يا عواجيز



أقول لك حاجة تصدمك ؟؟
مواليد سنة 2000 (هاكتبهالك تاني بالحروف علشان تقراها كويس وتستوعبها) سنــة ألفـيــن !!
النهاردة بقى عندهم أربعتاشـــر سنة !!
أه والمصحف الشريف  !!
يعني كلها سنة ولا حاجة ويطلعوا بطاقة !! وسنة بعدها ويدخلوا الجامعة !!
سنة ألفين اللي احنا فاكرينها إمبارح دي أو بالكتير قوي من أربع سنين !! وبنغلط لما نيجي نحسب السنين بسببها !! معايا أنتوا ؟؟  النهاردة بقى عندهم أربعـتاشـر سنة وقربوا يخشوا ع الخمستاشـر!!
فعادي جداً أنك تلاقي واحدة حيطة طول بعرض وهرموناتها بتبظ من كل حتة وتقول لك أنا مواليد سنة 2000 وأنت أصلاً فاكرها (بالنظر للحجم) من سنك أو أكبر منك وممكن كنت تتسرع وتقول لها يا مدام !!
مش عاوزك تتقهر ساعتها وتصعب عليك/ي نفسك وتفتكر أنك كبرت وعجزت  !!
لأ ؛ إطلاقاً .. أنا عاوزك تكبر مخك وتخليك عاقل وناضج وتعتبرها زي بنتك يا أخي !! (بس من غير ما تحتويها) لأنك فعلياً إذا كنت اتجوزت أول ما اتخرجت كان زمانك خلفت بنت قدها  !!
* بالمناسبة .. احنا داخلين على سنة 2015 (مش هاكتبهالك بالحروف لأني واثق أنك قريتها كويس)
* بالمناسبة برضه : البوست ده مش كئيب ولا سوداوي زي ما مواليد السبعينات (اللي أنا منهم) ممكن يكونوا فاكرين (لأن معظمنا بطل يعد من زمان !! احنا نسينا الأرقام أصلاً) لأ !!
البوست ده علشان أنبه مواليد التسعينات (اللي لسه شايفين نفسهم عيال) وأقول لهم : نص العشرينات قرب يخلص أهه !!
يا عواجيز !! يا عواجيز !! يا عواجيز !!  يا عواجيز !! يا عواجيز !!
الحق نفسك بقى يا عمو ويا طنط منك ليها !!
أما بالنسبة لنا احنا بقى ...
فـ لسه قدامنا (إن شاء الله) بتاع ست سبع تمن سنين ع الأقل على ما يتقال علينا جدو وتيتة :)
الدور والباقي عليكوا أنتوا !! وبعدين أنتوا مالكوا بينا أصلاً ؟؟ ولا تحبوا نستناكم ؟؟ D:
يا عواجيز !! يا عواجيز !! يا عواجيز !!  يا عواجيز !! يا عواجيز !!

تعليقات

  1. Gamal Abu El-ezz13‏/10‏/2014، 12:02:00 م

    حبيبى يا باشا مجبتش سيرة الشباب للأبد جيل التمنينات فى البوست
    وبعدين متتقهرش أوى الناس زمان الى كان بيوصل ثلاثين سنه كان بيخزى يجرى فى الشارع يقولك خلاص وصلت لسن الوقار دلوقتى بتلاقى الواحد ستين سنة وبيلعب تنس وبيجرى ومتدلوش سنة يعنى احنا بالنسبه ليهم اطفال
    الشباب فى القلب مش فى الوش والهيئة
    وكل جيل له رساله وبيأديها

    بس فعلا مأخدتش بالى ان جيل 2000 بقى عنده 15 سنة لأنى سنة 2000 لما هلت اعتبرت ان كل الأجيال الى بعدها سيظلوا اطفال للأبد احنا 1900 وحاجات جمبها هما 2000 حتى البطاقه إحنا أولنا 2 من الشمال هما 3
    وبعدين جيلكم لسه شباب
    ربنا يديك الصحة والعمر الطويل :)

    ردحذف
  2. P A S H A13‏/10‏/2014، 12:32:00 م

    Gamal Abu El-ezz
    :))
    صباح الفل عليك يا كبير ؛ أولعلك في البوست لو مضايقك والله :)

    لأ أصل فيه كام موقف كده حصلوا معايا الفترة اللي فاتت خللوني تنحت !!
    منهم مثلا :

