شوية ملاحظات على سلوك بعض الستات
(الملاحظة الأولى: السنتحة)
تكون حضرتك ماشي بخطوة ثابتة ع الرصيف في شارع زحمة وهُب تلاقي واحدة ماشية قدامك شبه المرتبة عمالة تتدنجل شمال ويمين وسدة السكة خالص !! لا أنت شايف اللي قدامها ولا عارف تعدي منها ولا هي بتمشي أصلاً !! بتمشي إيه يا عم دي بتنط في مكانها !! هي يا دوب بتزحزح (مش بترفع) رجلها اليمين كام سنتي فيروح التقل اللي بتبقى شايلاه وراها مرجعها تاني لورا !! بتحس كأنك برغوت معاق راكب على ضهر حلزون كفيف !! وتقعد تغني في سرك "اتمخطري واتمايلي يا فيل تارا" ؛ وتضطر أنك تظبط خطوتك على خطوتها لحد ما تعرف تزوغ منها !! لكن فجأة !! تلاقيها راحت واقفة ومصدرة العبيطة !! وألحق نفسك أنت بقى وفرمل قبل ما ترشق !!
زي ما تكون مثلاً كانت نايمة وبتحلم في سريرها وخير اللهم أجعله خير صحيت فجأة ولقت نفسها في الشارع وسط ناس أغراب !! فتبدأ تتمم على نفسها وتتأكد من أنها لابسة هدومها وأن الجلابية مش متشلحة وبنطلون بيجامة جوزها اللي مدخلاه في الشراب مش باين وأن صدرها مقفول وأن شنطتها معاها و كريم !! فين كريم ؟؟ أه كريم في إيديها أهه ماشي ينطح في الرايح والجاي زي الجدي المخصي !! فاقت كده الحمد لله ؟؟ تبدأ بقى تطالع العالم من حواليها وتتفرج بقى !! كل ده وهي واقفة في مكانها زي الجبنص !! وتيت أم الشارع ع اللي ماشيين فيه !! .. طبعاً أي ملاحظات غبية ومتخلفة زي : اقفي على جنب واتفرجي براحتك أو وسعي السكة علشان الناس تعدي ؛ مالهاش محل من الإعراب عندها !! مش لأنها مش عارفاها ؛ إنما لأ هو كده !! استعباط ما تعرف عافية ما تفهم !! لأ وتلاقيها نافشة دراعينها لبره زي الفتوات علشان تحجز ع الشارع كأنها خايفة ليهرب منها !!
إيه ده ؟؟ الفاترينة دي فيها إيه ؟؟ ده جواهرجي ؟؟ تميل برقبتها كده علشان تتأكد (غالباً النوع ده بتكون رقبته كبس ؛ فبتطوح بجسمها كله فحاسب أحسن تخبطك في ممتلكاتك) ؛ أه هو جواهرجي !! يا خسارة باحسبه فسخاني !! أصل نفسي هفاني على الفسيخ بقالي كام يوم !! يمكن علشان العيد بقى وكده ؟؟ أه صح !! دي البت منال بنت ألفت شبكتها تاسع يوم العيد !! أما أبص كده وأعرف الجرام وصل كام علشان ألفت ما تجيش تصيع عليا في الشغل وتضرب عليوي !! هي أصلها غاوية تعمل نفسها بنت اللي بارم ديله !! تميل برقبتها تاني فتلاقيه مش حاطط أسعار !! مش تتحرك بقى وتمشي ؟؟ لأ إزاي ؟؟ تقعد تفكر وتصلي استخارة في سرها هل يا ترى يا هل ترى لو أخدت خطوة لقدام وعديت فاترينة الجواهرجي مش هاحتاجها تاني ؟؟ توء !! مش هاحتاجها !! ترفع رجلها اليمين وقبل ما تنزلها ع الأرض تحس أنها اتسرعت فترجعها تاني لورا !! وتبص ع الفاترينة !!
