برواز متوسط الحجم





تصيح الأم من المطبخ :
- ياللا يا بت عشان تستحمي !
- للللللللللللأ !
- يا بت هي النضافة بتقرصك ؟؟
- ما ليش دعوة ، أنا اثتحميت يوم الجمعة ، وانتي ما اثتحمتيش !
بعد أن تفشل في إخفاء ضحكتها ، تخرج الأم من المطبخ بحثاً عن "الصغيرة" وهي تحاول أن ترسم على وجهها علامات الغضب ، تستعين على ذلك بـ كبشة في يدها تلوح بها في تهديد ووعيد .. وقبل أن تصل لمنتصف الصالة تلمح أصابع "الصغيرة" من أسفل مفرش كرسي الأنتريه ، فتبتسم في سرها على شقاوة ابنتها ، وتقرر إنها ما تعكننش عليها في يوم زي ده .. ثم تجلس على ذات الكرسي وكأنها لم تر شيئاً .. ومن فوق منضدة صغيرة بجانبها تلتقط صورة زوجها ذات الشريط الأسود المائل ، الموضوعة داخل برواز متوسط الحجم  .. وتتحدث بصوت عالي :
- خلليك شاهد يا "عصام" على بنتك وشقاوتها ! .. مش عاوزه تستحمى وتغير هدومها يوم عيد ميلادك .. بتقول إيه ؟؟ .. ما أجيبهاش معايا ؟؟ .. حاضــر .
تصيح "الصغيرة" من أسفل الكرسي وهي تدافع عن نفسها :
- لأه .. والله يا بابا اثتحميت بالليفة يوم الجمعة ، وماما ما اثتحمتش !
- سامع يا "عصام" طولة اللسان ؟؟ .. يرضيك كده ؟؟ .. خلاص أنا هاجيلك لوحدي !
تنفجر "الصغيرة" في البكاء .. ما ليش دعوة أنا هاجي معاكي ! .. أنا هاجي معاكي !
- يعني هاتستحمي ؟
- أه ، بث من غير ليفة !
..............................................

- انزلي هاتيلي كيس ملح خشـن بسرعة !
- وأجيب شيبثي ؟؟
- الشيبسي هايسد نفسك ومش هاتعرفي تاكلي !
- طب أجيب عثلية !
- العسلية بتسوس السنان ! .. تعالي أقشر لك برتقانة أحسن.
- لللللللللللللأ .. أنا عاوزه عثلية !
- قلت ما فيش زفت !
- تعالى يا "عثام" شوف مراتك ! .. إيه ؟؟ .. بتقول إيه ؟؟ .. أشتري شيبثي وعثلية وشيكولاتة ؟؟ .. حاضــر يا بابا .
تنفجر الأم ضاحكة في المطبخ .. وتنادي على "الصغيرة" :
- ماشي يا مقصوفة الرقبة انتي يا أم نص لسان ! .. خدي عشرة جنية من ع التسريحة اشتري كيس ملح خشن وهاتيلك كيس شيبسي ! .. بس على الله ما ترضيش تاكلي ع الغدا ! .. واطلعي بسرعة يا بت !
..............................................

