جمبررررياية
(يتلقى صابر اتصالا من زوجته في أول يوم عمل
بعد انقضاء شهر العسل)
- الزوجة: وحشتني أوي أوي يا حبيبي!!
- صابر يستشعر الحرج من أعين زملاءه الذين يراقبونه فيدير ظهره لهم ويرد هامساً: إحم .. وانتي كمان والله.
- الزوجة: أنت اتأخرت عليا أوي يا صبورتي!! .. يا للا بقى تعالى بسرعة!!
- صابر يفشل في كتم ابتسامته الطفولية: حاضر يا عمري .. هاخلص الشغل وآجي هوا!!
- الزوجة: تيجي لي بألف سلامة يا قلبي!!
- صابر: الله يسـ
- الزوجة: باقولك يا حياتي أنت قبضت؟؟
- صابر بمنتهى البراءة: أه .. عاوزة حاجة؟؟
- الزوجة (بدلع): مممم يعني!!
- صابر وقد بدأ يضيق بهمهمات زملاءه وضحكاتهم عليه: يعني إيه؟؟
- الزوجة: شكلك مش عارف تتكلم!! .. هو أنت فيه حد جنبك؟؟
- صابر بنفاد صبر: يا حبيبتي أنا في المكتب وكلهم هنا بيتصنتوا عليا، فأنا خايف أحسن نتحسد!! .. قوليلي عاوزه إيه أجيبهولك معايا وأنا راجع ولا أقول لك اكتبي الطلبات في رسالة وابعتيهالي.
- الزوجة: قل أعوذ برب الفلق من عينيهم يا حبيبي!!.. أقول لك؟؟ إقرا معايا المعوذتين علشان ربنا يحمينا.
- صابر بعصبية: أستغفر الله العظيم يا رب!! .. يا حبيبتي لو سمحتي إنتي عاوزة إيه؟؟
- الزوجة بخجل: لأ خلاص بقى ما أنت كسفتني!! وعلى فكرة أنا مخاصماك أوي جداً خالص!!
- صابر يبعد الهاتف عن أذنه وهو يلعن في سره الجواز على الستات على الموبايلات على الشغل على زملاءه!! .. ثم يتحدث في الهاتف وهو يجز على أسنانه: حـ قققـِ ك عـَلللـيا يا حبيبتي!! .. أنا آسف!! .. إن شاء الله لما أروح هاصالحك (ينظر إلى فردة حذاءه ويتخيلها منطلقة بأقصى سرعة كالقذيفة، فيبتسم) .. وحياتي عندك تقوليلي كنتي عاوزة إيه؟؟
- الزوجة: مممممم .. أصل أنا مش عارفه أعمل أكل إيه النهاردة في الجو السقعة ده!! .. وبعدين بصراحة نفسي هفتني ع الجمبري.. فقلت أتصل بيك أشوفك قبضت ولا لأ؟؟
- صابر: طيب خلاص ماشي!!
- الزوجة: إيه ده بجد؟؟؟
- صابر: إن شاء الله.
- الزوجة: هييييه هييييه!! .. مواه مواه مواه.
- صابر (خجلا): اححححم!!
- الزوجة: بس هاته م الكبير!! .. ما تجيبش الدعدع اللي عامل زي البوذو ده!! .. ده أصلاً بيبقى دقيق بنكهة الجمبري!!
- صابر: حاضر يا ستي!!
- الزوجة: يحضر لك الخير يا رب!! .. مووووووواه.
- صابر (بعد أن ضبط شفتيه كيلا يرد لها قبلتها أمام زملاءه): وعليكم السلام ورحمة الله وبركاته.
(في محل الأسماك)
- صابر: لو سمحت بكام كيلو الجمبري الكبير؟؟
- الكاشير: الجامبو بـ 180 جنيه.
- صابر: ليه يا عم؟؟ هو أنا هاركبه؟؟ ولا الجمبري ده مثلاً معاه كتالوج؟؟
- الكاشير ينظر إلى الدبلة اللامعة في يده اليسرى فيتوسم أنه عريس جديد، فيغمز له: يا بيه ده جمبري بلدي يعني الفوسفور كله، مش النوع الصيني اللي عامل زي السفنج وبينفخ البطن!! وبعدين احنا بنجيبه بالحجز لزباين معينة .. لو عاوز م الصيني الكيلو الوسط بـ 90 جنيه!! واحنا تحت أمرك.
