اتنين ستات وناقد
فيه كتابات معينة ما باحبهاش، اللي باحس وأنا باقراها أن صاحبها كاتبها بـ بز رجله!! يعني كلامه مش مفهوم ومليان غلطات إملائية!! بالصدفة من فترة اتشنكلت في مدونة ما أعرفهاش فلقيت بوست من النوعية دي، فقعدت أجري بعيني ع السطور وأنا باقول في ملل وزهق: ها ها ها ها المهم يعني؟؟ اِخلص بقى!! أووووف!! .. وبعدين لقيت نفسي سرحت في تركيبة جملة كانت غريبة شوية عليا وما فهمتهاش خالص!! فقلت أقرا البوست من الأول!! بعد ما قريته، صعب عليا بصراحة شوية الوقت اللي ضيعتهم في قرايته لأني في الأول لما جريت عليه بعيني كنت شايفه وحش، إنما لما قريته كله لقيته خرا!! .. ولسه يا مؤمن هاقفل المدونة عيني جت بالصدفة على التعليقات، قلت أتفرج!! لكني لما قريتها اتخضيت!! لقيت تعليقين من اتنين ستات كلهم ثناء وإطراء وإشادة وتأييد وتهنئة وأحضان وبوس وعيال صغننة!! .. وقال إيه يا خويا القصة دي أخدت الجايزة الأولانية في مسابقة وشك للحيط وحيطك ليا (مجازاً)!! فقلت لنفسي: يا أرعن يا أهوج يا فسل!! بقى يبقى قدامك كنز أدبي زي ده وما تاخدش بالك منه؟؟ يا حمـــــــار!! رُحت عملت جردلين قهوة وولعت أربعتاشر علبة سجاير وقعدت أقرا حرف حرف حرف حرف!! وفي الآخر أقنعتني على مضض أن القصة فعلاً حلوة وأكيد أنا اللي ما بافهمش!! .. وأن صاحبها ده المفروض ياخد نوبل أو نوبل ياخده (ما أعرفش ياخده فين بس هو يستاهل أنه ياخده)!! وبعدين وأنا بافكر في تعليق لائق اكتبه لصاحب القصة (علشان أقنعني أنها فعلاً حلوة) لمحت بالصدفة برضه تعليق تالت طويــل لـراجل مطلع القطط الفطسانة في القصة وفي صاحب القصة كان ناقص بس أنه يشتمه بالست الوالدة!! ده غير أربعة كيلو غلطات نحوية وإملائية تدخله السجن!! رجعت تالت للقصة واكتشفت أن فيها فعلاً غلطات بالهبل (هي أصلاً غلطات مكتوبة على شكل قصة أو زي ما تقول غلطة مقصقصة) بعضها بصراحة كنت شفته لكني عديته بعد ما شككتني فيا وقلت في سري: معقول يعني القصة اللي واخدة الجايزة الأولى هاتكون فيها غلطات يا حمار؟؟ اتعلم بقى يا أخي الكتابة اللي على أصولها!! أنت متغاظ منه ليه؟؟ هه؟؟ وبعدين يعني هو أنت بس اللي بتفهم والاتنين اللي معلقين دول طرابيش؟؟ .. وبعدين قلت: هو مين أصلاً اللي قال أن القصة دي واخدة جايزة؟؟ هه؟؟ مش صاحب المدونة؟؟ .. يعني إيه؟؟ .. يعني ممكن ما تكونش فيه جايزة ولا حاجة والاتنين ستات اللي معلقين عنده دول كاوركية ولا يفهموا حاجة في البتنجان!! .. فتحت الأكاونتات بتاعة الاتنين ستات اللي معلقين عنده علشان أدخل على بروفايلاتهم (بيت أم دي كلمة يا شيخ!!) وأشوف مدوناتهم ظهرت لي رسالة: لا يمكنك الوصول لملف التعريف!! فبدأ الشك يزغزغني!! .. قلبت في البوستات القديمة واحد ورا التاني ورا التالت .. وكل ما أقرا بوست للمذكور أقول في سري كلمة واحدة ما بتتغيرش: بيت أمك على بيت أم التدوين على بيت أم اللي يقرالك حاجة يا معفن!! .. اللافت للنظر بقى أن الاتنين ستات هما هما ما فيش غيرهم اللي بيعلقوا عنده كل مرة!! بنفس الترتيب وبنفس الأسلوب وفي نفس التوقيتات اللي ورا بعض!! الأغرب بقى!! أن الراجل الناقد برضه بينقد كل بوست وبيطلع فيه القطط الفطسانة!! بصراحة فضولي ثارني وصممت أدعبس ورا أخينا ده لحد ما أعرف حكايته، فتحت أرشيف المدونة وجبتها م الأول!! .. لقيت فيلم كبير قوي قوي قوي!!
