لانك جميلة
لانك جميلة .. فلزماً أقول
ولزماً أوصّف ف بنت الأصول
بحبك ولكن .. أبص ف عينيكي
بتصعب ف عيني جميع الحلول
♥♥♥
لانك جميلة .. وعالم بذلك
بحبك وخايف .. أقولها لذلك
لانك حبيبتي .. إذا قلتي لأه
فده يعني إني .. بلا شك هالك
♥♥♥
لانك جميلة .. ووشك بشوش
إله الجمال .. لكل الوشوش
وبسمة شفايفك .. تحولني فارس
يحارب فداها .. ويهزم جيوش
♥♥♥
لانك جميلة .. وحسنك بديع
بلمسة إيديكي .. تِصَحي الربيع
وورد الجناين .. يفتح عشانك
كأنِك بلمسة .. حييتي الجميع
♥♥♥
لانك جميلة .. قبلت الخضوع
وكل أما أقاوم .. تخونني الدموع
فلو كنت ليلى .. أنا ابن الملوح
ولو كنت مريم .. أنا ابنك يسوع
♥♥♥
لانك جميلة .. وحضنك وطن
وانا عشق تايه .. لقيتك شجن
ف حضنك حبيبتي عرفت الأمان
تماماً كأني ف جنة عدن
♥♥♥
لانك جميلة .. وطبعك خجول .. بلاش الكسوف
هانصبح عرايا .. ونهرب بعيـــــــد .. ما حدش يشوف
ونرمي همومنا .. وخنقة هدومنا .. فِ وسع الغابات
نعيش اللي فات .. كأدم وحوا .. فِ قلب الكهوف
♥♥♥
ختاماً .. باقوللك .. وأنا فوق حصان
وسيفي ف إيدي .. ووردة كمان
حبيبتي .. هاجيلك .. ف أبعد مكان
هاجيلك منامك
ف صحبة ملايكة .. هاتيجي عشانك
تغني .. وترقص .. وتسمع كلامك
لحد أما تصحي .. تلاقي أمامك
حبيبك واقف لك بفل وريحان
وأقوللك ..
بحبك .. بحبك .. بحبك
يا ريتك كمان
♥♥♥
سبتمبر 2004
*****
تعليقات