عندما لم تجد "الصغيرة" الملح "الحشن" - كما تنطقه - عند "صلاح البقال" أو "السوبر ماركت" الذي على ناصية الشارع قررت أن تسير قليلاً حتى شارع السوق .. وبعد أن سألت "عنتر" الفرارجي و"صالح" الموان ، دلتها بائعة الجرجير على محل العطار الذي يقع بعد المخبز الأفرنجي مباشرة .. وقبل أن تصل إلى المخبز ، تسمرت قدماها أمام الواجهة الزجاجية لمحل العطور ، الممتلئة بالزجاجات الملونة من مختلف الأحجام .. بعد أن دفعت الباب برفق ، تسللت لأنفها بعض الروائح الذكية فابتسمت في نشوة دون إرادة منها .
- هي الريحة بكام يا عمو ؟؟
- ياللا يا شاطرة من هنا ، الريحة دي للكبار بس !
- ما  أنا عارفه يا ناثح ! .. أنا هاجيبها لبابا عشان عيد ميلاده !
- هههههههههههه ماشي يا لمضة ! .. فيه من أول عشرة جنية !
- يعني لو إديتك عشرة جنية تديني إزازة حلوة كبيرة ؟
- هاديكي إزازة حلوة قد دي كده !
تمسك "الصغيرة" بالزجاجة ، وتقلب فيها ، فتكتشف إنها أصغر بكثير مما توقعت !
- إيـــه دي ؟؟ .. أنت بتضحك عليا ؟؟ .. دي إزازة البيبث أكبر منها !
- يا ماما دي مش للشرب ! .. دي ترشي منها شوية صغننة تخللي ريحتك حلوة ! .. ثم يرش على يديها الصغيرة قليلاً من زجاجة كانت في يده .. شمي كده ؟
- اللللللللللله .. دي ريحتها حلوة أوي ! .. حط شوية كمان والنبي !
- حاضر ! .. حلو كده ؟؟ .. ياللا بقى اتفضلي !
- طب خد عشرة جنية وهات إزازة لبابا !
- لأ .. أنا هارشلك شوية على منديل وتروحي تاخدي رأي بابا الأول ، لو عجبته تعالي وأنا أعمل لك إزازة .. اتفقنا ؟؟
- اتفقنا :)
..............................................

في المساء .. تنسل "الصغيرة" في هدوء من تحت الغطاء بعد أن تتأكد من استغراق أمها في النوم .. تتسلل في خفة إلى الصالة .. تخرج المنديل المعطر من جيب بيجامتها وتقربه من البرواز متوسط الحجم .. كل ثنة وأنت طيب يا بابا .. شـِم الريحة دي كده ؟؟ .. حلوة ؟؟ .. خلاث هاشتريلك إزازة بكرة بعشرة جنية ! .. بث خللي ماما تديهوملي عشان أنا مش معايا فلوث ! .. تـُقبل البرواز وتضعه في مكانه .. وقبل أن تستدير عائدة إلى فراشها تستكمل : هو أنا ممكن أبقى أحط شوية من الريحة بتاعتك يا بابا ؟؟ .. شوية ثغيرة والله أنا وماما ! .. لو مش عاوز ماما تحط بلاش ! .. مشكرة أوي يا بابا .. تعود "الصغيرة" إلى فراشها في سعادة .. دون أن تلحظ إتساع الإبتسامة داخل البرواز :)

تعليقات

  1. وصف الاحساس12‏/02‏/2012، 8:08:00 م

    رغم انها جميله اوي بس وجعتلي قلبي اوي
    الله يسامحك علي الوجع
    وتسلم ايدك علي اﻻبداع ده
    تحياتي

    ردحذف
  2. βent Pasha12‏/02‏/2012، 8:28:00 م

    :)
    جميلة ورقيقة وبريئة ومؤلمة أوي تسلم إيديك بجد ياشريف.
    ووصفك للمواقف خلاني ضحكت وابتسمت ودمعت من جوه بجد .
    بس بصراحة إبداع بما فيها من ألم وفرح وشقاوة جميلة جميلة جميلة .. إبداع بجد
    ربنا يباركلي فيك وفي إبداعاتك

    زوجتك
    :-)) الإيموشن إياه ، هه ؟

    ردحذف
  3. Israa' A. Youssuf12‏/02‏/2012، 9:14:00 م

    ضحكتني ووجعتني في نفس الوقت.. :(
    تسلم إيدك بجد :)

    ردحذف
  4. افكار مبعثرة12‏/02‏/2012، 9:29:00 م

    الله عليك
    رائعة و رقيقة و موجعة للقلب
    بث البنت دي عثولة اوي الثراحة :)))
    تحياتي

    ردحذف
  5. rona ali12‏/02‏/2012، 9:55:00 م

    الله تسلم ايدك بجد

    مش لاقيه كومنت يليق والله

    تسلم ايدك بجد :)

    ردحذف
  6. هدير12‏/02‏/2012، 9:57:00 م

    جميلة قوي قوي
    و بتوجع قوي ..
    دمت مبدعا !

