بامية وآيس كريم

رحت أسحب فلوس المعاش،، الناس أمم،، طلعت أول الصف علشان أشوف المكن شغال ولا لأ؟؟ لقيت أم مجدي قاعدة ع الرصيف جنب الباشمهندس،، عملت نفسي ما شفتهمش. عرفت من شعبان بتاع الأمن أن السيستم واقع، فرجعت آخر الصف وقعدت ع الرصيف المقابل جنب عربية،، سمعت واحد بيتكلم عن مكتب كمبيوتر في شارع السوق بيقبض المعاشات من جهاز عنده بصورة البطاقة،، خدت بعضي وقلت أروح له،، في السكة،، اشتريت ربع كيلو بامية صابحة وصغيرة وبتشوك،، وخمس أرغفة عيش كبير ملدن،، دخلت المحل،، لقيت شاب صغير طلب مني الفيزا وصورة بطاقة،، كان معايا صورة بطاقة قديمة ومهربدة في المحفظة،، مش فاكر كنت مصورها علشان إيه؟؟ تقريبا علشان تجديد بطاقة التموين،، اتحرجت اديها له؛ فقمت مطلع البطاقة وقلت له يصورها،، حط الفيزا في جهاز قدامه وسألني ع الباسوورد،، وصَور البطاقة على ماكينة جنبه،، ورمى الصورة ع الأرض وقال لي من غير ما يبص لي: عشرة جنيه. ولسه هازعق راح مكمل: وميت جنيه خدمة سحب المعاش يبقى كله ميه وعشرة،، وقبل ما أنطق كان خد حسابه من فلوس المعاش اللي سحبها وناولني الباقي ووصل صغير وراح قايل: اللي بعده. قام الراجل اللي ما أعرفش جه ورايا إمتى زاققني وخد مكاني. حطيت الفلوس والفيزا والوصل المكتوب بالانجليزي بخط صغير في جيبي،، وقفلت بـُقي ومشيت وأنا باسب وبالعن في الراجل اللي دلني ع المكتب ده،، أكيد شغال تبعه وبيدي له نسبة. شوية نصابين ولاد كلب.

طلعت الموبايل علشان أتصل بأم العيال أشوفها عايزه إيه من السوق،، لقيت اللغة إنجليزي،، أكيد حد من ولاد العيال لعب فيه،، خليت جدع ابن حلال يقلبهولي عربي،، حاولت أكلمها كذا مرة وأنا ماشي،، ما ردتش،، سمعت واحد كان ماشي جنبي بيقول لمراته: بس ساندوتش جامد،، لكنها ما ردتش عليه،، بص لي واتحرج وبعدين كمل: لعلمك فيه مطاعم تانية بتبيع نفس الساندوتش ده بألف ونص بس مش مليان زي ده،، بنته الصغيرة قالت له: بابا أنا عايزه آيس كريم من عند فلان (محل اسمه بالأجنبي ما عرفتش أسمعه كويس)،، ابتسمت له وأنا باحط الموبايل في جيبي،، لكنه بص لي بقرف كده وشد مراته والعيال من إيدهم وعدوا الناحية التانية،، يا سلام؟؟ كل ده علشان ما أسمعش؟؟ هو أنا يعني هاروح آكل معاكم؟؟ أما عيل خايب صحيح!!

أم العيال اتصلت،، ما سمعتش الموبايل علشان كانت عاملاه صامت .. صامت؟؟ وأنا عمال أرن أرن أرن؟؟ يعني افرضي الواحد مات ولا جراله مصيبة في الشارع أجيبك إزاي؟؟ .. كنت نايمة وما أعرفش أنك نزلت!! .. كمان نايمة؟؟ طب اقفلي يا اختي وخشي كملي نوم. قفلت السكة بعد ما لقيت الناس عمالين يبحلقوا فيا. نايمة!! ولا في دماغها معاش،، ولا دريانة بالحمار اللي نزل من النجمة وشايل على قلبه!! وهي تعرف ليه صحيح؟؟ ما هي لو بتتبهدل في طوابير كانت عرفت،، فالحة بس تحرق دم الواحد وتخلي الناس في الشارع تتفرج على فضايحنا.

