عم حسن الساعاتي
زمان .. وأنت صغير .. كنت دايماً تيجي لي وتشتكي من أن ساعتك بتأخر .. كنت عيل زي كل العيال .. عاوز يجري .. ويطير .. ويسبق الزمن ! .. كنت باضحك عليك وأعمل نفسي باصلحهالك .. وكل اللي كنت باعمله إني بانضفها بالبنزين .. وأما كبرت شوية .. قلت لي أنك عاوز تبيعها علشان زهقت منها .. ومابقتش لايقة عليك .. ضحكت في سري وإديتك ساعة شكلها حلو .. بس تقليد .. وخلّيت ساعتك عندي وما رضيتش أبيعها .. لأن معدنها أصيل .. ما بيتغيرش .. مهما الزمن أتغير .. ولما كبرت رجعت خدتها .. إنما دلوقت يا ابني مش هاينفع أضحك عليك زي زمان .. وأقول لك أن الساعة فعلاً بتقدم ! .. لا يا ابني ! .. ساعتك مظبوطة .. بس الوقت هو اللي هرب منك من غير ما تحس ! .. لو مش عاجباك ارميها والبس أي ساعة غيرها .. وهاتلاقي أن الوقت هو الوقت .. لا بيقدم ولا بيأخر .. الوقت ما بيتغيرش .. ولا بيستنى حد ! .. حتى لو مشيت من غير ساعة .. أو وقـّفت كل ساعات الدنيا ! .. صبح فِ ليل .. يموت يوم .. ويوم في شهر .. سنة تخلص ! .. وآهو كله من عمرنا .. المشكلة إننا دايماً بنظبط ساعاتنا وما بنظبطش نفسنا .. سبحان من له الدوام !
زمان .. لما كنت أخدك ونطلع فوق السطوح نطير الطيارة الورق .. كنت دايماً بتسألني هي ليه مش بتوصل عند العصافير ؟؟ .. كنت باقول لك : علشان مربوطة بخيط .. رحت من ورايا وطولت الخيط .. وفضلت تطلعها .. تطلعها .. تطلعها .. لحد ما غابت عن نظرك واختفت .. رجعت لي ساعتها تعيط .. بخيط مقطوع .. ومن غير طيارة ! .. قلت لك : يا خايب ! .. بدل ما كنت تبـُص للعصافير .. كنت بـُص للقمر .. بـُص للنجوم .. كانت طيارتك هاتوصل وما كنتش هاتحتاج أنك تطول الخيط ! .. المهم إن عينك ما تبعدش عن طيارتك أبداً ! .. مهما اختفت .. ومهما الشمس ضربت في عينك ! .. والأهم ! .. ما تنساش أنك واقف برجليك ع الأرض ! .. بس يظهر أنك نسيت الكلام ده لما كبرت ! .. مش علشان بطلت تطير طيارات .. لأ ! .. علشان بطلت تحلم ! .. وقفت مكانك وعينيك في الأرض .. مستني القمر يمد لك إيده ويطلعك لفوق ! .. ومن كتر ما استنيت ! .. العصافير شخت عليك !
زمان .. لما قلتلي أنك بتحب لأول مرة .. قلت لك : ده مش حب ! .. زعلت مني وخاصمتني .. افتكرت أني راجل كبير وما بافهمش ! .. ما فيش شهر وسبتها .. ورجعت لي تعيط .. قلت لك : لو كنت بتحبها ما كنتش سيبتها ! .. أنت كنت عامل زي اللي ماشي فِ صحرا وميت م الجوع ! .. وأول حاجة لقاها راح واكلها .. من غير ما يعرف هي إيه ؟ .. وتنفعه ولا لأ ؟ .. كنت عاوز تحس أنك شبعان وخلاص .. تاني مرة بقى .. كنت غبي ! .. لأنك ما كنتش جعان ! .. أنت كنت تعبان ! .. وبدل ما تهدى وترتاح .. قلت تشتري أي حاجة تنفعك لما تجوع ! .. ولما ارتحت .. اكتشفت أنها ما تنفعكش وأنك اتسرعت ! .. تالت مرة .. ما كنتش قاصد تحب .. علشان كده حبيت واتجوزت.