    ردحذف
  7. AHMED SAMIR12‏/02‏/2012، 10:05:00 م

    مش عارف ابتسم و لا ابكي...!!!!!|
    رااااااااائع

    ردحذف
  8. E7312‏/02‏/2012، 10:16:00 م

    ليه كدا بس!!!!!!!!!

    هي رائعة جدًا لدرجة خلتني تأثرت بشدة

    تسلم الأيادي والأفكار

    ردحذف
  9. سنكوح شنن لملوم سامي12‏/02‏/2012، 10:39:00 م

    حلوة، بس من غير زعل...فيها شوية ابتزاز مشاعر بس على الهادي قوي..مش من النوع اللي يعصر يعني.
    بس الحلو فيهاعلاقة الأم و بنتها، الأم اللي عايزة تفضل صورة الأب حية في ذهن الابنة، و الإبنة اللي بتتصرف عفوياً بنفس الطريقة.الأتنين متمسكين بأب راح خلاص بطريقة بتقول أن الأم مش عايزة تستمر في حياتها في الإتجاه الطبيعي و بالتالي مصرة على إحياء الصورة في ذهن البنت و مش عايزة
    To let go...
    و في نفس الوقت واضح أنها مدلعة البنت و مش قادرة عليها قوي..إختفاء صورة الأب من حياتهم الواقعية مخليها مش ماسكة كل خيوط التصرف في إيديها.
    في أفكار حلوة في القصة على قصرها، يعني تقدر تحلل نفسيات البنت و الأم من حاجات كتير قوي...قد تكون قاصدها فعلاً و قد تكون جت فطرياً أثناء الكتابة..ما علينا من اللت و العجن بتاعي

    تحياتي لك

    منى الدواخلي

    ردحذف
  10. ;كارولين فاروق12‏/02‏/2012، 10:49:00 م

    جميله ومؤثره جدا
    تسلم اناملك
    كاتب جيد جدا
    تحياتي وتقديري

    ردحذف
  11. موناليزا13‏/02‏/2012، 12:30:00 ص

    إذا كنت أنا ضحكت يبقى الراجل اللى جوه البرواز ما يبتسمش :)

    ردحذف
  12. ديدي13‏/02‏/2012، 10:34:00 ص

    مزيج من الحزن والبسمة هما محصلة البرواز متوسط الحجم .
    نهارك سعيد.):

    ردحذف
  13. P A S H A13‏/02‏/2012، 2:57:00 م

    وصف الاحساس
    :)
    نعتذر عن هذا الوجع يا أستاذة :)
    وشكراً لذوقك الجميل ومرورك الطيب

    تحياتنا

    ردحذف
  14. P A S H A13‏/02‏/2012، 3:00:00 م

    βent Pasha
    :)
    ربنا ما يحرمني منك أبداً يا رب ، ويبارك لي فيكي يا قمر :)

    متشكر أوي على تشجيعك يا جميل :)

    الإيموشن ذاك :)

    ردحذف
  15. P A S H A13‏/02‏/2012، 3:02:00 م

    Israa' A. Youssuf
    :)
    ربنا يكرمك يا أستاذة وشكراً أوي لذوقك وبنعتذر عن الوجع يا فندم :)

    شرفتينا

    ردحذف
  16. P A S H A13‏/02‏/2012، 3:03:00 م

    أفكار مبعثرة
    :)
    يسلم ذوقك ومرورك الجميل :)
    ثفتي البت عثولة إزاي :))

    شرفتينا

    ردحذف
  17. P A S H A13‏/02‏/2012، 3:05:00 م

    rona ali
    :)
    يسلم مرورك الجميل وكلامك الرائع ، كفاية إنها تعجبكم والله

    شرفتينا

    ردحذف
  18. P A S H A13‏/02‏/2012، 3:06:00 م

    هدير
    :)
    أشكرك بجد على ذوقك يا أستاذة ربنا يكرمك يا رب ونأسف على الوجع :)

