أول علقة


- كان بقالنا كتير ما اتلمناش بصراحة .. كل واحد فينا اتفاجيء بالتاني ع القهوة .. وعرفت إن صابر 5 هو اللي اتصل بباقي الشلة ولمنا ع القهوة .


ملحوظة أولانيه : جميع الأشخاص المذكورين في هذا الموضوع من وحي الخيال ، وبالنسبة لاختيار الأسماء : صابر 1 ، صابر 2 ، صابر 3 ، صابر 4 ، صابر 5 ، فهذا لأن الناس دي كلها عندهم نت في البيت وممكن مرات أي واحد فيهم تدخل بالصدفة ع المدونة وتقرا الموضوع :-D


ملحوظة تانية : ربنا يستر

 
صابر 5 : أنا آسف يا جماعة إني نزلتكم في الجو ده !


صابر 3 : ما خلاص نزلتنا يا عم أنت هاتمثل .


صابر 5 : أنا أصلي بصراحة ما كنتش متوقع إن كلب فيكم هايعبرني وينزل يقابلني دلوقت عشان كده اتصلت بيكم كلكم ، واحشنّي يا أوغاد !


صابر 1 : وأنت أوحش .


صابر 2 : ما تنطق يا ابني الله يحرقك الجو رصاص !


صابر 5 : أنا اتخانقت مع مراتي .


صابر 4 : هههههههههههههههههه .. طب وريني قفاك كده !


صابر 5 : أنا باتكلم بجد !


صابر 1 : هات لنا طاولة يا عم ، الواد ده شكله رايق وهايخنقنا وأنا مش ناقص !


صابر 5 : نفسه تصعب عليه وعينه تدمع .. باقولكوا إيه أنا قايم .. انتوا أصلكوا جزم وهاتتريقوا عليا وأنا اللي فيا مكفيني !


صابر 2 : وأنت فيك إيه إن شاء الله ؟


صابر 5 : باقوللك اتخانقت مع مراتي !


صابر 3 : طب إيه المشكلة ؟؟ .. فين الموضوع ؟؟


صابر 5 : أصلها استفزتني فشتمتها راحت شتماني وحدفتني بالريموت وجريت ع الأوضة وقفلت على نفسها بالمفتاح !


صابر 1 : ولا يهمك ، أنا عندي ريموت زيادة في البيت ابقى خده ، بس ابقى شيله بعيد عنها .


صابر 5 : (بصوت عالي) .. ريمووووووت إيه وزفت إيه ؟؟ باقول لك ضربتني !!


صابر 4 : طب اهدى بس كده ووحد الله .. فرجت علينا القهوة الله يحرقك .. اللي أنا عاوز افهمه بجد منك دلوقت ومش باهزر والله العظيم ، أنت زعلان عشان ضربتك ؟؟


صابر 5 : أيوه طبعاً ! .. أنا أول مرة حد يضربني !


صابر 1 ، صابر 2 ، صابر 3 ، صابر 4 : ههههههههههههههههههههههههههههههههههههه


صابر 5 : بعد ما يشتم ويسب ويلعن .. يضحك معانا .


صابر 2 : لو تشوف منظرك وأنت بتقول ضربتني ! .. يموت م الضحك ! .. وبعدين برضة أنا مش فاهم أنت مكبر الموضوع كده ليه ؟ .. ما كلنا بنتضرب من مراتتنا .


صابر 3 : معلش يا ابني ده أصله مستجد ! .. بــُص ! هي دايماً أول مرة بتبقى صعبة كده بعد كده هاتتعود صدقني .


صابر 4 : أهم حاجة ما تضربكش على قفاك !


صابر 2 : أه الضرب ع القفا إهانة .


صابر 1 : وبعدين أنت أصلك غشيم .. عارف هي لما ضربتك كنت عملت إيه ؟


صابر 5 : وقد بدأ عليه الذهول .. كنت عملت إيه ؟؟


صابر 1 : كنت طلعت لها لسانك وقلت لها ما وجعتنيش !


صابر 5 : نعم يا فالح ؟؟


صابر 3 : أه والله يا ابني .. عارف لو كنت عملت كده معاها ؟؟ .. كانت اتجننت !


صابر 5 : ده كان ممكن الريموت يخـُش فِ عيني يصفيها !


