سيد شحته
البهبوه الكبير
- الفترة اللي فاتت كنا مشدودين ع الآخر في المصلحة اللي باشتغل فيها ؛ ما أعرفش مين الصرمة القديمة اللي فقع الإدارة اللي باشتغل فيها شكوى كيدية عند البهبوه الكبير (يجعل كلامنا خفيف عليه) قال فيها كلام كتير كدب وافترا في حقنا زي مثلاً إننا ما بنشتغلش وأن المواضيع بتتأخر عندنا بالشهرين تلاتة و............ إلخ وإشاعات كتيرة مغرضة في حق إدارتنا الموقرة ومديرتنا الست البطة السكرة .
طبعاً الست البطة أقصد المديرة أول ما استلمت الشكوى راحت عاملة اجتماع مع أعضاء الإدارة علشان نشوف هنعمل إيه في المصيبة دي !! .. طب أنا راضي ذمتك عزيزي القاريء خازوق وجايلك حاير طاير من حيث لا تدري ؛ تلبسه لا موأخذة ؟؟ ولا تحدفه على اللي بلاك بيه ؟؟ الله يفتح عليك !! حدفناه عليها !! قلنا لها : سيبك منهم يا زعيمة ؛ احنا ما بنتهددش لا موأخذة واللي ماسك علينا حاجة يطلعها ؛ احنا ناس شغلنا على مية بيضا ؛ الكلام ده حضرتك أنتي المقصودة بيه علشان البهبوه الكبير يشيلك من ع الكرسي !! .. طبعاً هي سمعت كلمة الكرسي وعاديك !! سخنت وهاجت وعملت كدهوه بإيديها على وسطها وقالت : وديني لأطلع أشبشب له المعفن ابن بياع زبل الحمام وأنكش شعري عليه !! بقى يشيلني أنا من ع الكرسي ؟؟ طب والنبي واللي نبى النبي لاسأسأ له المسقي ع الناشف !! .. حلو يا معلم ؟؟ .. لأ مش حلو !! .. لأنها طبعاً لا طلعت ولا نزلت !! كل اللي عملته أنها اتكلت على فلان علشان يكتب مذكرة بالرد وطبعاً فلان اتكل على علان اللي راح موصى ترتان والموضوع بقى في خبر كان والكل هدأ واستكان !!
أتاري البهبوه الكبير لما ما لقاش رد مننا لمدة أسبوعين ؛ افتكر أننا مش مستعبرينه راح رافع الشكوى في لحظة طيش للبشبوش العليوي قوي (طويل العمر يزهزه عمره ويطول شعره) وزود عليها كلمتين زي الزفت من عنده !! .. راح البشبوش العليوي قوي طلب أننا نروح له بكل شغل الإدارة آخر أربع شهور من السنة اللي فاتت في خلال أسبوع !!
قول حاحا !!
طبعاً هنا كان مات الكلام خلاص !!
---- فاصــــــل ---- يكفيني أقول لك عزيزي القاريء أن واحدة زميلتنا بمجرد ما سمعت بس أن فيه شكوى متقدمة ضدنا للبهبوه الكبير (مش البشبوش العليوي قوي) جالها إنهيار عصبي وقدمت أجازة سنة بدون مرتب !! .. سألتني سموك ليه ؟؟ .. بغض النظر عن اللي ممكن يعمله البشبوش العليوي قوي في الجعيص اللي فينا ؛ الفترة اللي طلب يفتش علينا ويشوف شغلنا فيها كانت فترة زي الخرة !! أولاً : معظم أصول مستندات شغل الإدارة في الفترة دي عند البهبوه الكبير لأن هو السلطة المختصة اللي بتعتمد شغلنا بعد ما بيخلص وبيروح له ؛ فتعالى بقى سعادتك اتشطر وهات تنتوفة ورقة من عنده بعد ما طنشته وما عبرتوش واشتكاك للبشبوش العليوي قوي !! ثانياً : باقي شغل الإدارة متسجل على كمبيوتر ؛ لأ جهازين كمبيوتر وأنت الصادق !! حلو ؟؟ .. لأ مش حلو !! ليه ؟؟ .. لأن الجهازين اتسرق منهم الهارد ديسكات في أول السنة دي وكل شغل الإدارة اللي خلصان ضاع يا ولدي !!
