حواديتي




إلى أميرتي


ندر عليا لأرش حواديتي
سكر وفرحة معمولين بيتي
لجلن تنامي يا حلوة مبسوطة
ياللي ابتسامتك ليا زغروطة

وما تلوميش على حد فِ الأحلام
ولا تلوميش على قلب حب صحيح

أنا سندباد روميو عنتر قيس
مارد ومستنيكي في الفوانيس
عقلة صباع أنا فوق بساط الريح
تنين ياباني بابلع التماسيح

وما تلوميش على حد فِ الأحلام
ولا تلوميش على قلب حب صحيح

بندق هايلعب طاولة ع القهوة
ميمي راح يبوسها ميكي على سهوة
والساحرة الشريرة ماشية جنب الحيط
وشهريار هايبيت الكتاكيت

وما تلوميش على حد فِ الأحلام
ولا تلوميش على قلب حب صحيح

علي بابا والحرامية أهم قاعدين
بيذاكروا فِ الكيميا لعلاء الدين
بقلظ وبوجي اتصاحبوا على بكار
راحوا يضربوا بالنبلة فِ الأشرار

وما تلوميش على حد فِ الأحلام
ولا تلوميش على قلب حب صحيح