زمان .. قبل ما تسافر .. جيت علشان تسلم عليا .. فضلت اتملى فيك كأني باصورك .. كأني باحفر ملامحك فيا .. كنت لابس نفس القميص الزهري المقلم والشيرز الرمادي على البنطلون الجينز .. ساعتها أنت رحت اشتريت خمس أرغفة من الفرن وجبنة اسطمبولي وفول حراتي .. لسه طعمهم في بقي لحد النهارده ! .. قلت لك : أن الغربة زي القمار .. الغالب فيها دايماً خسران .. ما سمعتنيش ! .. قلت لك : مش هاتشوف ولادك وهما بيكبروا قدام عينيك .. هاتنسى أهلك وصحابك والبيت اللي اتربيت فيه ! .. ما صدقتنيش ! .. قلت لك : إن ضحكت في الغربة مش هاتضحك من قلبك .. وإن بكيت ما حدش هايطبطب عليك .. وإن مـُت ما حدش هايمشي وراك .. قلتلي : طولة العمر للقرش ! .. طيب ! .. أديك سافرت واتغربت عشرين سنة .. وراجع بنفس الهدوم اللي كانت عليك قبل ما تسافر ! .. القميص الزهري المقلم والشيرز الرمادي على البنطلون الجينز .. إيه اللي حصل ؟؟ .. خدت شقة أوسع في منطقة أنضف ؟؟ .. بس طالما ما حدش يعرفك فيها تبقى منطقتك دي برقبتها ! .. شيلت قرشين في البنك ؟؟ .. تقدر تشتري بيهم أهل وصحاب بدل اللي نسيتهم ؟؟ .. تعرف تشتري بيهم ذكريات تعوض بيها سنين الغربة ؟؟ .. تقدر ترجع الزمن عشرين سنة ؟؟ .. ما تعيطش يا ابني ! .. ما تعيطش ! .. مد إيدك فوق الرف هاتلاقي طيارتك القديمة .. إديها لابنك الصغير يطيرها .. متهيألي دلوقت لو سألك : هي ليه مش بتوصل عند العصافير هاتعرف ترد عليه .(تمت)
* الصورة من مدونة بنت الصعيد
مؤقتا
ردحذف:))
الله عليه وعليك....خد دي بقى زمان كان الواحد يعلق عندك براحته...دلوقتي مممكن تقفل على ايده التعليقات وهو بيكتب...حلو اوووي عمه الساعاتي ده والله عبقري والصورة تحفة...كل سنة وانت طيب ياباشا
ردحذفواخيرا" قدرت اعلق .. اصل صفحتك هي المدونه الوحيده اللي كل ما اجي اعلق فيها تطلع لي مسيج تقول ان حسابي غير مسجل عندك :(
ردحذفوالله انت مبدع يا شريف حبيت النصايح اللي مليانه تجارب ... روعه والله :)
مش لاقية كلام أعلق بيه بجد
ردحذفحلوة
ومؤثرة
وعجبنى جدا الفقرة الأخيرة الخاصة بالغربة راااائعة
( متهيألي دلوقت لو سألك : هي ليه مش بتوصل عند العصافير هاتعرف ترد عليه )
ردحذفصح صح صح
محدش بياخد م الدنيا كل حاجة
معبرة جدا جدا ومؤثرة أوي
تسلملي ايديك يارب ياشريف ويباركلي فيك و ف رقة خيالك
دمت لي مبدعا يازوجي الحبيب
وكل سنة وأنت بكل صحة وخير وسعادة وهنا
زوجتك
" الغربة زي القمار .. الغالب فيها دايماً خسران" صــــــــــــــــح جدا وأنا برضه بقول كده
ردحذفالقصة رائعة وجاتلي في الوقت المناسب
أخيرا عرفت أكتب كومنت هنا:)
جميلة جدا جدا
ردحذفاحلى حاجة ان الكتابة بالعامية مش دايما بتليق على كل الناس :)
لكن كتابتك العامية رائعة .. عجبتني جدا جدا
كل سنة وانت طيب ياباشا وعيد سعيد عليك ان شاء الله
ردحذفالقصة اكثر من رائعة وتحمل من العبر والمعانى الكثير والكثير
المهم إن عينك ما تبعدش عن طيارتك أبداً ! .. مهما اختفت .. ومهما الشمس ضربت في عينك ! .. والأهم ! .. ما تنساش أنك واقف برجليك ع الأرض !
