هجايص

تحب تاكل إيه النهارده ؟؟

2012-05-30T17:14:00.003+02:00

- معظمنا بيفضل أكلات معينة ونفسه بتهفه عليها من وقت للتاني .. وأوقات بنحس بزهد في الأكل اللي قدامنا .. وأوقات بنبقى محتارين ناكل إيه ونحس أن الأكل كله بقى شبه بعضه !! .. البوست ده عشان كل واحد فينا يقول على الأكلات اللي بيحبها وبيحب ياكلها إزاي أو فين ؟؟ .. ولو حد يعرف الطريقة اللي بتتعمل بيها يكتبها في التعليقات .. مش عاوزك ترص أكلات وخلاص !! .. لأ .. أنا عاوزك تكون بتحب تاكل الأكلة دي أوي أوي أوي .. وريقك بيجري عليها أول ما تفتكرها .. يا عم اعتبر نفسك هاتتعزم عليها :D

- بالنسبة للزملاء من الدول العربية والأجنبية يا ريت هما كمان يفيدونا بأسامي ومكونات أشهر الأكلات اللي في بلادهم .. أو الأكلات الغريبة اللي أكلوها بره بلادهم ويوصفوهالنا .

- أنا مش محلل نفسي !! (عشان ما حدش يفتكر أني هاحلل شخصيته وذوقه ومستواه الاجتماعي من نوع الأكل اللي بيحبه والكلام ده ، احنا مش في معمل تحاليل هنا ) .. أنا بس كل اللي أقصده أن ممكن حد فينا يقول على اسم أكله معينة الواحد فينا ما أكلهاش قبل كده أو ما أكلهاش بقاله فترة طويلة فيعرفها للباقيين ، أو يقول على طريقة جديدة لأكلة معروفة هو بيحب ياكلها بيها بتخللي طعمها أحلى أو يحكي عن موقف حصل معاه بسبب الأكل أو أو .. المهم أن في النهاية هايبقى عندنا أكلات كتيرة هانفتح نفس بعض فيها ونعزم بعض عليها هنا :) .. الفايدة التانية : أنك لو حسيت أنك زهقان في يوم من الأكل اللي أنت متعود عليه ، أو محتار تاكل إيه النهارده ،، ممكن تيجي تشوف اسم أي أكله هنا وتجربها .

- أنا ما أعرفش تقسيمات الأكل بتبقى إزاي أو على أي أساس بس اللي في بالي حالياً : المشهيات والسلطات / المعجنات والمخبوزات والفطائر / اللحوم والأسماك والطيور / الخضروات والفاكهة / الألبان والجبن / الحلويات والتسالي / المشروبات والعصائر .

- ملحوظة 1 : يا ريت ماحدش يقرّفنا في نعمة ربنا لو ما بيحبش صنف معين .

- ملحوظة 2 : علقوا براحتكم إن شالله كل واحد يعلق ميت تعليق طالما في موضوع البوست .

- ملحوظة 3 : الصورة من جروب ضحكني شكراً على الفيس بوك .

وبالهنــا والشفـــا :)

أهلاً عربان مرحبتين

2012-05-24T03:02:00.003+02:00

غناء : سيد المعازي

الترجمــة :)

أهلا عربان مرحبتين .. أهلا عربان مرحبتين .. أهلا عربان مرحبتين

أهلا عربان والجمهور اللى علاّنى نشكر ربى اللى عطانى من فوق القمة خلاّنى ديما من غير افتخار

ولكني ديما فخور بكل أحبابى والجمهور .. لكن هذا مش غرور لا والله يا حضار

أنا والله يا حاضرين بحيي كل المستمعين اللى لكلامى مشتاقين .. وكل الأخوة الفنانين بدون أسماء وبدون أذكار

نحيي كل الجماهير الله يمسيكم بالخير .. الله يمسيكم بالخير . ولكم مني سلام كبير وتحية وبيتين أشعار

سلام وميتين تحية نبدأ بالصحرا الغربية .. والسلوم تعز عليا ومطروح بوادي بحران

البحيرة وإسكندرية .. فيها ناس أصحابا ليا فنانين عزاز عليا عارفين الواجب جدار

وعارفين الواجب دايرينا شمال وجنوب سينا . فيها ناس تعز علينا . وف العريش عرب أحرار.

والغردقة عربان غوالى .. والبحر الأحمر في بالي سكانه ديما غوالي .. ناس عرب أصحاب أقدار

ف السويس والشرقية .. في فايد وإسماعيلية .. المعازة وإسماعيلية .. المعازة وإسماعيلية .. بلبيس وكل الصالحية وكل القبايل جملت .. يا عربان المنوفية .. والمنصورة والغربية .. وماننساش القليوبية . ولا ننسى المنصورية اللى غرب البحار ..عمرى ما ننسى المنصورية اللي غرب بحار

وهلى ف بلاد الجيزة .. مرحب يا عربان الجيزة مرحب يا عربان الجيزة .الأهرامات عليا عزيزة وسقارة بلاد الآثار.

وهي بلاد الآثارات وفيها نار الصنعيات وعمرى ما ننسى العياط وكل أحبابى ف العياط بنحيي عربان الواحات اللى ماسكين على العادات وديما عارفين الأجدار

وناس بوداى ديما دوم .نعدى تو ع الفيوم وجماهيرى بالفيوم وأحبابى كل الفيوم رجالة وأصحاب عزوم وبوادى بنى مزار .. ورجالة وأصحاب عزوم وبوادى بنى مزار

بالوادي بيعزوا الضيف .. رجالة في حد السيف .. رجالة في حد السيف .. ف المنيا و ف بنى سويف .. وأسيوط بلاد العمار

وماننساش قنا وهوارة .. ف جهينة عربان برارة .. سوهاج بلاد الأمارة فيها الوادى والغندار

نحيي جنوب الصعيد وتوشكى والوادى الجديد والسد العالي بالتحديد .. السد العالي بالتحديد اللى قريب واللى بعيد تحية للناس الحضار

لها مني مليون تحية ها الأقصر السياحية والحضارة الفرعونية وأسوان بلاد النوبية اللى جوها من كل جهية من كل العالم زوار

ومن كل العالم لو لف .. مهما عقلى دار ولف .. مهما قلبى دار ولف .. مهما عقلى دار ولف .. ما ننسى عربان الصف لو حتى زمانى دار ما ننسى جمهور الصف لو حتى زمانى دار

ومهما دار الزمان ما ننسى بلاد الحلوان اللى مشهورة ف كل مكان فيها العيلة والجيران والرفاقة والحبان وحبيبة عينى كمان

حكينا عن وصف البلدان من السلوم لحد أسوان عن القبايل والعربان .. ونختم قولى يا حضار

عزاز عليا في أنحاء الجمهورية .. جماهير عزاز عليا فى أنحاء الجمهورية .