أتاري الراجل ده (اللي مش معرف شخصيته) عايش وحيد وفاضي وبيحب الكتابة فقرر أنه يعمل مدونة يكتب فيها من أربع سنين!! بعد أول سنة كان كتب كل ذكرياته وحكاياته وقصصه وأغانيه اللي ألِفها (تقريباً أربعتلاف بوست وشوية) ده يا راجل ما سابش حاجة إلا أما غنالها!! ده ألـِف أغاني مخصوص لـ .. لـ .. للاموأخذة!! .. وبعدين اكتأب وزهق فترة علشان ما حدش بيقرا له، فقرر في السنة التانية أنه يعمل أكاونت باسم واحدة ست (هو شرح القصة دي في المدونة) وبدأ يرمي شباكه عليها ويبعت لها في تاجات ويغازلها لحد ما خلاها متيمة بيه!! وبوست ورا بوست نشأت لاف ستوري جميلة قوي ما بينهم (إيييييح) فبدأ يقول فيها أشعار ويألف لها أغاني، لحد ما قالت له في يوم أنها مخطوبة لابن عمها اللي ما بتحبوش من سنتين وخلاص هاتتجوز كمان أسبوع بس هي كانت مخبيه عليه علشان حبته هو، وطلبت منه (صاحب المدونة) أنه يتقدم لها أو حتى يهربوا سوا ويتجوزوا بعض من ورا أهلها!! فـ زي ما تقول اتصدم يا عيني!! وثار وهاج وحس أنها خانته وقرر يقطع علاقته بيها!! .. وفي السنة التالتة راح عامل أكاونت باسم واحدة ست تانية برضه، بس خلاها هي اللي تحبه الأول وتكتب له أشعار وتألف له في أغاني، إلا أنه كان لسه ما نسيش حبه للأولانية اللي كانت اتطلقت من ابن عمها بعد ست شهور ورجعت له تاني، ومن هنا بدأوا الاتنين ستات يتخانقوا عليه وكل واحدة فيهم تألف فيه قصايد وتكتب له قصص وروايات تحكي له فيها عن مدى حبها ليه كل ده وهو منفض لهم وما بيردش عليهم!! في السنة الرابعة وبنجاح ساحق عمل أكاونت باسم راجل (مش عاوز مخكوا يروح لبعيد) وقال أن ما حدش من الاتنين ستات هايعرف أن الأكاونت ده بتاعه هو -- قال يعني أكاونتات الستات مش بتوعه هو -- لأنه ناوي يختبرهم ويشوف مين فيهم اللي بتحبه أكتر من التانية!! .. والست اللي مش هاتطلع بتحبه أكتر فيهم هايجوزها للراجل اللي هو اخترعه (اللي هو هو نفسه برضه بس يظهر أنه هايفاجيء نفسه كده مرة واحدة من غير ما يعرف هههههههههه) وعلشان كده اخترع حكاية الجايزة دي علشان يستخدم أكاونت الراجل بأنه يخليه ينقده (صاحب المدونة) ويطلع له غلطات نحوية وإملائية في كل قصة .. كل ده علشان يُظهـِر الراجل الناقد بمظهر أنه مثقف عنه وبيكتب أحسن منه!! ويشوف مين من الاتنين ستات اللي هاتميل للناقد وهاتتعلق بيه!! .. أعتقد أنه اخترع شخصية الراجل الناقد ده لأنه بيحب الاتنين ستات ومحتار بينهما، وحكاية أنه عاوز يختبرهم بالراجل الناقد ده مفقوسة قوي يعني!! .. لأن أي واحدة فيهم هاتسيبه هاتروح له هو برضه!! وساعتها هاينبسط بنفسه أوي لأنه قدر يضحك على الاتنين في نفس الوقت!! كل الفكرة بس أنه عاوز يعرف مين فيهم بتحبه (صاحب المدونة) أكتر من التانية!! .. المشكلة بقى لو الاتنين ستات حبوا الناقد وسابوه!! .. اتنين مين وناقد مين؟؟ .. يلعن أبوه لأبو الاتنين ستات لأبو الناقد في يوم واحد يا أخي!!
