ثانوية عامة


- اليومين دول عشان المراجعات بتاخد كل يوم ستين جنيه للدروس !! .. ده غير الملازم ومصروف إيدها !! .. والله نزلت من البيت النهارده من غير ولا مليم وجيت مشي !! .. عشان أديها عشرة جنيه تركب بيهم توك توك في الجو الحر ده ، وتشرب لها كوباية عصير ولا حاجة ساقعة !! .. من كام يوم برضه وأنا راجع اتصلت بيا ع المحمول وقالت لي : يا بابا أنا عاوزه آكل فراخ مشوية ع الفحم ، عشان كنت ماشيه مع صحابي ودخلوا ياكلوا فراخ في محل وأنا ما كانش معايا فلوس فـ روحت ع البيت !! .. يومها والله كانت آخر ميت جنية في جيبي ، قلت حرام برضة أكسر بخاطر البت وأحرمها من حاجة نفسها فيها .. رحت محل الفراخ ألاقيلك الفرخة المشوية بـأربعة وتلاتين جنيه !! .. وفراخ مستوردة كمان مش البلدي بتاعتنا !! .. جبت فرختين ، آدي كده سبعين جنيه .. وأنا ماشي لقيت لك راجل بتاع بطيخ واقف على جنب ، باسأله : بكام يا عم الواحدة ؟؟ .. قال لي : بعشرة جنيه !! .. رحت جايب بطيختين ، اللهم صلي ع النبي قد كدهوه ، طلعوا زي العسل .. وأنا على باب البيت ، راحت البت الصغيرة متصلة بيا عشان أحول لها رصيد من السنترال !! .. رحت محول تلاتة جنيه لكل بنت !! .. آدي يا عم الميت جنيه ، خلصت في طقة !! .. وأنت عارف ؟؟ بقيت أنا وأمهم نمصمص الأجنحة وناكل وراهم هههههههه ، ياللا الحمد لله .. لسه قبلها برضه بكام يوم ، البت الكبيرة خدت تلتمية وخمسين جنيه عشان تجيب لبس تِحضر بيه شبكة واحدة صاحبتها .. أمها تقول لك يمكن حد يشوفها في الفرح ويتقدملها !! .. مع إن جاني ابن واحد جارنا من مدة وكلمني عليها بس أنا ما وافقتش عشان معاه دبلوم .. رغم إنه مبسوط مادياً .. أبوه عنده معرض سيراميك كبير ومشغله معاه .. وباني بيت كبير خمس أدوار وعامل لكل عيل من عياله شقة ومشطبها له .. وأمها ساعتها اتخانقت معايا عشان ما وافقتش !! .. قلت لها : عشان البت ما تحسش في يوم إن إحنا ظلمناها وجوزناها لواحد أقل منها في الشهادة ، أو تبص لواحدة من أخواتها بعد كده لو واحدة فيهم اتجوزت واحد معاه شهادة عالية .. البنات أصلها بتبص لبعض وبتغير !! .. وقلت لها : ما تعرّفيش البت بالموضوع عشان ما تتعلقش !! .. بعدها بكام يوم .. لما رجعوا من فرح صاحبتها .. لقيتلك أمها بتقول لي : كان معاك حق إنك ما وافقتش على بتاع السيراميك !! .. أصل صاحبتها اتخطبت لواحد محاسب .. قلت لها : صدقتي بقى إن كان عندي حق ؟؟ .. هو أنا يعني هاكره لها الخير ؟؟ .. احم .. وأنت لو فيه قدامك جدع ابن حلال كده ومحترم وتعرفه عاوز يتجوز ابقى قول له على (....) ولا أنت ما بتحبش تتصدر في المواضيع دي ؟؟ .. والله الواحد ما هايرتاح إلا أما يسترهم ويتطمن عليهم في بيوتهم .. ربنا يعدلها إن شاء الله .. متهيألي ما شفتش أنت بقى آخر العنقود صح ؟؟ .. طالعة تانية إعدادي .. ما تعرفش تاخد معاها لا حق ولا باطل من كتر اللماضة !! .. هههههههه .. ياااااه الساعة بقت واحدة ونُص ؟؟ .. لما اتصل بالبت أشوفها خلصت الدرس ولا لأ ؟؟