ونوجع بعض بالراحة

2012-05-17T01:13:00.010+02:00

ونوجع بعض بالراحة

ما نتألمش

لأ . نضحك

نحس ف نفسنا براحة

نتأمل

نلاقينا بعاد عن بعض

نتألم

لأن الضحك ما علمش

لأن وجعنا ما اتعلمش

نروح ع الحلم

نتلملم

ونوجع بعض بالراحة

~~~

إهــداء : إلى برنيس ..

مش هارد عليك

2012-05-11T02:35:00.005+02:00

أنا : أنا مش عاجبني

أنا : إن شالله ما عجبك ، أنا كده عاجبني

أنا : ما هو ده اللي تاعبني ، وعشان كده أنا مش عاجبني

أنا : إن شالله ما عجبك

أنا : أنت تاعبني

أنا : أنا مش هارد عليك

جوز ولا فرد ؟؟

2012-05-08T13:16:00.008+02:00

على قد ما تغامر تفوز . (يجوز)

ويجوز كمان تخسر .

وتتحوج وتعوز ..

للي كان فِ إيديك وأنت بيه استهترت .

جوز ولا فرد ؟؟ .. فرد ولا جوز ؟؟

مش هي دي المسألة !

المشكلة في : الوقت

في الإختيار

والبت

وإن مرة تانية خسرت

ما تشتكيش البخت !

معقول ما فيش أسفلت ؟؟

نـُص الشوارع سد ؟؟ والنـُص ردم وفحت ؟؟

لو حاجة يوم ضاعت .. حاجة بدالها جت

والدنيا مش ضلمة

لو في الضلام فتحت

والنفس لو ظالمة

نفسها

تتشت .

قطار المناشي السريــع

2012-05-06T22:56:00.027+02:00

- وأنا صغير .. لما كنت باركب أي مواصله مع بابا .. كنت أبص م الشباك واسأله : هو الشارع ده بيودي على فين ؟؟ .. كان يقول لي : الشارع ده بيوصل للمنطقة الفلانية .. اسأله تاني : والمنطقة دي فيها إيه ؟؟ .. يقول لي : دي فيها كذا ، أو ساكن فيها عمو فلان .. ولما كنت أقول له : طب ما تيجي نروح هناك ؟؟ .. كان يضحك ويقول لي : بعدين ! .. صحيح أنه خدني حتت ومناطق كتيرة جداً وأنا صغير وهو اللي علمني وحفزني وشجعني أني أروح مناطق كتيرة لوحدي ما أعرفهاش من غير سبب ، عشان أشوفها وأعرفها .. إلا أني من ساعتها ما بطلتش لف ولا سفر ! .. لأن كل حتة أو منطقة أو بلد جديدة كنت باروحها ، كانت بتحفزني أروح للي بعدها واللي بعدها .. كانت بتفتح لي دنيا جديدة ، مليانة بشر وأماكن وصور وروايح وحكايات وذكريات .. كل مكان جديد كنت بازوره .. كنت باسأل نفسي سؤال واحد : يا ترى المكان ده حكايته هاتبقى إيه معايا ؟؟ .. وعمري ما استنيت إجابة .. لسبب بسيط .. لأن ما حدش عارف بكره فيه إيه ؟؟ ولا هانروح فين ؟؟ .. عشان كده .. لما كنت بارجع بيتنا في كل مرة .. وقبل ما أنام .. أقعد أفتكر كل تفاصيل الرحلة بحذافيرها .. وأقول في سري : يا سبحان الله .. شوف كنت فين ، ورحت فين ، ويا عالم بكره هاتروح فين ؟؟

- يوم السبت 5/5/2012 .. وصلت محطة مصر الساعة 9:30 الصبح .. كان بقالي كتير أوي ما دخلتهاش .. باسم الله ما شاء الله جددوها وعملوا فيها شغل أهه .. لأ بجد صرفوا عليها ووضبوها لحد ما شوهوها تماماً ! .. مسحوا بصمتها وريحة التاريخ اللي كانت فيها ! .. خللوها مسخ ع الموضة ! .. وإيه الخازوق المدبب اللي نازل من السقف ده ؟؟ .. ده بيعبر عن إيه لا موأخذة ؟؟ .. وإيه علاقته بالقطارات ؟؟ .. ما علينا .. سألت محصل تذاكر على قطر المناشي (لأني كنت شاكك في الرصيف بصراحة) .. قال لي بقرف من غير ما يبص لي : على رصيف 11 وشوح لي بإيده .. ولنا هنا وقفه .. ليه ؟؟ .. لأن طريقة رده – وقتها- بصراحة استفزتني جداً .. حسيت كأني باسأله مثلاً على خرابة أقضي فيها حاجتي ! .. لكن دهشتي راحت لما وصلت للرصيف !

- المسافة بين محطة مصر وبين رصيف 11 الموجود (اسماً) داخل نفس المحطة تبعد حوالي خمسين متراً .. تشعر معها وكأنها خمسين سنة ضوئية ! .. فرق شاسع مثل ما بين السما والأرض ! .. وكأن ركاب هذا القطار من كوكب آخر ! .. بصراحة اتضايقت جداً ! .. حسيت للحظة قد إيه الناس دول (وكلمة دول هنا للإشارة فقط والله ، ولا أقصد بها أبداً التقليل منهم) مهمشين ومظلومين من غير أي ذنب ، غير لأنهم مش من سكان القاهرة .. حسيت كأنهم منبوذين .. وكأننا نحن سكان القاهرة لا نريد أي صلة أو وسيلة تربطنا بهم ! .. وكأننا حالفين أننا نطلع عينيهم ونقرفهم ونتعبهم في كل مرة يحاولوا ييجوا فيها القاهرة ونخلليهم يحرموا يزوروها تاني ! .. العاهرة ! .. عفواً القاهرة اللي بتتذوق بالمليارات كل سنة وسايبه جلابيتها مرقعة ! .. أما الإحساس الأصعب واللي ضايقني أكتر من نفسي .. هو إحساسي بأني واحد من ضمن اللي ظلموا الناس دي ! .. مش بس لأني قاهري .. لأ ! .. لأني ما أعرفش – زي كتير من حضراتكم – مجرد حتى أسامي البلاد اللي بيعدي عليها القطر ! .. وده كان السبب الرئيسي اللي خللاني أركب قطر المناشي .. عشان أعتذر – ولو ضمنياً - لكل بلد عديت عليها بالقطر .. وأقول لهم في البوست ده : أنا آســف جــــداً بـجــد .

- بعد ما وصلت للرصيف رقم 11 .. سألت عن ميعاد القطر ، قالوا لي هايطلع الساعة 10:00 .. سألت عن شباك التذاكر قالوا لي أنه موجود على باب المحطة التاني اللي ناحية موقف أحمد حلمي .. رجعت الخمسين متر لحد ما رحت للباب التاني .. لقيت جنب شبابيك الحجز وفي مكان لوحده كده ، كشك صاج مكتوب عليه بخط اليد بلون أزرق قطر المناشي ! .. قاعد جواه موظف نايم على دفتر زي دفاتر التموين .. ولما صحيته عشان أقطع تذكرة ، بص لي بإستغراب وقال لي وهو بيدعك عينيه : مش أنت جيت لي قبل كده ؟؟ .. قلت له : لأ اللي جالك في الحلم ده كان أخويا التوأم :) .. ضحكنا ، وقلت له : تذكرة إيتاي البارود (كنت أعلم مسبقاً بأنها آخر محطة في خط المناشي) .. قال لي : تلاتة جنية وربع .. قلت له : هو القطر ما فيهوش درجات ؟؟ (معلش يا اخوانا قاهري) .. قال لي : لأ كله درجة تالتة ((مطورة)) .. بصراحة عجبتني أوي ماكينة قطع التذاكر :) .. تحفة تحفة بجد .. تحس أنها أنتيكة .. حاجة كده شبه صندوق الدنيا ، أو زي الماكينة السحرية اللي كانت في فيلم Big بتاع توم هانكس اللي حولته من طفل لراجل كبير ! .. الماكينة بدراع طويل زي دراع التحويلة .. الراجل راح دايس على زرار أسود وشد الدراع ، يا سبحان الله ، طلعت تذكرة ! .. قلت له : ممكن أقطع تذكرة كمان وأطلب أمنية ؟؟ :)

