الموبايل


- إيه يا عم ؟؟ كل ده تأخير ؟؟ فين الموبايل ؟؟ صلحته ولا لأ ؟؟


- أه صلحته !!


- طب وريني ؟؟


- اصبر بس !! أصل وأنا جايلك ...


- لا لا ما تتوهش !! فين الموبايل ؟؟


- يا عم اصبر !! .. وأنا جايلك في السكة ؛ طلعت واحدة زي القمر قعدت جنبي في الميكروباص ؛ رغم أن كان فيه أماكن فاضية كتير ...


- عادي يعني إيه المشكلة في كده ؟؟ المهم ؛ فين الموبايل ؟؟


- اسمعني بس !!


- أووووف !! انجز !!


- كانت لابسة قصير ؛ فوق الركبة كده بحوالي شبرين .. فأنا بصراحة اتكسفت وقلت أبص من الشباك ؛ بس الإزاز بتاع الشباك كان عاكس البدي الواسع اللي مبين كل صدرها ؛ فضلت عامل عبيط لحد ما لقيتها قربت مني جامد ولزقت فيا ومشت إيديها على رجلي بالراحة !! .. ثواني بس أشرب !!


- حبكت المية دلوقت ؟؟ اطفح بسرعة !!


- المهم ؛ ميلت عليا بصدرها وقالت لي : عندك مكان ؟؟


- وقلت لها إيه ؟؟


- قلت لها : أه عندي ؛ بتاخدي كام ؟؟ .. قالت لي : النفر بتلتميت جنيه !!


- إيه هو ده ؟؟ تلتميت جنيه ليه ؟؟ إوعى تكون إديتها الموبايل ؟؟


- لا لا ما تخافش !! أنا فاصلت معاها !!


- أه باحسب !! وهتاخد كام في الآخر ؟؟


- قالت لي نعدي ع الديلر بتاعي نسأله !! .. نزلنا من الميكروباص ؛ وروحنا ع الكباريه ؛ الديلر قال لي : علشان أنت أول مرة تتعامل معانا هاكرمك ؛ هات ميت جنيه بس !!


- محترم الراجل ده !! خدت رقم موبايله ؟؟


- أساسي طبعاً وأديته رقمك كمان علشان لما تحب تكلمه !!


- أصيل يا برنس !! أمال هي فين ؟؟


- اصبر بس !!


- إيه تاني ؟؟


- الهانم ما رضيتش تتحرك إلا أما تجيب مزاجها معاها !!


- ؟؟


- صباعين حشيش وإزاتين خمرة.


- أستغفر الله العظيم يا رب !! خمرة يا عاصم ؟؟ أنت مش عارف أنها حرام ؟؟


- يا سيدي علشانها هي !! .. المهم اشتريتهم من الديلر بخمسميت جنيه !!


- خمسميت جنييييييه لييييييييه ؟؟


- يا عم اصبر بس !! .. ثواني أشرب !!


- هاحميك بيها والله !! ما تكمل يا جدع ؟؟


- بعد ما خدت الحاجة من الديلر ؛ البوليس كبس ع الكبارية !!


- يا نهار أسود ومنيل !! وعملت إيه ؟؟


- باقول لك قفشوني متلبس !!


- طـ .. طب اتصرفت إزاي ؟؟


- اتضح أن جوه الكباريه ده أوض دعارة وترابيزات قمار !! مطلعين من جوه بتاع خمستاشر واحدة ملط !! وبتاع خمسة كيلو حشيش على بودرة على برشام !! ده غير بقى الألوفات اللي كانت على ترابيزات القمار !!


- دي مؤسسة بقى مش كبارية ؟؟ وبعدين ؟؟


- قعدت أفكر في أي طريقة أهرب بيها علشان الفضيحة ؛ خصوصاً أن كان فيه برنامج بيصور !!


- يعني كمان اتفضحت ؟؟ ده مش بعيد يفصلوك !!


- لأ ما هو الظابط زعق للمصور وقال له : ما فيش تصوير إلا أما تجيب تصريح !! فالمذيعة اتحمقت وراحت كلمت الظابط بقلة أدب ؛ الظابط شتمها ؛ راحت لاطشاه بالقلم ؛ راح ضاربها بالبوكس في عينها ؛ قام فريق البرنامج هجم ع الظابط ونزلوا فيه ضرب ؛ فالعساكر والمخبرين سابونا ونزلوا فيهم ضرب بالخرزانات ؛ الشارع وقف والناس اتلمت !!

- أوووبا !! ودخلوا في الخناقة ؟؟

- خناقة مين ياعم ؟؟ دول كانوا بيتفرجوا ع الحريم العريانة اللي معانا في البوكس وبيصوروهم بالموبايل !!


- هههههههههههه يا خبر ع المسخرة !! وبعدين ؟؟


- ولا قبلين !! رحت ناطط م البوكس وطيران على هنا على طول !!


- أووووووف !! يخرب بيتك يا أخي نشفت دمي !! في داهية الستميت جنيه !! فداك !! المهم برضه فين الموبايل ؟؟


- صورت لك بيه شوية فيديوهات في البوكس !! حاجة آخر مليطة !!


- ههههههههههه حبيبي وربنا !! وأنا هاطلع أصيل وأدفع لك تلتميت جنيه يا معلم !! وريني بقى الموبايل !!


- اصبر بس !!