ردحذفدي أكتر فقره أثرت فيا...والبوست كله تحفه
شريف انت بجد مبدع .... كل سنه وانت طيب وبخير وصحه وسعاده وكل سنه برضه وانت مبدع ...
βent Pasha
ردحذف:))
ولا واحد ولا ميه ولا ألف وتلتميه ولا كل الدنيا ديه ولا ولا مليون
ده حبيب القلب هو واللي ساكن قلبي جوه ولا غير الواد داهوه ولا ولا مليون
(الأسطى حكيم أيام ماكان بشعر) D:
♥♥♥♥♥
هابي فالانتاين داي :)
بحبك
(جوزك الأسطى/شريف وهو لسه بشعر)
ههههههههههههههههههههههههههههه
أموت وأشوفك لما تقري التعليق ده !
هههههههههههههههههههههههههههههه
Tarkieb
ردحذف:))
عمي الغالي .. وربنا منور الدنيا كلها يا ريس ! .. أشكرك بجد على ذوقك وتعليقك الجميل .
بالنسبة لقفل التعليقات أنا بجد باعتذر جداً جداً لحضرتك ولكل الناس الحلوة اللي بتشرفني هنا .. هو السبب ممكن يكون غريب شوية بس أنا واثق أن حضرتك والسادة الزملاء الأفاضل هاتفهموني :)
- باعتبر أن أي بوست جديد زي الأكلة السخنة .. اللي باحب الناس كلها تشرفني وتدوقها معايا وتقوللي رأيها فيها (وهي سخنة) .. وباعتقد كمان أنها مسألة نصيب ! .. حاجة كده زي ما بنقول بالبلدي : "كل لقمة بتنادي آكلها" .. طبعاً بافرح جداً بالتعليقات وبكل الناس اللي بتشرفني وبتكلف نفسها وبتقرالي حتى لو ما علقتش .. بس أنا ما باصدق أنشر البوست .. كأني كنت باولده وخلصت !! .. بعد النشر بامسحه من ذاكرتي تماماً .. وابدأ مرحلة النقد والتنقيح والتعديل .. أنا أصلي قلوق جداً وباقعد أقرا الحاجة بعد ما تتنشر ييجي عشرين مرة ! .. وبابقى بجد بجد منتظر لأي تعليق فيه نقد وملاحظات وتصحيح وتعديل .. بابقى محتاج أتعلم وأعرف اخطائي .. معايا ؟؟ .. قشطة :))
فرضاً جت لي فكرة تانية بقى ؟؟ .. يبقى ولا كأني أعرف البوست ده ! باتبرى منه ههههههههههههههه وأقفل التعليقات فوراً وابدأ أكتب في البوست الجديد ! .. لأن طول ما فيه تعليقات مش هاعرف أركز في البوست الجديد .. ثانياً ما باحبش أهمل أي تعليق أو أتأخر عليه في الرد باحسها قلة ذوق مني بصراحة ! .. يعني الناس تكلف نفسها وتيجي تشرفني وتقرالي وتعلق وأنا أنفض لهم ؟؟ .. ثالثاً فيه مواضيع بتبقى شخصية نتيجة موود معين .. ودي في الغالب بامسحها تاني D:
صدعتك أنا عارف :))
كل سنة وحضرتك طيب وبألف خير وصحة وسعادة إن شاء الله وعيد سعيد بإذن الله
ساره
ردحذف:))
يا ألف أهلاً وسهلاً يا أستاذة منورانا والله وأشكرك بجد على مرورك الكريم وتعليقك الجميل الذي أسعدني .. ربنا يكرمك يا رب .. باعتذر جداً عن موضوع حسابك الغير مسجل أنا بس قفلت التعليقات للغير معرف :))
كل سنة وحضرتك طيبة وبألف خير وصحة وسعادة إن شاء الله وعيد سعيد بإذن الله
موناليزا
ردحذف:))
ربنا يكرمك يا أستاذة ويجازيكي ألف خير إن شاء الله على تعليقك الجميل ومرورك الطيب الذي يشرفني دوماً
:)
كل سنة وحضرتك طيبة وبألف خير وصحة وسعادة إن شاء الله وعيد سعيد بإذن الله
Lady E
ردحذف:))
ربنا يكرمك يا رب ويجازيكي ألف خير إن شاء الله على تعليقك الجميل ومروك الكريم الذي يسعدني دوماً .. بالنسبة لقفل التعليقات فأنا باعتذر جداً والله (اقري ردي على Tarkieb) .. كل سنة وانتي طيبة وبألف خير وصحة وسعادة إن شاء الله وعيد سعيد بإذن الله
قهوة بالفانيليا - شيماء علي
ردحذف:))
يا ألف أهلاً وسهلاً يا مبدعة منورانا والله .. باعتقد أن اللغة العامية دافئة وحميمية.