على الرصيف رقم 11 الممتد لما بين أسفل كوبري الليمون ونفق القللي في رمسيس .. أكشاك كتيرة خشب لموظفين كانوا لسه بيفطروا أو يا دوب لسه مخلصين فطار .. تلاقي مجموعة منهم ملمومين في كشك وقدامهم صينية عليها أطباق فول وأقراص طعمية .. ومجموعة تانية في كشك تاني بيعملوا شاي .. أما المجموعة التالتة اللي خلصت فطار وشربت الشاي ، ناموا ! .. القطر قديم ، لونه أصفر ، مكون من خمس عربيات .. ركبت في العربية التانية .. الكراسي بلاستيكية لونها أخضر باهت ومريحة إلى حد ما .. الشبابيك زجاجية مستطيلة بإطار حديدي صديء يجعلها لا تفتح أو تغلق عادة ! .. كان فيه عمال نضافة بيكنسوا القطر .. والقطر ما كانش زحمة ، في الغالب لأنه كان يوم سبت (أجازة) .. ومش ميعاد موظفين أو طلبة .. القطر المفروض أن ميعاده الساعة 10:00 .. اتحرك الساعة 10:30 .. أحب أنا المواعيد المظبوطة :) .. سألت الكمسري وهو بيشوف التذكرة : هو بيوصل إيتاي البارود إمتى ؟؟ .. قال لي : قول يا مسهل ! .. قلت له : يعني تقريباً كده إن شاء الله بياخد وقت قد إيه ؟؟ .. قال لي : يعني بتاع تلات أربع ساعات ! .. قلت له : شكراً .. ضحك وقال لي وهو ماشي : ده لو وصل ! .. قلت له : الله يطمنك يا شيخ !

- إنك تمشي على كورنيش النيل وتشوف فندق كونراد حاجة ! .. وإنك تركب قطر المناشي وتشوف نفس الفندق من ورا (من السبتيه بين البيوت القديمة الفقيرة) حاجة تانية خالص ! .. أول ما القطر اتحرك وبدأ يتهز حسيت أني راكب قطر في الهند ! .. لدرجة أني في الأول كنت حاسس أن الكراسي هي اللي بتمشي جوه القطر :) .. وعرفت معنى كلمة درجة تالتة ((مطورة)) .. بصراحة يا جدعان بتوع السكة الحديد مش حارمين الركاب من حاجة خالص .. كل شيء تتمناه ممكن ييجي لك لحد عندك وأنت قاعد في كرسيك معزز مكرم .. يعني مثلاً .. عاوز تاكل وتحلي وتشرب وتتسلى في الطريق .. هايعدي عليك بياعين : جوافة وتفاح أخضر وليمون ولب سوري ولب سوبر ولب أسمر وسوداني بقشره وترمس وسندوتشات طعمية وسميط وبيض وجبنة وقـُرص بعجوة وفطير وشاي وحاجة ساقعة وبسكويت وشيكولاتة وعسلية ونعناع وسجاير وولاعات وفيه كمان بتاع لبن بيطلع بالعجلة بتاعته عليها قسطين لبن في محطة بشتيل ، بس المشكلة أن اللبن ممكن يقطع على ما توصل ! .. مش عارف أنا إزاي ما يعملوش تلاجات في القطر ؟؟

لو أنت من هواة القراية وعاوز تتثقف .. هايعدي عليك بياعين : جرايد ومجلات قديمة (غالباً حريتي ونصف الدنيا أو أي مجلة عليها صورة واحدة قالعة) وكتيبات أذكار وقصص الأنبياء وأدعية .

عاوز تلبس أنت وولادك .. هايعدي عليك بياعين : صديريات فيه بسوستة وفيه بزراير ، الصديري بخمسة وعشرين جنية ، ممكن تفاصله وتاخد منه الواحد بسبعتاشر ونـُص .. مناديل قماش ، المنديل الكبير باتنين جنية ونص والصغير بجنية ونص .. مناديل بقوية .. بناطيل ترنجات وشورتات (ممكن تقيس البنطلون ورا الباب) .. شرابات (التلاتة بعشرة) .. ساعات ونضارات شمس ونضارات نظر مستعملة (وجربها بنفسك) .. عبايات أطفال ألوانها مزركشة فوشيا وموف وبمبى العباية الواحدة بسبعة ونص .. أحزمة جلد ومحافظ .. سلاسل ذهب صيني الواحدة بجنية (ما تستغربش أحسن تتغز) .

أما بقى لو عاوز تاخد هدية للناس اللي أنت رايح لهم .. هايعدي عليك بياعين : براويز جبس وتماثيل .. شمعدانات ملونة (التلاتة بعشرة) .. أقلام جاف (الاتنين بجنية) .. لعب أطفال وشخاليل .. ميت جلدة أنبوبة بجنية !

وبعدين إوعي تقلق خالص من شكلك أو منظرك لو كنت مبهدل .. لأن بالإضافة لبياعين الهدوم فيه بياعين مكن حلاقة وشفرات وبرفانات ومناديل ورق وبتوع ورنيش .. يعني عقبال ما تاكل وتحلي ، وتحلق دقنك ، وتتبرفن وتغير هدومك وتلمع جزمتك تكون وصلت :) .. ولو يا سيدي ما عاكش رصيد تكلم الناس اللي أنت مسافر لهم ، هايعدي عليك بتاع كروت شحن ، عشان تشحن وتتصل بيهم تطمنهم عليك !

طب قوللي بالله عليك تلاقي فين تطور أكتر من كده ؟؟ .. مش المفروض بقى تحمد ربنا وتشكره على النعمة دي ؟؟ .. مش واجب عليك تطلع حاجة لله ؟؟ .. صح ولا لأ ؟؟ .. هاتقول لي إزاي وأنا في القطر ؟؟ .. أقول لك : ودي حاجة برضة تفوت على بتوع السكة الحديد يا وله ؟؟ .. من الناحية دي أحب أبشرك عزيزي الراكب أن هايعدي عليك وأنت قاعد في مكانك أرذل وأغتت أنواع الشحاتين والمتسولين على الإطلاق ! .. ومش هايسيبوك في حالك إلا أما تطلع كل اللي في جيبك أو تنط من القطر وهو ماشي ! .. وحتى برضة لو نطيت وربنا كتب لك عمر جديد هاتلاقي واحد فيهم مستنيك بالحضن !

- ما كملتش لـ إيتاي البارود .. نزلت الخطاطبة .. خدت توك توك وبعدين ميكروباص رايح المناشي بـ اتنين جنية ونـُص .. الميكروباص ده مشي بيا مسافة ما يعلم بيها إلا ربنا ! .. لدرجة أني كنت هابوس رجل السواق علشان ينزلني ! .. مش عارف أنا هما هناك بيزرعوا بنزين ولا إيه ؟؟ .. نزلت المناشي وخدت ميكروباص لحد الوراق بجنية .. وبرضة مشي بيا بتاع ساعة ! .. وأول ما شفت الطريق الدائري قلت للسواق : على جنب يا أسطى !

أنها دُنى تجتازها في دقائق !

- في الرحلة القصيرة دي قابلت واتعرفت على ناس وأماكن جديدة كنت أول مرة أشوفها أو أعرفها .. وسابت جوايا إنطباعات كتيرة وأوحت لي بقصص كتيرة ورجعت بشوية ذكريات حلوة لفتهم جوه أربع مناديل قماش :) .. على سبيل المثال : شفت وردان .. اللي منير غنى لها "وعدي ع الجيزة خفاجه .. وردان ضلوعي الخفاجة" .. شفت الراجل العجوز ، اللي كان بيرمي عيش للسمك الصغير في منشأة القناطر من غير ما يصطاده .. السمك الصغير اللي قدر يهرب من صيادين القاهرة ! .. كوبري القناطر اللي محفور على العمدان الحديد بتاعته هلال حاضن تلات نجوم .. وغيرها .. مهما قلت ، مش هاعرف أعبر عن سعادتي باليوم الجميل ده ، ولا هاعرف أختزل كل البلاد اللي شفتها والملاحظات اللي سجلتها في سطور ! ..كل اللي أقدر أقوله للناس الحلوة الطيبة السِمحة الجميلة أوي أوي دي ، أني أدعي لهم بكل الخير والسعادة وصلاح الأحوال .. وتعالى نلضم أسامينا :)

خط سير قطار المناشي من محطة مصر وحتى الخطاطبة : محطة مصر 10:30 .. إمبابة 10:40 .. بشتيل 10:47 .. بشتيل البلد 10:50 .. الكوم الأحمر 10:55 (محطة قديمة ومن غير رصيف ، مش عارف أنا الستات والأطفال بينزلوا إزاي ؟؟) .. أوسيم 11:00 .. بـُرطـُس 11:05 (القطر وقف فيها عشر دقايق عشان القطر المقابل يعدي واليافطة الخاصة بالمحطة ممسوحة تماماً) .. الجلاتمة 11:20 .. المناشي 11:25 .. ذات الكوم 11:30 .. نكلا 11:35 .. برقاش 11:40 .. القطـّا 11:45 .. القطـّا البلد 11:50 (لم يتوقف فيها) .. الجزيرة الوسطاينة 11:53 .. أبوغالب 12:00 .. وردان 12:07 (بيبنوا فيها محطة كهرباء) .. بني سلامة 12:12 .. الخطاطبة 12:20 .

** صورة محطة مصر وصورة قطار المناشي من النت ، أما الخرائط عملتها على الجوجل إيرث والصورة الأخيرة للتذكرة السحرية :)

ملح السكر

2012-04-25T17:51:00.003+02:00

والأيام تشبه بعضيها مالهاش أي ملامح

تصحى تنام ف سؤال متكرر : بكره ده ولا امبارح ؟؟

طعم السكر ملح مكرر .. وأنا ميت بيقاوح

بكره يا رايح قبل ما تمشي : اسحب ورقة حلمي

رايح فـيـــ

2012-04-24T09:40:00.002+02:00