سبحان الله لما وصلت لاخر سطر رددت نفس الكلمة. يلعن ابو الكتابة اللي تعمل في الواحد كده .
ردحذفسطورك اجبرتني علي الابتسامة والضحك .
تحياتي لقلمك وتقبل مروري
ههههههههههههههههههههههههههه
ردحذفمش قادره أبطل ضحك :)
إنت مشكله
بص مفيش أكتر من الأمراض النفسيه في العوالم الإفتراضيه
بس أنا عمري ما ضحكت كده :)
ده بجد؟ :D أنا عن نفسي صدّقت :))))
ردحذفههههههههههههههههههههه
ردحذفأنا عارف ومتأكد إنك مصيبة وكارثة .
انت بالمختصر ما لكش حل .
بحب كل حروفك وكتاباتك . وطريقتك .
والله يخرب بيت الناقد والاتنين الستات .
يخرب بيت التحليل اللي جنني أكتر ما انا مجنون . شيء خرافي . اللي حصل واللي بيحصل . شيء مرعب اللي انتي بتحكية . خيال وأكتر من الخيال بشويتين تلاتة .
امراض نفسية على رأي شيرين وما فيش أكتر منها في العالم الافتراضي .
وبجد انت مشكلة . لما تقعد تعيد وتزيد وترجع وتقرا مرة وتانية وتالتة وتشوف التعليقات وتدخل تبحث وتخليه هوا موضوعك . السجاير والقهوة وحرقة الدم اللي عشت فيها . انا حسيت نفسي كمان عشت فيها . تخيلت كل اللي انت قولتة وعملتة . صحيح ما اكدبش عليك اني في وقت حسيت اني بدأت اتوه منك . واتوه من الموضوع والقصة . الا انك يبدو انك واخد بالك من دا وحاسس فسريعا بتوضح يعني اية اللي تقصدة .
بجد بجد . ربنا يسعدك دايما ويرسم على وشك البسمة والابتسامة زي ما بترسمها على وشوش الكثير .
تشكراتي . كامل احترامي وتقديري . دعواتي لك بالتوفيق والنجاح . لك مني تحياتي .
ههههههههههههههههه
ردحذفجميلة جدا بس لو القصة حقيقية ممكن ترفق لنا الرابط بتاع المدونة
هاااااااااااااااار اسود O-o
ردحذفهههههههههههههههههههه
ردحذفايييييييييييييييييه يا عم الحاج كل ده
ينهار اسود على دي شغلانه
بس هقولك ايه- العقد النفسيه موجوده في كل مكان، عندك انا مثلا واحد من المعقدين، بس الحقيقه لسه ماوصلتش للدرجه دي لأن اللي بتحكي عنه ده فاق كل الحدود
صاحب الحبر الأسْوَد
ردحذف:))
ربنا يكرمك ويسعدك دايماً يا رب زي ما أسعدتني بتشريفك الرائع وتعليقك الجميل
:))
خالص مودتتي واحترامي
شيرين سامي
ردحذف:))
أه والله يا دكتورة عندك حق :))
ربنا يفرحك دايماً ويسعدك زي ما بتفرحينا بمرورك الجميل الراقي
:))
خالص مودتي واحترامي
Lobna Ahmed
ردحذف:))
انتوا هاتخللوني أصدق ولا إيه ؟؟
D:
ربنا يسعدك ويفرحك يا أستاذة زي ما بتفرحينا بمرورك الراقي الجميل
:))
خالص مودتي واحترامي
SHARKawi
ردحذف:))
يا كبير أنا مش قد كلامك ده كله وربنا :))
ربنا يكرمك ويفرحك ويسعدك يا رب زي ما بتفرحني دايماً بذوقك وكرم أخلاقك وتشجيعك :))
وبعدين مالهم المجانين ؟؟
المجانين تنتظرهم المقدمة يا برنجي :))
خالص مودتي واحترامي
Abdulla Aboulwafa
ردحذف:))
فكرك يعني لو القصة حقيقية أنا كنت سبته كده من غير ما أشرده ؟؟
أنا أصلي ما اتوصاش ف الحاجات اللي زي دي D:
متهيألي لو القصة دي بجد وصاحبنا ده شاف تعليق بني أدم بجد عنده ممكن يموت م الصدمة :))
نورتني بمرورك الجميل وتعليقك الرائع
:))
خالص مودتي واحترامي
د/ ستيتة
ردحذف:)))))))))
بس هل تعتقدي يا دكتورة أن الاتنين ستات ممكن فعلاً يسيبوه ويروحوا للناقد ؟؟
علشان لو كده ألحق أنبهه وأخلليه يلغي الأكاونت بتاع الناقد :))
ربنا يكرمك يا رب ويفرح قلبك ويجازيكي كل خير على تشجيعك لينا بزيارتك الكريمة وتعليقك الجميل :))
نورتي الدنيا كلها
:))
خالص مودتي واحترامي
لورنس العرب
ردحذف:))
ههههههههههههههههههه
يا معتز يا اخويا ميت مرة أقول لك بطل صراحتك دي يا أخي !!