لك أن تتخيل بقى الإدارة كانت عاملة إزاي !! .. في مواعيد العمل الرسمية نجري هنا وهناك علشان نخلص الشغل اليومي وبعد مواعيد العمل نترزع علشان نعيد ونكتب ونألف في شغل قديم (أحياناً كنا بنقعد لحد الساعة 2 صباحاً) كنا مخلصينه أصلاً علشان بس البشبوش العليوي قوي يبص عليه ؛ وفي الآخر هيترمي في الزبالة !! .. مشكلتي في أني (المفروض) مكلف بالإشراف والمراجعة على شغل تلات أساتذة غير شغلي !! .. وطبعاً في الزنقة دي لا كنت فاضي أراجع ولا أتنيل !!
سيـــد شحته
المهم ؛؛ خلص الأسبوع المهلة ، خلصت شغلي وقلت أشوف شغل التلات أساتذة اللي المفروض باراجع لهم علشان أسلم الشغل كله للبشبوش العليوي قوي بنفسي .
أنا : ها يا أستاذة أماني كله تمام ؟؟
أماني : اتطمن حضرتك ، كله تمام التمام !!
أنا : راجعتي العقود والتحقيقات اللي عندك كويس واتأكدتي من تواريخ المحاضر والتوقيعات والمذكرات ؟؟
أماني : راجعتهم أربع مرات وحياة بوسي (القطة بتاعتها) !!
(أقلب في إحدى الملفات) : التحقيق ده بتاع مين ؟؟
أماني : ده بتاع سيد شحته غياب شهر 11
أنا : طيب !! وأنت يا أستاذ أحمد ؟؟
أحمد : حضرتك أنا خلصت عقدين وتحقيق لسيد شحته غياب شهر 12
أنا : إيه يا جدعان هو ما فيش في المصلحة كلها غير سيد شحته ولا إيه ؟؟ فين خيالكوا ؟؟ مش عارفين تألفوا أي تيت أم أسامي تانية ؟؟
أحمد : ما هو أصل ما فيش زبون غيره بيقرفنا كل شهر !!
أنا : وأنت يا هشام بيه ؟؟
هشام : برضه عقدين وتحقيق لسيد شحته في شهر 10 !!
أنا : أوووف !! طيب ؛ أهم حاجة زورتوا التوقيع كويس ؟؟
هشام : حضرتك لو سيد شحته بنفسه شاف التوقيعات اللي هنا هيقول لك بتاعتي !!
أنا : الأوراق كلها مختومة ؟؟
أماني : كلها مختومة وحياة بوسي !!
أطلع للمديرة فتسألني : ها يا شريف كله تمام ؟؟
أنا : اتطمني يا زعيمة !!
المديرة : راجعت شغل الأساتذة كويس ؟؟
أنا : بالورقة يا أستاذة !!
المديرة : خدت معاك كام موضوع ؟؟
أنا : أربع تحقيقات وعقدين غير اللي مراجعهم !!
المديرة : وريني كده !! (تقلب في إحدى الملفات) يادي سيد شحته !!
أنا : أصل ما فيش زبون غيره بيتحول لنا كل شهر ؛ وبعدين الأساتذة محققين معاه في شهر عشرة وحداشر واتناشر فأنا حققت معاه في شهر تسعة !!
المديرة : هو ظهر أخيراً ؟؟
أنا : لأ أقصد حققنا له D:
المديرة : مش مهم أهه كله هيترمي في الآخر !! هو أصلاً مش هيبص ع الكلام الفاضي ده هو عاوز يتأكد أن فيه شغل والسلام !! أهم حاجة راجعت التواريخ والأختام والتوقيعات كلها ؟؟
أنا : كلها زي الفل وحياة بوسي !!
