علشانك



إهــداء / إلى أميرتي




أنا عود نعناع فنجان شايك
أنا برج الحظ فِ جرنانك
أنا آهه .. متاوبه .. وتنهيدة
وبخار الميه ف حمامك

♥♥♥

أنا شال .. اتحط على اكتافك
أنا خط المكوى على اكمامك
أنا وردة اتنقشت فِ إيشاربك
أنا كل زراير فستانك

♥♥♥

أنا نسمة تزغزغ ف مسامك
و ف عـِز الشمس
أنا تـَـنية إيدك فوق راسك
أعمل ضليلة لجنابك

♥♥♥

أنا حدوتك قبل منامك
أنا نُسخة حلمك لو فاتك
أنا لاخضر لازرق والفوشيا
أنا فُرشة تلون أيامك

♥♥♥

أنا ركن الزاوية لاحزانك
أنا فرحة بتسري ف شريانك
أنا خط العمر على كفوفك
أنا أصغر دايرة ف إبهامك

♥♥♥

أنا قـِـبلة روحك وكيانك
أنا أبعد نقطة ف سرحانك
أنا أسفلتك فِ طريق سفرك
أنا بوصلة قلب اتجاهاتك

♥♥♥

أنا قدر اتسطر فِ كتابك
أنا عشق اتفصل علشانك
أنا بكره .. امبارح .. دلوقتي
أنا وقت موافق لأوانك

♥♥♥

أنا سِرك سترِك وحجابِك
أنا نفس الحِس لإحساسك
تمتمتك أنا وابتساماتك
طبطبة بتونس فِ حواسك


♥♥♥

أنا صدك ردك وجوابك
أنا لحمك دمك أعصابك
أنا صبرك وقت استفزازك
أنا لحظة فشلك ونجاحك

♥♥♥

أنا ألبوم صورك ف غيابك
أنا ضحكة بتمسح ف عذابك
أنا آخر شرطة ف موبايلك
تكملة الكلمة اللي ف بالك

♥♥♥

أنا عيني فتحة شباكك
وروحي عتبات أحلامك
أنا خَد رصيف أبيض ناعم
مستني يبوسك فِ اكعابك

♥♥♥

أنا طعم السكر فِ لسانك
أنا أجمل لحن فِ ألحانك
أنا أبوكي وأخوكي واعمامك
أنا ابنك بارضع فِ حنانك

♥♥♥

أنا إيد مرفوعه فِ صلاتك
أنا نهر ف عطشك وصيامك
أنا ضهر يشيل لك أحمالك
أنا كُل ملامح قسماتك

♥♥♥

أنا كل دول وأكتر بكتير
أنا كل حـــــــــاجــة
عَلشــانـِك

***
اللوحة لــ بنت باشا
مايو 2010