- صابر محاولاً تقليد الزباين المعينة اللي بتفهم في الجمبري: أيوه أيوه ما أنا عارف طبعاً!! طب هات لي كيلو جامبو لو سمحت!!
- الكاشير: عاوز معاه عيش وسلطات؟؟
- صابر: أه.
- الكاشير: يبقى الحساب 200 جنيه، وخلي عنك خالص!!
- صابر: هي السلطات والعيش بعشرين جنيه؟؟
- الكاشير وهو يغمز له: والله يا بيه الكيلو ده كان محجوز لزبون من بنها .. بس يا للا بقى بالهنا والشفا .. احنا برضه بنقدر الزبون اللي بيفهم وكل سنة وأنت طيب!!
- صابر يخرج ورقة فئة المائتين جنيه من محفظته وهو لا زال متردداً، ثم ينظر إلى باقي المرتب متحسراً: اتفضل!! .. ثم يهمس للكاشير: ده طبعاً أكبر حجم في السوق؟؟
- الكاشير: طبعاً يا بيه!!
(يشعر صابر بالزهو في قرارة نفسه وينظر إلى باقي زبائن المحل بتعالي، لشعوره بأنه أفضل زبون دخل المحل منذ افتتاحه، يبتعد خطوتين ليفسح المجال للزبائن من خلفه وهو يضع يديه في جيبه منتظراً إيصال الدفع)
- الكاشير بصوت عالي جداً: وعندك أحلى كيلو جمبري جامبو من بتاع محيط سفاجا للبيه هنا!!
صابر ينتشي ويتظاهر بأنه لم يسمع الكاشير، فيعيد الكاشير الصياح بصوت أعلى: كيلو جمبري من أبو 180 جنية للباشا اللي واقف هناك!!
- صابر مدعياً التواضع: احم !! أيوه أيوه!!
عقب خروجه من المحل في سره: محيط سفاجا؟؟ هو فاكرني خواجة ابن السفاحة؟؟
(في المنزل .. على مائدة السفرة)
اكتشف صابر أن كيلو الجمبري عبارة عن عدد سبعة جمبريات فقط لا غير!! .. فأصابه الإحباط!!.. وبينما كان يحسب سعر الجمبرياية الواحدة، كانت زوجته قد التهمت أول جمبرياية حاف من غير عيش فأصابه الذهول!!
- الزوجة: اللللللللللله!! ده طعمه حلو أوي يا صبورتي!!
- صابر وهو يقطع لقمة صغيرة ويغمسها بغيظ في الطحينة وبصوت مكتوم من تحت الضرس: بألف هنا يا عمري!!
- الزوجة تلتقط الجمبرياية الثانية وتقربها من فمه مداعبة إياه: يا للا غمض عينك!! .. افتح بقك!! .. هم يا جمل!!
(اغمض صابر عينيه وفتح فمه بمنتهى السذاجة على آخرة حتى انكشفت لوزتاه وهو يتخيل طعم الجمبرياية .. ثم زاد من فتحة فمه حتى صارت مثل فوهة قدرة الفول!! إلا أن شيئاً لم يدخل فاه سوى الهواء!! .. وعندما سمع صوت زوجته وهي تضحك بصوت عالي، فتح عينيه وفمه لا يزال مفتوحاً، فاكتشف إنها قد خدعته والتهمتها بدلاً منه!! .. فتملكه الغيظ وأغلق فمه بعصبية فعض لسانه!! .. كتم صابر صرخته بصعوبة وحاول أن يضحك وهو ينظر إلى الجمبري بحسرة، وقد أصبح عدده خمسة جمبريات!!)
- الزوجة وهي تقطع بيدها لقمة صغيرة جداً من رغيف عيش وتضع فيها الجمبرياية الثالثة: ما قلتليش يا حبيبي جبت الكيلو بكام؟؟
- صابر وهو يتابع في ذهول مسار اللقمة التي في يديها ويوشك أن يقفز عليها: يا ستي!! مش مهم الفلوس المهم أنه عجبك!!
- الزوجة وهي تحشر اللقمة في فمها: ربنا ما يحرمني منك أبداً يا رب!!
