التسلل إلى المطبخ



بانقضاء عام 2015 يكون "ياسين" قد استطاع أخيراً تفسير بعض الكلمات .. فهو يستطيع الأن أن ينطق كلمة "عجلة" بدلاً من "آلجة" و"علجة" .. ويصر (إذا شب على أصابع قدميه) أن يضغط هو على زر الدور الأرضي للمصعد .. وأن يصنع عدة قطارات في اليوم من رص الأشياء المختلفة خلف بعضها في طابور طويل، قطاراً من الكراسي وآخر من بقايا اللعب وثالث من الأحذية والشباشب ورابع من أواني المطبخ.



"آدم" (محاولاً تقليد ياسين ومنافسته) يطلب مني كل مرة أن أحمله لكي يضغط هو الآخر على زر الدور الأرضي للمصعد مثل شقيقه الأكبر .. ولكن "ياسين" يصر أن يكون هو آخر من يضغط على الزر وذلك لأن (حسب تفسير ياسين) "آدم" أنن ياثين كبييـ دوس (يعني آدم صغير، ياسين كبير وهو اللي بيعرف يدوس) .. يتغاضى "آدم" عن ذلك الأمر مؤقتاً حتى يستغل إنشغال "ياسين" باللعب ويتسلل إلى المطبخ ويفتح الثلاجة ثم يحضر الكرسي البلاستيكي الصغير الخاص به (إذ هناك بالطبع كرسياً آخر يخص ياسين) ويصعد فوقه ليحضر علبتين الزبادي من الرف العلوي ويقوم بفصلهما عن بعض (وهذا الفعل من الكبائر التي لا يغفرها "ياسين"!! فهو يصر على أن يفصل علبتين الزبادي عن بعضهما وأن يفتح علبته بنفسه) ثم يذهب إلى "ياسين" ويعطيه علبته ويجلس كحمل وديع (شوف البراءة يا أخي!!) .. ينفجر "ياسين" في الغضب والبكاء كالعادة ولكنه لا يستسلم .. يأمُر "آدم" أن يذهب إلى المطبخ ليحضر ملعقتين .. يفرح "آدم" لتكليفه بهذه المهمة الخطيرة والمسئولية الجسيمة .. ولكن الأمر مربك قليلاً بالنسبة له، فهو لن يستطيع الوصول إلى مكان الملاعق إلا بعد أن يصعد على كرسيه البلاستيكي الصغير، ولكي يحمل الكرسي عليه أن يترك علبة الزبادي!! وبالطبع هو لن يتركها على الكنبة بجوار "ياسين" حتى يفتحها في غيابه (يبقى هو عمل إيه؟؟) فيضعها على المنضدة الصغيرة (اللي هي قدام الكنبة بالمناسبة) ويذهب إلى المطبخ، يحضر كرسيه البلاستيكي الصغير من أمام الثلاجة المفتوحة ويضبط موضعه أسفل مكان الملاعق، يصعد الكرسي، يحضر الملعقتين، يهبط من على الكرسي، يعدو خارج المطبخ فرحاً بالنصر المبين الذي أحرزه؛ يقدم "آدم" الملعقتين إلى "ياسين" ليختار أيهما (شفت كرم أخلاق كده بذمتك؟؟)، يأخذ "ياسين" ملعقة منهما ويشكر شقيقه: تـُكن (شكراً) يا حبيبي، ثم يلتفت ويعطي "آدم" علبة زبادي من العلبتين المفتوحتين الموضوعتين بجانبه!! .. الله؟؟ .. مش كان معاه علبة واحدة بس؟؟ .. يلتفت "آدم" خلفه وينظر إلى المنضدة الصغيرة حيث ترك علبته فلا يجدها ويكتشف الخديعة!! .. ينفجر "آدم" في الغضب والبكاء .. أمامنا، يمسك "ياسين" العلبتين المفتوحتين ويخير شقيقه بينهما: دي؟؟ خد دي؟؟ .. يستغرق احتواء الموقف من 15 - 20 دقيقة على الأقل .. خلاص؟؟ كل واحد خد علبته ومعلقته وقعد في مكانه المفضل على الكنبة؟؟ ناكل بقى؟؟ لأ طبعاً، هما جايبينه علشان ياكلوه ولا إيه؟؟ مش لازم يلغمطوا نفسهم ويغسلوا وشهم بيه؟؟ دي الحيوانات المرسومة على هدومهم بتاكل أكتر من اللي هما بياكلوه يا راجل!! ده أنا الكنبة عندي تخنت من كتر الأكل!!



