بولامبو


- (11:00م) .. ياسيــــــــــــــــن !! ياللا عشان تنام ننه يا حبيبي !! .. ياللا يا بابا .. إقلع التاتا (الشبشب) وتعالى أوبا (فوق) هنا جنب بابا .. ياسين يقف جنب السرير ويقول وهو بيشاور بصباعة ناحية عيني: لاببّا بابّا (يعني نضارة بابا ، يقصد قوم والبس النضارة واقعد معايا) !! .. لأ نضارة بابا ننه خلاص !! وبابا كمان ننه أهه خخخخخ !! .. يزن ويدبدب برجليه ويقول: لاببّا بابّا !! لاببّا بابّا !! قول مثلاً بتاع تسعتاشر مرة في الثانية !! .. أشيله وأطلعه ع السرير وأبدأ أحكي له نفس الحدوتة بتاعة كل يوم !! .. "بُص .. احنا إيه ننام ننه وبعدين إيه نقوم تِس تِس (يعني ناخد دش) وناكل مَم ونلبس التاتا ونروح عند التِن تِن (الأسانسير) ونركب البيب بيب (يفضل التوك توك) ونشوف القطة نِو نِو والبوبي هاو هاو والكوكو أوبا فووووق (العصافير والحمام يعني) ونروح عند جدو وتتو وعمو ونلعب بالكورة !!"

قول مثلاً باحكيها له بتاع تلاتين خمسة وتلاتين مرة لحد ما أنام (أنا مش هو !!) 


- (12:30ص) .. ياسين يلاقيني غفلت ورحت في النوم ؛ يروح دابب صباعة اللي أرفع من سن القلم الرصاص فجأة في عيني ويقول لي: بولامبو !! .. أنا بنرفزة: اللي هو إيه يعني ؟؟ .. ياسين: بولامبو !! .. عاوز تشرب إمبو يعني ؟؟ أمه تجيب له ميه عشان يشرب ما يرضاش !! ويصر على بولامبو !!


- (2:45ص) .. كان خلاص بقى النوم طار وقمنا عملنا قهوة لأن آدم بيه راخر صحي وصهلل !! .. ورغم كل محاولات الإلهاء ، ياسين بيه لم ينسى مطلقاً بولامبو اللي لففنا عليه الشقة كلها وبرضه ما قدرناش نعرف كنه جنس ملته إيه في الآخر !! .. بس تقريباً كده قدرنا نخمن أنها حاجة حوالين الكمبيوتر ، والله أعلم !!


- (6:30ص) .. خدته ونزلت مخصوص قلت أجيب فطار من أي واحد بعيد إن شالله أروح السلوم ، يمكن ربنا يهديه وينام !! ساعة يا عم رايح جاي والواد آخر صهللة !! .. وأول ما طلعنا البيت زي ما يكون حد فكرة بـ بولامبو وهاتك يا زن تاني !!


- (8:00ص) .. واحنا بنفطر ، أمه شغلت له الأغاني بتاعته ع الكمبيوتر عل وعسى ينام لما يشوفها .. وبالفعل !! ما فيش دقيقتين والواد بدأ يفقر وينام !! .. يا فرج الله !! .. ولسه يا معلم باشيله وباتسحب زي الحرامية عشان أدخله على سريره !! .. سمع الأغنية بتاعة "أبريق الشاي" راح قايم م النوم مرة واحدة زي اللي يكون افتكر مكان الكنز وفضل يشاور ع الكمبيوتر: بولامبو بولامبو !! .. أنا والمدام وقفنا تنحنا كده وبصينا لبعض في إزبهلال !! .. وفيـــــن على ما عرفنا نربط الكلمتين ببعض !! .. اتضح أن: "بو" هي الابريق و"La" هي ال و"إمبو" يعني الشاي !! .. يا متعلمين يا بتوع المدارس !!