حقل تجارب

فيه ناس قدرها تعيش كأنها حقل تجارب !! .. يتجرب فيهم الحب / الفرح / الحزن / الوجع / الراحة / الونس ..... إلخ ، للحظات .. كأنهم مثلاً مظلة محطة أتوبيس أو كرسي على قهوة بلدي أو مراية تشوف نفسك فيها من غير ما تشوفها هي !!

الناس دي بتلجأ لهم لدقايق وبعد كده بتنساهم تماماً لحد ما تحتاجهم تاني .. ما بتشوفهمش ولا بتاخد بالك منهم قبل و بعد ما بتسيبهم وتمشي !!

في لحظة التماس بينك وبين الناس دي ، بتتولد حياة بينكم .. بيشيلوا عنك / معاك وبتاخد جزء منهم .. أنت ما بتفتكرش ده بعد كده (لأنك أصلاً ما بتفتكرهمش ولا بتحس بيهم وأنت معاهم) وده شيء مش إنساني ، رغم إن جيت للحق معظم البشر بتعمل كده .

مشكلة الناس دي مش بس في إنها بتتنسي وإنها ما بتلحقش تشبع أو تخف من اللسعات المختلفة اللي بنسببها لهم بمرورنا العابر في حياتهم ، ولا حتى في إننا ما بنودعهمش وبنسلم عليهم ونبص لهم قبل ما نمشي ونسيبهم ، لأ !! .. مشكلة الناس دي إنها -- بسببنا -- اتعودت على كده ، وصدقت إن ده قدرها فعلاً !! .. وبقت عايشة حياتها تستنى كل يوم جديد علشان حد يعبرها ويُعبر من خلالها ويلسعها ويمشي !! .. مشكلة الناس دي أنها بقت عايشة حياتنا احنا بدل ما تعيش حياتها هي !!


الناس دي في رأيي ، أكتر ناس وحيدة على وجه الأرض . 

تعليقات