اطبع صورتك


* تربية


ع القهوة .. الصنايعي خارج بصينية المشاريب وبيعدي بيها الشارع ، خبطه عيل صغير راكب عجلة وبيجري بسرعة !! .. الصينية وقعت ع الأرض والكوبايات اتكسروا !! الصنايعي راح مزعق في الواد ، الواد سب له الدين وجري !!

الصنايعي وقف يضرب كف بكف وقال بنرفزة : ده أنا عندي تلات عيال في البيت لما بابص بس بعيني للواد الصغير ، الكبير بيشخ على روحه !!
بص له راجل كبير من اللي قاعدين ع القهوة وقال له : أنت عندك بتبص لعيالك بيعيطوا ؟؟
الصنايعي : قال أه والله يا حاج .
الراجل الكبير : أنا بقى لما بابص لعيالي أنا اللي باعيط !!



* مصلحة


في الميكروباص :
- يعني هي الواحدة ما تطلعش من وراكي بأي مصلحة ؟؟
- ..............
- أي عريس يعني !! 
- ..............
- طب اللي كان بيبص لي قوي ده ومركز معايا لما جت لك الشغل ما كلمكيش في حاجة عليا ؟؟
- ..............
- أمال كان بيبص لي قوي كده ليه ؟؟



* كاجو


ما كانش فيه غير الواد الصغير ابن الراجل صاحب المقلة !! 
- عندك كاجو ؟؟
- اللي هو إنهيين ؟؟
- اللي هو شبه السوداني من غير قشر بس كبير شوية ومكلبظ وملولو !! 
- مولول إزاي ؟؟
أفتش بعيني في أرجاء المحل فأشير له إليه واسأله :
- أهم حاجة ما يكونش مملح قوي ويكون صابح !!
- يعني إيه صابح ؟؟
- يعني ما يكونش بقى له مدة !!
- قصدك معوج ؟؟ "يقصد معوأ يعني متأخر"
- أيوه ما يكونش معوج !! 
- لأ ده جايينا العشية ، إنما ده "يشير إلى الفستق" جايينا من أسبوع
- طب هات تـُمن كيلو 
-اللي هو جَد "قد" إيه ع الميزان ؟
- 125 

تقريباً شلني عشر دقايق وهو بيوزن وخمس دقايق علشان يتصل بأبوه علشان يعرف منه السعر ، وأول ما خرجت من المحل نادي على أصحابه اللي ف الشارع بصوت عالي : يا محمد !! يا كريم !! يا بلال !! تعالوا دوقوا الكاشو ده طعمه حلو أوي !!
تقريباً وزع نص كيلو على أصحابه !!



* بت جدعة


- محدثاً جاره في الميكروباص :

- يا عم ده أنا باجيب علبتين المارلبورو بتلاتين جنيه وشريطين البرشام بتلاتين جنيه آدي كده ستين جنيه وعندك ميت جنيه صباع حشيش آدي كده مية وستين جنيه وعشرين جنيه باجيب بيهم أي حاجة أطفحها يعني مية وتمانين جنيه !! باكسب أنا كام في اليوم علشان مراتي تقول لي اشحنلي رصيد بعشرة ؟؟ وفي الآخر تقعد ترغي مع أمها وأختها ؟؟
- !!!
- لعلمك أنا ماشي مع واحدة !! ما تفهمنيش غلط !! أنا باعاملها زي مراتي والله !! هو بس أبوها رخم وقافش عليا ومش عاوزني أتجوزها !! بت جدعة كانت بتسرق من أبوها علشان تجيب لي زيارة وسجاير في السجن !!
- !!!
- أه والله .. ثم يستقبل تليفون ع الموبايل .. أيوه يا سرنجة أنا ف الميكروباص أهه وداخل عليك .. يا جدع والله ما رضيتش أدي له من الفلوس اللي معايا أصلها مضروبة !! باقول لك مضروبة يا جدع يعني مزورة !! عيب عليك يا زميلي !! باقول لك عاوز خمس نمر عربيات ملاكي علشان فيه عربية مسروقة وعاوزين نصرفها !! شوف كده أخوك أصله كان بيقول أن معاه أربعتاشر نمرة .. أنا وصلت أهه .. على جنب يا أسطى !!



* اطبع صورتك


ع القهوة .. إبراهيم بيسأل حماده : ما تعرفش واحد بيبيع بوكسرات مستوردة ؟؟ .. حماده قال له : ليه هو أنت هاتتصور بيهم ؟؟ .. قال له : تصدق فكرة ؟؟ احنا ممكن نعمل مشروع إطبع صورتك وصورة من تحب على البوكسر بتاعك و نقف بترابيزة جنب سور المترو .. قلت له : يا دلعك بقى في الفالانتاين !! هاتلاقي العيال الحبيبة واقفين طوابير بلابيص علشان ما ياخدوش وقت !!