المرحلة الثانية من المسابقة: "مرحلة النظافة" أو مرحلة: "إللييييييي" (إجري) .. في هذه المرحلة يسعى كل متسابق لإلقاء علبة الزبادي الخاصة به داخل سلة القمامة قبل الآخر .. يبدأ السباق بأن يصيح "ياسين" فجأة وهو ممسكاً بعلبته الفارغة ويلوح بها لشقيقه في منتصف الصالة بالقرب من المطبخ: إللييييييي!! .. يفوز "ياسين" بالطبع في هذه الجولة قبل أن ينزل "آدم" من على الكنبة ويصل إلى منتصف الصالة بالعلبة الفارغة والغطاء .. يتذكر "ياسين" غطاء علبته الذي نسى أن يحضره فيعود ثانية إلى الكنبة، في الوقت الذي يكون "آدم" قد وصل فيه إلى المطبخ .. يعود "ياسين" من الصالة ومعه الملعقتين إلى جانب غطاء علبته، وقبل أن يغضب منه "آدم" وينفجر في البكاء يناوله "ياسين" ملعقته في يده لكي يلقيها بنفسه داخل الحوض، محاولات آدم لإلقاء الملعقة داخل الحوض العالي جداً بالنسبة له؛ أشبه بمحاولات الحجاج رمي الجمرات (كانوا الأول بيرموا المعالق في الزبالة) .. خلاص؟؟ خلصنا؟؟ لأ طبعاً أنت بتهرج!! مش لسه في حمام ولا إيه؟؟ .. حمام، يعني فيه لمبة حمام، واحد يولعها وواحد يطفيها .. كرسيين بلاستيك يتحطوا جنب بعض بالمللي قدام الحوض علشان يطلعوا عليهم .. وحنفية واحد يفتحها ووواحد يقفلها .. وصابونة يلعبوا بيها .. وفوطة يسحلوها معاهم ع الأرض!!



المرحلة الثالثة من المسابقة: "مين أول واحد هيخلي ماما ......" .. ودي مسابقة مفتوحة حسب خيال العيل .. يعني ممكن مثلاً تبقى: مين أول واحد هيخلي ماما تشد في شعرها؟؟ .. مين أول واحد هيخلي ماما تمشي في الشقة تكلم نفسها زي المجنونة؟؟ .. وهكذا ... هما هنا بيبقوا عاوزين يساعدوها ليس إلا .. يعني على سبيل المثال لا الحصر: ليه ما نساعدش ماما في الغسيل؟؟ .. طب نعمل إيه؟؟ .. وهي ماما يعني كانت بتعمل إيه؟؟ .. بتغسل .. سيبك من الغسيل اللي مش نضيف ده علشان ما تزعقلناش، وروح افتح الدولاب هات الهدوم اللي فيه عقبال ما أنا أملا الحوض ميه!! .. فتكون النتيجة: قطر هدوم طويل قيادة الأسطى "آدم" من الدولاب لحد الحوض الغرقان مية (واللي فاضت ع أرض الحمام) و"ياسين" افندي واقف ع الحوض بيقبص في الغسيل!! .. ليه ما نلمعش الجزم زي ما بابا بيعمل؟؟ .. إزاي؟؟ .. خد أنت الورنيش ده وأنا الورنيش ده وهات الجزم نمسحها .. فتكون النتيجة: كوتشي أطفال أبيض بقى شبه التاكسي (أسود X أبيض)، جزمة جلد طبيعي بني بقت بقت (والله ما عارف بقت إيه!!) وشباشب أطفال بألوان مختلفة بقت بألوان مختلفة برضه بس غير ألوانها الأصلية!! .. طب خلاص خلصوا تلميع الجزم بالورنيش والنتيجة كانت مذهلة بالشكل ده، يسكتوا؟؟ لأ طبعاً .. مش لسه فيه ورنيش؟؟ .. ليه ما يلمعوش الأنتريه بالورنيش وبعدين يمسحوا بيه الحيطة؟؟ .. ياللا ما هو ورنيش بقى!! .. خلصنا الغسيل ولمعنا الشقة، فاضل إيه؟؟ .. الطبيخ!! .. يعني نعمل إيه؟؟ .. طلع معايا كل الحلل اللي في المطبخ .. هاتها في الصالة .. هنطبخ إيه؟؟ .. ودي عاوزة سؤال؟؟ .. اللعب طبعاً .. ويبدأ كل واحد فيهم يطبخ اللعب بتاعته اللي بيحبها .. موتوسيكل / عربية / طيارة / مكعبات ... إلخ .. وبعدين يجيبوا المعالق الخشب ويقلبوها في الحلل .. مممم .. كده الأكل ناقص توابل .. هانغلب يعني؟؟ .. أمال اللعب المكسرة دي بتعمل إيه؟؟ ده لو ما فيش لعب مكسرة نكسر لعبة مخصوص .. فيبدأوا يرشوا بقايا اللعب من بلاستيك وأخشاب على الأكل (اللي هو اللعب برضه) وبعدين يغطوا الحلل شوية ويودوها المطبخ لمامتهم علشان تحطها في البـُن (الفرن) .. طب عقبال ما اللعب تستوي في البـُن هناكل إيه؟؟ .. يستغل "آدم" إنشغال "ياسين" باللعب ويتسلل إلى المطبخ ويفتح الثلاجة .........


