تيت تيت تيت






لما العدة بتاعة "فلان" اتسرقت واتصل على رقمه ، رد عليه اللي لقى العدة وقال له : أيوه العدة معايا ، اقفل دلوقت عشان مستني تليفون مهم .. يا جدع ما تنرفزنيش ، دي عدتي والخط اللي عليها بتاعي .. وهو أنا قلت لك إنها عدتي ما أنا عارف إنها عدتك ؟ .. طب لو سمحت ترجعهالي واللي أنت عاوزه يا سيدي أنا تحت أمرك ، وخللي بالك العدة فيها تتبع يعني لو عملتلك محضر في القسم هايجيبوك من قفاك .. هههههههههههههههه ، ما أنا عشان كده ما رمتش الخط بتاعك ! .. يعني  إيه ؟؟ .. يعني لو رُحت عملت محضر ف القسم وعرفت تاخد تصريح م النيابة لشركة المحمول عشان يعرفوا الخط اللي شغال ع العدة ده بتاع مين وعنوانه إيه هايلاقوا إن الخط بتاعك هو اللي شغال ع العدة .. هه !! .. هههههههههههه تيت تيت تيت


بعد عشر دقايق .. آلــو ، أيوه يا باشمهندس أنا صاحب العدة .. عايز إيه ؟؟ .. عايز العدة ، تاخد كام وترجعها ؟؟  .. لا يا عم أستغفر الله ، أنا يومين كده وهارجعهالك من غير أي حاجة .. ربنا يكرمك يا رب ، طب يومين ليه بس ؟ .. أنا أصلي طالع فايد مع جماعة صحابي يوم الجمعة وكنت عاوز عدة فيها كاميرا عشان نتصور بيها .. الله ما طولك يا روح ، يا باشمهندس الخط ده بتاع الشركة اللي شغال فيها وعليه أرقام عملا ، وأنت ما ترضاليش الأذية ! .. أنت بتتكلم من سنترال ولا معاك خط تاني ؟؟ .. لا ده رقمي التاني .. طب يا عم مشي نفسك بيه اليومين دول ، واللي هايتصل بيك هاديله رقمك يكلمك عليه قشطة كده ؟؟ .. استغفر الله العظيم يا رب ، يا باشمهندس فيه أرقام مهمة ع العدة أنا عاوزها ..  هات ورقة وقلم وأنا أمليهملك .. هاتمليني خمسميت اسم ؟؟ .. مش أنت اللي عاوز ؟ ، باقوللك اقفل دلوقت عشان الحاجة بتنده ، سلام ! تيت تيت تيت


بعد تلت ساعة .. آلــو ، إيه يا عم الرغي ده كله ؟؟ .. معلش أصل الحاجة كانت بتكلم خالي في الكويت .. كويت ؟؟ وخالك عرف رقمي منين ؟؟ .. لأ ده احنا اللي اتصلنا بيه .. اتقي الله يا أخي تلت ساعة بتكلم الكويت ؟؟؟ .. أنت مش قلت الخط بتاع شركة ؟ .. أوووف يعني هي فلوس حرام ؟؟ .. طب والله يا عم خالتي قعدت تدعيلك قد كده .. هي خالتك ولا خالك ؟؟ .. لأ خالي ده اللي في الكويت ، إنما خالتي مع جوزها في السعودية بيعملوا عمرة .. يا عم ارحمني بقى أبوس رجل خالتك ! .. بــُص أنا هاقفل دلوقت علشان معايا إنتظار .. معاك ؟؟ يا عم ده رقمي أنا ، مين اللي بيتصل ؟؟ .. مش عارف ، الاسم مكتوب بالإنجليزي ! .. طب لو سمحت ما تردش ! .. ليه يا عم مش جايز تكون حاجة مهمة ؟ .. يا عم وأنت مالك ! .. بــُص اقفل واتصل تاني ، ولا أقوللك أنا هاكلمك ، سلام ! تيت تيت تيت


بعد ساعة ونــُص .. آلــو ، سلامو عليكم .. (صوت أنثوي) وعليكم السلام مين حضرتك ؟ .. أنا صاحب العدة اللي حضرِتك بتتكلمي منها .. صاحب العدة ؟؟ .. أيوه يا فندم ، ممكن تديني الأستاذ اللي كلمني من شويه عشان أعرف هيديني العدة إمتى ؟ .. طب بــًُص هو "ماهر" نزل يجيب حاجة وهايرجع بعد شوية .. أمال التليفون كان مشغول ليه طول المدة دي ؟؟ .. معلش أنا أصلي كنت باتطمن على خطيبي .. طب يا ستي ما تكلميه من موبايلك .. لأ ما هو أنا أصل ما عيش رصيد ، وبعدين أنا ما طولتش والله عشان هو كان في الورشة وفِ إيده شغل .. ساعة ونــُص وما طولتيش ؟؟ .. طب والله العظيم ما كملت دقيقتين ، أنت بس تلاقيك اتصلت والبت "رحاب" بتكلمني .. و"رحاب"  دي عرفت رقمي منين ؟؟ .. لأ هي ما تعرفش رقمك ، أنا اللي اتصلت بيها عشان تنزل معايا نجيب قماش التنجيد .. طب يا ستي ما تكلمك على موبايلك .. ما هي في الأول كلمتني على موبايلي بس رصيدها خلص فكلمتها من عندك .. يا دي النيلة ! هي مصر كلها ما فيهاش غيري اللي معاه رصيد ! .. معلش يا اخويا ، باقوللك لو سمحت أغير اللغة منين ؟؟ .. هه ؟؟ .. عاوزه أقلبه عربي ! .. لو سمحت ما تلعبيش في الموبايل عشان عليه شغل مهم .. ما تخافش مش هابوظهولك والله .. يا صبر أيوب ! .. استنى أشوف عندك إيه ع الموبايل ، إوعى تكون محمل عليه قلة أدب ؟ .. هو فيه قلة أدب أكتر من كده ؟؟ .. الله يسامحك ! يسمع صوت زعيق (يا بت انتي ما لمتيش الغسيل لحد دلوقتي؟ إلهي تنضربي في قلبك يا بعيدة!) ، يا أمه لسه ما نشفش ، (إلهي ينشف ريقك زي ما انتي منشفه ريقي ، أصلك هاتتأسدي لو لمتيه) ، يووووه حاضر هاتنيل ألمه ، تيت تيت تيت


