بالونة


ع الكورنيش .. بتاعة الدرة قاعدة على الأرض بتشوي الدرة وجنبها بنتها الصغيرة اللي عندها سنتين ونص قاعدة بتلعب في الورق الأخضر بتاع الدرة عمالة تقطعه ، إيديها ووشها متلغمطين بالشواشي ، نسيت فردة شبشبها الصغير اللي كانت عاملاها عربية نقل من شوية محملاها غطيان كازوز وزلط !


زفة عربيات وموتوسيكلات عدت من قدام بتاعة الدرة .. البنت الصغيرة ما لحقتش تشوفها ! .. بس فرحت بصوت الكالاكسات وقعدت تتنطط وتصقف بإيديها الاتنين وتقول : بيب بيب بيبب بيب أوسة أوسة .. بالونة حمرا طارت من على عربية العروسة ، الهوا فضل يلاعب فيها شوية لحد ما دوخها وهـُب راحت خبطت في البنت الصغيرة !

البنت الصغيرة فرحت أوي بالبالونة الحمرا ، وفتحت لها حضن كبير أوي أوي أوي .. فرحتها بالبالونة نسيتها الورق الأخضر بتاع الدرة وداست عليه برجلها الصغيرة الحافية من غير ما تحس ! .. وهي بتلف عشان توري البالونة لأمها ، اتلسعت منها في المنقد .. فرقعت !

أول ما البالونة فرقعت .. البنت الصغيرة راسها رجعت لورا من الخضة وقعدت على الأرض وهي مش فاهمه إيه اللي حصل بالظبط !! .. بصت على إيديها في ذهول ما لقتش البالونة ! .. انفجرت في العياط ! .. وهي بتعيط بصت تاني على إيديها ، شافت البالونة المقطوعة ، سكتت ثانيتين وهي بتنهنه ، يمكن البالونة ترجع كبيرة تاني ، لكن .. ما رجعتش !

ــــــــــــــــــــــــــــــــــــــــــــــــــــ
هـــــامش :
اعتقدت بأنني سأكون غاضب جداً مما حدث لي
لكن من الصعب أن تظل غاضباً عندما يوجد هناك الكثير من الجمال في العالم
أحياناً أشعر بأنني أشاهد كل شيء في نفس الوقت وهذا كثير جداً عليّ
يملأ قلبي مثل بالون أوشك على الانفجار
وعندئذ أتذكر أن علي أن أرتاح
وأن أتوقف عن محاولة التشبث به
ثم يتدفق من خلالي مثل المطر
ولا أشعر بأي شيء سوى بالإمتنان
عن كل لحظة
من حياتي القصيرة الغبية
ليس لديكم فكرة عما أتحدث عنه ، أنا متأكد من ذلك
لكن لا تقلقوا
يوماً ما ستعرفون :)
American Beauty