    شرفتينا

    ردحذف
  19. P A S H A13‏/02‏/2012، 3:08:00 م

    AHMED SAMIR
    :)
    يكفيني إنها تعجبك يا أستاذنا ، ربنا يعزك يا رب وشكراً لذوقك الراقي :)

    شرفتنا

    ردحذف
  20. P A S H A13‏/02‏/2012، 3:09:00 م

    E73
    :)
    ربنا يعزك يا أستاذة ، شكراً بجد لذوقك وتعليقك الجميل ونعتذر عن مسحة الكآبة
    :)

    شرفتينا

    ردحذف
  21. P A S H A13‏/02‏/2012، 3:32:00 م

    سنكوح شنن لملوم سامي
    :)
    أولاً : باشكرك بجد على رأيك الذي أسعدني جداً والله :)
    ربنا يكرمك يا رب ويعزك ، باتعلم منكم والله ومن أرائكم ونقدكم الذي أفتقده بشدة :(

    ثانياً : بالنسبة لجزئية الإبتزاز العاطفي أو ما وراء النص .. شوفي وبصراحة شديدة ، لما باكتب - ده على أساس إني باعرف أكتب أصلاً - ما باعرفش القصة هاتمشي إزاي ! (الفكرة) أولاً .. وبعد كده التعبير سواء في نص أو قصيدة .. جايز شخصية هي اللي تحرك الأحداث ، جايز طريقة السرد ، جايز موودي أثناء الكتابة .. بس في جميع الأحوال الفكرة من ورا الكتابة بالنسبة لي مثلما في القراءة مثلما في مشاهدة الأفلام هي المتعة .. أن أجدني فيما أكتب أو أقرأ أو أشاهد .. فأنا باكتب لمزاجي الشخصي - وده يمكن يكون عيب للأسف - !
    باحب التحدي في خلق الفكرة وتجسيدها والتعايش معاها وبناء الأحداث ورسم الشخصيات والتعبير عن كل ده بأسلوب يصل للقاريء .. جايز اللي يقرا يطلع بمعنى مختلف بعيد تماماً عن المعنى اللي كنت أقصده ! .. وجايز يتأثر وينفعل بما كتبت :) .. اللي بيفرحني جداً بجد قراءتكم للنص .. تغمرني بالبهجة والنشوة الخالصة :)
    حالتكم أثناء القراءة .. انفعالكم ، ضحككم ، تأثركم .. هو ده الترمومتر بتاعي !

    نسيبنا من اللت والعجن اللي فوق ده دلوقتي :))

    شرفتينا

    ردحذف
  22. P A S H A13‏/02‏/2012، 3:34:00 م

    كارولين فاروق
    :)
    ربنا يعزك يا رب ويكرمك :)
    شكراً بجد لذوقك الراقي ومروك الجميل الذي أسعدنا
    :)
    شرفتينا

    ردحذف
  23. P A S H A13‏/02‏/2012، 3:38:00 م

    موناليزا
    :)
    احم احم D:

    مش عارف ليه يا أستاذة تعليقك خللاني تنحت :)

    بس عموماً طالما أسعد حضرتك وخللاكي ضحكتي يبقى ده يكفينا والله :)

    شرفتينا

    ردحذف
  24. P A S H A13‏/02‏/2012، 3:40:00 م

    ديدي
    :)
    شكراً لذوقك الجميل وتعليقك الأجمل :)

    نهارك زي الفل :)

    شرفتينا

    ردحذف
  25. إيناس حليم14‏/02‏/2012، 10:56:00 ص

    فكرتني بواحدة صحبتي اخوها اتوفى في حادثة من 6 سنين تقريبا ولما بتيجي تتكلم عنه هي واختها وباباها ومامتها.. كلهم عمري ما شفت لمحة حزن واحدة في وشهم.. دايما كانت فيه ابتسامة كنت بستغربها لأنها بتكون صادقة اوي..
    صورته برضه في برواز كبير في وسط الصالة عندهم ودايما بينتهزوا أي فرصة عشان يتكلموا عنه..
    مش عارفة ليه افتكرتهم اوي من قصتك..