    الكوافيرهيرجي اللي بيقص شعر سموي (أو اللي باقي منه يعني إن شئت الدقة) المرة اللي فاتت كان عمال يلف ويدور ويتمحلس وأنا أصلاً باتخنق من برود الحلاقين ؛ المهم كان عاوزني أروح معاه زيارة عند جيراننا في بيتنا القديم علشان عاوز يخطب بنتهم !!
    جارتنا دي (اللي هي أم العروسة وتبقى بنت صاحب البيت الله يرحمه) من سني وكانت معايا في الجامعة في سنة أولى بس اتجوزت وقعدت في البيت !! يعني قول خلفت سنة 98/97 يعني بنتها دلوقتي ما شاء الله تعمل لها ستاشر سبعتاشر سنة !!
    أنا آخر حاجة كنت فاكرها إن البنت اللي عاوز يخطبها دي عندها بتاع أربع خمس ست سنين بالكتير !!
    لأ والظريف بقى أن الكوافيرهيرجي (عنده 27 سنة بالمناسبة وما شاء الله يفصل مني اتنين ) كل شوية يثبتني ويقول لي : احنا مالناش غيرك يا عم شريف ؛ أنت حبيبي يا عم شريف !!
    لما خلاني قلت له في الآخر : عمك دبب يا أخي !! ساعتين بتقص في كام شعراية لحد ما فروة راسي اتسلخت وجلد قفايا وقع !! يا بارد يا ابن الكلب !!
    (أنا قلت فرصة بقى ههههههههه)
    فتقدر تقول كده أن البوست ده من أثر الحلاقة (حلاقة الزمن أقصد)
    :))
    ربنا يعزك ويبارك فيك وفي عمرك ويرزقك الزوجة الصالحة إن شاء الله
    :))
    نورتنا يا زعيم

    ردحذف
  3. Gamal Abu El-ezz13‏/10‏/2014، 2:50:00 م

    يا باشا الزمن بينحت فى الإنسان زى الميه الى بتنحت الحجر بس بيطلع لوحه جميله فى النهايه تجمع الخبره والجمال زى حضرتك

    انا يعتبر من مواليد النص التانى فى التمنينات ولظروف ما بعض دفعتى اتجوزوا صغار جدا فولادهم تقريبا فى عمر العروسه بس رغم كده مش حاسس ان كل دفعتى كبرت والحمد لله ربنا مبارك لنا فى العزوبيه على الأخر هههههه

    دا غير ان غالبا البنات بيتجوزوا بدرى فى حين ممكن تلاقى ناس زمايلك ولسه متجوزوش من السبعينات فخليك مع الناس الطيبه دى علشان متحسش بالزمن والوقت علشان تفضل شباب ديما :)

    ردحذف
  4. رحاب صالح13‏/10‏/2014، 6:50:00 م

    البوست ده فكرني بحاجة واحدة بس
    ان مواليد 98 ف المدرسة الي بشتغل فيها ومواليد 2000 بيحسبوني اني أكبر منهم بسنتين والا حاجة
    نظرا لأني قصيرة ورفيعة وعاملة زي العيال وهما حيطة صد رد يعملوا مني بتاع اربع خمس نسخ
    ممكن حسيت بوقت ما اني هجوزة لما لقيت ابن واحدة اكبر مني بسنتين عندي في المدرسة وبدرسله وبقوله اخر كل يوم سلملي علي ماما كتير
    بس الموضوع بالنسبة لي مش موضوع سن اد ما هو موضوع ثقافة هما اخدوا حقهم اكتر منننا مليون مرة مش مرة بس واللي انا عرفته في سن العشرين هما عرفوه ف سن عشرة وأقل بس كدة
    بوست ممتع كالعادة ويدعو للتتفكير

    ردحذف
  5. موناليزا13‏/10‏/2014، 7:48:00 م

    :)
    أحسن
    فرحتني جدا في بتوع جيل التسعينات
    بس سيبك أنت احنا جيل الذكريات
    هما ياعيني معندهمش ذكريات
    جيل التمانينات تحديدا ده كان جيل عز والله
    أحداث كتير مرت في حياته وتغيرات في المجتمع محدش ممكن يفهمها غيره هو وبتوع السبعينات
    اعلانات زمان وأدوات المدرسة والكرتون وإيفيهات العيال كبرت ومدرسة المشاغبين كل دول بالنسبة لنا كنز وتراث
    هما ياعيني ملهمش ولو كان عندهم فدي مجرد فتافيت وبقايا جيلنا ليهم مش أكتر