البشبوش العليوي قوي
- رحت في الميعاد لمكتب سيادة معالي / البشبوش العليوي الكبير ؛ بعد طبعاً ما عديت على عشروميت مكتب وأمن وتفتيش .. سلمت الملفات للسكرتارية ولسه هاتدور وأمشي قالوا لي استنى ده عاوز يشوف حضرتك بنفسه !! في إيييييييه يا جدعاااااان ؟؟ احنا ما اتفقناش على كده ؟؟ طب أجيب حد يتضرب معايا طيب ؟؟
المهم ؛؛ عكس كل التوقعات ؛ الراجل بصراحة طلع في منتهى الذوق والأخلاق والتواضع والكرم .. قابلني بحرارة شديدة ورحب بيا جداً وطلب لي قهوة وقعدنا نرغي ونهزر بتاع ربع ساعة ؛ عرفته بالإدارة وبنظام الشغل عندنا وبأعضاء الإدارة وهو بصراحة كان بيسمعني بتركيز وطمنني أنه استحالة هيأذي حد ؛ هو بس حابب يتعرف علينا ؛ لكن رمى كلمة كده في وسط الكلام خلتني مش قادر أبلع ريقي !! قال وهو بيبص لي من تحت النضارة : إلا طبعاً لو حد مقصر أو مستهتر ده لازم يتعاقب ولا إيه ؟؟ .. مش عارف ليه يا أخي كان هاين عليا ساعتها أسحب الملفات من قدامه وأجري !! .. بيقول لك المستهتر يتعاقب أمال المزور هيعمل فيه إيه ؟؟ وبقيت قاعد على نار !! هل أقول له أن شغلنا الحقيقي اللي تعبنا وشقينا فيه عند البهبوه الكبير ومش عاوز يديهولنا علشان عاند مع المديرة ؟؟ ولا أسكت يمكن ما ياخدش باله ؟؟ طب لو اكتشف اللي احنا عاملينه هاقول له إيه ساعتها ؟؟ .. وبقت دماغي تودي وتجيب في مليون إتجاه !! .. كل ده وأنا مش واخد بالي أن سعادته بدأ يفرز الملفات ويقراها !!
كل اللي فاكرة ساعتها أني بقيت مركز قوي في ملامح وشه اللي كانت بتتحول بسرعة عجيبة !! من دهشة لقرف لضيق لغيظ مكتوم لسب دين !! .. ما أعرفش إزاي قدر يرسم الابتسامة الباهتة دي على وشه وهو بيكلمني بثبات وهدوء !!
البشبوش (بهدوء من تحت الضرس) : لاحظت أن حضرتك مراجع كذا موضوع هنا !!
أنا (مش عارف صوتي راح فين ساعتها بجد) : احمم !! تمام معاليك !!
البشبوش بسخرية : هو أنتوا ما بتحققوش في المصلحة غير مع سيد شحته ؟؟
أنا : لأ فيه موظفين تانيين سعادتك ؛ بس ده زبون عندنا كل شهر !!
البشبوش (ينظر للملفات بعد ما فنطها قدامه زي الكوتشينة) : ما هو واضح أهه !!
وفجأة !! راح واقف وهبد بإيديه الاتنين ع المكتب كان هيكسره وصوته اتغير زي ما يكون بلع سيد شحته نفسه !!
البشبوش : بُص بقى !! سيد شحته سيد قشطة ماليش فيه !! أنا اللي عايز أفهمه دلوقت إزاي في التحقيق ده رقم 78 بتاع غياب شهر 10 يبقى عنده 47 سنة وفي التحقيق رقم 92 بتاع غياب شهر 11 يبقى عنده 35 سنة ؟؟؟؟ تيجي إزاي دي ؟؟ فهمهالي ؟؟ هو الواحد بيصغر ولا بيكبر ؟؟
(طبعاً أنا في سري كنت باقول يا ولااااااااااد الكاااااااااااالب !! ع البهايم اللي معايا !! المهم ما تعرفش إزاي يا أخي في ثانية واحدة لقيتني بارُد عليه بمنتهى البرود !! زي ما تقول كده حسبتها في عقل بالي وقلت كده كده احنا غلطنا فعلاً والموضوع خلاص اتكشف والعملية خسرانة خسرانة واللي يريده ربنا هو اللي هيكون ؛ يبقى المفروض أني أحاول أمتص غضبه وما أعصبوش زيادة بدل ما نولع في بعض والدنيا تخرب عليا وع البهايم اللي معايا)
أنا : أصل سيد شحته ده معاليك من النوع اللي بيمط !!