في مشوارك دُست على حاجات كتيرة .. مثلاً .. ذرات التراب الصغيرة أوي اللي دفنتها من غير ما تحس .. حاجات تانية كتيرة أوي كانت واقفه مستنياك تعدي من قدامها عشان تضحك لك وتشاور لك .. حاجات كانت اتخلقت عشانك أنت بس .. ما شفتهاش أصلاً وكملت مشي .. ما رضيتش تسمع صوت حد ولا تكلم حد .. كأنك ألة .. اللي كانوا بيحبوك بجد عذروك وقالوا : أكيد هو عارف رايح فين وعاوز إيه .. ودعولك في سرهم أن ربنا يوفقك ويهديك ويحفظك .. اختفيت .. ومشيت مشيت مشيت مشيت .. لحد ما تعبت .. ما رضيتش حتى تقف عشان ترتاح .. شوية .. واللي بيحبوك بعدوا واختفوا .. واللي بقوا حواليك أغراب ما تعرفهمش ولا يعرفوك .. وكالعادة ما رضتش تقف عشان تعرفهم ولا تعرفهم بنفسك اللي أنت أصلاً مش عارفها وبتدور عليها .. دلوقت .. أنت هنا .. لوحدك .. ما تبصش حواليك .. ياللا بقى ابتسامة حلوة .. سلم عليك واحضنك أوي .. قول لنفسك : حمداً لله على السلامة .. ما تخلليش سؤال عبيط زي : هو أنا كنت رايح فين ؟ يخنقك .. ما فيش وقت يا راجل للكلام الفاضي ده ! .. شايف شوية التراب دول ؟؟ .. أيوه .. هما نفسهم اللي كانوا هنــــــــــاك في أول سطر ودست عليهم .. طبعاً أنت أول مرة تشوفهم .. مش مهم .. المهم أنهم مستنيين ياخدوا حقهم منك .. بعد ما تشيلهم ذرة ذرة وتحطهم على جنب .. هاتلاقي حفرة .. انزل فيها .. مدد .. خلاص ؟؟ .. مرتاح كده ؟؟ .. سيبهم بقى يدوسوا عليك ويدفنوك ! .. ياللا بقى يا راجل موت الفيلم هايبدأ ! .. هاتشوف فيلم حياتك كلها ثانية بثانية .. ولحظة بلحظة .. مش مشكلتي لو فيلمك ما عجبكش ! .. بتقول إيه ؟؟ .. رايح فـيـــ ...

شبابي رخصته (فيديو كلب)

2012-04-22T10:46:00.004+02:00

واحد شحات قاعد ع الرصيف تحت كوبري الملك الصالح بيفللي كلب جربان .. بيملس ع الكلب في منتهى الحنان والامتنان .. الكلب يمد بوزه ويلحس ف الشحات .. ولسه الشحات هايقرب م الكلب عشان يحضنه .. ييجي ميكروباص طاير عاوز يلحق الإشارة يطرطش عليهم هما الاتنين ! .. الكلب يتحمق ويفلــّـق من صاحبه ويجري ورا الميكروباص ناحية المنيل ! .. الشحات يتحسر ع الكلب اللي سابه ويغني :

عمر الزمان ما يدوم بكره يجيلك يوم .. بدمعة المحروم

تبكي على الماضي وأعيش أنا راضي .. بقسوة المظلوم

- الإشارة تقفل .. والشحات ماشي بيشحت بين العربيات وبيغني وهو متأثر :

اللي ياما ف وحدته قال لك تعالى !

ده أنت روحي وبهجتي وسعدي وهنايا !

هنا تدخل بياعة المناديل والفوط الصفرا اللي في إشارة الملك الصالح في دور الرقاصة .. وتروح عامله البارويطة وهي رافعة إزازة فينيك على بقها :

(صوت مجاميع:عساكر المرور في الإشارة مع ركاب ميكروباصات السيدة عيشة ودار السلام والمطبعة وحلوان مع اللي واقفين بيستهبلوا وعاملين نفسهم بيصطادوا فوق الكوبري مع واحد واقف بيعمل زي الناس تحت كوبري الملك الصالح وبيلف عشان يشارك بصوته وهو بيبصبص للرقاصة)

اللي ياما ف وحدته قال لك تعالى !

ده أنت روحي وبهجتي وسعدي وهنايا !

(هنا بتاع الفل يستغل إندماج الجمهور في الأغنية ويرش ع الفل رشتين من إزازة بيرفن معاه عشان تفحفح ! .. ثم يدخل بين العربيات وهو بيترقص بالفل !)

ده أنت روحي وبهجتي وسعدي وهناااايا ! (هنا الرقاصة تحط الإزازة على راسها وتطلع مطواه قرن غزال من صدرها تحركها في الهوا بعد ما ترفع العباية وتحشرها جوه بنطلون الترينج الأحمر .. وتشعلل الجو ! .. وينضم لها العيال والبنات المزوغين اللي قاعدين قدام سينما فاتن حمامة !)

شبابي رخصته عمري نقصته قاللي إيه يعني ..

قاللي إيه يعني (الراجل اللي كان بيعمل زي الناس يطلع خمسة جنيه للرقاصة في محاولة للتحرش بيها وسط زحمة العيال .. تضحك له وتشاور له بإيديها الاتنين تعالى)

وعمري ضيعته حبي ودعته راح ما ودعني

راح ما ودعني (عم أحمد السوهاجي بتاع المحلب يترقص وهو بيغمز للعسكري عشان يفتح الإشارة لأنه ما باعش بنكلة)

شبابي رخصته عمري نقصته قاللي إيه يعني ..

قاللي إيه يعني (الشحات بين العربيات يزغر لعم أحمد ويقول له أصبر لحد ما الأغنية تخلص)

وعمري ضيعته حبي ودعته راح ما ودعني ..

راح ما ودعني (الرقاصة تزق الراجل اللي كان بيعمل زي الناس وتقول له وهي بتطبق الخمسة جنيه وتحطها في صدرها : كفاية كده ! أنت خدت بسبعة !.. وترفع عليه الشبشب عشان يبعد)

عمر الزمان ما يدوم بكره يجيلك يوم .. بدمعة المحروم

(الراجل اللي كان بيعمل زي الناس بعد ما بعد عن الرقاصة واتحسر ع الخمسة جنيه)

تبكي على الماضي وأعيش أنا راضي .. بقسوة المظلوم

(الرقاصة تفلفل له بإيديها وهي بتاخد اتنين جنيه من عيل ف ثانوي)

كان ضلام نور حياتي عشت فيه (هنا الإشارة تفتح والمجاميع تتفركش .. الرقاصة تنزل العباية وتقفل المطواة وترجع لـ بياعة مناديل .. تطبطب ع الشحات وتدي له آخر بق في إزازة الفينيك)

كاس وفاضي شربت منه سكرت بيه (يكتشف أن الإزازة شبه فاضية بعد ما رفعها على بقه ، يطوحها بإيده تحت الكوبري .. يطلع نص سيجارة كليوباترا فرط ويولعها)

(صوت مجاميع:الناس اللي واقفين عند عفيفي بتاع العصير بعد نفق الملك الصالح )

كان ضلام نور حياتي عشت فيه (بياعة المناديل تزغده في صدره بكوعها وتقول له : مش هاتجيب نفس ولا إيه ؟؟)

كاس وفاضي شربت منه سكرت بيه (يشد نفس عميق من السبارس ويناولها العقب وهو بيضحك بعد ما يحط إيده على كتفها)

كاس وفاضي شربت منه سكرت بيه (يغنيان سويا في نشوة وهي تريه حصيلة الإيراد اليومي من بيع المناديل (بس) بعد ما خنصرت نصها .. يقول لها في جدية : إوعي يا بت يكون حد عاكسك ولا اتحرش بيكي ؟؟ .. تطلق صوت كريه من أنفها علامة الشجب والإستنكار ثم تتقصع وتقول : فشــر !!.. يبتسم ويربت عليها : جدعة يا بت ! ما تيجي نروح الخرابة اللي ورا جامع عمرو؟؟)

- يعود الكلب إلى أسفل كوبري الملك الصالح ويبحث عن صاحبه .. فلا يجده .. يتشمم الهواء بأنفه باحثاً عن آية آثار له فيفشل ! .. يجلس على الأرض في حزن ثم يرمي من فمه رقعة قماش ممزقة كانت قد هبشها من بنطلون صاحب الميكروباص في ميدان الجيزة - اللي كان طرطش عليهم أول الأغنية أنت نسيت ولا إيه ؟؟ - يجد بقايا زجاجة فينيك بجواره فيلعقها .. يشعر بدوار حاد في رأسه .. يدفن رأسه بين رجليه ويبكي بحرارة .. بينما صوت الكاسيت المنبعث من الميكروباص بجواره يردد :

شبابي رخصته عمري نقصته قاللي إيه يعني ..

وعمري ضيعته حبي ودعته راح ما ودعني ..

شبابي رخصته عمري نقصته قاللي إيه يعني ..

وعمري ضيعته حبي ودعته راح ما ودعني ..

عمر الزمان ما يدوم (صوت زغطة الكلب) بكره يجيلك يوم .. بدمعة المحروم

