فلوس كتيرة قوي ما تجيبش حاجة

افتكرت زمان لما كنت بامشي في الشارع وأشبط في أي لعبة أو حاجة حلوة أشوفها في الفتارين وأقعد أزن علشان بابا يجيبها لي، وأتضايق قوي لو ما رضيش يجيب لي الحاجة اللي أقول له عليها .. ما كنتش أعرف أن علشان نشتري أي حاجة لازم ندفع فلوس .. وحتى لما عرفت أن فيه حاجة اسمها فلوس؛ ما فهمتش وما أقتنعتش؛ بالعكس كنت بازعل منه زيادة علشان مش بيرضى يشتريها لي بالفلوس اللي معاه في المحفظة؛ كنت باتخنق منه وبافتكره مش بيحبني .. وفي مرة شبطت في عجلة وقعدت أزن على بابا قد كده علشان يجيبها لي؛ وهو فضل يقول لي: حاضر إن شاء الله وما جابش حاجة .. فزعلت منه جامد وأتخنقت وصعبت عليا نفسي وما رضيتش أكلمه .. راح بابا دخل عليا الأوضة وقفل الباب وإداني فلوس كتيرة قوي وقال لي: خد المرتب أهه؛ أصرف أنت ع البيت واللي يتبقى منه خده كله ليك وهات بيه اللي أنت عاوزه .. خدت منه الفلوس وفرحت قوي وقلت بس هاجيب كل اللي أنا عاوزه .. لقيته بيقول لي: بس خلي بالك؛ فيه مبلغ كذا لازم يندفع لجدك وفيه مبلغ كذا إيجار الشقة ومبلغ كذا للنور وأنبوبة البوتاجاز ومبلغ كذا مصروف البيت .. وكل ما يقول لي على مبلغ أديهوله في إيده؛ لحد ما لقيت الفلوس الكتيرة قوي دي اتبخرت وما فضلش منها حاجة ليا!! .. وبعدين قال لي: لسه فيه كمان مبلغ كذا بتاع حضانة أخوك ومبلغ كذا مصروفك اللي بتاخده كل يوم ومبلغ كذا علشان نصلح الغسالة و..... فضلت متنح شوية كده وأنا باصص على إيديا الاتنين وهما فاضيين ومش عارف أقول له إيه؟؟ معقول الفلوس الكتيرة قوي دي ما تجيبش كل حاجة؟؟ ما بقتش عارف أقول له ندفع فلوس إيه وما ندفعش إيه؟؟ وبعدين قلت له بصوت واطي وأنا مكسوف وعيني في الأرض: فيه كمان فلوس الدكتور اللي ماما هتروح له .. قال لي: أه؛ وكمان فلوس الدوا .. قلت له: أه صح ده احنا لسه عايزين فلوس علشان الدوا!! وبعدين افتكرت: أنت نسيت كمان لمبة السلم اللي اتحرقت!! ومصروف أخويا!! و.........

 
بعدها بشهرين .. كنت واقف في البلكونة لما شفت بابا داخل الشارع ومعاه العجلة الفراشة الزرقا اللي كان نفسي فيها .. ما أعرفش إزاي نزلت التلات أدوار بالسرعة دي ولحقته وهو لسه على أول الشارع وجريت عليه وأتشعلقت فيه وخدته بالحضن!! .. طول المسافة لحد البيت كنت باصص لفوق؛ لبابا .. ما بصيتش ع العجلة غير لما وصلنا تحت البيت والعيال أتلموا عليها وأنا قعدت أزق فيهم علشان ما حدش يلمسها.

بعد كده؛ زينتها من مصروفي واشتريت لها: جرس ودينامو وكشاف .. كانت أحلى عجلة في الدنيا دي كلها .. ورغم أن بابا باعها بعد كده وجاب لي عجلة تانية أكبر (دفعنا نص تمنها من مصروفنا أنا وأخويا)، وعجلة تالتة (بابا ساعدنا في تمنها)، إلا أن الدينامو بتاع العجلة الفراشة الزرقا لسه عندي لحد دلوقت.

تعليقات