    أهم حاجة في الكتابة إنها تمسك حتى لو كانت بسيطة
    تحياتي

    ردحذف
  26. أمة الرحمن14‏/02‏/2012، 5:20:00 م

    حلو اوى السرد والاسلوب

    واعتقد انها بس تكبر مش هتضحك لما تشوف البرواز وهتعرف كتير

    تقبل مرورى

    ردحذف
  27. sony200014‏/02‏/2012، 9:58:00 م

    انا عيطت وانا بقراها

    جميييييييييله

    ردحذف
  28. P A S H A15‏/02‏/2012، 5:41:00 ص

    إيناس حليم
    :))

    تعليقك فرحني جداً والله ، ربنا يكرمك يا رب يا أستاذة ويجازيكي ألف خير إن شاء الله

    لك منا أطيب تحية

    شرفتينا

    ردحذف
  29. P A S H A15‏/02‏/2012، 5:43:00 ص

    أمة الرحمن
    :))

    أشكرك على ذوقك الراقي ومرورك الكريم

    كله بأوان :)

    ردحذف
  30. P A S H A15‏/02‏/2012، 5:45:00 ص

    sony2000
    :))
    مش عارف أزعل ولا أفرح بتعليقك يا سوني باعتذر إن كانت ضايقتك زي ما ضايقت كتير من الزملاء ،، وبجد نورتينا بزيارتك الجميلة وكلامك الأجمل :)
    شرفتينا

    ردحذف
  31. ريـــمـــاس15‏/02‏/2012، 9:05:00 ص

    صباح الغاردينيا
    رغم ألم القصة بس كان فيها أحساس حلو براءة الطفلة وشقاوتها حديث والدتها مع البرواز ووجود الاب دائما في تفاصيل الحياة رغم رحيلة ومع كل هذا لن أنكر أن دمعة سقطت على خدي رغم ابتسامتي فلازال برواز صورة والدي رحمه الله يتأملني بـ أبتسامة عريضة "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  32. P A S H A15‏/02‏/2012، 5:47:00 م

    ريـــمـــاس
    :)
    مساء الورد ، ربنا يكرمك يا رب ويرحم والدك ويسكنه فسيح جناته ويلهمك الصبر والسلوان
    شكراً لمرورك الرائع وتعليقك الراقي

    شرفتينا

    ردحذف
  33. Carol16‏/02‏/2012، 2:55:00 ص

    دافئة جدا :)

    أحب طريقتك في السرد فعلا و موضوعاتك
    بتشدني لأخر كلمة

    دمت مبدع :)

    ردحذف
  34. P A S H A16‏/02‏/2012، 4:30:00 م

    Carol
    :))
    تعليقك أسعدني جداً والله ، ربنا يكرمك يا رب ويجازيك كل خير ويسلم مرورك الكريم
    :)
    شرفتينا

    ردحذف
  35. zizi27‏/02‏/2012، 1:14:00 ص

    تسلم ايديك وتصبح على خير نتقابل بكرة مع الباقي ما انا حاكمل للآخر ان شاء الله ..تحياتي لك ولزوجتك الكريمة ..

    ردحذف
  36. P A S H A27‏/02‏/2012، 1:25:00 ص

    zizi
    :)
    أنا مش عارف أشكر حضرتك إزاي على متابعتك الجميلة وتعليقاتك الراقية الجميلة :)

    ولو أني ما كنتش أحب إن حضرتك تختمي بالموضوع النكد ده ! باعتذر جداً لو كان ضايق حضرتك .

    زوجتي إذ تهدي حضرتك أعطر تحية وأرق سلام

    لك منا أطيب تحية
    :)

    شرفتينا جداً

    ردحذف

لا يسمح بالتعليقات الجديدة.