الله ده عنده تشكيلة حلوة !! طب والله أنا ممكن أدخل جمعية مع ألفت وكوثر في الشغل وأقبضها وآجي هنا أبيع الخاتم والمحبس وأجيبلي غويشتين !! بس لو كان يحط أسعار !! ياللا بقى مش وقته !! وتبدأ الحلموزة في الحركة بعد ما تكون حضرتك مـُت وصحيت سبع مرات !! .. ياللا ؟؟ خلاص أهه رفعت رجليها !! هيييييييه !! لكن لأ !! هو بالساهل كده ولا إيه ؟؟ مش لازم تشوف المحل ده اسمه إيه ؟؟ وبعد ما ترفع راسها وتدقق في اليافطة علشان تقرا اسم المحل وتبص حواليها علشان تعلمه بأي علامة مميزة (الستات ما بتحاولش تعرف أسماء شوارع) فجأة !! تكتشف ويا سبحان الله للمرة التانية في أقل من ساعة أنها في وسط البلد وأن أكيد جواهرجية وسط البلد حرامية ونصابين وحاجاتهم غالية !! فتنزل راسها وتحمد ربنا أنها ما حفظتش اسم المحل !! وهي يعني كانت عبيطة علشان تدخل تشتري من هنا ؟؟ راح فين عبد الهادي الجواهرجي اللي عندهم في المنطقة ؟؟ أه صح هو راح فين ؟؟ مش عارفة مين قالت لها أنه أخد محل جديد عند المترو !! مين اللي قالت لها ؟؟ مين ؟؟ مين ؟؟ يبدأ السؤال الأخير يلح عليها وياكلها !! وبمناسبة ياكلها ؛ تلاقيها راحت مدت إيديها بكل أريحية وشدت الجلابية لبره علشان لا موأخذة اللي اسمه إيه كان لازق في جتتها وطابق على صدرها - هي كده أندرات زمان بتدفي الصدر - ومش مخليها عارفة تركز !! (احترس عزيزي الواقف في المؤخرة لأن غالباً الحركة دي بيتزامن معاها خروج فتيل قذر ممكن يجيب لك استجماتيزم أو ميه مجاري على الرئة وصدقني ولا هتفكر حتى تبص وراها تشوف ضحاياها وترمي عليهم منديل) ؛ أيوه كده !! يا سلام !! أنا دلوقت أرتحت !! زي ما يكون كابوس وانزاح !!
امشي عدل يا كــــريم احنا في الشارع !! ما تخلنيش أمد إيدي عليك أنا باقول لك أهه !! أحسن والله العظيم ما أخدك معايا في حتة تاني !! إيه ده ؟؟ كريم ؟؟ وتبدأ تفكر في كريم اللي عنده سبع سنين وتسأل نفسها : يا ترى يا ابني على أيامك جرام الدهب هيبقى بكام ؟؟ إلا بقى لو الأيام راحت وجت وخطيبة كريم حبت تشتري شبكتها من هنا ؟؟ ليه لأ ؟؟ مش بعيد !! فتبص ع الفاترينة بصة قناعة وزهد بتشع حكمة وكأنها خلاص أدت رسالتها في الحياة وكريم أبو شخة اتعلم واتخرج واشتغل واشترى شقة وعاوز يخطب !! شفت الأيام بتجري بسرعة قوي إزاي عزيزي الواقف في المؤخرة ؟؟ وبالمناسبة الحلوة دي (اللي هي خطوبة كريم) تقرر الحلموزة أخيراً أنها تتحرك خطوة لقدام عزيزي الـ .. !! عزيزي ؟؟ يا عزيزي ؟؟
"يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي" صدق الله العظيم.
دى ست محترمه انها فكرت ف مستقبل كريم ... فيه منهن احيانا بيبقوا ساحلين كريم على بطنه وهمه شدينه من دراعه لانه عايز شيبسى وهيه مش عايزه تجيبله شيبسى ... وتفرج عليها وعلى كريم منطقة نص البلد كلها فى سيمفونية شتيمة ف كريم وسيمفونية صراخ وعياط من كريم وكانهم عايشين فى بيداء ... او جزيره مهجورة ... عادى خالص
ردحذفENG./ELSAYED,PMP
ردحذف:))
يا صباح العسل على أجدع باشمهندسين القطر المصري كله :))
والله العظيم يا كبير أنت علقت فأوفيت بالكلمتين دول : "عادي خالص".
