زحلونين

أنا مش قلتلك ميت مرة ما تقفلش الموبايل ؟؟ ولو هاتقعد في مكان ما فيهوش شبكة تبقى تعرفني قبلها ؟؟ أفضل أنا قاعدة قلقانة عليك كل ده ؟؟ إلا حتى ما هان عليك تبعت لي رسالة تطمنني فيها عليك !! أنت بالشكل ده هاتخلليني أحرم أتصل بيك تاني على فكرة !! وبعدين يعني هما الناس اللي أنت معاهم أهم مني ؟؟ عموماً خلليهم ينفعوك !! أنا أصلاً غلطانة إني عبرتك واتصلت بيك !! كنت فين بقى حضرتك من الصبح ؟؟ هه ؟؟ وما اتصلتش بيا ليه ؟؟ وطبعاً كالعادة نزلت من غير فطار ومقضيها قهوة وسجاير من الصبح !! أنت أصلاً لو بتحبني كنت تاخد بالك من نفسك !! طب ما هانش عليك تتصل تطمن عليا ؟؟ ماشي !! بس خلليك فاكر إنك زعلت مني لما اتصلت بيا مرة ولقيت موبايلي مقفول !! وهو والله العظيم كان فاصل شحن !! ورغم كده برضه كلمتك من موبايل واحدة صاحبتي علشان أطمنك عليا !! أنت مسحت نمرتها صح ولا لأ ؟؟ عارف لو لقيتك لسه مسجلها ؟؟ والله العظيم لأقرمك قرمة تجيب دم !! المهم ، حضرتك ناوي تيجي النهاردة الساعة كام ؟؟ ولا هاتتأخر كالعادة ؟؟ اعمل حسابك إننا هانتغدى وننزل على طول !! عشان ما تجيش الساعة تسعة زي المرة اللي فاتت وتقول لبابا عاوزين نخرج ؟؟ وبعدين ما تجيبش معاك حاجة لما تيجي !! بس عارف لما نخرج ؟؟ والله العظيم لو ما جبتلي شيكولاتاية بالبندق الحجم الكبير لأكون مورياك !! ومش هاديك منها ولا حتى مثلثاية واحدة !! وكمان هاتعزمني على آيس كريم !! بس هه !! على فكرة أنا اتصلت بمامتك من شوية !! وقعدنا نرغي قد كده !! أنا بصراحة اتصلت بيها علشان أتطمن عليك !! أنت ليه ما قلتليش صح أنها زعلت مني يوم العزومة ؟؟ أنا والله العظيم ما أخدت بالي خالص من الموقف اللي هي حكيتهولي !! بس أنا برضه عرفت أصالحها بطريقتي !! عيب يا ابني !! خلاص دي بقت حماتي صديقتي !! ولعلمك بعد كده هانتفق عليك !! تصدق أول مرة أخد بالي إنك واخد حاجات كتيرة من مامتك ؟؟ لأ ، مش هاقول لك عليها إلا أما تصالحني !! هو أنت ما كنتش قايل لها صح إنك هاتتغدى عندنا النهارده ؟؟ أنا على فكرة ما قولتلهاش !! بس حسيت إنها ما تعرفش !! كنت عاوزه أسألك على حاجة مش عارفة هاتعرفها ولا لأ ؟؟ خدت بالك من لفة الطرحة بتاعة المرة اللي فاتت ؟؟ كانت لايقة على وشي ولا لأ ؟؟ أصل أنا حسيت إنها ما عجبتكش !! أه صح !! أنت بتحب الكوسة بالباشاميل ؟؟ أصل مامتك كانت بتتفرج على طريقتها في التليفزيون وكانت بتقول هاتعملها لكم !! أنا بصراحة ما جربتهاش قبل كده !! دوقها عندكم الأول ولو عجبتك هابقى أتعلم منها الطريقة ، بدل ما أتعلمها ع الفاضي وما تعجبكش !! بابا النهاردة نزل السوق مخصوص علشان يجيب السمك المكرونة اللي بتحبه !! عارف وأنا بانضف سمكاية لقيت جواها سمكاية تانية صغننة قد كدهوة ، شكلها عسول أوي !! أنت بتعرف صح تنقي السمك ؟؟ أصل بابا بيقول فيه بلدي وفيه مزارع !! أنا بصراحة ما أعرفش الفرق بينهم !! إيه رأيك صح نعمل حوض سمك في الركن اللي جنب البلكونة ؟؟ ونجيب فيه زحلونـين ... اسمهم إيه دول ؟؟ استنى ، زحالين !! هههههههههههه هما اتنين اتنين !! اللي هما بيشلوك على ما يتحركوا مللي دول !! أيون !! حلزونين !! حلزونين !! تذكرتين !! ههههههههههه .. ونسمي واحد على اسمك وواحد على اسمي وهاخللي حلزوني يقرم حلزونك هههههههههههههه ولما حلزونك ييجي يقرم حلزوني هادخله ف القوقعة بتاعته ههههههههههههه !! بُص ، لو الحوض ده هايبقى غالي بلاش نعمله دلوقت !! تعرف إن أنا باقعد أسرح مع نفسي كتير أوي وأتخيل بيتنا شكله هايبقى عامل إزاي ؟؟ هايبقى حلو أوووووي !! أنت وحشتني أوي على فكرة !! من يومين دخلت أوضة الصالون وقعدت أشم في الكرسي اللي أنت كنت قاعد عليه المرة اللي فاتت !! ابسط يا عم هاتتجوز واحدة شمامة ههههههههههههههههه .. استنى كده !! إيه الريحة دي ؟؟ يا نهار أسود الرز شاااااط !!