- صابر في سره (ده إيه الجبروت ده؟؟ الولية بتاكل في الجمبري ولا كأنه لب سوبر!! قولي الحمد لله بقى ياشيخة وقومي!!) .. ثم يستدرك: والله الراجل كان عنده كيلو جمبري بتسعين جنيه بس ما رضيتش أجيب منه علشان صيني وجبت لــــنــــــا الجمبري الجامبو البلدي اللي الكيلو منه بميتين جنيه!!
- الزوجة: يا خبر أبيض!!
- صابر: أه والله!! .. (في سره: معقول حست؟؟)
- الزوجة (تستدرك): معلش يا حبيبي أنا آسفة!! نسيت الجرجير في المطبخ، ممكن تروح تجيبه لو سمحت؟؟
- صابر بنرفزة: مش عاوز زفت!!
- الزوجة: مالك بس يا حبيبي؟؟ متعصب ليه؟؟ أنا حتى شايفاك مش بتاكل خالص؟؟
تمد يدها لتلتقط الجمبرياية الرابعة، فيمنعها صابر بسرعة!! ثم يمسك كلتا يديها ويقبلهما وهو يقول في استعطاف: أبوس إيدك (ثم يزيح طبق الجمبري قليلاً عن متناول يديها) سامحيني يا حبيبتي وما تزعليش مني!! أنا أصلي النهاردة متضايق أوي من نفسي!!
- الزوجة وقد بدأت تنتبه قليلا لحديث صابر: ليه يا حبيبي خير؟؟
- صابر وهو يلتهم الجمبرياية الرابعة حاف: ما فيش!! مش عاوز أضايقك!!
- الزوجة تقترب من الطبق بعد أن لاحظت ابتعاده عن متناول يدها: هو أنت ليك حد غيري تفضفض معاه؟؟
- صابر يغمس الجمبرياية الخامسة بغـِل وتشفي في الطحينة ويبعد الطبق عنها: أصلك ممكن تزعلي مني!!
- الزوجة وقد بدأت تنتبه إلى أن الجمبري قد أوشك على النفاذ فقامت وجذبت الطبق ناحيتها: أنا عمري ما أزعل منك أبداً!!
- صابر يخطف الجمبرياية السادسة بسرعة ويضعها في لقمة ويحشرها داخل فمه: أصلي زعلان أوي من نفسي علشان اتنرفزت عليكي فِ التليفون النهاردة وأنا فِ الشغل!!
- الزوجة تجلس على حيلها بعد أن فهمت الحيلة وهي تتربص بآخر جمبرياية وتحوط الطبق بذراعها الأيسر: أنا مقدرة والله يا حبيبي إنك كنت فِ وسط ناس ومش عارف تتكلم براحتك، حقك عليا إذا كنت ضايقتك!!
- صابر وهو يرفع ذراع زوجته بيده اليمنى، بينما يجذب طبق الجمبري من تحته بيده اليسرى: يعني مش زعلانة مني بجد؟؟
- الزوجة تترك ذراعها في يده علامة الاستسلام وتبتسم له: وهو أنا أقدر أزعل منك يا روحي؟؟
- صابر: طب الحمد لله.
- تنقض الزوجة فجأة كالصقر على الجمبرياية الأخيرة بيدها اليمنى وتصوبها مثل كرة السلة داخل فمها: أنا قلت برضة إنك شبعت!!
