الواد بتاع جوجل


أيام ما الواحد كان لسه مستجد في الحقل التدويني وكنت عايز أنتشر بقى والناس تعرفني وتيجي تزورني في المدونة .. كنت باتنطط في المدونات زي البرص .. وما كنتش لسه أعرف حكاية الإشراف على التعليقات دي !! .. وفي مرة دخلت مدونة مش فاكر اسمها حالياً .. لقيت صاحبها بيحتفل بعيد ميلاده .. وناس كتيييييييرة أوي معلقين عنده .. فقلت أهنيه بالمناسبة السعيدة دي .. كتبت التعليق ودوست نشر التعليق .. ما لقيتوش !! .. كأنه اتبخر !! .. رحت كاتبه تاني !! .. برضه ما اتنشرش !! .. ساعتها شكّيت أن الكمبيوتر بتاعي متفيرس .. فعملت عليه سكان واتأكدت أنه نضيف .. ورحت ع المدونة أياها كتبت التعليق لتالت مرة !! .. وبرضه ما اتنشرش !! .. فضلت كده بتاع خمس ست مرات .. والعند بقى ركب معايا وقلت يا أنا يا التعليق بتاعي النهارده !! .. بعد كده قلت أكيد فيه حاجة غلط !! .. اشمعنى يعني تعليقات الناس التانية دي كلها تتنشر وأنا لأ ؟؟ .. أكيد الواد اللي قاعد ع الكمبيوتر نوبتجي الليلة في قسم نشر التعليقات في شركة جوجل قاعد فاضي وبيتسلى عليا وبيشتغلني !! .. ماشي يا عم !! .. قشطة !! .. بس ما تزعلش !! .. وطقت في دماغي أشتمه !! .. ورحت شاتمه في التعليق شتايم محترمة وبألفاظ يعاقب عليها القانون !! .. واستنى إن بسلامته يتحمق ويرد عليا ؟؟ .. أبداً !! .. ده إيه البرود ده ؟؟ .. طبعاً ما هو قاعد في التكييف وبيقبض بالدولار من دمنا !! .. المهم دخلت شتمته تاني وتالت ورابع !! .. ما أنا باخد حقي بقى وبافش غلي !! .. ولازم الأشكال دي تتربى علشان يبطلوا يتسلوا علينا ويستهتروا بينا !! .. وعلشان يعرفوا إننا صايعين أوي ومدقدقين برضه وصاحيين لهم !!


تخيل حضرتك كده إن واحد ما يعرفكش ولا عمرك حتى سمعت عنه داخل بيقول لك في كذا تعليق : "كل سنة وأنت طيب وبألف خير وصحة وسعادة وراحة بال إن شاء الله وبإذن الله يكون عام جديد سعيد عليك مليان فرحة وهنا وسرور وتحقق فيه كل ما تتمناه" .. فتقوم تفرح أوي وتنشكح وبعدين تلاقيه سحب منك كل الأمنيات الطيبة دي فجأة واتحول وبقى بيشتمك : "أنت أصلاً حيوان يا (....) يا ابن الـ (....) يا (....) يلعن (....) يا (....) .. يلعن أبو اللي قعدكم على جهاز يا ولاد الـ (....) يا بهايم !! .. لو أنت راجل من ضهر راجل تنشر تعليقاتي في المدونة !! .. إنما أنت أصلاً مش راجل يا ابن الــ (....) طب أنا قاعد لك بقى يا واطي وفاضي لك !!


المهم بعد ما هديت كده واستريحت واستنفذت كل مخزون الشتايم اللي كان عندي لدرجة إني بقيت بآلف شتايم يا جدع !! .. دخلت على مدونة تانية وكتبت تعليق على موضوع فيها .. وأنا بادوس نشر التعليق لمحت بالصدفة جملة "تم حفظ تعليقك وسيتم نشره بعد الموافقة عليه" !! .. 


-- مش أفهم أنا بقى ؟؟ .. لأ . أبداً !! --


قلت ده بيعند معايا بقى !! .. شوية شوية ألاقيه مقرصن على الكمبيوتر بتاعي وبيدمرهولي !! .. طب والله العظيم ما أنا ساكت له ابن الـ (....) .. ولسه هاشتمه افتكرت إن المدونة اللي أنا فيها دي بتاعة زميلة وما يصحش برضه إنها تشوف الألفاظ دي عندها !! .. طب أعمل إيه ؟؟ .. أعمل إيه ؟؟ .. رحت راجع له تاني ميدان المعركة (المدونة الأولانية) .. وطبق الأصل العلقة الأولانية !! .. يعني أنا في المحضر الأولاني قلتلهم أنا رمضان السكري أغير أقوالي تاني إزاي ؟؟ .. كتبت "على فكرة ما تستعبطش !! .. أنت عارف كويس أوي إني أقصدك أنت بالشتيمة اللي فاتت دي كلها مش حد تاني !! .. علشان ما تحاولش بس توقع بيني وبين أي حد تاني محترم يكون بيقرا هنا وبيتابع المدونة !! .. أو تكون فاكر مثلاً إني بالقح على حد تاني !! .. لأاااا .. أنا أقصدك أنت يا (....) يا ابن الـ (....) يا (....) يلعن (....) يا (....) يا واطي !! .. أنا قاعد لك هنا ومش ماشي إلا أما ترد عليا !! .. وابقى وريني بقى هاتعمل إيه !!".


مش فاكر مين بصراحة ربنا يكرمه فهمني موضوع الإشراف على التعليقات ده بعد الموقعة دي بكام يوم ؟؟ .. ومش عارف ليه لما حاولت أدخل المدونة أياها تاني لقيت صاحبها فاتحها للمدعويين فقط ؟؟ :D يكونش زعل من حاجة ؟؟ :D:D

مش كان واجب برضه عليه يعزمني علشان أقول له كل سنة وأنت طيب :) 


16-09-2012

11:18 PM