ما كلنا معقدين بس مخبيين على بعض D:
أصل الحاجات دي لعلمك بتتحسد !!
عندك أنا مثلاً أهه ما باقولش خالص لحد ع الموضوع ده وباتعامل مع الناس بشكل عادي جداً وبمنتهى التواضع والله يعني ما باتنططش عليهم بالعقد بتاعتي ولا حاجة !! مع إن عندي كل عقدة وكلكيعة قـــد كـــدهوه !!
روق يا سيد الناس :))
إيه أخبار العرايس صح ؟؟
نورت الدنيا كلها
:))
خالص مودتي واحترامي
أعتقد هي قصة خيالية
ردحذفلكن المتأكد منه ان ليها أمثله كتير واقعية
سواء في العوالم الأفتراضية
او في المعالم الملموس
من المرضى النفسين
مرضى بسبب المجتمع
كوميديا سوداء
الحمد لله الذي عافنا
ربنا يشفي كل مريض
و يجازي ال كان السبب
تحياتي على الطرح المتميز :)
الله على الطرح الجميل والأسلوب الشيق ولعلمك انت فعلاً بتاخدنا معاك لتخيل الوضع اللي انت بتبقى عليه لأن بتحصل كتير والواحد يرجع يقرا من الأول على اساس هو اللي مش فاهم ..اما عن العقد اللي احنا فيها فحدث ولا حرج..والا الغلطات الإملائية ..ماتقوليش..ماتقوليش..بوست مميز بجد واضحكتنا كثيراً كتر خيرك ..
ردحذفهههههههههه
ردحذفأنت بتوجع دماغك
وعينيك بالحاجات دى ليه
دمااااااااااااااااااااغك تهمنا :)
ههههههههههههههههههههههههههههه
ردحذفمش قادرة من الضحك
ههههههههههههههههههه يخربيت دي شغلانة يا جدع ههههههههههههههههههه
المفروض يعمل اكونت لطليق الاولانية و يخليه يحاول يرجعلها تاني و يبقى الضغوط عليها من كل ناحية يا ترىى ترجع لجوزها و اهو بيت يلمها و لا تروح للناقد و لا تختاره هو دونا عن كل الناس المهابيش دول
هههههههههههههههههههه
تحياتي
RAmy
ردحذف:))
ربنا يكرمك يا رب ويجازيك كا خير إن شاء الله على مرورك الكريم وتعليقك الجميل الراقي :))
الحمد لله على كل شيء
نورت الدنيا كلها
:))
خالص مودتي وعميق احترامي وتقديري
zizi
ردحذف:))
يا أهلاً وسهلاً يا أستاذة منورة الدنيا كلها :))
ربنا يكرم حضرتك يا رب ويجازيكي كل خير على تعليقك الجميل وتشجيعك :))
وبجد احنا بنتعلم من حضراتكم
:))
خالص مودتي وعميق احترامي وتقديري
norahaty
ردحذف))
ا أهلاً وسهلاً يا دكتورة منورة الدنيا كلها :))
دي قصة والله
:))
ربنا يكرم حضرتك يا رب ويجازيكي كل خير على دعمك وتشجيعك
:))
خالص مودتي وعميق احترامي وتقديري
افكار مبعثرة
ردحذف:))
هههههههههههههههه
موتيني م الضحك على كلمة المهابيش دي !!
ما سمعتهاش من زمان الصراحة :))
حلو الاقتراح ده يا أستاذة ماشي مع جو البوست ، بس كده الناس هاتولع فيا :))
نورتينا بتعليقك الجميل
:))
خالص مودتي وعميق احترامي وتقديري