هو أنا أنسى يا راجل الست اللي وقفت فجأة قدامنا في وسط السكة زي العربية الشرقانة قصاد فاترينة الجواهرجي بلا سابق إنذار !!
المهم أنها وقفت واتحركت ورجعت بصت ووقفت تاني واتحركت بتاع تلات مرات في عشر ثواني ولا منها لحقت تبص ع الفاترينة ولا منها مشيت زي مخاليق ربنا !!
و ف الآخر راحت ماشية "عادي خالص"
:))
نورت الدنيا كلها يا معلمي
السلام عليكم
ردحذفيسعد صباحكم يارب
احم احم لامؤاخذة يعنى ههه هى الستات موجودة فين انا عمرى ماشوفت حد كده صراحة يعنى .. هو البوست معبر والتخيلات بتبقى واسعه اووى معانا وخاصه فى منشورات حضرتك .. اكتر حاجه معبرة وهى الزحمة والطفل كريم غير كده محدش يسالنى لانى مشوفتش كده .. انا هعمل بس حبت تناقض لونى ماليش فيه .. فين غض البصر ؟؟!!!!
الله يرحمه اكيد راح فطيس او شهيد ....
ردحذفMa As
ردحذف:))
وعليكم السلام ورحمة الله وبركاته
مساءك فل بإذن الرحمن
:))
ما شفتيش حد كده ؟؟
جايز لأن الصنف ده بيتواجد بكثرة في الأماكن المزدحمة ويتغذى على صغار المواطنين :))
غض البصر ؟؟
وليه ما نقولش إماطة الأذى ؟؟
احنا كل اللي عاوزينه إنسان ألي ضخم بكلابات مسننة ونمشي بيه في وسط البلد نصطاد أي واحدة من دول عاملة إشغال طريق ونرميها في حفرة مليانة ضباع D:
Pasha
ردحذفلا اله الا الله هى وصلت لانسان الى .. طيب احنا ممكن ندعلهم بدل كل ده
وربنا مع الناس اللى بتمشى فى الشوارع
الوووو يا باشا الوووو
ردحذفMa As
ردحذف:))
وماله يا أستاذة ؛ ندعي لهم : ربنا يهديهم ويبعدهم عنا
:)
نورتينا
moataz farouk
ردحذف:))
مسا الجمال والدلال على زينة الشباب وسيد الرجال
:))
منورنا يا دكترة والله
بسم الله الرحمن الرحيم
ردحذفوبعد عيد سعيد ورمضان كريم والله اكرم وبعودة الايام وكدة يعني
انا هسيب كووووووووول ده وامسك ف حاجة واحدة
ان الست تخينة
يا لهوي ي ي ي ي
انا عندي عقدة من التخن
مش متخيلة نفسي في وزن من ده ابدااا
ولما بلاقي اي حد وزن زايد في الشارع في الشغل في اي مكان الاقي نفسي بدعي كل الادعية الممكنة وغير الممكنة لربنا اني مكونش في يوم من الايام بالوزن ده ولا حتي ربعة
مع العلم اني 45 كيلو ومش قابلني للزيادة ابداااا
دول حتي قابلين للنقصان بعد رمضان خفت اوزن نفسي الاقيني اختفيت
المهم عيد سعيد عليكم :)
رحاب صالح
ردحذف:))
كل سنة وأنتي طيبة يا رحاب ويا رب يكون كان عيد سعيد عليكي وعلى أسرتك الكريمة وكل حبايبك بإذن الله
:))
لأ هي الفكرة اللي قصدتها هنا مش فكرة وزن في المقام الأول بس جايز خانني التوفيق في التعبير عن اللي أقصده ؛ أقصد بصفة عامة الستات أو الرجالة اللي بتمشي تستهبل في مكان زحمة وكأنه بيمشي في صالة بيتهم من غير ما يراعي الناس اللي ماشية حواليه ؛ يمكن كتبت الستات وحددتهم هنا لأني بصراحة في المواقف اللي زي دي (اللي بتبقى الستات فيها هي اللي معطلة السكة) ما باعرفش أتصرف إزاي ؟؟ حقيقي باتحرج وباتكسف رغم إني بابقى في قمة انفعالي ونرفزتي ؛ بس باقف متنح !! فيه حالات بتبقى مرضية دي الواحد ما يقدرش طبعاً يتكلم عنها وبيدعي أن ربنا يشفيها ويشفي كل مريض ؛ إنما واحدة ست طبيعية وجت وقفت قصادي في وسط مكان زحمة وضيق فجأة وبدون سابق إنذار ؟؟ أتصرف معاها إزاي ؟؟ لأ ومش وقفت مثلا ثانيتين وخلاص لأ دي واقفة بتتفرج على فاترينة أو سرحت في حاجة أو بتنادي على حد !! طب يا ست الكل اتفضلي اقفي على جنب وأعملي اللي أنتي عاوزاه براحتك ؛ إنما نقول إيه ؟؟ هي سلوكيات للأسف غلط ما فيهاش مراعاة للأخرين ولا حد بيعطي الطريق حقه !!