بعد تلات ساعات .. آلــو .. أيوه مين ؟ .. أنا صاحب العدة ، يا عم أنت نمت ولا إيه ؟؟ .. معلش كنت مريح شوية ، هي الساعة كام دلوقت ؟ .. الساعة سبعة .. طب ساعة كده وصحيني .. تيت تيت تيت



بعد ساعة .. آلــو .. أيوه يا باشمهندس أنا صحيت خلاص أهه .. يا جدع ما تخللينيش أغلط فيك هو أنا باتصل عشان أصحيك ؟؟ .. الله يسامحك يا عم ، أنا مش هارد عليك برضه عشان خاطر العدة ، إلا بالحق يا باشمهندس هي "سماح" دي إيه ظروفها ؟ .. "سماح" مين ؟؟ .. "سماح" يا جدع ، أصلها اتصلت بيك وأنا رديت عليها .. وأنت مال أهلك ترد عليها بتاع إيه ؟؟ .. برضه بتغلط ؟؟ طب هه ! .. تيت تيت تيت  


بالليل ..  آلــو .. أيوه ، مين بيتكلم ؟؟ .. يا عم أنا صاحب العدة ! .. أه لا موأخذة ، تعالى كـُل .. بألف هنا يا عم ..اعصري ليمون يا بت ع الشوربة ، معلش أنا آسف العدة اتوسخت ، أعمل لك إيه أنت اللي اتصلت واحنا بناكل ، خدي يا مه حتة الطحال دي .. لو سمحت أنا  .. ما تنساش تقول له ع الشاحن والسماعة / حاضر ! .. شاحن إيه ؟ وسماعة إيه ؟ آلــو آلــو .. أيوه يا باشمهندس معلش كنت باغسل إيدي .. ولا يهمك يا عم ، تاخد سيجارة عشان تحبس ؟ .. ههههههههههههه لأ حلوة شكراً يا عم ، باقوللك صح ، أنت محتاج الشاحن والسماعة ؟ .. هه ؟؟ .. أنا باقول يعني لو مش محتاجهم ناخدهم منك .. أنت مش قلت هاتديني العدة يوم الجمعة ؟؟ .. والله أنا محرج منك يا باشمهندس .. إشمعنى ؟؟ .. أصل الأربعين بتاع مرات عمي يوم الأثنين والحاجة هاتسافر البلد .. الله يرحمها يا عم ، أنا مالي ؟؟ .. ما هو أنا أصلي هاديها عدتي عشان ابقى اتطمن عليها وهي هناك .. أأأه والحاجة إن شاء الله هاتقعد قد إيه في البلد ؟؟ .. هاتقعدي قد إيه يا أمه ف البلد؟؟ / هارجع ع الجمعة / ليه يا أمه؟ / عشان فرح بنت أم كوثر يوم الخميس / يبقى تاخدي "سحر" معاكي / لأ أنا مش هاسافر البلد! / يعني إيه هاتقعدي هنا لوحدك؟ / أه قاعدة على قلبك ، ولا أنت عايزني أسافر عشان تقلبها غرزة أنت والحشاشين صحابك؟ / طب ورحمة أبوكي لتسافري مع أمك ، انتي فاكراني مركب إيريال يا بت؟ ، عاوزه تقعدي لوحدك عشان خطيبك ييجيلك زي المرة اللي فاتت؟ / إيه اللي يجيب خطيبك يا بت وأنا مش هنا؟ / والله يا أمه ما كانش يعرف ، أنا قابلته ع السلم / سلم يا بنت الموكوسة ؟ / يا أمه انتي هاتصدقي كلام الحرامي ده وتكدبيني؟ / أنا حرامي يا بنت الـ .. / أيوه حراااااااامي بأمارة العدة اللي في إيدك يا اخووووووووويا ، ولا أنت هاتبيعهم عليا؟؟ / أنت رجعت تسرق تاني يا واد؟ / يا أمه والبصحف الشريف دي كدابه! / بصحف يا حبسجي؟ ،  طب والله العظيم سارقها وصاحبها اتصل العصرية وأنا رديت عليه / يحرق أم العدد ع اللي عملها ، أنا هاكسرها أهه عشان ترتاحي!
آلــو آلـــو ، وحدوا الله يا جماعة مش كده ، آلــو آلــو ....   تيت تيت تيت