البشبوش : بيمط ؟؟؟؟
أنا : أه ؛ يعني سعادتك تشوفه كده تتلخفن فيه !! ما تبقاش عارف تدي له كام سنة !!
البشبوش : بيمط ؟؟؟؟
أنا : أه ؛ يعني سعادتك تشوفه كده تتلخفن فيه !! ما تبقاش عارف تدي له كام سنة !!
البشبوش يحاول يمسك نفسه من الضحك لكنه في الآخر يضحك ويقول : طيب ماشي يا أستاذ شريف !! .. في التحقيق الأولاني كان ساكن في بولاق إزاي في التحقيق التاني ساكن في حلوان ؟؟ وفيه تحقيق تالت استنى كده (يقلب في الورق أمامه) بتاع غياب شهر 12 ساكن في مصر الجديدة !! هو واخد البلد لحسابه ولا إيه ؟؟ استنى استنى !! ده مكتوب هنا أن عنده 59 سنة !!
أنا : شفت بقى معاليك ؟؟؟ مش قلت لك بيمط ؟؟ سيد ده جن مصور والله !! تحس سعادتك أنه مخاوي !!
البشبوش ضاحكاً بصوت عالي : فعلاً !! ما هو ما يعملش كده إلا أما يكون جن !! .. (يمسك نفسه ويلبس الوش الخشب) : وبعدين هو سيد ده وظيفة أمه إيه في المصلحة بالظبط ؟؟؟
أنا : زي ما هو مكتوب قدام معاليك !!
البشبوش بنرفزة وبصوت عالي : مكتوب إيه وزفت إيه ؟؟ أنا باسألك أنت !! .. المكتوب عندي أنه في شهر 10 كان شغال سباك وبعدين في شهر 11 شغال محاسب وفي شهر 12 مدير إدارة ؟؟ أصدق مين فيهم ؟؟
أنا : أيوه سعادتك يعني هو هيفضل سباك طول عمره ؟؟ أكيد طبعاً هيترقى !!
البشبوش ضاحكاً : لا يا رااااجل ؟؟ يترقى مرتين في شهرين ؟؟ من سباك لمحاسب لمدير إدارة ؟؟ لييييييييييه ؟؟
أنا : أصل سيد ده سعادتك حسيس قوي وابن أصول تصور معاليك كان مخبي علينا أن معاه بكالوريوس تجارة ووافق أنه يشتغل سباك علشان ما يبقاش مدير على زميله اللي أقدم منه ولما زميله طلع معاش سوى المؤهل بتاعه وبقى محاسب والشهر اللي بعده اترقى وبقى مدير !!
البشبوش : تصدق أقنعتني !! طيب سيبك من ده كله !! هاعديه بمزاجي !! .. في التحقيق بتاع شهر 10 كان غايب 3 أيام وقال في التحقيق أنه غاب علشان أبوه مات !!
أنا متأثراً : لا إله إلا الله ، الله يرحمك يا عم شحته !!
البشبوش : ما تزعلش قوي كده اصبر بس !! في شهر 12 يعني بعد الموضوع ده بشهرين سيد غاب 4 أيام علشان كان في المستشفى ، تفتكر ليييييه ؟؟
أنا : ما عنديش فكرة سعادتك !! بس أكيد يعني كان عيان !!
البشبوش : يا ريت !! مكتوب هنا لأنه كان قاعد جنب أبوه الله يرحمه علشان كان بيعمل عملية قلب مفتوح !! فهمني بقى دي تيجي إزاي ؟؟ إيه ؟؟ طلعوا أبوه من التربة وعملوا له العملية علشان ما يبقاش ميت ونفسه في حاجة ؟؟
أنا ضاحكاً : لأ ما هو سعادتك أبوه هنا مش أبوه شقيقه ده من أب وأم تانيين !! هو أصلـ...
