كلنا تايهين وبنضل بعض



- مشكلتي مش في أحلام اليقظة ، لأ ، المشكلة إني باصدق الأحلام دي وباعيش فيها على أساس إن هي الواقع !! .. شيء صعب صدقني إنك تبقى عايش صاحي في حلم جميل ما حدش شايفه غيرك !! .. بتحس إن كل اللي حواليك ناس ما تعرفهمش !! .. ناس غريبة عنك !! .. بتحس إن هما اللي نايمين وغرقانين في كوابيسهم الواقعية المفزعة وأنت بس اللي صاحي !! .. بتبقى عاوز تشدهم وتدخلهم معاك جوه حلمك وتقول لهم وأنت بتبتسم : تعالوا هنا فيه مكان !! .. إنما للأسف ما حدش بيسمعك !! .. كأنك مجرد فقاعة هوا صغيرة في قاع المحيط !! .. وحتى لو لقيت حد يسمعك ، هاتكتشف إن ما عندوش أدنى استعداد أنه يشاركك حلمك !! .. إذا كان ما بيحلمش لنفسه أصلاً !! هايحلم معاك ؟؟ .. وعلشان أنت لوحدك ، الناس مش هتصدقك !! .. مش هايصدقوا ولا حتى هايفكروا إن أنت بني آدم حقيقي ومن حقه يحلم !! .. حتى لو حلفتلهم إن حلمك ده هايبقى حقيقة لو كلهم حلموه معاك !! .. برضة ما حدش هايصدقك !! .. وساعتها تبقى مش عارف هل المشكلة في إنك ممكن تكون خيالي حبتين ؟؟ .. ولا في إنهم حقيقيين زيادة عن اللزوم ؟؟


باعتقد أن المشكلة في أن الناس ما بتصدقش الحقيقة !! صدقني .. مش لأنهم كدابين ، لأ ، لأنهم ما اتعودوش عليها !! .. معظم الناس ، كائنات داجنة !! .. بتفضل الكدب طالما بيتقال لهم بالطريقة اللي بيحبوها واتعودوا يسمعوها ويشوفوها !! .. عاوز تكسب الناس ؟؟ .. نافقهم واهديهم وثبتهم في ضلالهم !! .. حفزهم للإستمرارية في طمس وحجب ذواتهم الحقيقية !! .. مش بس كده !! .. لأ .. شجعهم وكافئهم كل ما تلاقيهم تاهوا أكتر ، وعاتبهم وأنبهم (لأنك خايف على مصلحتهم) لو لقيتهم في مرة بيفكروا !! .. لو بس فكروا !!


أنا مش مجنون صدقني !! .. باحاول ، بس لسه قدامي شوية على ما أوصل للمرحلة دي !! لأني باعتقد دوماً أن : المجانين تنتظرهم المقدمة .. أنا بس بقيت مش عارف أعيش في العالم الحقيقي أوي ده !! .. حقيقي لدرجة الزيف !! .. ويا ريته عالم عاقل !! .. إنما عالم مجنون ، وبيحاسبك أنت على أحلامك البريئة !! .. هاتقولي ما أنت عايش فيه فعلاً !! .. هاقول لك عايش فيه بجسمي أه ، إنما بروحي وخيالي لأ !! .. إيه مش من حقي ؟؟ .. روحي وخيالي يا عم وأنا حر فيهم !! .. ما تقهروناش بقى أكتر من كده !!