هزني - ابدأ من جديد - لما ابتدينا نغني - لما كان البحر أزرق

كلمات الأغاني: هاني زكي

ألحان وتوزيع: هاني شنودة

ألبوم: ابدأ من جديد - فرقة المصريين 1981

***


هزني

للاستماع: من هنـــــــا



قبل ما أقابلك

كنت باحس إن أنا عديت سن الستين

كنت باحس شبابي عنوان فيلم قديم

من أيام السينما الصامتة


***

هزني

هزني من جوه

هز بقوة

غير كل خرايط الكون

غير مواعيد وساعات اليوم

غير ترتيب أيام الشهر

غير ألوان السما والبحر

كسر أصنامى

علمنى أتمرد على أوهامى

علمنى أثور على يأسي وعلى أحزاني

وأهرب من الخوف وأحب


***

كنا صغار وكبرنا

رحنا مدارس واتعلمنا

إزاي نتستر على مشاعرنا

زي أسير هربان

من حكم بالإعدام

قضبان وراها قضبان

وحيطان حواليها حيطان

احنا السجين واحنا السجان

وحياتنا عيب وحرام وغلط وكلام و
كلام وكلام

***

قريت كتير وما اتعلمتش

قطعت تذاكر لكن ما سافرتش

ومشيت مشيت سنين ما وصلتش

الليل زي النهار

والصيف زي الشتا

بين حيرة الانتظار ودمعة البكا

الليل من غير أحلام ونهار من غير أمل

وتنتهى الأيام م الوحدة والملل

علمني أضحك علمني أبكي

علمني أكون على طبيعتي

علمني أفكر وصوتى عالي

علمني أصرخ وأقول بحبك
.

.
.
وأعيش وأعيش وأحب
ـــــــــــــــــ




ابدأ من جديد

للاستماع: من هنــــــــــا



مهما كان حلمك بعيد

مهما كان صعب عنيد

حتى في نهاية الطريق

ابدأ من جديد

فيه حاجات كتير بين إيديك

الكون أسرار عايشة فيك

والشمس الصبح بتناديك

بتقول لك ابدأ من جديد

***

بحار وحيد واقف على السفينة

بيدندن غنوة ليها ذكريات

ودع سماه وأسوار المدينة

وراح يدور عن حياة تانية هناك

سايب وراه قصة في كل مينا

عمره ما فكر يلتفت وراه

ياما الرياح لعبت بالسفينة

وفي كل مرة الشمس تطلع من جديد

***

إنسان بسيط .. إنسان زيي وزيك

راهن في يوم بكل اللي معاه

على أن الشمس في ميعادها هترجع

وهو ده سر سعادته في الحياة

ابدأ جديد ده فيه زهور بتكبر

وما دام فيه شمس وقمر وليل

وفي الطريق هتلاقي نفسك

وحضن دافي تتسند راسك عليه

ـــــــــــــــــ


لما ابتدينا نغني


للاستماع: من هنـــــــا


لما ابتدينا نغني .. قلنا بحبك لا

قالوا علينا بنحلم .. الحلم حققناه

احنا اتولدنا بنضحك احنا أمل وحياة .. احنا أمل وحياة

الغنوة بالنسبة لنا عالم بلا أسوار

كل الزهور حقيقية والفجر والأنوار

وما فيش سما صناعية .. ما فيش غيوم وسحاب .. ما فيش دموع وعذاب

جبنا لغنوتنا .. زهور جناينا .. ضحكة طفولتنا .. أول أمل لينا

جبنالها إحساسنا .. كل مشاعرنا .. أصدق تجاربنا .. وحلم عاش فينا

هنغني للعالم على طريقتنا

نخلق بغنوتنا دنيا من الأنغام .. دنيا من الأحلام

في وسط كون حيران .. عيشنا أمل وحياة

***

الغنوة معبدنا .. وقلوبنا فيها شموع

بنحس من غيرها أجسادنا من غير روح

وفيها أوطاننا وركننا الدافي .. وأرض أحلامنا عايشة وبتنادي

***

هاتمر بينا سنين .. تتغير الألوان .. تتبدد الأوهام .. يمكن نكون عايشين

هييجوا ناس تانيين .. نفس المكان واقفين .. في ليلة تحت الضوء .. هيغنوا حلم جديد

ويغنوا للعالم على طريقتهم .. ويعيشوا دنيتهم دنيا من الأنغام .. دنيا من الأحلام

وفي وسط كون فرحان .. هيغنوا للإنسان

لما ابتدينا نغني قلنا بحبك ** كان سهل جداً نكدب .. لكن بحبك **

احنا اتولدنا بنحلم .. الحلم حققناه .. الحلم حققناه

الغنوة بالنسبة لنا عالم بلا أسوار

كل الزهور حقيقية والفجر والأنوار

وما فيش سما صناعية .. ما فيش غيوم وسحاب ما فيش دموع وعذاب

ـــــــــــــــــ


لما كان البحر أزرق

 
للاستماع: من هنـــــــا

(هي)

لما كان البحر أزرق .. والنجوم لسه ف مكانها

وطيور بتحلم فوق الشجر كل يوم

لما كان ممكن أصدق .. إن السعادة كلمة واحدة

ما كنتش أقدر أقرا ما بين السطور

كنت عايشة ما بين إيديك .. كنت سراب تحت سماك

وكان هناك البحر أزرق .. لكن في يوم كان لازم أبدأ

أعيش حياتي وأخلق لذاتي كيان


(هو)

اديتها سنين حياتي .. اديتها كل حاجة

علمتها تجاربي .. الحب ، السعادة

الصبح سافرت وسابت لي ورقة

"هاختار طريقي"

الشمس طلعت وهي بعدت

وأنا وحيد


(هي)

تاهت ملامحي بين ملامحك .. حتى أفكاري وخيالي

حتى أحلامي وإرادتي .. كنت نور وكنت ضلك

واكتشفت من تجاربك .. اللي يوم علمتها لي

إني لازم أكون أنا عشان أحبك أنت

وألمس بنفسي:

إن لون البحر أزرق

إن النجوم لسه ف مكانها

وطيور بتحلم فوق الشجر كل يوم

لأن كان إزاي أصدق

إن السعادة كلمة واحدة

لكن هادور وأقرا ما بين السطور

*** 



* كلمات أغنية (هزني) من مدونة: ذكريات الأغاني .. اللي فيها بوست هايل عن الأغنية

* كلمات أغنية (لما كان البحر أزرق): (wnature - (Neveen El-Gamal

فشكراً جزيلاً لهما :)

تعليقات