البشبوش ساخراً : مش أبوه شقيقه !! قلتلي أه !! .. وبعدين تعالى بص هنا لو سمحت على التحقيق بتاع شهر 11 وقول لي إيه اللي أنا شايفه ده ؟؟
أنا مقترباً منه بحذر : خير معاليك ؟؟
البشبوش : شوف بس هنا مكتوب إيه ؟؟
أنا : معلش أصلي ما باشوفش بالنهار سعادتك !!
البشبوش : مكتوب أن المذكور انقطع أسبوعين علشان شال الرحم ؟؟
أنا : معلش أصلي ما باشوفش بالنهار سعادتك !!
البشبوش : مكتوب أن المذكور انقطع أسبوعين علشان شال الرحم ؟؟
أنا (كنت هاتشل ساعتها): مين شال إيه سعادتك ؟؟
البشبوش يولول بإصبعيه السبابة ويمصمص في شفايفه : شلتوا الرحم لسيد ليييييييه يا ظلمه ؟؟ هيخلف تاني إزاي ؟؟
(بصراحة ما قدرتش أمسك نفسي من الضحك على منظره وفين على ما قدرت أمسك نفسي) : احـــم !! وريني كده سعادتك ؟؟ مين اللي عامل التحقيق ده ؟؟ أه دي الأستاذة / أماني عذراً يا فندم أصلها زميلة جديدة لسه متخرجة وأنت عارف بقى حضرتك خجل البنات هي تلاقيها بس التبس عليها الأمر فكتبت الرحم بدل المثانة سعادتك لأن ما عندهاش فكرة عن الجهاز البلبلي عند الذكر !!
البشبوش مندهشاً : وده المفروض بيبقى فين إن شاء الله ؟؟
أنا : ده اللي هو بيبقى من أول السرة وأنت نازل كده معاليك لحد حجر البنطلون !! ثواني حضرتك أنا هاوري سعادتك ..
البشبوش يقوم من على كرسيه وهو يشير لي بيديه أن أجلس : توريني إيييييييييييييييه !! أنت هاتقلع لي البنطلون ؟؟؟
أنا : أنا باقول يعني علشان أبقى جاهز وما ناخدش وقت ههههههههههههه
البشبوش يجلس وهو يضحك عالياً : طب أقعد أقعد !!
(يمسح عيناه التي دمعتا من كثرة الضحك ويشرب كوباً من الماء ثم ينظر إلى باقي الملفات ويختار منها واحداً ؛ أدقق في الملف فأجده تحقيق لـ سيد شحته عن غياب شهر 9 الذي قمت بتأليفه !! فأقوم بسرعة لسحب الملف من يده)
أنا : وحياة حبيبك النبي ما أنت فاتح الملف ده !!
البشبوش : يعني هي جت على ده يا راجل ؟؟ ده مين اللي عامله ده ؟؟ (ينظر إلى الاسم المكتوب على الملف) أنت ؟؟ لما نشوف كان ماله سي السيد في شهر تسعة !!
أنا : احم !! لأ هو بصراحة ما قدرش يعمل حاجة الشهر ده لأنه كان ميت !!
أنا : احم !! لأ هو بصراحة ما قدرش يعمل حاجة الشهر ده لأنه كان ميت !!
البشبوش مندهشاً : مات ؟؟ تصدق زعلتني ؟؟ على كده بقى عفاريته هي اللي كانت بتروح بداله المصلحة ؟؟
أنا : احم !! لأ سعادتك هو مات في شهر تسعة بس ؛ وجاب شهود ع الكلام ده ؛ فأنا اعتبرت أن ده عذر قهري حال دون حضوره للعمل فحفظت له التحقيق مراعاة لظروفه D:
البشبوش : ههههههههههه ظروفه ؟؟ ماشي وعلى كده سيد شحته ده موظف بجد في المصلحة ولا من تأليفكم ؟؟
أنا : احم !! لأ سعادتك هو مات في شهر تسعة بس ؛ وجاب شهود ع الكلام ده ؛ فأنا اعتبرت أن ده عذر قهري حال دون حضوره للعمل فحفظت له التحقيق مراعاة لظروفه D:
البشبوش : ههههههههههه ظروفه ؟؟ ماشي وعلى كده سيد شحته ده موظف بجد في المصلحة ولا من تأليفكم ؟؟
أنا : لا يا باشا موظف وحي يرزق !! (ينظر إلي البشبوش من تحت النظارة متشككاً)
أنا بسرعة : طب وحياة بوسي موظف عندنا !!