بالنسبة للتخن أو الرفع .. ليا رأي شخصي .. أهم حاجة أن الواحد يكون متصالح مع نفسه ومتسق مع ذاته ومتقبل شكله أياً كان ؛ تخين رفيع طويل قصير أبيض أسمر مش مهم ؛ المهم الروح الحلوة وشخصية الإنسان نفسه .. وبعدين هو في أحلى من أن الواحد تبقى شهيته مفتوحة للحياة وبياكل وبيشرب وبيتمتع بنعم ربنا ؟؟ وبعدين لما الأصحاء يعيشوا على أعشاب التخسيس والبرشام وووو وجع القلب ده ويتحرموا من الأكل ؛؛ العيانين يعملوا إيه ؟؟
الحمد لله على كل شيء
:))
خدي بالك من صحتك وسيبك من موضوع الريجيم والتخسيس والبدع دي .. عيشي حياتك واستمتعي بالأكل وافتحي شهيتك للحياة ؛ هو احنا هنعيش كام مرة ؟؟
:))
نورتينا يا رحاب وآسف ع الرغي
لالالالا انا فهمت قصدك من التدوينة بس انا اترعبت من موضوع التخن
ردحذفثم انا مش حارمة نفسي من اي حاجة
مشكلتي اني مبعرفش اكل
يعني يوم ما اقول اكلت فاكهة كتير يبق ياكلت موزة وتفاحة
يوم ما اقول اكلت واتخمت يبق ياكلت طبق رز لاني مبكلش رز اصلا
واذا اكلت عيش باكل يا دوب نص رغيف واذا اكلت الرغيف كله يبقي معجزة
تقريبا كدة عندي فقدان شهية
وده مش حلو وصحتي بالنازل بس ده تأثير نفسي مش عشان الرجيم والله
هو انا عندي فوبيا من الوزن الزايد برغم ان اصلا عيلتي مفيهاش اي وزن زايد نعائي ومش قابلة انا للزيادة بس هو مجرد خوف نفسي بس
الموديل ده بيمشي قصادي كتير، بس انا بيقعد جنبي في المترو كمان و مرة واحدة قعدت جنبي و لقيتني اتنطرت و وقعت على الارض بكل حاجة شايلاها..بعد لحظة المفاجأة و قبل ما انطق اصلاً الناس واحدة منهم بس ساعدتني و هي بتكتم ضحكها، على الاقل هي كتمته يعني، الباقي مكتمش بالمرة و الست اتنرفزت و قالت لي اني بستهبل:) .
ردحذفاوقات الناس دي بتصعب عليا قوي، الدهولة اللي هما فيها، بس بيصعب عليا نفسي اكتر انهم بيقضوا العيشة غلاسة عشان عارفين انهم مش هيعرفوا يمشوا فيها غير بالدراع فلازم يقرفوا الخلق و خلاص حتى اللي معملهمش اي حاجة خالص.
يالا الحمد لله على كل حال
و كل سنة و انت طيب و نهارك ابيض ان شاء الله.
