طابور النمل
كنا خارجين من الشغل لما خدت بالي وأنا ماشي إن فيه قدامي على الأرض طابور نمل .. المشهد كله ما خدش أكتر من ثانيتين بالكتير ، لكنه ملازمني بقاله فترة طويلة .. نعيد المشهد تاني .. كنا خارجين من الشغل احنا التلاتة -- وكنت أنا اللي ماشي ناحية الشمال -- وقبل ما أرفع رجلي اليمين علشان أدوس ع الأرضية المتبلطة بالطوب الأسمنتي ، شفت كام نملاية صغننة شايلين قشرة فول سوداني (اللي هي القشرة الخارجية الخشنة) وماشيين ع الأرض .. حسيت كأني شفتهم رافعين دراعاتهم لفوق وهما ماشيين شايلين القشرة .. أنا ما شفتش أول الطابور ولا أخره .. أنا كل اللي شفتهم تقريباً أربع خمس نملات بس .. جايز جداً زمايلي الاتنين اللي كانوا ماشيين جنبي على اليمين داسوا على أول الطابور !! .. ليه لأ ؟؟ .. احتمال مش بعيد للأسف !! .. احتمال أنا نفسي أكون دست على آخر الطابور (اللي كان متجه ناحية اليمين) برجلي الشمال من غير ما أحس !!
جه في بالي دلوقتي إني أتخيل قصة أكمل بيها البوست .. كأني مثلاً .. مثلاً .. ممممم .. مش عارف !! .. كنت عاوز أقول كأني مثلاً نملة من النمل اللي كان في الطابور ، بس اللي خللاني وقفت ، أني مش عارف أحدد مكاني كان هايبقى فين في الطابور ؟؟ .. هل كنت ضمن النمل اللي ماشي في أول الطابور واللي غالباً اتداس ومات تحت جزم زمايلي ؟؟ .. ولا ضمن النمل اللي كان في النص اللي كان شايل قشرة الفول السوداني وغالباً ماشي بيغني هيلا هيلا ؟؟ .. ولا اللي كان في آخر الطابور اللي مصيره مجهول ؟؟ .. ما اعتقدش إن فيه مكان هايكون أفضل من التاني !! .. خاصة لو تخيلنا أن اللي في أول الطابور وآخرة هما أباء وأمهات النمل اللي في النص !! .. إيه الكآبة دي !! .. ليه ما يكونش الكل نجا بأعجوبة بعد شوية إثارة وبعدين عملوا احتفال كبير وقعدوا يرقصوا (كنت هاكتبها يقرصوا) سامبا سوا ؟؟ السؤال هنا : النمل إزاي هايدخل قشرة الفول السوداني الجحر بتاعه ؟؟ .. مش مشكلتنا دلوقت هما أكيد هايتصرفوا !! .. ولا ممكن كانوا واخدين القشرة دي زي درع يحيمهم من الحشرات الطائرة أو أشعة الشمس مثلاً ؟؟ مش بعيد ليه لأ ؟؟ .. وممكن أوي كانوا بيلعبوا !! .. هو احنا ليه حاطين في دماغنا أن النمل نشيط ومنظم ومجتهد ومدبر وووو ..... اللي هي معلومات كتب المدرسة ؟؟ .. هو النمل مش من حقه يلعب ويتسلى ولا إيه ؟؟ .. تصدق جت في بالي حاجة دلوقت !! .. أن ممكن دي كانت جنازة !! .. أه والله يا عم .. يعني ممكن مثلاً ده كان "النمول الأكبر" -- اللي هو كبير عشيرة النمل -- ووافته المنية ، والنمل قرر يعمل له -- طبقاً لتقالديهم المتبعة في مثل تلك الحالات -- جنازة مهيبة !! .. اللي هي يحطوا جثمان الفقيد على قشرة فول سوداني ويمشوا بيه لحد مثواه الأخير !! .. قمت أنا وزمايلي بكل آسف موتنا كل اللي كانوا ماشيين في الجنازة وسيبنا اللي شايلين النعش !! ههههههههههههههههه .. أنا متهيألي أصلاً الميت صحي وجري لما شاف غزو الجزم !! ههههههههههههههههه .. متخيل أنا دلوقت منظر اللي كانوا شايلين النعش بعد ما وصولوا القرافة علشان يدفنوا المرحوم ولقوا النعش فاضي !! ..هههههههههههه ولا منظر العشيرة لما يلاقوا "النمول الأكبر" داخل عليهم وبيقول لهم بشعره الأشيب المنكوش : كنتوا عاوزين تدفنوني بالحيا يا ولاد الــ ... !!