_________
اللي حصل بعد كده ؛ هو اللي كان لازم يحصل من الأول !! .. كلمته بصراحة عن كل حاجة واتضح أن الراجل عارف كل حاجة عن شغلنا لأن معظمه بيوصله علشان شغل سليم وقانوني !! وهو قال يعمل حركة التفتيش دي لأنه بيسمع إشاعات عن فساد البهبوه الكبير والشلة اللي حواليه في المصلحة وكان فاكر أنه هيلاقي أي مستندات تدينهم عندنا !! .. ولما عرف أن البلاوي التقيلة ما بتوصلناش (الحمد لله) وأنهم بيطبخوها مع بعض قال لي : كده أنتوا تمام سيبهوملي أنا بقى هاظبطهم قريب !! .. وهو بيوصلني لباب مكتبه قال لي : أنا عازم نفسي على قهوة عندكم علشان أتشرف بالزملاء المبدعين دول !! قلت له : لأ قول بقى سعادتك أنك جي علشان تشوف سيد شحته :))
كــــــل سنــــــــة وحضراتكم جميعاً طيبين وبألف خير وصحة وسعادة ورضا وراحة بال وهنا وسرور وإن شاء الله يكون عيد سعيد علينا وعلى المسلمين جميعاً وعلى الدنيا كلها
ردحذف:))
كلوا لحمة على قد ما تقدروا
:))
باعتذر جداً عن التقصير في المتابعة ؛ متهيألي كده خلاص عرفتوا السبب :))
طب وحياة بوسي هو ده اللي حصل ورحمة عم شحتة مطرح ما هو قاعد كنت مطحون
:))
يومكم فل بإذن الرحمن
ايييه ده !! هو ده بجد ¿¿ !
ردحذفبس بجد بجد انا كنت هموت من الضحك
هههه سيد شحته ده بقا مهمته ايه ههه
كل عام وحضرتك وبنت باشا والاولاد بخير يارب
وسلامى لبنت باشا
بس منشور اكتر من جميل ومضحك اووى بس برضه الراجل طلع كويس المفروض تدعوله بقا ههه
تحياتى
Ma As
ردحذف:))
ههههههههه
لأ طبعاً مش جد ؛ هو كان حصل موقف قريب شوية من ده بس من فترة كبيرة ؛ واحدة زميلتي كانت لسه جديدة في الشغل من كام سنة وبعد ما قعدت تحقق مع موظف ساعة ونص بحالها افتكرت في الآخر بعد ما مشي أنها نسيت تاخد بياناته أو تخليه يمضي على محضر التحقيق فقلت لها بهزار صرفي نفسك وخدي أي اسم من عندي D:
فتخيلت بقى المسخرة اللي ممكن تحصل لو ده كان حصل بجد :))
كل سنة وأنتي طيبة وبألف خير وعيد سعيد عليكي وعلى أسرتك بإذن الله وبنت باشا إذ تهديكي أطيب تحية وسلام
:)
نورتينا
الله يخر ببيت أمه سيد سحته ده ...
ردحذفأنا شوفت النص طويل قلت لنفسي بلاش أقراه دي الوقت .. بس اتشجعت وقرأته .
وعيوني دممعت من الضحك ..
كده برده يا راجل .
تحيتي لك يا باشا من زمان ما اضحكتش كده ..
