التلات عرايس



عارف حكاية البنت اللي لقت نفسها كبرت فجأة من غير ما تحس ؟؟ .. لما اكتشفت أن كل الحاجات اللي بتحبها وبتحب تعملها ما بقتش تنفع لها لأنها كبرت .. وأن حتى صحابها اللي كانت بتحبهم قوي وهما صغيرين ما بقوش زي ما هما لما كبروا .. هما أصلاً اختفوا من حياتها وما بقوش ييجوا لها البيت زي زمان .. كل ما كانت تيجي تضحك أو تجري أو تلبس فساتين قصيرة ملونة أو تسيب شعرها من غير ما تربطه ؛ كانوا يقولوا لها عيب أنتي كبرتي !! .. كانت تزعل وتقفل عليها أوضتها وتقعد تلعب على سريرها مع عرايسها التلاتة اللي كانت مسميه كل واحدة فيهم على اسم واحدة من صحابها .


ولأنها بتحب الحياة اللي كانت شايفاها وهي صغيرة .. اتمنت أن كل واحدة من صحابها تصغر عشرين سنة علشان يجروا ويلعبوا ويتنططوا زي زمان .. الجني قال لها : ممكن بس بشرط !! .. البنت فرحت قوي وقالت له : موافقة عليه من غير ما أسمعه .


تاني يوم .. عدوا تلات بنات صغيرين بسرعة من قدام البيت .. كانوا لابسين فساتين قصيرة ملونة وعمالين يجروا ويلعبوا ويتنططوا ويضحكوا بصوت عالي والهوا بيزغزغ شعرهم .. وما يعرفوش أن جوه البيت ده فيه تلات عرايس على أساميهم ؛ نايمين في حضن واحدة ست عجوزة عندها خمسة وتمانين سنة ؛ ماتت من شوية على سريرها بعد ما قفلت عليها أوضتها .