*******

طبعاً مع كامل تقديري واحترامي وحبي للفنــان الرائع المبدع / محمد محيي .. البوست كوميدي في الأساس ولا يعني قطعاً الاساءة لشخصه أو لفنه أو التقليل من قيمة الأغنية .

ترجمة فيلم Harvie Krumpet

2012-04-18T09:15:00.008+02:00

فيلم الأوسكــار 2003 Best Short Film, Animated

معلومــات عن الفيلــم : هنــا

ملف الترجمة : هنــا

** كل اللي عليك أنك تحمل الفيلم (مساحته 107 ميجا) وبعدين تحمل ملف الترجمة ، وتعمل للفيلم إعادة تسمية باسم ملف الترجمة Harvie Krumpet

** لا يوصى بمشاهدة الأطفال للفيلم !

أتمنى أن تنال ترجمتي المتواضعة إعجابكم وفي إنتظار أرائكم :)

عصافير الجنة

2012-04-17T10:11:00.006+02:00

طارق لما كان عنده أربع سنين كان بيحب يقعد على رجل باباه في الأتوبيس جنب الشباك .. وكان بيفرح أوي بنفسه لما يمسك في الحديد اللي فوق المسند اللي قدامه وكأنه ماسك الدركسيون بالظبط .. ويميل بجسمه يمين وشمال كأنه هو اللي بيسوق الأتوبيس ! .. وكل شوية يضم صوابعة الأربعة للإبهام ويفتحهم ويقفلهم كذا مرة كأنه بيزمر : بيب بيب .. وباباه – لأن هو اللي كان حافظ السكة – يقول له : خـُش يمين يا طارق ، يروح طارق محود الدركسيون ناحية اليمين ، يلاقي الأتوبيس دخل يمين ! .. يفرح أوي أوي بنفسه ويفضل يضحك كتير .. ويقول : ثـُفت يا بابا أنا باعرف أثوق إزاي ؟؟

طارق كان ساعات يتلسع من شباك الأتوبيس لما ييجي يسند بكوعة عليه ! .. لكنه كان بيتكسف يقول ييح لأنه راجل كبير مش عيل صغير ! .. كان يقعد يطلع في التذاكر الملفوفة المحشورة جوه مجراة الشباك بضوافرة ، ويقعد يفرد فيها وبعدين يقطعها فتافيت صغننة خالص ويرميها بإيديه الاتنين م الشباك ويقول : هيييييييييه عصافير الجنة .

طارق كان بيتضايق أوي من الوقفه في الإشارات ! .. ولما باباه فهمه أن فيه ناس تانيه غيرهم جايه من حتت تانيه وعاوزه برضه تروّح بيوتها .. كان ينفخ م الزهق ويقول : يعني هما يروحوا واحنا لأه ؟؟ احنا اللي جينا الأول ! .. ولما الإشارة كانت تطول ، ينسى الدركسيون ويقعد يبص من الشباك على العربيات اللي بتعدي قدامهم عشان يشوف الناس التانية دي شكلها إيه ؟ .. يمكن لما يشوفهم يقدر يعرف الحتت التانية دي شكلها إيه ! .. وفجأة يمسك باباه من دقنه عشان يوريه حاجة من الشباك : بـُث يا بابا ! فيه راجل أثود هناك أهه / راجل تخين أوي ومش عنده شعر / الثت اللي هناك دي بطنها فيها ننه ! .. في الغالب كانت أكتر حاجة بتشد انتباهه غير محلات لعب الأطفال وبياعين الـ لولا .. هي الأطفال اللي من سنه ، العالم بتاعه اللي شبهة .. ولما كان يزهق م الفرجة أو يلاقي باباه مش مركز معاه ، يرجع تاني للدركسيون ويقعد يزمر عشان الإشارة تفتح ! .. ولما الإشارة تفتح يتضايق أوي لما عربية ولا أتوبيس يكون واقف جنبهم في الإشارة ويسبق الأتوبيس اللي هما راكبينه !

طارق كان بيتكسف أوي لما يكتشف أن حد كبير بيبص له وبيغمز له وبيلاغيه !.. في الأول بيروح باصص في الأرض شوية ، وبعد كده يرفع راسه في الخباثة يشوف إذا كان لسه الحد ده بيبص عليه ولا لأ ؟ .. ولو لقاه لسه بيبص عليه ، يتكسف تاني ، ويضحك ، ويبدأ ياخد عليه ، ولما الأتوبيس يتحرك يعمل له باي باي ويحدف له بوسه في الهوا ويفضل باصص عليه لحد ما رقبته تتلوح ، عشان يتأكد أنه خد البوسة بتاعته مش حد تاني !

الذكريات الحلوة دي كلها ، عدت على طارق في ثواني وهو واقف قدام محل إكسسوارات العربيات بيظبط عربيته الجديدة وبيلزق إستيكر على الإزاز من ورا .. افتكرها لما شاف ابنه اللي عنده أربع سنين قاعد على كرسي السواق وماسك الدركسيون كأنه بيسوق ، زي ما كان بيعمل زمان بالظبط ! .. افتكرها ، لما شاف ابنه بياخد منديل من العلبة اللي على تابلوة العربية وبيقطعة فتافيت صغننة خالص رماها من الشباك وقال : هيييييييييه عصافير الجنة .

طارق بعد ما دفع حساب الصنايعي ومشي بعربيته الفضي اللي كتب على إزازها من ورا :

Don't drive fast , just flying slowly

جيت وكتبت لكم البوست ده :)

التــورتة

2012-04-14T22:14:00.008+02:00

الزوجة تفتح الثلاجة ، تبحث عن شيء ما بداخلها ولا تجده ، تغلق الثلاجة وتتجه إلى زوجها في غرفة المكتب ..

الزوجة : ما شفتش يا حبيبي التورتة اللي كانت في التلاجة ؟؟

الزوج (محاولاً أن يبدو مشغولاً في قراءة الجريدة) : وهو احنا عندنا تلاجة ؟؟ تصدقي أول مرة أعرف المعلومة دي !

الزوجة (تبتسم ابتسامة صفراء من تحت الضرس وتأخذ الجريدة من يد الزوج) : كانت فيه تورتة في التلاجة اشتريتها امبارح ، راحت فيـــن يا حبيبي ؟؟

الزوج (يأخذ الجريدة من يد الزوجة ويقرأ بصوت عالِ) : بيقول لِك كيلو الفراخ هايغلى اتنين جنيه ، ابقي اشتريلنا دبوس عشان عازم جماعة صحابي رُخمة بكرة ع العشا.

الزوجة : يعني مش عاوز ترد عليا ؟؟

الزوج (يكمل قراءة بصوت عالِ): بيقول لِك الفراخ رخصت أربعة جنيه .. الحمد لله إن احنا ما جبناش الدبوس !

الزوجة (تغير من نبرة صوتها): راحت فين التورتة يا حبيبي ؟؟

الزوج : فيه إيه بس يا حبيبتي ؟؟ تورتة إيه بس اللي انتي مضايقة نفسك عشانها ؟؟ إنتي تورتة حياتي وبسبوسة عمري وجلاش السلام الآلي .

الزوجة (ما يدخلش عليها طقم التثبيت ده وتقاطعه) : أصل التورتة دي كنت شارياها عشان عيد ميلاد مامتك النهاردة و..

الزوج : أنا أمي مؤدبة ما بتاكلش تورتة .

الزوجة : وهو أنا قلت حاجة على طنط ؟؟

الزوج : ماهو ده اللي ناقص إنك تغلطي في ماما كمان ، عموماً أنا متربي ومش هارد عليكي ، الله يسامحك .

الزوجة : ؟؟؟؟؟ أففف صبرني يا رب !!

الزوج : وكمان مش عاجبك كلامي ؟؟ وبتنفخي في وشي ؟؟ والله عال يا ست هانم ! مش بعيد كمان تكوني بتشتميني في سرك ؟ صح ؟ أه أكيد بتشتميني في سرك ، أنا لا يمكن أبداً أقبل إنك تهينيني بالشكل ده ، هو أنا إيه ما عنديش كرامة ! .. أنا هاسيب لك البيت كله وأنزل بدل ما أفقد أعصابي ، وأولع سجاير وأنا مبطل بقالي أربع ساعات ! .. وبعدين أصلاً أصلاً أمي ما بتحتفلش بعيد ميلادها !

الزوجة : ما هو يا حبيبي أنا كنت هاعملها لها مفاجأة !

الزوج : أأأأأه قولي بقى إنك عاوزه تـِسرعي الولية عشان تتخض تقوم تـُطب تموت ، يا حبيبتي يا ماما ، ألف بعد الشر عليكي يا ست الحبايب يا ..

الزوجة : حبيبة يا أغلى من روحي ودمي تيرارارا

الزوج (وهو يطبل ع المكتب) : وصلي صلي .. صلي .. ع النبي صلي ..

الزوجة : برضه أنا عاوزه أعرف التورتة راحت فين ؟؟

الزوج : وإشمعنى أنا يعني اللي أتسئل في أم البيت ده ؟؟

الزوجة : وهو فيه غيرك أصلاً ؟؟