تعليقات

‏قال norahaty mo
بسم الله ما شاء الله
ربنا يخلى ويزيد ويبارك
‏قال norahaty mo
كل عام وانت والأسرة
بكل خير وسعادة
‏قال norahaty mo
سبحان الله
أولاد اخواتى
كانوا بيقولوا الكلام
بنفس الطريقة باين عليها
لغة عالمية للأطفال واحنا معرفش :)
‏قال norahaty mo
مرة تانية وتلاتة وألف وخمسمائة
كل عام وانت والأسرة بالف خير
‏قال Gamal Abu El-ezz
ربنا يباركلك فيهم
وتشوفهم عرسان كبار كده وتبقى جدو وتعيد الشقوة من تانى
بس طبعا وقتها هتشارك الأحفاد فى اللعب هما الرجاله لما تكبر بتصغر هههههه
واكيد الشاقوة دى وراثه مش من فراغ ههههه
كل سنة وإنت والأسرة طيبين وبخير
وسنة سعيدك عليكم يا رب
مودتى وإحترامى
‏قال زهــــراء
صباح الورد ويارب عام كله خير وسعاده....
عن قريب في انتظار بوست تتحدث فيه عن يوم خطوبة آدم وفرح ياسين وان شاء الله عاجل غير اجل ربنا يحفظهم ويبارك فيهم هؤلاء جيل التاتش والسرعة الفائقة يعني لازم يكون هناك بصمه مميزه لهم في حاجات كتير
هنا بنت اخويا عمرها أربع سنوات وبتعشق تقليد أختها الكبيره ساره ذات الست سنوات ونصف والتقليد ده بقي عواقبه فظيعه مريعه بس عالمهم رائع وبرئ جدا جدا باعشق التعامل معاهم واتمنى ان اعيش مع الأطفال فقط لما يتميز به عالمهم بالإبداع والابتكار في حاجات عجيبه
بمناسبة العام الجديد عاوزه ابعت لهم اتنين زبادي بالفرواله على حسابك ههههههههههه ربنا يبارك في صحة مامتهم ويقدرها على رعايتهم
عام جديد سعيد عليكم يارب
‏قال محمد سلامة
هو فيه أحلى من كدة
ربنا يخلي
‏قال P A S H A
norahaty mo
:)))))))))))))))

يا ألف مليون مرحب بحضرتك يا دكتورة وبتعليقاتك الجميلة اللي بتنور المدونة .. جزاكِ الله كل الخير على دعائك الطيب وتشريفك الكريم اللي أسعدنا جداً والله
:))
- الأطفال دول عالم تاني خالص لوحدهم .. عالم بريء وطاهر وبسيط ومتسامح وجميل قوي قوي .. ساعات لما باقعد أسرح فيه وأتأمله بالاقي أنه كان من الأفضل لينا وللعالم والكوكب اللي عايشين عليه أننا ما نكبرش .. لأننا لما كبرنا دمرنا مفهوم الحياة مع الأسف.
بقيت كل ما أبص على الواقع ومدى بشاعته أخاف عليهم وأترعب .. ومليون سؤال يطرحوا في نافوخي: يا ترى لما هيكبروا هيشوفنا إزاي؟؟ وهيقولوا علينا إيه؟؟ هنفسر لهم إزاي اللي بيشوفوه إذا كنا مش قادرين نفسر لنفسنا اللي بيحصل دلوقت؟؟ هنقول لهم مش احنا اللي عملنا كده؟؟ هل لما نقول لهم حاولنا ............ يعني،، حاولنا نخلي العالم أجمل وأنضف وأكتر سلاماً واستقراراً وعدلاً ونحافظ على موارد الكوكب وثرواته ووووو... إلخ هيصدقونا؟؟ هل ساعتها مبررات زي: أكل العيش وتربتيهم ومحاولات تأمين مستقبلهم هتقنعهم؟؟ وبعدين مستقبل إيه واحنا أصلاً مرغمين على حاضرنا؟؟.. تيه.
يمكن الحاجة الوحيدة اللي بتصبرني بعد ربنا سبحانه وتعالى أن هما واللي زيهم جزء (ربنا يحفظهم جميعاً من كل سوء وشر ويبارك فيهم) من الواقع ده .. هما - بإذن الله تعالى - بكره اللي نتمنى من الله أن يكون أحسن من النهارده :)
يمكن علشان كده شايف "لغتهم العالمية" اللي احنا ما بنفهماش دي نعمة كبيرة من المولى عز وجل بتحافظ على ذاتيتهم .. صحيح أننا بنتعب وبنغلب علشان نتواصل معاهم ونفهم هما عاوزين مننا إيه .. بس مين عارف لو كنا قدرنا نفهمهم في السن ده كنا علمناهم إيه؟؟ وأثرنا فيهم وعليهم إزاي؟؟ كفاية قوي اللي بيتعلموه مننا غصب عننا لما بيراقبونا!! .. أهالينا دول ليهم الجنة والله.
:)
كل سنة وحضرتك طيبة وبألف خير وصحة وسعادة .. ربنا يبارك في عمرك وفي اخواتك وأولادهم ويكون عام جديد سعيد عليكم كلكم بإذن الله وتحققي فيه كل ما تتمنين
:)
شرفتينا يا دكتورة
‏قال P A S H A