    المستفز في بتوع التسعينات بالنسبة لي أنهم بيتعاملوا معايا كأني قدهم أو أصغر منهم
    وأنا من جوايا بتعامل معاهم كأنهم قد عيالي فعلا :)

    وبيني وبين نفسي بقول يابني لو كنت اتجوزت بدري كنت خلقت قدك ^_^

    ردحذف
  6. reemaas13‏/10‏/2014، 11:02:00 م

    هههههههههههههههههههههههههههههههه
    طيب احب اقولك انا تمنينات ومع ذلك ولا اى اندهاش انا كل اللى حاسيت بيه انى فرحانة فى التسعينات اصلى ماعرفش حد 2000 هههههههه

    ردحذف
  7. جيلان حمزة14‏/10‏/2014، 7:32:00 ص

    سلام عليكم
    والله يا استاذ شريف الموقف ده تحديدا حصل معايا آخر مرة ركبت طيارة .. لقيت الست اللي جنبي و((واللي بعد كده اكتشفت انها بنوتة)) بتسألني هو فاضل وقت اد ايه يا طنط ... الحقيقة كانت صدمة .. فقلت يمكن البنت عندها مشكلة هرمونية مثلا و عمرها عشر سنين ... فأختلقت فرصه و سألتها انتي في سنة كام يا حبيبتي ..طلعت البنت في ثانوية عامة ..بعد شوية دهشة و حبة استغراب فكرت و فكرت .. لقيت انها ممكن جدا تقولي يا طنط ..من غير متحس بكمية عقدة الذنب اللي كنت بتمنا انها تحس بيها ...مهي تطلع مواليد 1997 مثلا و انا وبلا فخر كده اكبر منها بييجي 18 سنة ...
    عواجيز فعلا والله..
    اسفه للاطالة .. بس انت جيت على الجرح يا استاذ شريف
    تحياتي☺

    ردحذف
  8. شمس النهار16‏/10‏/2014، 10:13:00 ص

    الحمد لله انا تيته رسمي نظمي فهمي
    :)
    يعني عجوزة عجوزة :)

    ردحذف
  9. P A S H A17‏/10‏/2014، 5:43:00 ص

    Gamal Abu El-ezz
    :)
    صباح الفل عليك يا أستاذنا ؛ يا رب تكون بخير إن شاء الله وفي أحسن حال
    :)
    يا كبير احنا مش قد الكلام الحلو ده كله ربنا يكرمك يا رب ويعزك ويسعدك ويفرح قلبك ويبارك في عمرك
    :)
    شوف سموك ؛ عن نفسي ما باحبش أربط موضوع السن بالجواز لأن في الأول والآخر دي حاجة بتاعة ربنا ونصيب ما حدش عارف هييجي إمتى وإزاي وهيصيب ولا هيخيب .. يمكن المثل اللي ذكرته لحضرتك فوق ؛؛ علشان أقول إن الواحد
    ساعات كده بيلاقي حاجة خبطته فوق دماغه نبهته وصدمته !! .. يعني أنا عارف إن جارتي دي من سني وعارف أنها متجوزة من أولى جامعة وكنت باشوف بنتها وهي صغيرة عندها تلات سنين وبتلعب في الحوش ؛؛ بس كونك تغيب شوية أو تتلهي في الدنيا وهب تلاقيها فجأة بقت عروسة وأنت فاكرها بالكتير عندها أربع خمس ست سنين !! فبتحس بصدمة !!
    بتقول ساعتها إيه ده ؟؟ هو أنا كنت فين يا جدعان ؟؟
    رغم أنك كبرت واتخرجت واشتغلت واتجوزت وخلفت .. بس زي ما تقول الواحد ما بيحسش بالزمن اللي هو عايش فيه غير لما بتيجي حاجة من بره تنبهه !!
    وبعدين يا معلم عيش براحة راحتك ع الآخر وخد حقك تالت ومتلت من الدنيا واعمل كل اللي نفسك فيه ؛؛ مش لأنك مش هتعرف تعملها بعد كده بس أنت هنفسك هتكون غير !!
    يعني اللي تعرف تعمله في العشرينات هيبقى صعب عليك شوية أنك تعمله في الأربعينات .
    :)
    ربنا يبارك في عمرك ويجعل أيامك كلها فرحة وسعادة وخير
    :)
    نورتنا

