الشمس الجريئة




فاكرين الأغنية دي ؟؟
الشمس الجريئة والنسمة الرقيقة والضحكة البريئة للموجة الشقية في بحور إسكندرية واحشانا يا حبيبي !
مفرحة قوووووي .. ولذيذة وحنينة وشقية وحيوية ومبهجة قوووووووي
تحسها كده أغنية ملونة !! فيها ألوان الطيف وريحة البحر وزغزغة النسيم !!
قدرت تمنع نفسك من السرحان ؟
في الصور الحلوة والذكريات الجميلة ؟
ممممممم
ما افتكرش !!
ما تقاوحش !!
هارشك أنا .. هه ؟؟
وشايفك بتضحك أهه
يا جدع أضحك مكسوف ليه
هههههههههههههههه
- عاملين إيه كلكم ؟
يا رب تكونوا بألف خير وصحة وسعادة وهنا وفرحة وراحة بال ورضا بالحال .اللهم آمين
واحشنّي والله من هنا لإسكندرية !
طب غنا وسمعنا .. بحر وبلينا رجلينا وطرطشنا على بعض .. شمس واتشمسنا .. هوا واتنفخنا آآآآ .. قصدي اتهوينا .. ضحك وضحكنا .. طب إيه بقى ؟؟
أيوه يعني وبعدين ؟؟ ..
أه يا شريرين !!
إيه سايبه هي ؟؟
مش تقولوا لي فين النكد ؟؟
ربنا ما يجيب نكد يا رب .. ويجعل أيامكم كلها فرحة وسعادة . اللهم آمين
هو موقف من فترة ومش هاطول عليكم فيه :
شاب زيي وزيك .. متجوز جديد ربنا رزقه بطفل عنده 3 شهور .. الطفل تعب بالليل .. جري بيه على مستشفى (.....) مشهور جداً وتقريباً في كل حي فيكي يا قاهرة أكتر من أكوام الزبالة ! .. دخل المستشفى ومش هاوصفلكم طبعاً خضته على ابنه عامله إزاي .. ولا أساساً جاب فلوس منين الساعة 4 الفجر .. المهم إنهم في المستشفى المذكورة اشتغلوه - هو بالنسبة لهم مجرد زبون مش أكتر - ما بين حجز وكشف وتحاليل ومحاليل وخلافة .. وبين كل واو وواو ألف آآآه من قلب الأم والأب .. تقابل بإستهتار وحيوانية من جانب المستشفى .. لولا واحد من الإداريين جزاه الله كل خير يمكن ربنا جعله سبب في اللحظة أياها عشان الطفل ده ينكتب له عمر جديد نصح الأب بإنه ياخد الطفل ويجري بيه على مستشفى أبو الريش للأطفال .. وف دقايق كان جوه المستشفى وفي ثواني كانوا شخصوا حالته وعالجوه .. كل ده وبــ 2 جنية !!
المستشفى دي بجد بجد ربنا وحدة يعلم بتشتغل إزاي .. يمكن عشان بتضم أطفال ملايكة ما لهمش أي ذنب .. يمكن عشان دعوات أهالي الأطفال دول .. يمكن عشان أهل الخير اللي نيتهم صافية وأرواحهم شفافة وقلوبهم بيضا وبيتبرعوا باللي ربنا يقدرهم عليه .. الله تعالى أعلى وأعلم
متهيألي .. إن أي واحد فينا .. مهما كانت حالته المادية أو الاجتماعية .. ما يحبش يشوف طفله هناك .. أو أخوه .. أو قريب له .. اللهم اشف مرضانا ومرضى المسلمين . اللهم آمين
دعــــوة خيـــر
أحبابي في الله
فيه دعوة خير من أهل الخير لعمل صدقة جارية عبارة عن المساهمة فى شراء جهاز طبى ( مونيتور ) لخدمة الأطفال المرضى بمستشفى أبو الريش الجامعى
الجهاز تكلفته 15000 جم ( خمسة عشر ألف جنيه ) وبفضل الله سبحانه وتعالى ثم مشاركة أهل الخير منكم تم توفير مبلغ خمسة ألاف جنيه حتى الأن من ثمن الجهاز .
بالنسبة للتبرع هيكون بإحدى الطرق الآتية :
- عن طريق حوالة على بنك مصر فرع الأورمان
باسم الأستاذ : خالد عثمان هاشم بكر
رقم المحمول / 0101345140
- أو عن طريق الاتصال على الأرقام الآتية :
مدام نوران بت خيخة
0180004374
خالد همس الاحباب
0101345140
- أو التبرع يوم اللقاء 9/4/2010 بمستشفى أبو الريش الجامعى
تفاصيل أكثر تلاقوها هنــا :
وإن شاء الله المبلغ الباقي يكون اتدبر قبل يوم الجمعة 9/4/2010 بمشاركتكم يا أهل الخير .

*****************

- آه بالمناسبة .. قبل ما أنسى الطفل – بإعتبار إنه طفل يعني ! - اللي حكيت لكم عليه فوق .. دلوقت عنده 5 سنين .. قابلني من مدة في الشارع وقال لي :
سي حماده : أنت عرفت إن بكره أجاثة ؟؟ (أجازة يعني !)
محسوبكم : ( أنا مبلم ومتنح ) .. هه ؟؟
سي حماده : باقول لك بكره أجاثة .. ما تنحليش كده !
محسوبكم : برضه نازل عصر في نافوخي باحاول افتكر احنا امتى وفين وإزاي ؟ وعيد إيه اللي فات وعيد إيه اللي جاي ؟؟ وباطلع الموبايل عشان أشوف التاريخ !
سي حماده : ( وقد بدأ يتملكه الغيظ وبينغز فيا بصوابعه اللي زي المسامير) أنت مش مثدقني ولا إيه ؟؟
محسوبكم : لا يا عم مصدقك بس ما تزقش !
سي حماده : أمال مطلع الموبايل ليه ؟؟ هاتثورني ؟؟
محسوبكم : لا يا معلم .. أنا أقدر أصورك برضه ( أخاف ع الموبايل يتفيرس) .. بس بكره أجازة ليه بقى ؟
سي حماده : بكره عيد ميلادي !


********************



الشمس الجريئة في قلوبنا كلنا والله مش هانفتح لها الشبابيك بقى ؟

وبسرعة الوقت بيجرررررري نتقابل يومها بدري أنا وانتوا يا حبايبي ☼☼


أشوفكم على خير يا صحبة الخير في يوم الخير إن شاء الله يوم الجمعة 9/4/2010 أمام مستشفى أبو الريش للأطفال .. وما تخافوش مش هاجيب حماده معايا !


***************

** الصورة بموبايلي - أه وربنا - من مطعم زفيريون - أبو قير - إسكندرية - يوم 20/2/2010

تعليقات