فتفوتة سكر

مرة كان فيه بنت بتحب ولد جارها قوي قوي .. كانت بتقف تنشر الغسيل كل يوم الصبح مخصوص علشان تشوفه وهو بيشرب الشاي في البلكونة على أمل أنه يشاور لها أو حتى يبص لها .. لكن الولد كان بيقعد يشرب الشاي وياكل مكعبات السكر من سكات من غير ما يبص يمين أو شمال .. لدرجة أن البنت اتمنت أنها تبقى مكعب سكر ليوم واحد بس علشان الولد يلمسها بإيديه ويقربها من شفايفه ويحس حلاوتها بتسري في روحه ودمه .. وفي يوم، البنت صحيت من النوم لقت السرير كبير قوي عليها، واكتشفت أن أمنيتها اتحققت واتحولت لمكعب سكر أبيض جميل .. البنت طارت من الفرحة وقررت تجري بسرعة تروح للولد في البلكونة.

لما نطت من ع السرير، كان اتكسر ربعها واتفتفت ع السجادة والنمل بدأ يتلم عليه .. قالت مش مهم، المهم ألحق الولد قبل ما يخرج من البلكونة .. فضلت تتدحرج لحد ما وصلت للسلم اللي صدها وقال لها: مش هتنزلي عليا إلا أما تدوقيني حتة منك .. بصت له كده في عناد وقالت له وهي بتجري: ده بُعدك!! .. نزلت ع السلالم جري، لكن كل سلمة كانت بتتدحرج عليها، كانت بتاخد منها حتة قبل ما توصلها للسلمة اللي بعدها .. لما وصلت للشارع أخيراً، كانت بقت النص بالظبط .. قالت مش مهم، المهم ألحق الولد قبل ما يخرج من البلكونة .. بصت حواليها يمين وشمال ما لقيتش عربيات فنزلت من ع الرصيف بسرعة وجريت علشان تعدي الشارع .. لكن الشارع كان مرشوش مية .. المية فضلت تنهش فيها وتدوب منها فتافيت فتافيت وتبلعها بسرعة كبيرة مخيفة، لكن هي فضلت تقاوم لحد ما وصلت بيت الولد بآخر ربع فيها .. قالت مش مهم، المهم ألحق الولد قبل ما يخرج من البلكونة .. عقبال ما طلعت السلم ودخلت من تحت باب الشقة ووصلت للبلكونة وطلعت ترابيزة الشاي ووصلت للسكرية كانت بقت مجرد فتفوتة سكر صغيرة قوي قوي.

الولد خلص كل المكعبات وما فضلش غيرها في قعر السكرية .. قلبها دق بسرعة قوي لما شافت صوابعه بتقرب منها .. غمضت عينيها وابتسمت لأن اللحظة اللي بتحلم بيها جت أخيراً .. الولد بص كده في السكرية لقى فتفوتة سكر منظرها مش نضيف، قام قايل: إيه القرف ده؟؟ وقام مطلع السكرية بره سور البلكونة ونفخ فيها جامد قوي، طير فتفوتة السكر في الهوا!!

وهي طايرة في الهوا .. قدام عينيه بالظبط .. ما شافهاش!! .. لأنه كان بيبص هناك على بلكونتها وبيقول: هي ما طلعتش النهاردة ليه؟؟