للي يفهم !!

حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي !!!
***
يأسك و صبرك بين ايديك و أنت حر
تيأس ما تيأس الحياه راح تــــــــمر
أنا دقت من ده ومن ده عجبي لقيــــــت
الصبر مر و برضك اليـأس مـــــــر
عجبي!!!
***
لا تجــــــبر الإنسان ولا تـــخيره
يكفيه ما فــيه من عقل بيحيره
اللي النهارده بيطلبه ويشتهيه
هوا اللي بكره ح يشتهي يغيره
عجبي !!!
***
الدنيا أوده كبيره للانتظار.....
فيها ابن آدم زيه زي الحمار....
الهم واحد والملل مشترك......
ومفيش حمار بيحاول الانتحار..
عجبي !!!
***
أنا شاب لكن عمري ولا ألف عام......
وحيد ولكن بين ضلوعي زحام...........
خايف ولكن خوفي مني أنا.................
أخرس ولكن قلبي مليان كلام...............
عجبي!!!
***
ليه يا حبيبتي ما بيننا دايماً سفر....

ده البعد ذنب كبير لا يغتفر......
ليه يا حبيبتي ما بينا ديماً بحور....
أعدي بحر.... ألاقي غيره اتحفر...
عجبي !!!
***
دخل الشتا وقــفـل البيبـان ع البـيوت
وجـعل شعاع الشـمس خيط عنكبوت
وحاجات كتير بـتمـوت في ليل الشتا
لكن حاجات أكـتر بـترفـض تــمـوت
عجبي !!!
***
سلاااام .. سلاااام .. سلاااام .. سلاااام

كلاااام .. كلاااام .. كلاااام .. كلاااام

هز الـورق كدهــــــــوه ... يطلع

سـلام كـلام ... وكـلام سـلام

عجبي !!!
***
سمعت نقطه ميه جــوه المحيط
بتقول لنقطه ما تنزليش في الغويط

أخاف عليكي م الغرق ..... قلت انا
ده اللي يخاف م الوعد يبقى عبيط
عجبي !!!
***
أنا كنت شيء وصبحت شيء ثم شيء
شوف ربنا .... قادر على كل شيء
هز الشجر شواشيه ووشوشنى قال :
لابد ما يموت شيء عشان يحيا شيء
عجبي !!!
***
عيني رأت مولود على كتف أمه
يصرخ تهنن فيه يصرخ تضمه
يصرخ تقول يا ابني ما تنطق كلام
ده اللي ما يتكلمش يا كتر همه
عجبي !!!
***
أيوب رماه البين بكل العلل..
سبع سنين مرضان وعنده شلل..
الصبر طيب.... صبر أيوب شفاه..
بس الأكاده مات بفعل الملل..
عجبي !!!
***
يا خالق الـــكون بــالحســاب والجــــبر
وخـــــالقني ماشي بالاختيار والجـبر
كل اللي حيلتي زمزميه أمل
وإزاي تكفيني لباب القبر؟
عجبي !!!
***
أنا قلت كلمة وكان لها معنيين
كما بطن واحده وتوأمين زين وشين
لو دنيا شر .... التوأم الخير يموت
ولو دنيا خير... الشر هايعيش منين ؟؟؟

عجبي !!!
***
حدوتة عن جعران و عن خنفسة..
اتقابلوا حبوا بعض ساعة مسا.....
ولا قال لهم حد اختشوا عيب حرام...
ولا حد قال دي علاقة متدنسة؟؟
عجبي !!!
***
أنا اللي بالأمر المحال اغتوى..
شفت القمر نطيت لفوق في الهوا..
طلته ما طلتوش إيه أنا يهمني....
وليه ...ما دام بالنشوة قلبي ارتوى.
عجبي !!!
***
علم اللوع أضخم كتاب في الأرض..
بس اللي يغلط فيه يجيبه الأرض.....
أما الصراحة فأمرها ساهل .......
لكن لا تجلب مال ولا تصون عرض...
عجبي !!!
***
ايـــديا فـي جيــوبي وقلــبي طــرب
سارح في غـربــه بس مـش مغترب
وحــدى لكين ونسان وماشي كـده
بابتعد ...ما أعـــرفش ...أو باقــتــرب
عجبي !!!

***
جالك أوان ووقفت موقف وجود..
يا تجود بده يا قلبي يا بده تجود..
ما حد يقدر يبقي على كل شيء...
مع إن...عجبي...كل شيء موجود...
عجبي !!!
***
يــاللي عـرفت الحـب يــوم وانــطوى
حســك تقــول مشتــاق لــنبع الهــوى
حســك تقــول مشتـــاق لنبـــع الغــرام
ده الحب.. مين داق منه قطرة.. ارتوى
عجبي !!!
***
سنوات وفــايته عليـا فوج بعد فوج

واحــدة خــدتنى ابن والتــانـية زوج
والتـالتة أب خـدتني والــرابعة إيه
إيه يعمل اللي بيحدفه مـوج لمــوج ؟؟؟
عجبي !!!
***
ياما صـادفت صــحاب وما صحبتهمش
وكاسـات خمــور وشراب وما شربتهمش
أندم على الفرص اللي أنا سبتهم
ولا على الفرص اللي مـا سـبتهمش
عجبي !!!
***
حبيت...لـكن حب من غـير حنــان
وصـاحبت لـكن صحبة مـالهــاش أمـان
رحت لحكــيم وأكتـر لقيـت بــلوتي
إن اللي جـوه القلب مش ع اللسان
عجبي !!!
***
عجبي عليك.. عجبي عليك يا زمن
يا أبو البدع.. يا مبكي عيني دمــــاً
إزاي أنا.. أختار لروحي طريـــــــــق
و أنا اللي داخل في الحياة مرغماً
عجبي !!!
***
ضريح رخام فيه السعيد اندفــــــن
وحفره فيها الشريد من غير كفن
مريت عليهم .. قلت يا للعجـــــب
لاتنين ريحتهم لها نفس العفـــن
عجبي !!!
***

أه لـو أنا ومحـبوبي جــزنـا الفضـا
في سفينـه وحـدينـا ...وآشيـا رضا
سـاعـه صفـا تعجبنـا نـرجع لهـا
والهم قبل ما ييجي ....يبقى مضى
عجبي !!!
***
سهير ليالي وياما لفيت وطفت
وف ليلة كنت راجع ف الضلام قمت شفت
الخوف كأنه كلب سد الطريق
وكنت عايز أقتله بس خفت

عجبي !!!
***
اقلع غماك يا تور وأرفض تلف

اكسر تروس الساقية وأشخر وتف

قال.. بس خطوة كمان وخطوة كمان

يا أوصل نهاية السكة يا البير يجف

عجبي!!!
***

 *  من رباعيات عمنا صلاح جاهين

 * نُشرت هذه التدوينة في المدونة القديمة بواسطة: hamotta  وهو الاسم المشترك الذي كان يستخدمه كلا من: الدوك وباشا الذي كان يدون حينئذ باسم (boshkashi)