للي يفهم !!



حاسب من الاحزان و حاســـــــب لها

حاسب علي رقابيك من حبلـــــــــــها

راح تنتهي و لابد راح تنتهــــــــــي

مش انتهت أحزان من قبلهــــــــــا؟

عجبي !!!




يأسك و صبرك بين إيديك و انت حر

تيأس ما تيأس الحياه راح تــــــــمر

أنا دقت من ده ومن ده عجبي لقيــــــت

الصبر مر و برضك اليـأس مـــــــر

عجبي!!!




لا تجــــــبر الإنسان ولا تـــخيره

يكفيه ما فــيه من عقل بيحيره

اللى النهارده بيطلبه ويشتهيه

هوا اللى بكره ح يشتهي يغيره

عجبى !!!




الدنيا أوده كبيره للانتظار.....

فيها ابن آدم زيه زي الحمار....

الهم واحد والملل مشترك......

ومفيش حمار بيحاول الأنتحار..

عجبي !!!




أنا شاب لكن عمري ولا ألف عام......

وحيد ولكن بين ضلوعي زحام...........

خايف ولكن خوفي مني أنا.................

أخرس ولكن قلبي مليان كلام................

عجبي!!!




ليه ياحبيبتي ما بيننا دايماً سفر....

ده البعد ذنب كبير لا يغتفر......

ليه يا حبيبتي ما بينا ديماً بحور....

أعدي بحر.... آلاقي غيره اتحفر...

عجبي !!!



دخل الشتا وقــفـل البيبـان ع البـيوت

وجـعل شعاع الشـمس خيط عنكبوت

وحاجات كتير بـتمـوت فى ليل الشتا

لكن حاجات أكـتر بـترفـض تــمـوت

عجبي !!!




سلاااام .. سلاااام .. سلاااام .. سلاااام

كلاااام .. كلاااام .. كلاااام .. كلاااام

هز الـورق كدهــــــــوه ... يطلع

سـلام كـلام ... وكـلام سـلام

عجبى !!!




سمعت نقطه ميه جــوه المحيط

بتقول لنقطه ماتنزليش فى الغويط

أخاف عليكى م الغرق ..... قلت انا

ده اللى يخاف م الوعد يبقى عبيط

عجبي !!!




انا كنت شئ وصبحت شئ ثم شئ

شوف ربنا .... قادر على كل شئ

هز الشجر شواشيه ووشوشنى قال :

لابد ما يموت شئ عشان يحيا شئ

عجبى !!!



عيني رأت مولود على كتف أمه

يصرخ تهنن فيه يصرخ تضمه

يصرخ تقول يابنى ماتنطق كلام

ده اللى مايتكلمش يا كتر همه

عجبي !!!




أيوب رماه البين بكل العلل..

سبع سنين مرضان وعنده شلل..

الصبر طيب.... صبر أيوب شفاه..

بس الأكيده مات بفعل الملل..

عجبي !!!




ياخالق الـــكون بــالحســاب والجــــبر

وخـــــالقنى ماشى بالاختيار والجـبر

كل اللى حيلتى زمزميه أمل

وازاى تكفينى لباب القبر ؟

عجبي !!!




أنا قلت كلمة وكان لها معنيين

كما بطن واحده وتوأمين زين وشين

لو دنيا شر .... التوأم الخير يموت

ولو دنيا خير... الشر هايعيش منين ؟؟؟

عجبي !!!



حدوتة عن جعران و عن خنفسة..

اتقابلوا حبوا بعض ساعة مسا.....

ولا قال لهم حد اختشوا عيب حرام...

ولا حد قال دي علاقة متدنسة ؟؟

عجبي !!!




أنا اللي بالأمر المحال اغتوى..

شفت القمر نطيت لفوق بالهوا..

طلته ما طلتوش إيه انا يهمني....

وليه ...ما دام بالنشوة قلبي ارتوى.

عجبي !!!



علم اللوع اضخم كتاب في الأرض..

بس اللي يغلط فيه يجيبه الأرض.....

أما الصراحة فأمرها ساهل .......

لكن لا تجلب مال ولا تصون عرض...

عجبي !!!




إيـــديا فـى جيــوبى وقلــبي طــرب

سارح فى غـربــه بس مـش مغترب

وحــدى لكين ونسان وماشي كـده

بابتعد ...ماعـــرفش ...أو باقــتــرب

عجبي !!!


جالك أوان ووقفت موقف وجود..

يا تجود بده با قلبي يا بده تجود..

ما حد يقدر يبقي على كل شئ...

مع إن....عجبي....كل شئ موجود...

عجبي !!!




يــاللى عـرفت الحـب يــوم وانــطوى

حســك تقــول مشتــاق لــنبع الهــوى

حســك تقــول مشتـــاق لنبـــع الغــرام

ده الحب......مين داق منه قطره ...ارتوى

عجبي !!!




سنوات وفــايته عليـا فوج

بعد فوج واحــدة خــدتنى إبن والتــانـية زوج

والتـالتة أب خـدتني والــرابعة إيه

إيه يعمل إللى بيحدفه مـوج لمــوج ؟؟؟

عجبي !!!



ياما صـادفت صــحاب وما صحبتهمش

وكاسـات خمــور وشراب وما شربتهمش

أندم على الفرص اللى أنا سبتهم

واللا على الفرص اللى مـا سـبتهمش

عجبي !!!




حبيت...لـكن حب من غـير حنــان

وصـاحبت لـكن صحبه مـالهــاش أمـان

رحت لحكــيم واكتـر لقيـت بــلوتى

إن اللى جـوه القلب مش ع اللسان

عجبي !!!




عجبي عليك..عجبي عليك يا زمن

يا أبو البدع.. يا مبكي عيني دمــــاً

إزاي أنا.. أختار لروحي طريـــــــــق

و أنا اللي داخل في الحياة مرغماً

عجبي !!!




ضريح رخام فيه السعيد اندفــــــن

وحفره فيها الشريد من غير كفن

مريت عليهم .. قلت يا للعجـــــب

لاتنين ريحتهم لها نفس العفـــن

عجبي !!!



أه لـو أنا ومحـبوبى جــزنـا الفضـا

فى سفينـه وحـدينـا ...وأشيـا رضا

سـاعـه صفـا تعجبنـا نـرجع لهـا

والهم قبل ما ييجي ....يبقى مضى

عجبي !!!



سهير ليالى وياما لفيت وطفت

وف ليله كنت راجع ف الضلام قمت شفت

الخوف كأنه كلب سد الطريق

وكنت عايز اقتله بس خفت

عجبي !!!




إقلع غماك يا تور وأرفض تلف

إكسر تروس الساقية وأشخر وتف

قال .. بس خطوة كمان وخطوة كمان

يا أوصل نهاية السكة يا البير يجف


عجبى !!! 


* من رباعيات عمنا صلاح جاهين
* نُشرت هذه التدوينة في المدونة القديمة بواسطة hamotta وهو الاسم المشترك الذي كان يستخدمه كلا من : الدوك وباشا (الذي كان يدون حينئذ باسم boshkashi )