الزوج : احم احم .. تصدقي أفحمتيني ! .. طب استني لما أفكر لك في كدبة مقنعة تصدقيها .

الزوجة (تشير بسبابتها في وجهه علامة الإتهام) : جاوب بسرعة وبصراحة !

الزوج : بسرعة ولا بصراحة ؟؟

الزوجة (تزغر له وتشخط فيه): ها ؟؟ جاوب باقول لك !

الزوج : أصل كان فيه واحد غلبان ماشي في الصالة شكله ما داقش الأكل من سبع سنين قلت أكسب فيه ثواب وأديله التورتة ياكلها .

الزوجة : ماشي في الصالة !!.. ممممم .. وكان غلبان أوي يعني ؟؟

الزوج : يوووووووووه دي حالته كانت تصعب ع الكافر !

الزوجة : تصدق أقنعتني ! وأنا اللي كنت أستغفر الله العظيم يا رب هاظلمك وأقول إن أنت اللي أكلتها لما شفت بقعة الشيكولاتة دي على هدومك !

الزوج (ينظر إلى ملابسه حيث أشارت) : أن أن أن تش تش .. تصدقي صح فيه بقعة شيكولاتة ! .. أدي آخرة اللي يعمل خير في الناس !

الزوجة : عاوزه اعتراف كامل وصريح ومفصل لو سمحت !

الزوج : أنا هاحكيلك اللي حصل وانتي يا ستي احكمي .. بقى أنا بافتح التلاجة الصبح لقيت خير اللهم اجعله خير علبة شكلها حلو .. بافتحها لقيت جواها تورتة شكلها أحلى .. قلت يا ترى دي هنا بمناسبة إيه ؟؟ .. ولما قعدت أفتكر تواريخ كل المناسبات وما افتكرتش حاجة ، قلت حلال الله أكبر !

الزوجة (شهقة) : يعني كلتها كلها لوحدك يا خاين ؟؟؟

الزوج : أنا والله ما كان قصدي أكلها لوحدي .. أنا الأول لقيت كريزياية شكلها مش عاجبني قلت لو كلتها هايبقى شكل التورتة أحلى .. رحت واكلها .. وأنا باشيلها راحت طبقة الشيكولاتة اللي على الوش اتلخبطت رحت جايب سكينة وقاطع الجزء اللي اتلخبط وقلت أكله أنا وأسيب لك الجزء السليم .. وبعد ما قطعت وكلت اكتشفت أن الجزء اللي كلته هو الجزء الكبير السليم فبصراحة اتضايقت أوي من نفسي عشان كلت الجزء بتاعك .. بس خلاص كان أمر الله نفد .. ورحت واكل الجزء بتاعي وأنا متضايق ع الآخر والله .. لأن بطني كانت وجعتني أوي بصراحة ! .. شفتي إزاي بقى إني ضحيت بنفسي عشانك ؟؟

الزوجة : فدائي من يومك يا سبعي !.. طب حيث كده بقى يا زوجي الحبيب .. قررنا الآتي : أولاً : إنك تجيب لي تورتاية زي اللي أنت أكلتها بالهنا والشفا بالظبط عشان أكلها لوحدي ومش هاتدوق منها فتفوتة واحدة ولا كريزياية ... ثانياً : تجيب تورتة تانية لمامتك بدل التورتة اللي أنا هاكلها لوحدي طبعاً ... ثالثاً : تجيب تورتة تالتة تصالحني بيها وناكلها سوا احنا الاتنين ، قلت إيه ؟؟؟

الزوج : إيييييه هو ده ؟؟ تلات تورت بحالهم ؟؟ ليه هو عيد التورتة ؟؟ ولا أكونش حلواني ؟؟

الزوجة : إيـــــه ؟؟ حقي ولا مش حقي ؟؟

الزوج : حقك يا أبو كمــال ، حقك يا أخويا !

الزوجة : نسيت أقول لك رابعاً : وهو إنك أنت يا حبيبي يا قمور يا شطور اللي هاتغسل التي شيرت المبقع ده لوحدك !

الزوج : ده أنا مش هاغسله وبس .. ده أنا هاقطعه حتت بسناني وأولع فيه بجاز !

الزوجة : أقول لك على فكرة حلوة ؟؟ .. أنت ممكن بعد ما تغسله تتبرع بيه لأي حد غلبان يكون معدي في الصالة .

خرج ولم يعد

2012-04-09T01:50:00.005+02:00

manipulation

2012-04-07T17:47:00.005+02:00

سبق

2012-04-03T02:56:00.004+02:00

زمان .. لما كنت صغير .. كانوا في العيلة رابطين بيني وبين ابن عمي في كل حاجة .. كنا من سن بعض .. وكانوا بيعاملونا كأننا جوز خيل في سبق وبيتراهنوا على مين اللي هايكسب فينا .. مش مهم إحنا عاوزين إيه ؟ .. ولا هانقدر نعمله ولا لأ ؟ .. ولا إزاي وليه هانعمله ؟ .. المهم .. إن اللي هما عاوزينه لازم يتعمل ، زي ما هما عاوزين ! .. حتى لو واحد فينا فاز بالسبق ومات بعد كده !

"نصر آخر ونكون قد انهزمنا تماماً"

الكلمة دي مش فاكر مين القائد اللي قالها في حرب كان انتصر فيها بعد ما خسر كل جنوده وما فضلش معاه غير عسكري واحد .

بالنسبة لي .. فرحت شوية في الأول أنهم مبسوطين مني لما كنت باعمل اللي هما عايزينه .. لأني كنت بانول الرضا السامي وباخد اللي أنا عايزه .. بس بعد كده .. بدأت أحس إني زي اللعبة اللي بزمبلك .. مش مسموح لي أعمل اللي أنا عايزه وقت ما أحب أعمله إلا لو كانوا هما كمان عايزينه في نفس الوقت ! .. فبدأت أنفض لهم .. وأعمل اللي أنا عايزه (أو فاكر إني عايزه) من باب العند ليس إلا .. كنت ممكن أعمل أي حاجة لأي حد تاني عايزها .. المهم إني ما أعملش الحاجة اللي هما طالبينها مني .. حتى لو فيها مصلحتي ! .. ورغم إني في الغالب كنت بافشل .. لأني ماشي من غير هدف ولا خطة ولا دعم .. فكنت بارجع لهم برضه في الآخر علشان أرمي غلطي عليهم وأعملهم شماعتي وأقوللهم : شفتوا ؟؟ عاجبكوا كده ؟؟ آهو اللي أنا فيه ده بسببكم ! ما أنتوا لو ما كنتوش عملتوا كذا ما كانش ده حصل ! خلليكوا كده بقى ! أحسن تستاهلوا ! .. ولما كانت بتصادف معايا وأنجح في حاجة عملتها حتى لو مش عايزها (على أساس يعني أني عملتها لوحدي من غير مساعدتهم ليا اللي أنا ناكرها ومش عايز أشوفها) كنت بابقى عامل زي اللي فتح عكا .. كان ناقص أتحزم وأرقص لهم !

على الجانب الآخر من الحدوتة .. كان هناك ابن عمي .. متفوق ومجتهد ومثابر ومتبرمج .. لا بيحود يمين ولا شمال ! .. ذاكر يذاكر .. ما تصاحبش فلان ماشي .. اعمل كده يعمل .. ما كانش بيفكر غير في اللي هما عايزينه وبس .. وإزاي يعمله بأحسن طريقة .. حتى لو هو مش قادر فعلاً يعمل ده ! .. وبعد ما يعمله يبدأ يقنع نفسه بأن اللي عمله ده أكيد اللي هو كان عايزه .. وهو يعني هايفهم أكتر منهم ؟ .. خوفه من أنه يفشل قدامهم .. خللاه يعمل أقصى ما في وسعه علشان ينجح .. علشانهم .. خللاه ما يحاولش يعمل أي حاجة تانية - حتى لو كانت حاجة هو بيحبها وعايزها - غير الحاجة اللي هما عايزينها أحسن يفشل قدامهم ! .. علشان كده وإحنا صغيرين .. كنا – بسببهم – بنشوف بعض منافسين لبعض .. خصمين .. يجب على كل واحد فينا الاحتراس من الآخر واجتنابه قدر الامكان .

كبرنا .. واتخرجنا .. واشتغلنا .. واتحررنا .

بالنسبة لي ما حستش أوي ساعتها إني اتحررت .. ما أنا أصلاً كنت حر ! .. بس بدأت أحس بالاستقلال ! .. والاستقلال ده مع الحرية والتمرد خللوني بقيت عامل زي القطر اللي ماشي بأقصى سرعة من غير فرامل ولا قضبان ولا سواق ! .. جمحت وخرجت بره التراك .. كنت في الوقت ده باسابق نفسي بس .

بالنسبة لابن عمي .. الوضع ما اتغيرش كتير .. إحساسه بالالتزام بالتبعية كان مسيطر عليه .. كان مفهوم الحرية بالنسبة له ساعتها : أنه حر في اختيار أي خيار من الخيارات - المفروضة عليه منهم - ودي كانت طفرة بالنسبة له لأنه كان بيحس أنه بيختار وبينجح في اللي بيختاره .. وأنه هايكسب السبق .