صابر 2 : طب الحمد لله ربنا ستر ، بعد كده يا حمار لما تتخانق اختار مكان تعرف تستخبى منها فيه .. يعني أنا مثلاً لما باتخانق مع مراتي باجرجرها لأوضة العيال ، طبعاً هي لئيمة بتبقى عاوزه تجرجرني للمطبخ بس على مين ؟


صابر 4 : وبعدين اوعى تشتمها حتى لو شتمتك .. يا سيدي لو الشتيمة حرقتك أوي ، قوللها الله يسامحك الشتيمة بتلف تلف وترجع لصاحبها !


صابر 3 : عارف ؟؟ .. هاتلاقيها بتهري في نفسها ! .. وبتنكشك وبتستفزك بأي طريقة علشان ترد عليها ! .. ولا كأنك سمعت حاجة ، كأنك هوا .


صابر 1 : المهم إنها بعد ما تهدى ، تروح تصالحها !


صابر 5 : أنا اللي أصالحها ؟


صابر 2 : أه طبعاً ، وتتحايل عليها كمان !


صابر 3 : ولا أنت عاوز مسلسل النكد يستمر ؟


صابر 2 : كله من التليفزيون ! .. هو اللي بوظ دماغ الرجالة و فِ الآخر بيتنفخوا في البيوت !


صابر 4 : بــُص ! .. لما تشوف راجل ماشي هو ومراته في الشارع ومنشكح أوي وبيضحك تعرف إن ده لسه مضروب طازة ، أما اللي ضارب بوز ومش طايق نفسه فده لسه يا عيني هايروح ياخد العلقة !


صابر 5 : طب لو ماشي معاها عادي وما بيتكلمش ؟


صابر 1 : ده تلاقيه أخرس يا عيني ههههههههههههههههههه


صابر 3 : أنت فكرك يعني أبوك لما كان بيزعق لأمك قدامك ده كان بجد ؟؟


صابر 5 : أمــال إيه ؟؟


صابر 2 : دي تمثيلية يا حمار !! .. يا ابني هما كانوا بيتفقوا من ورانا إنه يشخط فيها ويزعق لها قدامنا عشان يحافظ على برستيجه ، إنما من ورانا كانت بتظبطه !


صابر 4 : أنت ما حدش قاللك على التلات قواعد بتوع الخناقات ؟؟


صابر 5 : لأ والله !


صابر 1 : يا ضنايا !!


صابر 4 : طب هات ودنك أحسن يكون فيه حد عازب قاعد ويسمعنا ! .. تاني قاعدة ...


صابر 5 : أمال إيه هي أول قاعدة ؟؟


صابر 2 : ما تستعجلش على رزقك ، هاتعرفها لما تروح !


صابر 5 : طيب !


صابر 4 : تاني قاعدة يا سيدي : ما تنامش أنت ومراتك متخاصمين لأي سبب !


صابر 5 : اشمعنى ؟


صابر 3 : عشان ما تديهاش فرصة تفكر في طريقة تخلص عليك بيها !


صابر 1 : تالت قاعدة : اوعى تروح لأمك وأنت متخانق مع مراتك !


صابر 5 : ليه ؟؟


صابر 2 : عشان يا إما هاتسم بدنك وتنكد عليك وتشحنك زيادة على مراتك ..


صابر 4 : يا إما هاتنكد على مراتك لما تشوفها وبالتالي هاتنضرب تاني من مراتك !


صابر 3 : باقولكوا إيه ؟ .. ياللا نروح أحسن الجو صعب !


صابر 1 : ياللا استهدى بالله وروح صالح مراتك ، التأخير مش في مصلحتك !


صابر 5 : لأ أنا هاقعد شوية مع نفسي .. غوروا انتوا !


صابر 2 : شكلك كده مش هاتهمد إلا أما تعرف أول قاعدة !


صابر 1 ، صابر 2 ، صابر 3 ، صابر 4 : ههههههههههههههههههههههههه .. سلام

صابر 5 : ســلام !


ولما عاد صابر 5 إلى منزله وجد زوجته قد أوصدت باب الشقة من الداخل بالمزلاج ، وفي الصباح بعث بالرسالة التالية لأصدقائه :

"أول قاعدة : ما تسيبش البيت لما تتخانق مع مراتك ، لأن النوم ع السلم بيكسر الضهر".