وهنا ييجي سؤال وجودي : هل النمل العايش بياكل النمل الميت ؟؟
متهيألي أه .
حيث كده .. يبقى أنا وزمايلي عملنا ثواب في أحبائي وأعزائي أسر النمل اللي في البيوت ، لأننا وفرنا لهم على الأقل طقة الغدا !! .. الحمد لله يا رب .. وأنا اللي كنت حاسس بالذنب .
عارف بقى المشكلة دلوقت فيه إيه ؟؟
هه ؟؟
أن اللي في البيوت يطلعوا يجيبوا اللي ماتوا بره ، يحصلوهم !!
هــُسسسسس !! احنا لا بنقول ولا بنعيد !!
لما أقوم بقى أحسن رجليا نملت !!
انا خلانى اعلق ان فى ناس فى المنصورة دلوقتى بتموت عشان خاطر ناس تانى فى ارض مصر ! وفى ناس فى بورسعيد بتموت عشان ناس تانية برده فى ارض مصر !
ردحذفالاهم دلوقتى ان اثار مصر ممكن تتاجر ! وكمان النيل ممكن يتاجر ! وكمان احنا ممكن نتاجر !
المهم بقى ان رئسنا منتخب ولازم يكمل عشان الديمقراطية وهو المدافع الاول عن الشريعة ! انا مش هشتم لان مع محمد طرشى عندما تفقد الشتيمة رونقها !
AhMeD RaDy
ردحذفهي الناس دي أصلاً لسه هاتموت دلوقت بس ؟؟
والناس اللي هايموتوا علشانهم عايشين أصلاً ؟؟
وبعدين ما احنا بنتباع في اليوم الواحد مننا فينا مليون مرة !!
كلنا آثار يا عزيزي :))
نورت الدنيا يا كبير ونهارك فل بإذن الله
عايزة اقولك وصفت حالنا يموت بئا بالجزم ياكلوا بعض اهى بقت كلها موته بلا هم
ردحذفكلنا نمل يا عزيزى :)
صباحكم هنا
richardCatheart
ردحذفاللي بيموت في البلد دي .. أهله بيموتوا بعديه .. واللي بيستفيد محامي التعويضات ووسائل الإعلام والمسئولين عن موته اللي بيترقوا وبيبقى كل همهم إزاي يموتوا ناس تانيين !!
:))
صباحك فل بعون الله
حضرتك عبقرى ! :)
ردحذفتحيتى :)
علا
ردحذفالعفو يا فندم .. احنا بنتعلم من حضراتكم والله
:))
نورتينا
:D
ردحذفضحكتني قوي ان النمل ماسك شمسية ازاي وهو بيمشي حافي >_<
فكرة التأمل فالنمل !!!!
بسم الله الرحمن الرحيم
حَتَّى إِذَا أَتَوْا عَلَى وَادِ النَّمْلِ قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ (18)النمل
صدق الله العظيم
معتقدش النمل بياكل بعضه يمكن فصيلة بتاكل فصيلة لكن مش نفس الفصيلة بتاكل في أمواتها
كلام احمد راضى حسسنى ان فيه اسقاط على حال البلد فكنت هضحك وبعدين ماضحكتش
ردحذفكنت هسالك هى مقابر النمل فين فى القصة بس بردوا لما قريت التعليقات سكت ...............
مش قادرة يا باشا انا هضحك وخلاص ههههههههههههههههههههههههههههههههههههههههههههههههههههههههههه
E73
ردحذفصدق الله العظيم
ــــــــــــــــــــــــــ
هو أنا بصراحة يا أستاذة مش متأكد هل فعلاً النمل بياكل بعضه دي ولا لأ ؟؟
متهيألي ما فيش غير البني أدمين بس هما اللي بياكلوا في بعض !!
على رأي كلمة سمعتها إمبارح في فيلم أجنبي اسمه Cloud Atlas بتقول :
They feed us to ourselves.
ــــــــــــــــــــــــ
نورتنيا بحضورك الكريم
:))
reemaas
ردحذفههههههههههههههههههههههههه
أسعد الله أوقاتك يا دكتورة
:))
حلو السؤال بتاع مقابر النمل ده .. أغلب الظن - لو افترضنا إنها كانت جنازة فعلاً - يبقى مقابرهم أكيد ناحية الشجرة اللي ع اليمين .. هابقى اتأكد م الموضوع ده .
نورتينا