:)
أشكرك بجد على زيارتك الكريمة وتعليقك الجميل الذي أسعدني .. ربنا يكرمك يا رب
كل سنة وحضرتك طيبة وبألف خير وصحة وسعادة إن شاء الله وعيد سعيد بإذن الله
همس الاحباب
ردحذف:))
أخويا الكبير الغالي .. منورني والله بتعليقك الجميل
:)
ربنا يكرمك يا خالد يا رب ويجازيك كل خير إن شاء الله ربنا يفرحك ببناتك ويحفظهملك من كل سوء اللهم آمين
كل سنة وأنت طيب وبألف خير وصحة وسعادة إن شاء الله وعيد سعيد عليك بإذن الله
البنفسج الحزين
ردحذف:))
يا ألف أهلاً وسهلاً يا دكتورة مشرفانا والله .. ربنا يكرمك يا رب ويجازيكي كل خير على تعليقك الرائع ومرورك الجميل الذي يسعدني دوماً
:)
كل سنة وحضرتك طيبة وبألف خير وصحة وسعادة إن شاء الله وعيد سعيد عليكي بإذن الله
جدتى كانت بتقول
ردحذفالغربة(تربة)لكن
الزمن أتغير وبقى
الاب والأم بيساعدوا
اولادهم للبعد والسفر
وكمان يمكن وسائل الاتصال
خلوا (الغربة)مش تربة أوووى
حلوووة القصة
ردحذفتسلم أيديك
وأضحى مبارك عليك
ردحذفوعلى اسرتك الكبيرة
والصغيـــــــــــــــــــرة
حزينة قوي بس ممكن أختلف في موضوع الغربة اللي العمر بيضيع فيها دي؟مش كل الغربة كدة أوقات خيالنا الشاعري المرتبط بأرضه بيصور لنا أن الغربة مرار و بس..لكن أحياناً بتكون نعمة محدش مقدرها.
ردحذفالتغيير سنة الحياة...عدم التغيير ركود و موت في نفس المكان و اللحظة... العمر اللي هيتعاش هنا هيتعاش زيه هناك...قد تختلف المتعة بس محتاجة الواحد يطور دماغه و يشيل منها فكرة أن العمر اللي بيعدي بعيد عن الأهل هو عمر ضايع
norahaty
ردحذف:))
يا ألف أهلاً وسهلاً يا دكتورة .. منورانا والله .. عم حسن برضه رأيه من رأي جدتك .. وكان دايماً يسأل : لما الكل هايسافر ويتغرب - ده على أساس أن لسه فيه سفر - مين اللي هايعمر البلد دي ؟؟
شرفتينا بتعليقك الرائع ومرورك الجميل الذي يسعدني دوماً
كل سنة وحضرتك طيبة وبألف خير وصحة وسعادة إن شاء الله وعيد سعيد عليكي بإذن الله
Mona el Dawakhly
ردحذف:))
يا ألف أهلاً وسهلاً يا أستاذة .. منورانا والله .. باتفق معاكي إلى حد كبير في رأيك .. بإستثناء : "و يشيل منها فكرة أن العمر اللي بيعدي بعيد عن الأهل هو عمر ضايع" هو مش عمر ضايع بس ناقصه حاجات كتير ! .. الفكرة اللي كانت مسيطرة عليا وأنا باكتب البوست ده : الناس اللي بتشتري الرخيص بالغالي .. أنا مش ضد السفر بس ضد الغربة .. مش ضد اللي يسافر يسعى ورا رزقه بس ضد الناس اللي بتسافر وتحرم نفسها من كل حاجة علشان تحوش .. وفي الآخر ؟؟ تضيع أحلى سنين عمرها علشان شقة وعربية وفلوس في البنك مش ضامنين إذا كانوا هايلحقوا يتمتعوا بيهم ولا لأ ؟؟ .. ضد اللي اختار بإرادته يتحرم من أهله ويحرم أهله وولاده منه .. أنا ضد الغربة بس مش ضد الناس الغرباء اللي سواء عايشين بره أو جوه ما حدش يعرف عنهم حاجة وزي قلتهم !
