الرقم الكبير

- شفت الإعلان ده؟؟

- إعلان إيه؟؟

- اللي بالإنجليزي ده

- هو أنا باعرف عربي لما هاعرف إنجليزي!!

- ياد طالبين ناس تشتغل

- وأنت عرفت منين؟؟

- مكتوب فيه فلوس


- كام؟؟

- عشرتلاف دولار
في الشهر!!

- ده انا أشتغل شهر واحد وبعد كده إن شالله حتى يعدموني ما فيش أي مشكلة!! بس هيرضوا يشغلوا حد من المنطقة المعفنة اللي احنا فيها دي؟؟ ده أنا لما باقف في كمين باقول له ما عييش بطاقة علشان يسيبني بدل ما يشوفها ويشدني!!

- وإيه اللي يخلينا نقول لهم إن احنا من هنا؟؟

- أمال نقول لهم احنا منين؟؟

- أي حتة نضيفة، بص أنا هاقول أني من المعادي

- قشطة يا زميل وأنا معاك

- وماله يا عم تنورني، منين بقى في المعادي؟؟

- من دار السلام

- !!

- بدل ما نقعد نفكر في عنوان، دار السلام معروفة يعني وكلها محطتين مترو!!

- ششششش اسمع أنا هاكتب 7 ميدان المعادي

- قشطة وأنا كمان 7 شارع المعادي

- شارع؟؟ الميدان خليته شارع؟؟ وبعدين هي الدنيا ضاقت بيك جي تسكن معايا؟؟

- يا زميلي علشان لو اتأخرت بالليل تلاقي حد يرمي لك المفتاح!!

- لا لا لأ أنت 5 ميدان المعادي

- واشمعنى أنت تاخد الرقم الكبير؟؟

- هو أنا هاكله؟؟ ده رقم بيت يا عم!! وبعدين 5 ده يعني البيت اللي قبلي يعني الأول.

- لا يا با ما يصحش أنت صاحب الفكرة، خد أنت رقم 5 وأجر رقم 7 قانون جديد

- طب وأنت؟؟

- لأ أنا ما أقعدش في إيجار لا موأخذة!! أنا هاروح الزمالك!! علشان ما يعرفوش أننا مع بعض!!

- أوووووف!! ماشي يا عم!! مبروك عليك!! عارف عنوان هناك؟؟

- 7 ميدان المعادي

- برضه؟؟

- يا عم اللي في الزمالك!!

- طب سيبك م العنوان دلوقت، عاوزين ننقي أسامي نضيفة كده من بتاعة الأجانب

- أنا هاسمي نفسي مونيكا

- مونيكا؟؟

- مونيكا شلقامي، إيه رأيك؟؟

- وأنت كده اتنكرت؟؟

- إيه؟؟ مش حلو؟؟

- ياد ده اسم حريمي زي زينب وصفاء كده عندنا

- ما هو حريمي عندهم علشان هما بيكتبوا من الشمال إنما عندنا يبقى رجالي

- فكرة برضه. أنا هاسمي نفسي شيت

- ماشي يابا الله يسهله، بتدكن لنفسك أنت الأسامي الحلوة!!

- يا عم والله مش مدكن ولا حاجة، ده أنا باسمعه كتير في الأفلام الأجنبي ع القهوة

- طب ما تباصيلي واحد كده على ذوقك بس ما يكونش منتشر؟؟

- ممممممم .. فق

- الفق المفترس هههههههههههههه

- عجبك؟؟

- ده عالمي!! أنا هاطبعه ع البوكسر من ورا .. فق شلقامي!!

- تمام. كده اختارنا العناوين والأسامي، نختار صورتين اتنين أجانب من ع النت.

- يابا لا نت ولا بتاع، أنا معايا كارت كنت واخده في الكابيرتاج معمول فيه شغل عالي قوي، كاوبوي وحصان وحاطط لي تاتانيك في الخلفية.

- لأ ومطلعك أشقر وبشعر!!

- أمال إيه يا عم ده واخد فيه خمسة جنيه!!

- والحـَوّل مش باين خالص!! إيه ده؟؟ ده مش أنت!!

- أنا برضه هادفع خمسة جنيه في صورتي مش عيب عليك؟؟

- معاكش واحدة تانية؟؟

- فيه يا غالي، بص دي، راكب فيها على أسد وشايل تمساح على دراعاتك ومتلفح بكوبرا

- إيه ده؟؟ ده التيشيرت بتاعي!!

- احم!! لا يا عم مش هو!!

- باقول لك التيشيرت بتاعي اللي كنت شاريه من رمسيس مع أشرف بزو!!

- نزل إيدك يا جدع ما تخلنيش استغبى عليك؟؟

- لأ مش هانزل إيدي يا حرامي!! أنت اللي نتشته من ع الحبل!!

- قول بقى أنك بتعمل كده علشان تنطرني من على كبوت المصلحة!!

- مصلحة مين ياد؟؟ اطلع بالتيشيرت لأغزك؟؟

- الله الله الله؟؟ الغدارة دي بتاعي!!

- احم!! لا دي بتاعتي وهانقرشك بيها لو ما جبتش التيشيرت!!

- قشطة!! هي بقت كده؟؟ خد يابا التيشيرت!!

- خد يابا غدارتك!!

يتناول منه المطواة ويطعنه بها عدة طعنات نافذة في البطن والرقبة ثم يأخذ منه التيشيرت

- علشان تبقى تاخد الرقم الكبير بعد كده.