إعلان بطاطس


المخرج: ياللا ستاند باي .. أكشن!!

الممثل:

بافتح كيس البطاطس

لقيت فيه حد عاطس

المخرج منفعلاً: ستوب!! عاطس إيه يا أستاذ؟؟ إيه القرف ده؟؟

الممثل وهو ينظر إلى كيس البطاطس المفتوح في يده: ما هو قرف فعلاً!!

المخرج: مش قصدي المنتج أنا قصدي الكلام اللي حضرتك بتقوله!! غاطس غاطس فيه حد غاطس!! أنت ما قريتش الورق ولا إيه؟؟

الممثل: بصراحة لأ!! أصلي نسيت نضارة القراية في العربية .. وبعدين غاطس دي غريبة قوي!! هو كيس بطاطس ولا بلاعة؟؟

المخرج: يا أستاذ احنا مالنا!! احنا هناكله؟؟ .. ده إعلان!! شغل يا أستاذ .. شغل.. ياللا يا جماعة ستاند باي أكشن:

الممثل:

بافتح كيس البطاطس

لقيت فيه حد غاطس

بيقول لي كل و .. رجّع؟؟ .. رجّع؟؟

المخرج: ستوب!! أيوه يا سيدي رجّع!! كمل أرجوك!!

الممثل متأففاً: أكمل إيه؟؟ ده إيه الإعلان المقرف ده؟؟

المخرج: يا أستاذ من فضلك كمل الجملة علشان تفهم!! .. إيه يا بنات مالكوا وقفتوا ليه؟؟ .. كملوا رقص ياللا وابتسموا من فضلكم وأنتوا ماسكين المنتج!! .. ياللا؟؟ .. أكشن!!

الممثل: ما علينا!!

بافتح كيس البطاطس

لقيت فيه حد غاطس

بيقول لي كل ورجّع

العضلة للمجانص

الممثل: أأه .. مع أنه كلام هجص، بس كده اتفهمت شوية!!

المخرج: يا أستاذ أرجوك كمل وما تعلقش!! .. ويا ريت تمشي مع اللحن .. أكشن!!

الممثل وهو يغني:

بافتح كيس البطاطس

لقيت فيه حد غاطس

بيقول لي كل ورجّع

العضلة للمجانص

المخرج يشير له بإبهامه علامة أنه يؤدي بشكل جيد

الممثل:

برابير دي أحلى .....

المخرج: برابير إيه بس يا أستاذ؟؟ برابيز .. برابيز .. المنتج اسمه برابيز!!

الممثل: حد في الدنيا يسمي البطاطس برابيز؟؟

المخرج: يا سيدي هما حُرين!! يسموه زي ما يسموه!! وبعدين هي جت ع الاسم؟؟ ما المنتج كله عاوز الرمي!!

الممثل: على رأيك، أهو أي قرف في كيس وخلاص!! وبكام الكيس ده على كده؟؟

المخرج: بعشرة جنيه

الممثل: ده بعشرة جنيه؟؟ ليـــــه؟؟ ده ما فيهوش بعشرة صاغ بطاطس!!

المخرج: ده لو لقيت فيه بطاطس أصلاً .. وعموماً هاقول لك ليه .. علشان أجر حضرتك في الإعلان ده عشرة مليون جنيه غير عشرين مليون جنيه للشركة اللي ماسكة الحملة غير ...........

الممثل: خلاص خلاص فهمت!!

المخرج: طيب أرجوك كمل وأقرا صح .. ياللا يا بنات ابتسموا .. وأنتي يا حلوة ارفعي الفستان شوية الأندر مش بيبان وأنتي بتلفي يا ماما!!

الموديلز: أنا مش لابسة أندر يا أستاذ!!

المخرج: طيب تمام .. ياللا .. أكشن!!

الممثل:

برابيز دي أحلى نكهة

فراخ حاطين وراكها

وجبنة موتزاريلا

وشطة كتير فركها

كمان خل وليمون

ولانشون بالزيتون

من غير مواد حافظة

وخالية م الدهــــون

الممثل يمد يده بكيس البطاطس في مواجهة الكاميرا: برابيز كل وموت

المخرج: ستــ ....

الممثل: سوري سوي .. خلاص قريتها

برابيز كل ومـَوِن

المخرج: ستوب!! .. هايل يا فنان!! .. أجهز بقى علشان نسجل .. أوك؟؟ .. بتلبسي الأندر ليه؟؟ .. أنتي فاكرة نفسك في البيت؟؟ .. ده مكان شغل يا ماما!!