ظلالي البيضاء
ردحذف:))
يا ألف أهلاً وسهلاً أخي الكريم الفاضل نورت الدنيا كلها والله العظيم
:)
ربنا يكرمك يا أستاذنا ويسعدك ويفرح قلبك ويجازيك كل خير على زيارتك الكريمة وتعليقك الجميل وكل سنة وحضرتك طيب وبألف خير وصحة وسعادة أنت وكل أسرتك الكريمة وعيد سعيد عليكم جميعاً بإذن الله
:)
نورتنا
كل سنة وانت طيب يا باشا وربنا يجعلها سنة سعيدة عليك
ردحذفكل سنه وانت طيب يا باشا
ردحذفمعذره عن عدم التهنئه العيد ده لأن الحقيقه أصبت بحصوه في الكلى عامله لي مغص كلوي بشكل دائم من يوم الخميس الماضي- وطبعا انت عارف الدكاتره في اجازه- يعني تقريبا انا عايش بالترامادول لغاية ما العيد يخلص
ربنا يعطيك الصحه والعافيه انت والاسره
Gamal Abu El-ezz
ردحذف:))
وأنت طيب وبألف خير وصحة وسعادة ويا رب يكون كان عيد سعيد عليك وعلى أسرتك الكريمة أخي الفاضل
:))
عذراً للتأخير في الرد ولكن النت كان فاصل اليومين اللي فاتوا ولسه راجع حالاً
:))
نورتنا
moataz farouk
ردحذف:))
وأنت طيب يا كبير وبألف صحة وسعادة
:))
ربنا يطمننا عليك يا دكترة ويعفو عنك وتقوم لنا بألف سلامة إن شاء الله
:))
بعت لك رسالة ع الميل وع الجوجل بلس
:))
نورتنا
أضحكتنى :)
ردحذفههههههههههه
norahaty mo
ردحذف:))
ربنا يسعدك يا دكتورة ويفرح قلبك
:))
نورتينا
حلوة جدااااااااااااااااااااااااااااااااااااااااااااااااااااااااااااااااااااا
ردحذفو الله فكرتني بزميلة عزيزة لما كنت بشتغل في مركز البحوث، مشوفناش وشها ابداً و خدت ترقية و هي عمرها ما حضرت و لما رجعت من السفر و عايزة تعمل اخلاء طرف هي نفسها اتفاجئت بأنها مترقية و بتشتغل و مرتبها بيتقبض و امضاءها حضور و انصراف يومياً بمنتهى الدقة و مغابتش و لا يوم و لا خدت عارضة و لا اجازة سنوية ابداً.
هههههههههههههههه هههههههههههههههه هههههههههههههههه هههههههههههههههه
ردحذفمش ممكن فصلتني ضحك بجد ، ، الله سنك ^_^
Mona el Dawakhly
ردحذف:))
أنا خمنت أن حضرتك استحالة هتقريه لأنه طويل جداً ؛ وتعليقك أسعدني جداً والله
ربنا يكرمك ويسعدك ويفرح قلبك يا باشمهندسة
:)
موقف زميلتك حصل معايا بالمللي .. كنت بافتش في مرة على فرع المصلحة في إسكندرية وما لقتش هناك غير حارس الأمن أونلي !! وعرفت منه أن فيه موظفة في السعودية مع جوزها وبيتمضي لها حضور وانصراف وبتقبض عادي جداً .. والموظف اليتيم اللي قابلته يومها بالصدفة ؛ لسه هاتكلم معاه قال لي بمنتهى البجاحة : أنا مش فاضي لك أنا سايب الركاب بره في الميكروباص وداخل أملا ميه وخارج على طول !! .. اتصلت ساعتها بمدير الفرع هناك ونزلته من بيتهم يومها بالترينج والشبشب !! .. الدنيا هناك كانت زبادي خلاط :))
نورتينا
Samar El.metwally
ردحذف:))
يا ألف أهلاً وسهلاً بحضرتك في زيارتك الأولى ؛ شرفتينا والله يا فندم وسعداء أن البوست عجب حضرتك ؛ربنا يجعلنا عند حسن ظن حضراتكم دايماً ؛ علشان تشرفونا بتعليقاتكم الجميلة
:))
شكراً جزيلاً لتشريفك