علاقتنا ببعض في الوقت ده كانت زي الحرب الباردة .. صحيح أن كل واحد فينا مشي في طريق غير التاني .. بس السبق ما خلصش طالما لسه فيه خيل بتجري !

تجري السنين .. وتدور الأيام .. وتتقابل الطرق .. والخيل !

بالنسبة لي كنت خلاص تعبت من كتر الخبط والتخبيط .. كنت شبعت صياعة م الآخر ومحتاج أهدى وأرتاح ! .. ولأني كنت جربت ميت طريق واتعضيت واتهبشت من مليون كلب ، فعرفت واتعلمت واتربيت واتعظت وبدأت أمشي في الطريق الصح ، حتى لو كنت اتأخرت شوية ، بس الحمد لله قدر الله وما شاء فعل .

أما بالنسبة له فكان زهق من كتر الالتزام والتعليمات والاختيارات المتحددة وبدأ يتمرد ! .. ويعيد نفس اللي كنت باعمله زمان بالظبط ! .. الفرق بيننا في التوقيت ! .. عشرين سنة !

دلوقت .. أنا وابن عمي أصحاب لأن السبق اللي بيننا انتهى .. كل واحد فينا بيجر عربية محملة .. مخللياه ما يبصش غير قدامه وبس ! .. كل واحد فينا بيعافر في مليون سبق قصاد مليون خيل ونمور وذئاب وصقور ما يعرفهمش ، ولو وقف يا هايتداس يا هيتاكل ! .. دلوقت .. بنسابق عمــر .. دلوقت .. كل واحد فينا نفسه يبقى مع التاني مش علشان يسبقه ويفوز عليه .. لأ .. علشان يتونس بيه ويتعكز عليه .. لأننا في النهاية حتى لو وصلنا متأخرين .. فالسبق ما بيخلصش !

راكب الأتوبيس

2012-03-24T02:25:00.009+02:00

- قد يقف شخصاً ما لفترة طويلة منتظراً الأتوبيس الذي سيقله إلى منزله بعد عناء يوم طويل في العمل ، حتى يتملكه اليأس والإحباط والسخط ويفتك به الإجهاد والتعب لكثرة ما انتظر .. وأثناء انتظاره يظل يلعن كل الأتوبيسات التي تمر من أمامه والتي لا تذهب إلى منزله ! .. يظل ينظر في حقد إلى هؤلاء المحظوظين الجالسين على مقاعدهم في تلك الأتوبيسات .. وقد يشتم أحدهم في سره إذا ما رآه يتحاشى النظر إلى الواقفين على محطة الأتوبيس وكأنهم غير موجودين أصلاً أو كأنه – الجالس على مقعد في الأتوبيس – لم يكن مثلهم منذ قليل .. "ناس واطية صحيح" هكذا يصفهم !

يأتي الأتوبيس أخيراً .. مزدحماً جداً كما هو متوقع .. يتهلل صاحبنا فرحاً لقدوم الأتوبيس .. ويكون شاغله وقتها أن يستقله بأية وسيلة حتى يذهب إلى منزله ويرتاح من عناء الوقوف .. بعد لحظات من الركوب .. ينسى الوقت الذي قضاه في الخارج في انتظار الأتوبيس .. ويبدأ في الشعور بالضيق والتعب من الزحام .. وأنه لن يقدر على الاستمرار في الوقوف هكذا وسط تلك الكتل البشرية المتلاحمة حتى منزله .. يصبح كل ما يتمناه وقتئذ أن يقل هذا الزحام قليلاً حتى يستطيع أن يقف في وضعية أفضل دون أن يحتك بأحدهم أو يتمايل عليه أحد ! .. يتمنى لو أنه استطاع أن يقترب في وقوفه من إحدى النوافذ حتى يستطيع أن يأخذ أنفاسه بحرية وأن يشعر بالنسيم المنعش يجفف عرقه !

يخِف الزحام قليلاً .. ويقف صاحبنا في مكان ووضعية أفضل بكثير من التي كان ينشدها .. يستطيع الأن التنفس بحرية .. بل أن عرقه قد جف بفعل الهواء القادم إليه من النافذة .. وما أن يبدأ الشعور بالراحة حتى ينظر في حقد إلى الركاب الآخرين الجالسين على مقاعدهم في استرخاء ونشوة .. أولئك الذين ينظرون من النافذة لأشياء لا يستطيع هو أن يراها من مكانه هذا .. ويبدأ في لعن حظه العاثر الذي جعله يقف طويلاً في انتظار هذا الأتوبيس المزدحم وهو في قمة الإجهاد ثم جعله يقف أيضاً بداخله ! .. يشعر بأن كل هؤلاء الحمقى المترفين الجالسين على مقاعدهم لم يتعبوا قط مثلما تعب هو ، ولم يعانوا من ملل الانتظار وآلامه مثلما عانى .. كما أنهم مفرطوا الأنانية وعديموا الرحمة لأن أحداً منهم لم يتنازل له عن كرسيه ويقف بدلاً منه ! .. وهو الأحق منه في الجلوس !

بعد أن يقتنص صاحبنا أول فرصة للجلوس .. ويجلس على مقعد بجوار النافذة .. يترك جسده المنهك يتهاوى ويأخذ الوضعية التي تريحه كيفما يتفق .. ويبدأ في مد رجليه ويشعر بالراحة والاسترخاء .. ينظر من النافذة في سعادة واهتمام على ذات التفاصيل التي رآها قبل ذلك آلاف المرات .. هي – التفاصيل - لا تسعده في حد ذاتها ، بل ما يسعده أنه يراها من خلال تلك النافذة التي تعب كثيراً حتى يستحق المشاهدة منها .. يسعده أيضاً أنه يستطيع أن يرى من مكانه هذا ما لا يستطيع الآخرون الوقوف في ذات الأتوبيس رؤيته حتى وإن كانت ذات التفاصيل المكررة .. لذا فعليه أن ينظر ويستمتع حتى وإن كان قد رآها آلاف المرات من قبل .. وحتى إن لم يكن مستمتعاً أو في حالة مزاجية لا تسمح له بالاستمتاع فعليه أن يصطنع الاستمتاع ولو على سبيل الاستخسار والعند في كل اللي واقفين ، بل قد يتمادى في إظهار مدى سعادته بما يمر أمام عينيه دون حتى أن يراه غيظاً في الواقفين بجواره .. أليس الجميع يفعل ذلك ؟؟ .. ينظر بتعالٍ وكأنما يستقل سيارة فارهة بسائق خاص .. ينظر حتى يتحاشى نظرات من هم وقوف بجواره في الأتوبيس المزدحم والذي يعرف جيداً فيما يفكرون .

يقف الأتوبيس في إحدى المحطات فينظر صاحبنا في أسى مصطنع إلى أولئك التعساء الواقفين على محطة الأتوبيس ! .. يهز رأسه في امتعاض علامة الشعور بالأسف من أجلهم ! .. وكأن لسان حاله يقول لهم : "يا حرام ، مساكين والله !" .. ولكنه حتماً لن ينزل من الأتوبيس لأجل أحدهم .. وهل كان أحد قد نزل له من قبل ؟؟ .. يعلم أن غالبيتهم ينظرون إليه في حقد .. بل أن أحدهم يشتمه الأن في سره "ناس واطية صحيح" .. لذا سيوسع من الابتسامة المرسومة على فمه وينظر إلى الفراغ في سعادة وكأنه لا يراهم .

قشرة برتقالة

2012-03-22T09:04:00.005+02:00

" لا أحد ، على أي حال ، يعرف كيف ترتب الحياة نفسها ... أحياناً يحسب المرء أن قصة ما انتهت فإذا بها تبدأ . إن مستقبل إنسان كامل تراه فجأة متعلقا بحادث صغير لا قيمة له ، إن عقدة المسبحة أصغر من حباتها ولكنها إذا انفكت كرت ثلاث وثلاثون حبة واحدة إثر الأخرى، وأحياناً ينحرف الماعز الأكبر في القطيع وراء قشرة برتقالة ، فيتبعه القطيع بأكمله ، وقد يجتاز سياجاً فيشتبك الرعاة بالمزارعين ويموت ناس وتفقد دواب وتعقد ولائم الصلح فيأكل فقراء القرية ومجانينها وأطفالها العراة وخيلها وبقرها ، ويرى مدعو ما فتاة ما هناك فيخطبها ويتزوجها وتنجب له أولاداً وبناتاً يعيشون ويموتون ، ويمشي في جنازاتهم رجال لا يعرفونهم خطوات السنـَّة العشر ويتحدثون وقد يتفقون على شيء أو يتشاجرون".

* من رواية "العاشق" لـ غسان كنفاني

غنواية البحر

2012-03-21T02:44:00.022+02:00

يا موجة يا هادرة

نامي ننه وارتاحي

يا موجة يا شاطرة

خللي السمك صاحي

يحكيلي حدوتة

ما تكونش ملتوتة

ويغني ويايا

ع الرملة غنواية