رحت لعيد بتاع الفول .. بخمسين جنيه فول يا عيد .. بص لي جامد قوي كده زي عوايده بعينيه اللي عاوزه قلعها وسابني ومشي من غير ما يرد عليا .. افتكرت أن الولية كانت مدمسة فول امبارح،، قلت في سري: أحسن وفرت،، لفيت علشان أمشي،، ريحة الطعمية السخنة المفحفحة اللي كانت بتتقلي دخلت في نخاشيشي،، فقلت أشتري طعمية أصالح بيها الولية .. عيل صغير كان واقف جنبي قدام الطاسة وقف يتفرج عليا وأنا باطلع شنطة الفلوس البلاستيك الصفرا من جيبي،، طلعت ملبساية من الكيس واديتهاله،، قلت للواد الطعمجي: هات بستين جنيه طعمية،، ما سمعنيش،، لسه هاكرر الجملة،، لقيت عيد خرج وقام زاغر لي جامد قوي،، سكت ودورت وشي،، شفت صينية بتنجان مخلل في الركن،، بتنجان رومي مش عروس،، متقطع شرايح رفيعة ومقلي،، ومرشوش عليه تتبيلة،، كويس أن لسه فيه حد بيقلي البتنجان حتى لو رومي مش عروس لأن الكل دلوقت بيستسهل ويسلقه علشان يوفر في الزيت،، قلت للواد الطعمجي: زود كمان بعشرة جنيه بتنجان مخلل،، الواد سابني وراح يتكلم مع عيد!! إيه قلة الذوق دي؟؟ داهية فيك أنت واللي مشغلك.

وقفت مش عارف اشتري البتنجان ولا كفاية الطعمية؟؟ .. الواد الطعمجي طلع الطعمية،، وخد مني الفلوس فجأة،، اتخضيت،، سألني عاوز بكام قلت له بستين جنيه،، حط لي طعميتين سخنين في القرطاس،، كانت خضرا وسخنة وتفتح النفس،، وبعدين قام حاطط لي أربعة باردين من الطعمية اللي كانت طالعة قبل كده،، كنت عايز أزعق له بس اتكتمت مش عارف ليه؟؟ .. سألني: حاجة تاني؟؟ .. قلت له: لأ،، وبعدين افتكرت أني حاسبت ع البتنجان فقلت له عليه،، الواد فضل ساكت شوية كده وبعدين قال لي: أصل بعشرة جنيه قليل قوي يا حاج .. اتحرجت وقلت له: أنا ما أعرفش يا ابني أقل حاجة بكام،، وبعدين لقيت واحد دخل في الحوار فجأة وهو بيزغدني بدراعه وبيزيحني من مكاني: هو كده لازم يعمل غاغة في كل مكان يروحه ها ها ها .. بابص لقيته الباشمهندس!! وسابني من غير حتى ما يلتفت لي ودخل المحل،، وعيد قام سايب كل اللي في إيده وقعد يهزر ويضحك معاه!! ياللا ما هي الطيور على أشكالها تقع. بصيت بره المحل لقيت أم مجدي واقفة على جنب،، رحت صبحت عليها،، قالت لي وهي بتبتسم: السيستم اشتغل وقبضنا،، وشدتني من دراعي كده علشان تبعدني عن مدخل المحل والحرارة والهبو اللي طالعين من الطاسة وكملت بصوت واطي اضطرني أوطي وأقرب منها علشان أسمعه: قعدت أبص عليك يمين شمال ما لقيتكش،، رحت فين يا راجل أنت؟؟ .. قلت أجيب فطار ونفطر سوا .. يا أخويا تسلم وتعيش -- وراحت مطبطبة على دراعي الشمال -- لزومه إيه بس تكلف نفسك كل مرة؟؟ .. ده كلام برضه؟؟ إوعي تقولي كده تاني أحسن أزعل منك والله .. زعل إيه بعد الشر؟؟ وأنا أقدر؟؟ .. تعيشي .. ما تيجي تفطر معانا ع الكورنيش؟؟ .. كورنيش إيه؟؟ وبعدين ياخد لطشة برد يموت مننا،، هاهاها .. بصيت للباشمهندس وكان هاين عليا أرميه بالطعمية في خلقته،، لكنه كمل بسرعة: روح الحق الطابور أحسن المكن زحمة قوي .. يا سيدي إن ما كانش النهاردة يبقى بكرة .. أقول لك؟؟ فيه مكتب كمبيوتر في شارع السوق عنده جهاز يصرف لك المعاش وأنت واقف بصورة البطاقة .. أه أه،، سمعت عنه .. شدني من ودني فجأة وراح قايل لأم مجدي: الحقي ده لسه بيسمع؟؟ طب كويس والله أن لسه فيك حاجة سليمة ها ها ها. لولاش بس أم مجدي شدته من قدامي كنت فرجته مقامه.