خللي بالك كمان أن مفهوم السفر في ثقافتنا هو مفهوم خاطيء إلى حد كبير .. تلاقي مثلاً الأم من دول لو بنتها راحت الدرس تتصل بيها كل خمس دقايق .. لو الواد نزل يجيب خمس أرغفة تفضل بصه عليه من الشباك ! وتضربه بالشبشب لأنه جه من الشارع اللي ورا أو علشان نزل من ع الرصيف ! .. الخوف المرضي ! .. الخوف من المجهول عموماً .. فكرة أن بلدنا أحسن بلد في الدنيا والتانيين دول كفار ! مشهد يومي متكرر بيستفزني : اتنين واقفين مستنيين ميكروباص ربع ساعة مثلاً ولما ييجي ياخدوا بعض بالأحضان وينزلوا بوس ولا كأنها مهاجرة كندا مثلاً ! .. وهي بالكتير نازله بعد محطتين ! .. .. مع أن الدنيا فعلاً بتتغير والزمن بيجري .. وقريب قوي هاتلاقي الميكروباص في الجيزة بينادي : نفر ميلانو ميلانو .. فاضية كراسي ميلانو ميلانو !
"قلت لك : يا خايب ! .. بدل ما كنت تبـُص للعصافير .. كنت بـُص للقمر .. بـُص للنجوم " .. لو هاسافر يبقى علشان أتعلم وعلشان أشوف بلاد جديدة وناس وأماكن وثقافات جديدة .. أسافر علشان أعيش .. إنما علشان أموت بالحيا لأ .. طب ما أنا الحمد لله عايش هنا – حتى لو على قدي – بس برضه الحمد لله أحسن من ناس كتير .
شرفتينا بتعليقك الرائع ومرورك الجميل الذي يسعدنا دوماً
كل سنة وحضرتك طيبة وبألف خير وصحة وسعادة إن شاء الله وعيد سعيد عليكي بإذن الله
أهلا و سهلا
ردحذفمدونة الزمن الجميل تتمنّى لك عيدا سعيدا
و كلّ عام و أنت أنقى و أتقى و أرقى
http://zaman-jamil.blogspot.com/
كل سنه وانت طيب وبخير
ردحذفجميله القصه وجميله الحكايه
ولسه الاحلام برده جوانا ولسه بنحلم نوصل الطياره عشان تطير بين العصافير ولو الخيط اتقطع هنعمل خيط اجمد ولو الزمن بيفوت هنعيش احلى ما فيه
تحياتي
منجي باكير
ردحذف:))
يا ألف أهلاً وسهلاً يا فندم .. كل عام وأنتم بألف خير وصحة وسعادة وراحة بال إن شاء الله
شرفتنا بزيارتك الكريمة وتعليقك الجميل
eng_semsem
ردحذف:))
يا ألف أهلاً وسهلاً يا باشمهندس .. يسلم ذوقك ومرورك الكريم وتعليقك الجميل الذي أسعدني جداً
خالص تحياتي وعميق تقديري
دمت في خير وسعادة