رحاب صالح
ردحذف:))
فقدان شهية وحالة نفسية !!
مممممممممم
أنا شايف أنك تعزمينا كلنا في يوم على أكلة سمك ع البحر علشان نفتح نفسك ونرجع لك شهيتك وبعد كده تعزمينا على عصاير ومرطبات وبعد كده تعزمينا على أي حاجة حلوة ولو الأمر استلزم أنك تعزمينا ع العشا كمان عينينا يا رحاب يا سلام بس نفسك تتفتح وتاكلي D:
ياللا يا جماعة مين يحب يساهم معانا في العمل التطوعي الإنساني ده ؟؟
* نصيحة: اعملي نفسك ما شفتيش التعليق وبلاش حتى تعزمي عزومة مراكبية علشان دول ما هيصدقوا :)
Mona el Dawakhly
ردحذف:))
فيه حاجة أنا دايماً باتخيلها بتحصل في عربية الستات في المترو لما بيدخل في النفق ؛ باتخيلهم بيهجموا على بعض وبينزلوا ضرب وعض في بعض ويقعدوا بقى يشدوا في شعور بعض وأول ما يقرب من محطة تروح واحدة مصفرة فيقعدوا ساكتين D:
أصلاً عربيات الستات دي أنا مسميها أفران الغاز اللي كانوا الألمان بيحرقوا فيها اليهود ودايماً باقول حرام والله نعمل لهم عربيتين اتنين بس المفروض يبقى ليهم ست عربيات ع الأقل D:
وعلى ذكر المترو والغلاسة والسنتحة .. فيه صنف كده من الستات (ما عدا كبار السن والحوامل) عاوزين الحرق بيركبوا في عربية الرجالة ويقعدوا يقضوها - أنا أسف في اللفظ - حك ومحلسة في الرجالة اللي قاعدين علشان حد منهم يتحرج ويقف لهم ويقعدهم مكانه وده لأنهم عارفين ومتأكدين أنهم لو قطعوا نفسهم حتت في عربية الستات ما فيش ولا واحدة هتعبرها وتقف لها لأنها فقساها !!
لأ أنا الناس دي ما بتصعبش عليا بصراحة !!
كل سنة وأنتي طيبة يا باشمهندسة ونهارك فل بإذن الرحمن
ايون انا مشكلتى مع اللى بياخد الشارع بالعرض دى مشكله رهيبة دى مصممة تفضل حجزة اللى وراها وياسلام بقى لو قلتلها عدينى هيبقى صباح
ردحذفreemaas
ردحذف:))
أه والله يا دكتورة معاكي حق !! .. اللي يغيظ بقى أن لو واحد فينا وقف ثانية واحدة علشان يعدي حد جي من قدامه وكان واقف وراه واحد ولا واحدة من دول تلاقيه ما يصبرش ويروح زقك بكل قلة ذوق علشان يعديكي !! وكأنك وقفتي بمزاجك مثلاً !!
:))
نهارك فل بإذن الرحمن
أعتزر عن انقطاعى الفترة الماضية عن التدوين
ردحذفوهذا بسبب سرقة المدونة الخاصة بى
أرجوا منكم تشريفى فى النسخه الثانية من مدونتى الغالية النسر المهاجر
حيث تجدون كل ما كان فى المدونة القديمة بالإضافة الى كتبابتى الجديدة
اتمنى أن تنول اعجابكم أيضا
وأن تصبحوا متابعين لها
لينك المدونة الحديثة
http://mehageer.blogspot.com/
Gamal Abu Elezz
Gamal Abu El-ezz
ردحذف:))
ألف مليون حمداً لله على سلامتك يا كبير نورت البلوجر تاني يا معلمي ؛ يا رب تكون بخير وفي أحسن حال إن شاء الله
:))
ومليون مبروك علينا مدونتك الجديدة وإن شاء الله أتشرف بزيارتها قريب
:))
شرفتنا
شايل فى قلبك
ردحذفوساكت كل دا!!
الله يعينـــــــك :)
norahaty mo
ردحذف:))
ربنا يكرمك يا دكتورة ؛ يومك فل بإذن الرحمن
:))
نورتينا