عـــودة


أيوه .. فوق شوية ... لأ لأ لأ ... أنزل ســِـنة صغيرة ... أيوة خــُـش يمين بقى ... يمين .... يا أخي باقول لك يمين ... يااااه ده أنت نيله قوي .


أتاري التدوين ده صعب يا رجاله .... ساعة ونــُـص عشان أظبط المدونة .... يا ساتر ... أوووف ... هي تقريباً كانت كده الأول ... أو شبه كده ... مش مهم دلوقتِ ... أحلى حاجة إني بعد ما حطيت اللينكات بتاعة المدونات وبوظت ... قصدي ظبطت العنوان والخطوط والألوانات .... وقلت أبص كده على شكل المدونة – الحقير طبعاً – ألاقي إيه ؟ مكتوب إظهار كافة الرسائل ... وأدوس دبل كليك ... يقول لي : لا توجد أية رسائل تطابق هذا الاستعلام ... يا سيدي إظهار كافة الرسائل ... يقول لي : لا توجد أية رسائل تطابق هذا الاستعلام ... معلش دور عشان خاطري ... برضه نفس الرسالة .... قلت الجهاز ده أكيد مهيس .... وفييييييين عقبال ما افتكرت وأدركت .... إن ... إن .... إهيء إهيء إهيء .... إن ما فيش رسايل .... ههههههههه .... وإن دي مدونة جديدة بنفس الأسم ... وقعدت أضحك ... ومن ساعتها كل ما افتكر أضحك ... ولكنه ضحك كالبكاء ... ياللا الحمد لله .


من سنة بالظبط وزي اليومين دول ... عملت مدونة "هجايص" أنا وشريك الكفاح " الدوك" اللي حتى ما خليت عندي دم وقلت له إني رجعت للتدوين تاني - زهايمر بقى - ووالله كانت مدونة حلوة وشرحة كده وكان بيزورها ناس زي الفل ... لحد تقريباً آخر شهر سبتمبر اللي فات ورحت قافلها بالضبه والمفتاح ... المهم إن مش باقي من الهجايص القديمة غير الأسم ... وشوية ذكريات حلوة .


- أنا باقول احترم نفسي وكفايه رغي قوي لحد كده ... أحسن المدونة دي طلعت عيني ... باقول لكم ساعة ونــُـص يا اخوانا !!


- أه بالمناسبة صحيح ... شفتوا كنت هانسى أهم حاجة .... يمكن اللي حفزني بجد إني أرجع أكتب تاني .... موضوع " بؤجة الخير" جزى الله القائمين على الفكرة ألف خير وجعلها في ميزان حسناتهم ... وده بإذن الله تعالى موضوع الدرس القادم ... وتصبحوا على خيييييير !!

---------------------------------------------------------------------


** ملحوظة :

لسه واخد بالي حالاً إني باسمع حالياً المتألقة / سعاد ماسي ( أصلها بتعمللي دماغ عاليه قوي بالذات بعد ما عرفت معنى أغانيها ) وهي جزائرية ،، وباقرأ "دومة ود حامد" للمبدع الكبير / الطيب صالح وهو سوداني .... ههههههه ،، وده بالعند في كل اللي بيحبوا الكورة وبيتفرجوا عليها نياهاهاها وتحيا الوحدة العربية ،، بس بذمتكوا بذمتكوا مش البنت عسوله ؟؟ دي تتحب من صورتها ... ياللا كفايه كده أحسن أتضرب

تعليقات