سيناريو كل يوم


- أخرج م البيت .. أسلم على "محسن" السباك اللي في الغالب بيكون قاعد نايم قدام المحل وما غسلش وشه .. هو على فكرة ما بيغسلوش أبداً !! .. بالكتير بيفركة بإيديه الاتنين لما يدخل عليه أول زبون !! .. أسلم ع الخفير بتاع الجراج اللي جنبنا وأسأله على سجاير يقول لي وهو باصص لأي حاجة تانية غيري وبيسلك سنته الفضة بلسانه يأي: لا والله يا بيه ما فيش سجاير شوية وهاروح أشتري !! .. الخفير ده ما بيجيبش غير قاروصة سجاير واحدة في الشهر وفي الغالب بيشربها هو والكام بواب اللي بيلعبوا معاه دومنه طول اليوم !! .. وبعد ما تخلص يفضل سايب القاروصة فاضية في الفاترينة الإزاز اللي قدام الجراج بشكل يوحي لك إن فيها سجاير .. تسألني ما بيرميهاش ليه ؟؟ .. أقول لك علشان بيقطع منها كل شوية حتة ورقة صغيرة يقيد فيها حساب اللعب !! .. طب وأنا باسأله ليه طالما عارف إن ما عندوش سجاير ؟؟ .. تعود !!


بعد شوية .. أبص ع الكام عربية الأمريكاني القديمة المركونين صف ورا بعض قدام سور الأرض الفاضية .. واللي ما أعرفش قصتهم إيه ولا بتوع مين ؟؟ .. بس بصراحة نفسي أشتري عربية فيهم !! .. بعدين أعدي بسرعة من قدام فرن العيش علشان اتحاشى النظرات الغبية للناس المتنتورين اللي قاعدين ع الأرض مستنيين العيش وبيتسلوا بالفرجة ع اللي رايح واللي جاي وكأنهم لما يبصوا ويبحلقوا كده هايشبعوا !! .. وبعدين أقابل قطيع الكلاب العبيطة اللي ما بتهوهوش إلا أما حد يعدي قدامها زي ما تكون افتكرت فجأة إن ليها حنجرة أو إنها بتعرفنا بنفسها إنها كلاب !! .. ولو الشارع فاضي ممكن أتحرش بكلب فيهم وأدبدب له برجلي وأنا باقرب منه وباخوفه نياهاهاهاهاها .. لحد الشارع العمومي الأولاني ما فيش كده حاجة تاني يتبص عليها !!


عديت معايا الشارع ؟؟ .. لأ !! .. مش عاوزك تتردد وتقف مكانك !! .. لازم تبقى سئيل (مش عارف بصراحة بالهمزة ولا بالقاف) وأنت بتعدي وتعمل عبيط !! .. أصل كده كده هايشتمك في سره وهاتشتمه في سرك يبقى تعدي وتخلص بقى !! .. أنيس منصور كان قال مرة فيما معناه :"إن فيه قاعدة مشتركة متبادلة بين اللي بيسوقوا عربيات واللي ماشيين على رجليهم وهي أن نصهم حيوانات والنص التاني مجانين !!" .


الشارع الموصل للشارع العمومي التاني ما فيهوش حاجة تتشاف بالنهار غير التجمع اليومي لنقابة الروبابيكيا !! .. حوالي سَبع أو تـَمَن عربيات كارو وتروسيكل عليهم شوية كراكيب قديمة وحاجات مستعملة مركونين قدام الجنينة اللي بقت مقلب زبالة !! .. واللي يا سبحان الله لما بتنضف وتبقى جنينة ما حدش بيقعد فيها منهم !! .. هاتلاقي بتوع الروبابيكيا في الغالب قاعدين بيفطروا وبيسبوا الدين لبعض وهما بيفطروا وبعدين يضحكوا شوية وبعدين يسبوا الدين لبعض تاني !! .. وبعدين .... بـُص م الآخر هو سب دين يتخلله فطار !! .. وعلى جنب هاتلاقي الحمير سرحت بالعربيات مع نفسها لحد ملف العربيات اللي بعد الجنينة وبتقلب في الزبالة علشان تفطر هي كمان !! .. طبعاً هاتلاقي واحد عاوز يلف بعربيته من الملف ومش هايعرف لأن الحمير سادين السكة بالعربيات !! .. فيبدأ يزمر بالكلاكس وبتوع الروبابيكيا شايفينه وسامعينه ومنفضين له ع الآخر !! .. يا إما يزهق ويمشي ويروح يلف م الملف التاني يا إما ينزل يزعق لهم فيسبوا له الدين هما والحمير !! .. أما بالليل بقى الشارع ده يا سيدي .. الشارع ده يا روحي .. الشارع ده يا عيني !! .. فيه تجمع لبتوع الروبابيكيا برضه بس الفرق أنه تجمع للحريم المستعملة :D


وصلت معايا للشارع العمومي التاني ؟؟ .. عديت ؟؟ .. برافو عليك !! .. لأ ما تخافش هانركب أهه .. أنا عارف إنك تعبت من المشي !! .. ما أنا علشان أوصل للشغل كل يوم بامشي نص ساعة وباركب عشر دقايق !! .. واللي باركبه قد اللي بامشيه !! .. ع الأقل أنت بتمشي باحترامك إنما لما بتركب بتتبهدل وبتصدع وبتتخنق !! .. الشارع الموصل للشارع العمومي التالت ما فيهوش حاجة تتشاف غير الفكهاني الحرامي اللي ع اليمين في نص الشارع وبتاع الجرايد .. الفكهاني ده ممكن تكتشف عنده أنواع فاكهة ما شفتهاش قبل كده ف حياتك !! .. تحس كأنه هو بس اللي بيزرعها !! .. لكن لو قربت واتفرجت ودققت هاتلاقي أن البتاع اللي شكله حلو أوي ده ومتلمع ومتغلف ومرصوص بعناية يا سبحان الله طلع برقوق !! .. الكيلو بتلاتين جنيه بس !! .. وإن كمان .. شوف إزاي يا جدع !! .. الشيء الأصفر الملولو ده موز !! .. مش موز وأنت مبوز كده وضارب بوز لأ مــوز برشاقة ودلع !! .. زي اللي كنت بتشوفه زمان مرسوم في الكتب في أطباق الفاكهة !! .. طبعاً لما أقول لك أن الكيلو بعشرين جنيه بس مش هاتصدق نفسك أنا عارف :D .. وعلشان هدومك ما تتبقعش الراجل كتر خيره فرط لك الرمان وحطهولك في طبق مغلف !! .. دي بقى اللي بجد "تسر الناظرين" .. بس بيني وبينك لو شفت الراجل الفكهاني ده وهو لابس الجلابية المكوية وماسك المشنة وقاعد حاطط رجل على رجل بجزمته المتلمعه تقول ده باشا !! .. أصلاً حضرتك ما بيقفش لأي زبون !! .. وبعدين ده أنا عمري ما شفت دبانة واحدة ع الفاكهة اللي عنده !! .. أنا أساساً ما أعتقدش إن الدبان المعفن بتاعنا ده عارف إن دي فاكهة !! .. إذا كنا احنا ما نعرفش يا جدع !!


نيجي بقى لبتاع الجرايد .. وده بصراحة يمكن الحاجة اللي بتهون عليا المشوار في الآخر .. منظر الكتب أصلاً بيبسطني بصراحة !! .. بس في الغالب ما باقفش اتفرج عنده إلا بعد ما أخرج من الشغل علشان أعرف أتفرج بمزاج :))

يا نهار أبيض !! 

الشغل !!

الشغل !!

يا خرااااااابي !!

سلام