بوك ستوري





الكتاب ده عندي في المكتبة بقاله زمن .. قول عشرة خمستاشر سنة .. يمكن أكتر .. مش فاكر .. ما قريتوش .. واحتمال كبير برضه ما أقراهوش .. رغم أني ساعة ما اشتريته كنت فرحان بيه قوي لأني كنت قريت (قبل كده في الجرنان) جزء من قصيدة فيه وعجبتني جداً .. بس لما روحت البيت وفتحت الكتاب، لقيت الإهداء ده:





 قعدت أقلب في الكتاب صفحة ورا صفحة، وأختلس النظر للمقتطفات المتعلم عليها .. زي واحد واقف ورا شجرة بيتلصص على اتنين عشاق في جنينة .. كنت مكسوف، بس في نفس الوقت كنت مستمتع بتطور القصة مع كل علامة جديدة .. ما أعرفش هل F و U دول شخصين؟؟ .. ولا F كانت تقصد بحرف الـ U كلمة "أنت"؟؟ اللي هو صاحب الإهداء؟؟ .. ما أعرفش هل كان الكتاب هو البوسطجي اللي رايح جاي ما بينهما؟؟ ولا F قريته وعلمت على المقتطفات دي لوحدها بعد كده؟؟ وهل القصيدة العفوية الجميلة اللي كتبتها بطة (F) آخر الكتاب ((بعد 8 شهور من تاريخ الإهداء المكتوب في أول الكتاب)) قراها صاحب الكتاب / الإهداء؟؟ ولا دي كتبتها بطة لتخليد ذكرى جميلة؟؟ هل يا ترى U اشترى الشقة وارتبطوا؟؟ طب لو ارتبطوا يبقى مين باع الكتاب؟؟ وهل باعه علشان ما يغرقش في الذاكرة؟؟ و.......































فيه تخمينات كتيرة ممكن تتقال هاسيبها لأصحاب الخيال .. لكن في الواقع، أتمنى صدفة سعيدة تخلي واحد فيهم يقرأ البوست ده ويبتسم، زي ما أنا بالظبط بابتسم في كل مرة بافتح فيها الكتاب ده :)

ختاماً:

"إلى بطة و U ...

سواء كنتما شخصاً واحداً أو شخصين ...

سواء ارتبطتما أم لا ...

لكما مني كل المحبة والسلام"

أخوكم/ شريف حسن "صاحب الكتاب الحالي". القاهرة 8/4/2016

* ملحوظة: ما تخافوش يا جماعة سركم في بير

:D