الست الكبيرة والعمارة الجديدة والكوبري


في التعلق فقد أحياناً .

من مدة .. كنت نازل أجيب فطار الصبح .. وقابلتني ست كبيرة في السن وسألتني عن العمارة الجديدة اللي طالبين فيها واحدة تشتغل بوابة .. كان منظرها بسيط .. جداً .. أنا ما اعرفش أنا ليه ارتبكت ساعتها .. يمكن لأني ركزت أوي فيها وفي ملامحها .. يمكن كانت أو كنت باحاول أفتكر فيها حد أعرفه .. مش عارف ! .. المهم رديت عليها " لا والله يا حاجة ما أعرفش" .. سيبتها ومشيت .. بس صورتها ما سابتنيش ! .. فضلت تتمتم "أروح فين وآجي منين بس يا ربي ؟" .. وأنا بابعد .. رحت المطعم لقيته قافل ! .. مشيت مسافة طويلة علشان أجيب الفطار .. ومسافة أطول علشان أجيب العيش .. وافتكرت أني نسيت اللبن والبيض فرجعت تاني .. قلت بدل ما أنزل مخصوص .. وافتكرت أن سجايري خلصت .. رجعت تاني أشتري سجاير .. وأنا راجع من عند بتاع السجاير بصيت على الست يمكن أشوفها تاني وأحاول أساعدها .. بس للأسف ما لقيتهاش ! .. خطوتين ووقفني واحد معاه سيجارة عاوز يولعها .. وبعد ما ولع السيجارة مني .. بص لفوق ورد على واحد كان بينده له من سقف عمارة جديدة كانت بتتبني ! .. بصيت للمكان اللي أنا واقف فيه .. يا دوب عشرة متر عن المكان اللي الست قابلتني عنده .. فرحت أني لقيت العمارة بس زعلت أوي لأن الست كانت مشيت !

********

 من فترة زارني في البيت واحد صاحبي هو ومراته وولاده .. مراته أوكرانية بالمناسبة.. صاحبي ده معايا من أولى ابتدائي .. يعني تقريباً من سبعة وعشرين سنة وأكتر ! .. قعدنا في البلكونة علشان ندخن .. وسيبنا الستات ترغي .. هما فهموا بعض ما تسألش إزاي ! .. كلمة روسي على كلمة إنجليزي على كلمة عربي انسجموا مع بعض ! .. البنت دخلت علينا البلكونة وصممت تقعد معانا .. فقلت لها : أدخلي جوه علشان البلاط ساقع عليكي .. قالت : "كوبري" .. وجريت على جوه .. أنا بصيت لصاحبي وقلت له : يعني إيه كوبري ؟ هي البت بتشتمني بالروسي ياد ؟؟ .. قاللي : مش عارف ! .. ما فيش ثواني ولقيت البنت جايبه مشاية صغننة (سجادة) وفرشتها ع البلاط ! .. وقالت لي : دي اسمها كوبري يا عمو ! .. بعد ما نزل قعدت أفكر .. إحساس صعب أوي لما تبقى مش عارف تتكلم مع ابنك ! .. مش عارف توصل له اللي أنت حاسس بيه ! .. ولا عارف تفهمه ! .. بس بعد شوية .. لقيت أن فيه أهالي وابناء كتير - للأسف - بيتكلموا لغة واحدة ومع ذلك مش فاهمين بعض !

* في التعلق فقد أحياناً .

يمكن لقيت لها معنى دلوقت بعد ما افتكرت الموقفين دول ! .. ساعات لما بنتعلق بحاجة بنسيب حاجة تانية قصادها من غير ما نحس !
البلاي ليست خلصت :)