أكيد ده ذنب أم العيال علشان زعلتها وقفلت السكة في وشها. فقت على صوت حد بينده بصوت عالي: يا حاج يا حاج،، بصيت ورايا لقيت الواد الطعمجي عند المحل وفي إيده كيس بلاستيك صغير،، رجعت له،، خدني جنب المحل وقال لي: البتنجان يا حاج .. شكرا يا ابني .. مش أنت كنت دافع مية؟؟ بستين طعمية ودول بأربعين يبقى كده تمام .. بصيت ع الكيس لقيت فيه شريحتين بتنجان بالعدد!! لسه هافتح بـُقي،، مشي وسابني. لما دخلت الحوش افتكرت الطعمية الباردة اللي استغفلني وحطهالي،، رحت سايب قرطاس الطعمية ع الأرض وطلعت.

ع الفطار،، الولية سألتني السؤال المقرر بتاع كل يوم: هتاكل إيه النهاردة؟؟ .. اعملي لنا البامية .. حاضر من عيني هالبس وانزل السوق أجيب لك بامية .. وفجأة افتكرت كيس البامية والعيش اللي نسيتهم!! قمت بسرعة ودخلت بصيت على كيس الفلوس في البنطلون ليكون وقع راخر،، لكن الحمد لله لقيته. الله؟؟ طب البامية والعيش نسيتهم فين؟؟ في محل الكومبيوتر وأنا باسحب المعاش؟؟ ولا في الشارع لما وقفت أرد على الموبايل؟؟ ولا في المطعم عند عيد؟؟ حاجة تجنن!! .. خرجت من الأوضة بعد ما غيرت هدومي تاني وقلت للولية: عايزه حاجة أجيبها لك من تحت؟؟ .. الله؟؟ أنت نازل تاني؟؟ .. أه خشي كملي نوم أنتي أصلك ما نمتيش كويس .. نوم إيه؟؟ ما قلتلك هالبس وأنزل .. ما أنا خلاص لبست أهه ولا أنتي غاوية مناهدة؟؟ .. أنت رايح في حتة؟؟ .. لا أبدا بس سمعت أن فيه محل آيس كريم فتح ع الكورنيش،، قلت أجيب منه للعيال علشان لو جم يلاقوا حاجة حلوة .. تروح لحد الكورنيـــــش علشان تجيب آيس كريم؟؟ ده يكون ساح وناح،، اقعد ارتاح،، ولا هي مشورة وخلاص؟؟ أنا هابقى أجيب لهم الكوبايات الصغيرة دي من البقال وأنا طالعة .. لا لا بقال إيه وكوبايات إيه؟؟ دي كلها مواد حافظة وتلاقيها مركونة عنده م الصيف اللي فات .. أنت قبضت المعاش؟؟