المشاركات

عرض المشاركات من أكتوبر, 2010

لو حلمك

لو حلمك

كنتي حافظتي معايا عليا
كنتي فضلتي ماسكة إيديا
وما بعدتيش !
كنت باموت
حتى الأهة
كنت أحبسها وأبان مبسوط
علشان بس ما تتغميش !
حبيتك
وما حبيتنيش !
إلا حتى ما حاولتيش !
متكلبشة رجليكي فِ خوفك
فشل الماضي ساكن جوفك
وانتي مكانك ما خرجتيش !
فالحة تقولي :
إنـِك ليا .. وماليش غيرك
ما تسيبنيش ؟
إزاااااااااي ؟
بتلاعبيني ؟
ولا إكمني كنت عليكي رايح جاي ؟
جايز طيب
بس الطيبة ما تعيبنيش !
بس !
خلاااااااااااص !
ما ترديش !
***
اتطمنتي إني حبيبك ؟
وإني فِ جيبك ؟
وإنك لو سيبتيني هاضيع
وابقى ما فيش !
دايماً فاكره إنك أذكى
وإنك مالكه
طب بالذمة ؟
حد يشد ولا يرخيش ؟
كوني صريحة فِ مرة وحيدة
وما تغشيش !
هل فعلاً
كنت أنا حلمك ؟
ابنك ؟ راجلك ؟ سندك ؟ كلك ؟
حضن لهمك ؟ قدر احتلك ؟
ولا ده كله جبر خواطر ؟
ما تجاوبيش !
ده مش إجباري
وما تعتذريش !
إذا كان قلبي
اتداس بالجزمه
وما وقفتيش !
***
الحُــب
عطــــاء
مش ضمة فِ ضلمة
ورسالة ناعمة
وشغل نفاق !
الحُــب
أرزاق
وأنا مش شحات
ولا غاوي إواء
وما باشكيش !