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ردحذفربنا يكرمك يا رب ,,, زى ما بتضحطنا كدا :)
كنت ناوي أقرا أولها بس و أرجع أكملها بعد الأمتحان
ردحذفبس مقدرتش مكملهاش
:D :D :D :D :D :D :D
"ده إيه الجبروت ده ؟؟ الولية بتاكل في الجمبري ولا كأنه لب سوبر !! قولي الحمد لله بقى ياشيخة وقومي"
ضحكتني أوي الحته دي :D
بس ايه يا باشا
الواحد عنه ما أتجوز :D
ههههههههههههههههههه
ردحذفصباح الجمبري :)
ربنا يكرمك زي ما بتحلي اليوم من أوله
هههههههههههههههههههههههه
ردحذفده جمبري و جامبو و بميتين جنيه كويس انه مقتلهاش عشان ياكله لوحده
هههههههههههههههههههههه
ربنا يجازيك خير عن البسمة اللي بترسمها على وشوشنا
تحياتي
ينهار سود
ردحذفده في شهر العسل؟
دي واحده جباره ومفتريه يا عمنا
بس سيبك انت من القصه
انا بيعجبني دخولك في التفاصيل الدقيقه
يعني زي انها تكون عاوزبط وتقوله حاجه وتفضل تستعبط لغايه ماتوصل لها
او انه واقف وسط الناس في المحل وحاسس بنفسه انه اشترى اغلى حاجه
التفاصيل الدقيقه دي اللي بتدخل في النفس البشريه والعقد بتاعتها هي اللي بتعجبني في كتاباتك بصراحه
:)))
ردحذفضحك الي مالا نهايه طبعااااااااا
هههههههههههههههههههههههههههههههههههههههههههههههههههههههههههههههههههههههههههه احيييييييييييييييييييييية
ردحذفالمشهد بتاع الصراع على الطبق دا سمعت معه مزيكا تانجوا هههههههههههههه تخيلتهم بيرقصوا هههههههههههههههههههههههه بس جنااااااااااااااااااااااان الراجل ليه حق يتشل الحقيقة بس ولا عنده دم مش كان عزمنا ولا احنا للفرجة بس هههههههههههههههههههه والله بجد يسلم قلمك والدم الشربات
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ردحذفلالالالالالالالالا بجد كل الحب ده
يا لهوي ي ي ي يعني ممكن اتجوز راجل بالشكل ده يا خبررررررر
هههههههه
طيب ابقي شوف اللينك ده بس عللي الصوت من عندك
انا هنا
http://vocaroo.com/i/s0qEzqJRXZYY
يخرب بيتها مفجوعه صحيح
ردحذفتسلم ايدك
تحياتي
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه هموووت من الضحك... ربنا يكرمك يااارب ويسعدك :)
ردحذفهههههههههههههههههههههههههههههههههههههه
ردحذفلأ مسخرة السنين بجد هههههههههههههههه
أنا قريته أكتر من مرة وكل مرة أقعد أخيل أكتر م الأول وأضحك أكتر
شفت المفترية دي عملت إيه ف الراجل من شهر العسل ؟؟ عشان تعرف بس إن أنا ملاك هههههههههههههههههه لو مكانها كنت سيبتلك واحدة ياااااااالّه من نفسك عشان ما أحرمكش من حاجة ههههههه
ربنا يسعدك ويفرح أيامك ويبعد عنك كل شر وكل سوء يارب قادر ياكريم
طب قولي المفروض يتقال اية واقولهولك .
ردحذفعشان بجد يخرب بيت الكلام . يخرب بيت القصة . ويخرب بيت الضحك .
النهاردة قريت الجمبريايه وانا في الشغل وما قدرتش اوقف نفسي من الضحك . كنت بضحك بصوت عالي . وبعد ما خلصت القصة قولت والله انت عسل .
بجد القصة مكتوبة صح الصح . ودة طبعا مش جديد عليك يا برنس . ودمها خفيف جدا .
وبجد هدعيلك ان ربنا يسعدك دايما . ويخليك دايما مبستم وترسم البسمة على وشوش الجميع . زس ما حصل للجميع من بعد ما قروا قصة النهاردة .
تحياتي وتشكراتي
ههههههههههههههههه
ردحذفده إيه الجبروت ده D:
بجد مش ممكن..
إلا صحيح إيه خليج سفاجا ده D: D:
هههههههههههههههههههههه يا خبر ابيض دى حرب مش اكله
ردحذفوتلاقيه بيدعى مع كل جمبراييه بس بصراحة عنده حق
مبروك النيو لوك يا باشا
ههههههههههههه
ردحذفالوصف رااائع
ده أول يوم بعد شهر العسل؟!!!
ردحذفالجوازة دي مش هتعمر على فكرة.
هههههههههههه لا والله باشا بصحيح
ردحذفدا كنت عايشة في الحرب بينهم علي الجمبري ،متهيألي انها اخر مرة هتشوف الجمبري ههههههههه
بس بصراحة هو مفتري مش كفاية انه اشتراه وعاوز كمان ياكل دا ايه دا راجل مفتري صحيح
بارك الله فيك
مُبدع كالعاده ، وموضوع وسيناريو وحوار أكثر من رائع .