Gamal Abu El-ezz
:))
ربنا يحفظك يا أستاذنا ويبارك في عمرك ويسعدك ويفرح قلبك بالزوجة الصالحة والذرية الصالحة قادر يا كريم
:))
وهو أنا لسه هاستنى لحد ما أكبر وأبقى جدو علشان أعيد الشقاوة تاني يا جمال يا أخويا؟؟ وليه ما اتشقاش أنا دلوقت؟؟ هه؟؟ لعلمك؛ أنا باراجع مقرر الشقاوة يومياً مع العيال .. إشي مكعبات وإشي شقلبظات وحاجات تانية كتير .. مش دي الشقاوة اللي أنت قصدك عليها ولا أنا فهمت غلط؟؟ .. متهيألي - لمصلحتي - أني أفهم غلط (فاهمني طبعاً)، ثم أنا أفهم ليه أساساً؟؟ .. شفتوا جمال عاوز يفتح عيني على حاجات كخ إزاي؟؟ (أيوه ما أنا ما انضربش لوحدي) .. لا لا يا جمال!! المدونة دي طاهرة وهتفضل طاهرة .. عندك أي مصلحة لاغيني ع الجوجل بلس وأنا راشق معاك أنا والعيال :D
(لو ما ظهرتش خلال اليومين اللي جايين دول، عارفين طبعاً أنا هابقى فين)
:))
كل سنة وأنت طيب وبألف خير وصحة وسعادة أنت وأسرتك الكريمة وعام سعيد عليكم جميعاً بإذن الله وتحقق فيه كل ما تتمنى إن شاء الله
هتوحشني يا جمال
‏قال P A S H A


زهــــراء
:))
يا صباح الفل على حضرتك يا أستاذتنا .. ربنا يجعله عام خير وسعادة على حضرتك وكل أسرتك الكريمة بإذن الله وتحققي فيه كل ما تتمنين
:))
خطوبة آدم وفرح ياسين في ليلة واحدة علشان الرقاصة ما تتعبش هههههههههههه .. وبعدين بوست إيه اللي هاقعد اكتبه ساعتها يا زهراء؟؟ عاوزاني أسيب الفرح والمعازيم بين قوسين والرقاصة وأقعد أكتب في بوستات؟؟ ده كلام؟؟ .. (شكلي كده مش هالحق أرد على محمد سلامة يا جماعة) :D
خلينا في بنات أختك .. بتقولي إيه بقى؟؟ إبداع؟؟ وأي إبداع!! حضرتك الإبداع عندنا دمر الشقة .. بالنسبة للتعامل معاهم عاوز حكمة وحنكة وصبر وطــــــولة بال (ودي كلها حاجات ناقصة من سوبر ماركت العبد لله) .. بس الأكيد أن أي خلل في التعامل والتواصل معاهم بنكون احنا سببه لقصور معين فينا.
شكراً جزيلاً لدعواتك الطيبة الكريمة ربنا يجازيكي عنها كل خير .. ربنا يحفظك ويسعدك ويفرح قلبك ويبارك لك في بنات أختك ويحفظهم لك وأولادنا جميعاً من كل سوء وشر اللهم آمين
:))
شرفتينا يا أستاذة
‏قال P A S H A
محمد سلامة
:))
ربنا يخليك يا باشمهندس ويكرمك ويبارك لك ويسعدك ويفرح قلبك بالزوجة الصالحة والذرية الصالحة قادر يا كريم
:))
كل سنة وأنت طيب وبألف خير وصحة وسعادة أنت وكل أسرتك الكريمة وإن شاء الله عام سعيد عليكم جميعاً وتحقق فيه كل ما تتمنى
:))
شرفتنا بزيادة يا غالي