- إيييه تااااااني ؟؟


- أصل وأنا باجري بأقصى سرعة وباخرم يمين وشمال في شوارع كتير ؛ علشان أهرب من العسكري اللي كان بيجري ورايا و.....


- هو كان فيه عسكري بيجري وراك ؟؟


- اتنين !!


- إوعى يكونوا جم وراك لحد هنا !!


- عيب عليك !! زوغت منهم في المظاهرة !!


- مظاهرة إيه ؟؟


- أنا عارف ؟؟ أنا لقيت ناس كتيرة ماشية بدقون في الشارع قمت داخل وسطهم !!


- هههههههههههه يخرب بيت فقرك !! يعني من النقيض للنقيض !!


- فضلت أزعق معاهم بأي كلام ؛ لحد ما .. ثواني بس أشرب !!


- (يرمي الكوب على الأرض) وآدي أم الكوباية آهيه علشان ترتاح !!


- احم .. لحد ما بتوع الأمن المركزي هجموا علينا بقنابل الدخان من كل ناحية !!


- يادي النيلة !! ده إيه النحس ده ؟؟


- اتعميت من كتر الدخان وأغمى عليا ؛ بس الأخ مصعب الله يبارك له فوقني واحنا في عربية الترحيلات !!


- جزاه الله كل خير !!


- لأ بجد إنسان حقيقي والله !! .. ياللا بقى الله يرحمه !!


- إيه ده هو مات ؟؟ إزاي ؟؟


- أتاريهم لما مسكونا ؛ قبضوا على كام واحد من أهل المنطقة اللي كانوا ماشيين ساعتها في الشارع ؛ فأهل المنطقة أتلموا على الشوية اللي هربوا مننا وهجموا على الشرطة تاني !!


- أوووبا !! دي كده بقت حرب أهلية !!


- بالظبط !! احنا كنا قاعدين جوه عربية الترحيلات وسامعين أصوات ضرب نار وصريخ !! وما فهمناش حاجة غير لما شوية ناس جم وكسروا قفل الباب وطلعونا !! .. تقريباً مصعب اتضرب بالنار واحنا بنجري !!


- أووووووف !! بس بقى كفاية نكدت عليا !!


- أمال لو شفت الفيديوهات اللي صورتها ؟؟ قلبك يتقطع والله !!


- لا يا عم مش عاوز أشوف !! امسحها من الموبايل !!


- خسارة !! الفيديوهات دي ممكن تجيب لك دهب لو بعتها للقنوات الفضائية !!


- لا يا عم الله الغني !! كفاية اللي بنشوفه في التليفزيون !! خدهم أنت على موبايلك وسيب لي أنا صور الحريم !!


- احم .. عاوز أشرب !!


- وأنا كمان !! نشفت ريقي منك لله !! حاضر هاقوم أجيب ميه .. بس طلع الموبايل الأول !!


- اصبر بس !!


- هاضربك بالجزمة على دماغك !! مش عاوز أسمع حاجة تاني !!


- آخر حاجة والله !!


- مش عاوز أسمعها !! طلع الموبايل !!


- أصل عقبال ما وصلت لأول الشارع عندك كنت خلاص أتهديت !! فركبت توك توك .. وبعد ما نزلت بأدي له خمسة جنيه ؛ ما رضاش ياخدها وقال عاوز عشرة جنيه !!


- عشر عفاريت ينططوه !! سيبه يهوهو زي الكلب وأمشي !! .. وتلاقيه حتة عيل معفن ما يجيش تسع سنين !!


- ما هو أنا عملت كده فعلاً !! .. بس الواد أتشعلق في القميص وقام مصفر صفارة معينة !! لقيت لك عشر تكاتك ملمومين حواليا في ثواني وكلهم عيال بلطجية ماسكين سنج وطبنجات وبيثبتوني !!


- أ*ا !! ليه ؟؟ هو ما كانش فيه حد ماشي في الشارع ولا إيه ؟؟


- لأ كان فيه !! بس اللي كانوا ماشيين كملوا مشي عادي خالص ، واللي وقفوا منهم ؛ طلعوا موبايلاتهم وقعدوا يصوروا عادي خالص برضه وهما بيضحكوا !!


- بيضحكوا على إيه ولاد الــ ..... دول ؟؟


- أصل العيال قالوا لي : طلع اللي في جيبك بالذوق بدل ما نقلعك ملط في الشارع ونعلم على الزلمكة بالمطواة !!


- وطبعاً إديتهم الموبايل ؟؟


- فشر !! قال ياخدوا الموبايل قال !!


- يعني سبتهم يـ ........... ؟؟


- لا يا عم أنت عبيط ولا إيه ؟؟ .. ما تقوم تجيب ميه ؟؟


- يلعن .............


- خلاص خلاص هاكمل !! إديتهم الفلوس اللي معايا ومشيتهم !!


- أووووووووف !! ده أنت حرقت دمي يا أخي منك لله !! معلش ؛ الحمد لله أنها جت على قد كده !!

- الحمد لله.

- طلع الموبايل !!


- احم .. طب قوم هات ميه الأول !!


- هاتجيب الموبايل ولا أفرتكلك الزلمكة بسناني ؟؟


- اصبــ .. !!


- (ينقض عليه ويبدأ في عضه)


- آآآآآآآآه !! خلاص خلاص !! هاقول لك والله اللي حصل .. أصل بصراحة بصراحة أخويا خده معاه فرح واحد صاحبه علشان يصور بيه .