    ردحذف
  10. P A S H A17‏/10‏/2014، 6:15:00 ص

    رحاب صالح
    :)
    رحاب أنت حطيتي صباعك على حاجة أنا حاسسها جداً ودايماً باتكلم فيها أنا وصحابي ؛ اللي هو الجزء بتاع الثقافة والمعرفة بصفة عامة !!
    الكمبيوتر على سبيل المثال .. الوقت اللي بدأ ينتشر فيه كنت أنا في الجامعة .. يعني في نفس الوقت اللي بدأت اتعلمه فيه ؛ كان فيه طفل عنده سبع تمن سنين بيعرف يعمل اللي أنا باعمله عليه ويمكن كمان تلاقيه عارف أكتر مني !! أصبح هنا فيه فجوة حوالي 12-13 سنة !! ولما اتخرجت كان الواحد بدأ بقى يصارع الحياة علشان يكون نفسه ودخلنا الدايرة اللي أنتي عارفاها ؛ فالكمبيوتر كان بالنسبة لمعظمنا وسيلة ترفيه ليس إلا !! نشغل عليه أغاني ونلعب عليه جيمز ونتفرج على أفلام !! ويوم ما واحد فينا سطب ويندوز ما كانش حد عارف يكلمه !!
    حتى النت لما دخل .. الإنبهار والصدمة الحضارية والثقافية والمعرفية اللي حصلت لمعظمنا بسبب الانفتاح المفاجيء على العالم ما كانتش في الغالب في صالحنا لأن معظمنا أحبط زيادة وبدأ يفكر في إستغلال الموضوع إستغلال سيء للأسف .. يعني تخيلي شاب عنده 23 سنة مثلاً ويكتشف أن كل السنين اللي قضاهها في المدارس دي ما أتعلمش فيها حاجة (بالذات اللغات) وييجي يعمل شات مع شاب أو بنت في نفس سنة من دولة تانية يلاقيه لف العالم وبيعرف أكتر من لغة وعنده خبرات مش عند أبوه شخصياً !!
    ممممممممم .. يمكن اللي نفعنا بجد وقتها وقلل من الصدمة شوية ؛ القراءة .. خلت الواحد عنده حد أدنى من الفكر لإستيعاب الإختلاف (مش باقول تقبل) بيننا !!


    بس برضه .. احنا الحمد لله قوي عايشين أهه ميت فل وأربعتاشر
    :)

    الخلاصة .. ومش بانصح حد لأن معظمنا ما بيقبلش النصيحة أصلاً .. بس النهاردة الفرصة أحسن من بكرة .. النهاردة أنت لسه قادر (بغض النظر عن سنك إن شالله يا رب تكون 100 سنة) تعيش .. يبقى عيـــش :)
    ما تخليش حد يحبطك أو ييأسك ويكسر مقاديفك ؛ أنت مش هتعيش غير مرة واحدة بس .
    :)
    نورتينا يا رحاب

    ردحذف
  11. P A S H A17‏/10‏/2014، 4:26:00 م

    موناليزا
    :))
    والله يا أستاذة بالنسبة لجزئية : "جيل التمانينات تحديداً ده كان جيل عز والله" ؛؛ مممممم يمكن اللي في بالي حالياً إننا لحقنا شوية من بواقي الحاجات الجميلة اللي سابوهالنا اللي قبل اللي قبل اللي قبلنا ؛؛ يعني شوية قيم / أصالة / ذوق / معمار .. السؤال هنا : طب احنا هانسيب إيه للي بعدنا ؟؟
    مش عارف !!
    "وأنا من جوايا بتعامل معاهم كأنهم قد عيالي فعلاً .. وبيني وبين نفسي بقول يا ابني لو كنت اتجوزت بدري كنت خلقت قدك !" .. باعتقد أن إحساسنا بإننا كبرنا هو اللي كبـّرنا فعلاً !!
    :)
    نورتينا يا أستاذة