ردحذفُدمت بكل إبداع... تحياتي لقلمك ):-
ايه يا باشا انت رحت فين
ردحذفعلا
ردحذف:))
ربنا يكرمك يا رب ويسعد أيامك كلها
نورتينا
RAmy
ردحذف:))
أسعدتني جداً بتعليقك والله ربنا يكرمك يا رب ويفرح قلبك :))
فكرتني بأيام الامتحانات .. الواحد كان بيبقى عنده إستعداد يقرا أي حاجة إلا كتب الدراسة D:
بالنسبة للجواز .. الجواز للرجالة D:
نورتنا
Amira Yusuf
ردحذف:))
إيه الصباح اللذيذ ده :))
ربنا يكرمك يا رب ويحلي أيامك كلها :))
افكار مبعثرة
ردحذف:))
حمداً لله ع السلامة يا أستاذة ، نورتي البلوجر :))
متهيألي قتلها في الحالة اللي زي دي مش كفاية D:
دي المفروض تتربط في ترابيزة السفرة وتتفرج عليه وهو بياكل كيلو جمبري لوحده :))
ربنا يسعدك ويفرح قلبك
:))
لورنس العرب
ردحذف:))
أخويا الجميل الكريم الأصيل الغالي :))
والله يا عم وما ليك عليا حلفان دايماً بتفرحني بتعليقاتك وتشجيعك وبتخلليني آخر إنشكاح :))
بالنسبة لــ "شهر العسل" أنت ما تعرفش أنه بقى تلات أيام بس ؟؟
D:D:
- ميزة التفاصيل .. ممممم .. هي في الكتابة حلوة ، بتبقى تفريغ لمواقف وتجارب وتأملات كتيرة مرت على الواحد .. بحيث لما حد بيقرا التفاصيل دي في موضوع ما وبتلمس حاجة جواه ، بيفرح وبيحس أنه مش هو بس اللي بيحس وبيعمل كده ، لأ ده فيه بني آدمين زيه كتير هما كمان بيعملوا كده .. التفاصيل ، دفا وونس ومشاعر ممكن تتشنكل فيهم في كام سطر تقراهم فيحسسوك بالحميمية .. ممكن لو أنت مش بتعمل كده وتأملت في التفاصيل دي تاخد خبرات ..
- مشكلة التفاصيل .. إن اللي بيدق بيتعب :))
الاستغراق فيها بصفة مستمرة بحيث تتحول لطبع ثابت بيخللي عين الواحد في أحيان كتيرة تتعمي عن الصورة الكبيرة .. بتخلليك - على قد ما بتستمتع بالتفاصيل - بتفقد التركيز وبتتشتت !! .. خصوصاً أن الحياة قصيرة وما تستوعبش إننا ندقق في كل الكم ده من ده التفاصيل لأننا ممكن نتوه !!
صدقني الناس اللي مكبرة دماغها مرتاحة جداً .. عايشين الحياة ببساطة .. حتى لو مش عارفين إيه هي الحياة :))
نورتنا يا غالي
شمس النهار
ردحذف:))
ربنا يكرمك ويسعدك ياأستاذتنا :))
ده شيء يفرحنا جداً والله إننا نقدر نبسط حضراتكم
:))
richardCatheart
ردحذف:))
ههههههههههههههههههههههه
والله يا بنتي انتي تعليقك لوحده ضحكني بجد :))
ربنا يسعدك يا رب ويفرح قلبك ويحلي أيامك كلها :))
تانجو !!
تصدقي أنا باصقف لك على خيالك الجامد أوي ده ، برافو والله :))
مش باقول لك أنت جبارة والله في الكتابة ومش مصدقاني !!
...............
انتوا كمان كنتوا عاوزين الراجل يعزمكوا ؟؟؟؟
ألطم على وشي يقولوا الراجل اتجنن ؟؟
:))
نورتينا جداً والله
re7ab.sale7
ردحذف:))
هههههههههههههههههههههههههههه
هو انتوا طلعتوا العيب في الراجل يا رحاب ؟؟
هههههههههههههههههههههههههههه
تصدقي صح هو غلطان ويستاهل أنه جاب نص كيلو .. هو المفروض كان جاب لها سندوتش بعشرة جنية وكان غلس عليها كمان وهي بتاكله D:
بالنسبة للصوت سموك .. احنا سمعنا واستمتعنا بالحلقة بصراحة .. بس مش عارف ليه حسيت أن المذيع كانت اسئلته غبية ؟؟ زي ما يكون كان مش ذاكر مثلاً :))
بس انتي افحمتيه !!