    ردحذف
  12. P A S H A17‏/10‏/2014، 4:27:00 م


    reemaas
    :)
    والله يا دكتورة أهم حاجة الروح الحلوة والرضا
    :)
    يعني تخيلي حضرتك مجرد أن الواحد يقرا بس "هههههههههههههههههه" في تعليق
    أكيد هيبتسم ويدعي لصاحب التعليق بكل الخير والفرحة والسعادة
    :))
    نورتينا يا أستاذة

    ردحذف
  13. P A S H A17‏/10‏/2014، 4:38:00 م


    جيلان حمزة
    :))
    وعليكم السلام ورحمة الله وبركاته
    قالت لحضرتك يا طنط ؟؟
    يبقى احنا كده داخلين على مرحلة أننا نلاقي شاب في المترو أو الأتوبيس قام لنا وقال : تعالى اقعد يا حاج !! أو نكون ماشيين في الشارع وشايلين شنط فنلاقي واحد جي بيقول : عنك أنت يا حاج !!
    ههههههههههههههههههههه يا نهار أبيض يا جدعاااااان !!
    أحلى حاجة وصف حضرتك للموقف بصراحة !! "لقيت الست اللي جنبي" ههههههههه
    أنا لو مكان حضرتك كنت عملت زي عمر الشريف في فيلم إشاعة حب : بابا مين يا واد ؟؟ بابا أنت يا حبيبي !!
    وبعدين هي قالت لحضرتك ك أنها في ثانوية عامة ؛؛ يبقى المفروض كنتي رديتي عليها وأنتي مندهشة : إيه ده ؟؟ ثانوية عامة ؟؟ معقول ؟؟ على كده أنتي أكبر مني بسنة واحدة بس ؟؟
    كنتي خلتيها فتحت باب الطيارة ونطت منه طالما الكتكوتة مستعجلة
    :))
    نورتينا يا أستاذة

    ردحذف
  14. P A S H A17‏/10‏/2014، 4:43:00 م

    شمس النهار
    :))
    يا ألف أهلاً وسهلاً يا أستاذتنا منورة الدنيا كلها والله العظيم
    :))
    أيوة كده ارجعي نورينا تاني ونوري بلوجر بتعليقاتك الجميلة وبوستاتك الحلوة
    :))
    وبعدين مين لا سمح الله اللي يقدر يقول على حضرتك عجوزة ؟؟ هي كل ست توصل الخمسة وتلاتين أو حتى الستة وتلاتين تبقى عجزت ؟؟ فشر !!
    ده أنتوا الخير والبركة يا أستاذة
    :))
    ربنا يبارك لنا في عمرك يا أستاذتنا ويفرح قلبك بأولادك وأحفادك وتجوزي ولاد ولادهم
    :))
    نورتينا يا أستاذتنا

    ردحذف
  15. رحاب صالح17‏/10‏/2014، 9:51:00 م

    انا مش زعلانة من شيء الا بس موضوع الثقافة فعلا لاني كنت ومازلت فضولية للمعرفة
    والحمد لله ان القراءة فتحت لي ابواب كتير
    بس فعلا مشكلتي بتنحصر مع الاجيال الجديدة في الشكل الجسماني وزي ما قلت وانت عارفني حجم صغنتوت تلاقيني مش عارفة ابص لحد فيهم برغم انهم بيقولواعني ف المدرسة شخصية قوية وايام الامتحانات اللجنة الي براقب عليها بتكون مظبوطة جدا وبدون توتر اوقلق يعني بعرف اوازن بين الامور
    والله المستعان ويعيننا علي الاجيال دي

    ردحذف
  16. norahaty mo17‏/10‏/2014، 10:35:00 م

    الحمد لله
    المهم الصحـــة
    (هات يابنى دوا الرجلين اللى أدامك )

    ردحذف
  17. P A S H A18‏/10‏/2014، 7:33:00 ص

    رحاب صالح
    :))
    هي بيني وبينك مش مسألة حجم ؛ هي المعاملة معاهم صعبة وعاوزة حذر وبالذت سن المراهقة ده عاوز حد حكيم وصبور بدرجة كبيرة ؛ عن نفسي باخاف أتعامل معاهم بصراحة ؛ أو باتعامل في أضيق الحدود !!
    كان الله في عونك يا رحاب
    :))
    نورتينا