ألف مبروك ع الكتاب وإن شاء الله يحقق صدى كويس مع الناس وربنا يعوض تعبكم ومجهودكم خير :))
وصف الاحساس
ردحذف:))
ههههههههههههههههههههههههههههههه
تسلم إيدك يا باشمهندسة .
أحب أنا الصراحة :))
هي من جهة مفجوعة فكلمة مفجوعة دي قليلة عليها بصراحة !!
نورتينا
amiraali
ردحذف:))
ربنا يسعدك يا دكتورة ويفرحك ويكرمك ويجازيكي كل خير إن شاء الله
βent Pasha
ردحذف:))
هههههههههههههههههههههههههههههههه
ههههههههههههههههههههههههههههههه
سكر وربنا :))
"لو مكانها كنت سيبتلك واحدة ياااااااالّه من نفسك عشان ما أحرمكش من حاجة"
طب الحمد لله إننا ما بندخلش الحاجات الوحشة دي البيت D:
ربنا يكرمك ويسعدك ويفرح قلبك ويبارك لي فيكي يا أم ياسين ولا يحرمنا منك أبداً يا رب :))
SHARKawi
ردحذف:))
طب وربنا يا عم أنا اتكسفت :))
ربنا يكرمك يا رب ويسعدك ويبارك لك ويفرح قلبك ويسعدك ويجازيك كل خير على طيبة قلبك وكلامك الغالي الجميل :))
صدقني والله العظيم أنا اتعلمت ولا زلت باتعلم من حضراتكم جميعاً :))
وحضرتك من الناس اللي بجد مميزة جداً في كتاباتها وليك أسلوب خاص بيبهرني والله :))
نورتنا يا غالي
Israa' A. Youssuf
ردحذف:))
منورانا يا دكتورة والله :))
ربنا يكرمك يا رب ويوفقك ويسعدك :))
بالنسبة لـ "خليج سفاجا"
هو حضرتك ما تسمعيش عن المثل اللي بيقول : "خير في سفاجا ، وسفاجا في خير" ؟؟
D:
نورتينا
reemaas
ردحذف:))
منورة يا دكتورة والله :))
أنا فعلاً نسيت أكتب أنه كان كاشف راسه وبيدعي عليها في كل جمبرياية :))
الله يبارك فيكي ربنا يكرمك يا رب
:))
نورتينا
موناليزا
ردحذف:))
ربنا يكرمك يا أستاذتنا ويجازيكي كل خير إن شاء الله على تشجيعك :))
شكراً لزيارتك الكريمة ، وألف مبروك على نزول الكتاب في المعرض ، إن شاء الله ينجح ويحقق صدى كويس مع الناس وربنا يعوض تعبك ومجهودك :))
سنكوح شنن لملوم سامي
ردحذف:))
ههههههههههههههههههههه
هو فعلاً الجمبري أبو شنبات ده خراب بيوت D:
ربنا يكرمك يا رب :))
نورتينا يا باشمهندسة
zeze
ردحذف:))
ههههههههههههههههههههههه
أنا متهيألي أنها آخر مرة هاتشوف فيها أصلاً :))
ربنا يكرمك يا رب ويفرحك ويسعدك ويجازيكي كل خير على زيارتك الكريمة
نورتينا
منجي بـــــــــــــاكير
ردحذف:))
يا فندم أخجلتنا بذوقك السامي الرفيع وشرفتنا بدعوتك الغالية الكريمة :))
إن شاء الله أتشرف بزيارة مدونتك الراقية المتميزة وأقراً الموضوع :))
لك مني كل سلام وتقدير واحترام
ديدي
ردحذف:))
ربنا يكرمك يا أستاذتنا ويسعدك ويجازيكي كل خير إن شاء الله على كلامك الرقيق وتشجيعك :))
نورتينا بزيارتك الكريمة
لورنس العرب
ردحذف:))
ربنا يكرم أصلك يا معتز يا غالي ويبارك لك ويحفظك من كل سوء ويسعدك ويفرح قلبك زي ما بتفرحني بزياراتك الجميلة وسؤالك الكريم الطيب :))
الحمد لله بخير :))
لا تنسانا في الدعاء الله يكرمك :))
ربنا يا رب يوفقك ويرجعك بألف ألف سلامة إن شاء الله
في حفظ الله