    ردحذف
  18. P A S H A18‏/10‏/2014، 7:37:00 ص

    norahaty mo
    :))
    الحمد لله على كل شيء
    (يا ابني هات دوا الرجلين اللي جنب دوا المرارة هاتلاقيه ورا دوا القولون على طول لأ لأ ده بتاع الزهايمر)
    :))
    نورتينا يا دكتورة

    ردحذف
  19. Mona el Dawakhly20‏/10‏/2014، 12:17:00 ص

    بقولها من زمان الكلمتين دول و الناس بتقولي اني سوداوية.. ليا صديق صغير شوية كان بيحتفل بعيد ميلاده ال 26 قريب.. كان بيقول انا لسه كنت 19 بقيت 26 امتى؟
    انا عجزت امتى؟
    بس جيلهم احسن مننا و الله ، اتعلموا بدري عنا حاجات كتير ، العالم فتح قصادهم بدري عننا، احنا فرصنا اقل منهم قوي، احنا مكنة خياطة يدوي قديمة جنبهم

    ردحذف
  20. P A S H A22‏/10‏/2014، 1:18:00 ص

    Mona el Dawakhly
    :))
    هستأذن حضرتك في رد طويل كنت كتبته وما نشرتوش ؛؛ أو يمكن نشرته وحذفته ؟؟ مش فاكر يصراحة .. هو مش رد على تعليق حضرتك !! بس زي ما تقولي حضرتك هما كلمتين محشورين في زوري .

    ردحذف
  21. P A S H A22‏/10‏/2014، 1:20:00 ص

    شاء ربنا إن الأربع سنين اللي فاتت تحصل فيها الأحداث الكتيرة اللي مرت علينا كلنا .. بس لو اتكلمنا بإنصاف شوية .. هنلاقي أن الشباب الصغير اللي هما ستاشر سنة فيما فوق .. الأربع سنين دول بالنسبة له رُبع أو خُمس عمر بالكتير !! .. أنتوا متخيلين يعني إيه ؟؟ شاب أو بنوتة في عمر الزهور يشوف كل ده قصاد عينيه في سنه ده ؟؟ .. يشوف زميله بيموت أو بيتصاب أو بيعتقل ؟؟ يعيش في رعب وذعر وسط تفجيرات ومظاهرات وتحرش وبلاوي سودا معظم جيلنا ما شافهاش أو بالكتير كان بيمر عليها بعينه لما بتيجي في نشرة الأخبار الساعة تسعة بالليل وغالباً ما كانش بيلتفت لها ؟؟
    الشاب أو البنوتة دي وارد جداً يكون ابن أو بنت حد فينا أو أخوه الصغير أو قريبه أو جاره .. احنا بالنسبة لهم (سواء بمزاجنا أو غصب عننا) سندهم .. الحضن اللي بيتحاموا فيه .. الأم أو الأخت اللي بتداوي وتطيب وتعالج كل التشوهات النفسية اللي صابتهم .. يمكن الحمل زاد علينا شويتين سواء بالنسبة للي لسه أصلاً ما شقش طريقه وما اشتغلش وما اتجوزش وفتح بيت وبقى مسئول عن أسرة وأطفال ونفسه يستقر ويعيش أو اللي مسئول بالفعل عن أسرة وأطفال و........
    لأن كل واحد فينا عاوز يعيش .. عاوز يحس بسلام وأمان وأمل .. عاوز يحقق أحلامه أو اللي باقي منها .. عاوز يتطمن على بكره علشان ولاده ومستقبلهم ..
    فكان قدرهم أنهم يشبوا ويطلعوا في الوقت ده ؛؛ وقدرنا أننا نحاوط عليهم وناخد الضرب بدالهم .. نديهم الأمل اللي احنا أصلاً مش شايفينه .. نطمنهم واحنا خايفين .. نبتسم في وشهم واحنا بنبكي من جوانا وبننزف !!
    هاتقولي واحنا ذنبنا إيه ؟؟
    طب وهما ذنبهم إيه ؟؟
    ع الأقل احنا عيشنا 33 سنة في استقرار (مثلاً يعني) ؛ هما لسه أصلاً ما لحقوش يعيشوا .. وبعدين خد بالك أنت لما بتساعدهم وبتدعمهم وبتساندهم النهارده ؛ مش لوجه الله ولا إنسانية ؛ لأ !! لأن دول هما سندنا بكره !!
    ساعات كتير باقول أن اللي حصل ده احنا مسئولين عنه بشكل أو بآخر .. لأن المفروض (أو كما ندعي) بأننا كبار وفاهمين وعارفين ومتعلمين .. فالمفروض أننا نوعي ونفهم .. إنما للأسف معظمنا ؛ ولا بلاش هاتكلم عن نفسي علشان ما حدش يتقمص .. كبر دماغه وبقى يبص للأمور من فوق ويتابع من بعيد وإياكش تولع !! .. وهي لما هتولع هتولع بينا كلنا !! .. أبسط حاجة : ابن الـ**** اللي بيتحرش ببنت وبتعمل نفسك ما شفتوش ؛ بكره هيتحرش بأهل بيتك !! .. سواق الميكروباص اللي بتسمح له يزود الأجرة على مزاجه ويعاملك كأنك شغال عنده ؛ بكره هيضربك ويسرقك عادي جداً .
    ولو هنرجع لتفكيرنا العقيم اللي ورثناه بأننا اتظلمنا وما عشناش زي الجيل اللي قبلنا و كل الهري ده وأن اللي قبلنا دول المفروض يتعدموا .. فهاقول لك ؛ يبقى الحل إننا نبص للي جي علشان ما يجوش بعد كده يلعنونا وفي أول فرصة تيجي لهم يقتلونا.
    طب واحنا ؟؟ خلاص كده كبرنا ؟؟ هنعيش إمتى ونحقق أحلامنا إمتى وووووو
    أولاً وأخيراً الحمد لله على كل شيء .. لكني باعتقد أن إحساسنا بإننا كبرنا هو اللي كبـّرنا !! .. هو اللي بيضطرنا أننا نعزز نفسنا ونعمل كبار على الأصغر مننا علشان مالحقناش القديم ومش عارفين نلاحق ع الجديد (رغم أننا عايشين فيه) .. و جايز كمان لأن كتير مننا ما حققش نفس اللي في سنه حققوه (سواء بسبب الظروف والمجتمع ووووو ..... إلخ أو غيرها من الأسباب) .. بس مين قال إن فيه كتالوج أو جدول أعمال زمني لازم نمشي عليه ولو ما مشيناش عليه نطلع بره الحياة ونخش خانة المعاشات ؟؟ . وهل مثلاً البنت اللي بتتجوز في سن أربعتاشر خلاص بقت ناضجة وكبيرة ؟؟ .. هل مثلاً لو فيه طفل عبقري اخترع حاجة وكان عنده سبع سنين ؛ مش هنقول عليه مخترع ومكتشف ومبدع وعبقري علشان لسه ما وصلش لـ سن معين ؟؟
    احنا ممكن نكون كبرنا سناً ؛ بس كام واحد فينا خد باله من ده ؟؟ كام واحد فينا نضج ؟؟ .. كام واحد فينا عرف ؟؟ وعمل إيه باللي عرفه ؟؟ .. كام واحد فينا حاسس بالرضا وسعيد ؟؟ .. كام واحد فينا بيحلم وبيعافر ولسه بيحاول وبيجرب وكام واحد استسلم ؟؟ .. كام واحد فينا عايش ؟؟ .. إلخ

    باعتقد أن رؤيتنا وإجاباتنا على الأسئلة دي كلها هي اللي ممكن تميزنا عن الأصغر والأكبر مننا !!


    وبالمناسبة ؛؛ الجيل الجديد برضه له ذكرياته بس على قد اللي شافوه وعاصروه ؛ يمكن بس أغلبهم مش مهتم بتأصيلها وتأريخها وتوثيقها في ذاكرته لأنهم لسه صغيرين فمساحة الذاكرة عندهم لسه براح .

    ردحذف
  22. Mona el Dawakhly29‏/10‏/2014، 7:49:00 م

    قلت جملة حلوة قوي، هو في كتالوج او جدول زمني نمشي عليه يعني؟
    لا مفيش.. نعيش بقى و نفوق بقى لنفسنا..و يا رب الزمن و الظروف تسمح و متعافرش معانا كفاية اللي فات.

    ردحذف
  23. P A S H A01‏/11‏/2014، 3:53:00 ص

    Mona el Dawakhly
    :))
    كله على الله يا باشمهندسة
    باحاول والله أقنع نفسي بكده :)
    :)
    نورتينا

    ردحذف

لا يسمح بالتعليقات الجديدة.