~~~

يا شط ما تشدش ضفاير البحر خلليها

تغسل هموم الخلق وبنظرة تمحيها

يا أبو الكناري الفرط يا ملاية م الفتافيت

عمال تبوس البحر .. والبحر قلبه غويط

البحر مستني

أنزل ويبلعني

يقلبني سمكاية

على موجة نساية

ع الشط بنوتة

فِ قلب حدوتة

بتغني غنواية :

يا موجة يا هادرة

نامي ننه وارتاحي

يا موجة يا شاطرة

خللي السمك صاحي

يحكيلي حدوتة

ما تكونش ملتوتة

ويغني ويايا

ع الرملة غنواية

~~~

* المطلع مستوحى من أغنية يا طالع الشجرة .. هاتلي معاك بقرة .. تحلب وتسقيني .. بالمعلقة الصيني :)

اللي تشوفه حضرتك

2012-03-18T05:35:00.032+02:00

نبيل سكلانة (زي ما بينادوه في المنطقة) ، شاب غلبان وغلب الدنيا فيه .. عامل خدمات معاونة في مطبخ مستشفى حكومي .. وبالليل بيغسل الميكروباصات اللي بتجرج جنب القهوة .. ولما كنت أيامها باقعد لوحدي ع القهوة بعد الفجر .. فما كانش فيه غيري يتكلم معاه في الوقت ده – وهو بينضف القهوة - قبل ما نروح على أشغالنا .. ويحكي لي قصته .. والده متوفي .. وأخوه إتجوز وقعد مع أمه في شقتهم .. فلم يكن أمام نبيل إلا أن يستأجر شقة إيجار قديم .. دور أرضي .. بـ 250 جنيه في الشهر .. في حين أن كل مرتبه – وقتها - كان 150 جنيه في الشهر ! .. لكن الحمد لله ربنا بيكرمه آخر الليل من غسيل العربيات وتنضيف القهوة وتقضية الطلبات للزباين .. مشكلة نبيل كانت في أنه عاوز يتجوز .. بالنسبة للشقة كان وضب السباكة بتاعتها وصلح الكهربا وكسّر الحيطان اللي كانت ناشعة رطوبة ومحرّها من جديد ودهن الشقة بالزيت .. وجاب الغسالة والتلاجة والتليفزيون (كان فاضل له أربع أقساط من تمنه) وأخوه إن شاء الله هايشتري له أوضة النوم وأمه هاتجيب له الشبكة من الاربعتلاف جنيه نصيبه في ورث أبوه .. بس شارطة عليه ما يتجوزش بنت أم خالد (ما عرفتش ليه بصراحة ) وإلا مش هايطول مليم أحمر من الفلوس دي !

أنا قاصد حضرتك في خدمة .. أأمر يا نبيل .. الأمر لله ، ما يؤمرش عليك ظالم أبداً يا رب ، أنا بس كنت رايح أتقدم لواحدة وعاوز حضرتك تشرفني وتيجي معايا نطلبها من أبوها .. قعدة تعارف يعني ؟؟ .. لأ أنا عارف أبوها ، بس لسه ما شفتش العروسة ! .. ما هو ده اللي أنا أقصده يا نبيل ، إنك رايح تتعرف عليها وعلى أهلها وتعرفهم بنفسك .. والله اللي تشوفه حضرتك أنا موافق عليه ، أنت زي أخويا الكبير وعاوزك تظبطني .. يا ابني هو أنا هاحلق لك شعرك ؟؟ ، ده جواز !! ، مش أنت ناوي تروح عشان تتجوز ؟؟ .. اللي تشوفه حضرتك .. يا دي النيلة على حضرتي ، ودي مين اللي جابهالك يا نبيل ؟؟ .. دي تبقى بنت الشيخ/إبراهيم خادم الجامع اللي في آخر شارع السوق ! .. طب الحمد لله أن ربنا هداك وبقيت تصلي .. لأ حضرتك ، أنا أصلي كنت باعمل سباكة الشقة الأسبوع اللي فات وكنت مكسر لا موأخذة الحمّام فكنت باروح الجامع عشان أدخل الحمّام ، والشيخ/إبراهيم الله يكرمه بصراحة كان بيعزم عليا بـ أكل كل ما أروح الجامع ، ولما عرف أني ما عنديش حمّام ، خد هدومي معاه البيت وغسلها لي ، ومن كلامي معاه عرفت أن عنده بنت اسمها "شعبانه" .. ما علينا من اسمها ، طب أنت ما قلتش لأمك وأخوك عشان ييجوا معانا ؟؟ .. والله حضرتك أنا قلتلهم ، قالوا لي روح لوحدك الأول شوف الناس ، ولو خير هاييجوا بعد كده عشان يتفقوا مع أبوها ! .. طب أنت ناوي تروح إمتى ؟؟ .. والله الميعاد اللي تشوفه حضرتك !

وفي اليوم المتفق عليه ، قابلت نبيل على القهوة

- والله أنا ما عارف أشكر حضرتك إزاي ع البدلة .. العفو يا نبيل احنا اخوات يا جدع .. بس مش عارف ليه حاسس إنها زي ما تكون واسعة حبتين ؟؟ .. خلاص نحطلها تخشينـة .. ههههههههههههه ، طب الكوتشي ماشي مع البدلة ؟ .. كوتشي إيه ؟؟ أنت لابس كوتشي ؟؟ وكمان أخضرررر ؟؟ .. ما هو حضرتك فيه خطين سوُد من الجنب ! .. يا جدع هو أنت رايح تلاعب برشلونة ؟؟ .. ما هو أصل حضرتك لا موأخذة أنا جزمتي مقطوعة ووديتها لا موأخذة للجزمجي إمبارح عشان يخيطها وخد مني تلاتة جنيه والله ، ونسيت أنه بيقفل النهارده عشان النهارده الأحد ، فاستلفت الكوتشي ده من واحد صاحبي ! .. منــه لــه ! طب اقلع الكوتشي وخد قـِيس جزمتي يمكن تطلع على مقاسك ! .. طب ولا موأخذة حضرتك هاتروح معايا عند الناس حافي ؟؟ .. وماله يا نبيل ؟؟ الجو حر يا أخي ! .. لا يا بيه ما يصحش ، بعدين تتعور ولا حاجة ، خد الكوتشي ده البسه ! .. لا يا شيييييييخ !! إيه العطف والمِروة دول ؟؟ إإففففففف إيه ريحة القبر دي !! أنت متأكد أن صاحبك كان بيلبس الكوتشي ده فِ رجله يا نبيل ؟؟ .. أه والله حضرتك .. فِ رجله كان بيلبس صاحبك الكوتشي يا نبيل ؟؟ .. أه والله يا بيه .. شكل صاحبك هو راخر كان مكسر الحمّام ، بس ما كانش فيه جامع قريب منه !

وفي الطريق لمنزل العروسة

مش واجب برضه ناخد لهم حاجة معانا ؟؟ .. والله اللي تشوفه حضرتك .. طب أنت معاك كام ؟؟ .. حضرتك أنا معايا في البيت خمسة وأربعين جنيه ! .. أنا مالي باللي في البيت !! ، أنا باسألك ع اللي معاك دلوقت ! .. ما هو حضرتك لا موأخذة ما قلتليش أجيب معايا فلوس ، وبعدين بصراحة أنا لما باشيل فلوس كتير بتقع مني ! (وبدأ يدمّع) .. خلاص يا نبيل ما تزعلش ! أنا معايا فلوس ، تحب ناخد لهم جاتوه ؟؟ ولا حلويات ؟؟ ولا علبة شيكولاتة وورد ؟؟ .. هات زلابية عشان باحبها !

في شقة جار والد العروسة

- نظراً لحالة شقة الشيخ/إبراهيم (والد العروسة) المتواضعة ، فقد رأى أن يقابلنا في شقة جاره الذي يعمل في إحدى شركات الأدوية ومقيم في الشقة بمفرده ، والذي كان مسافراً يومها وترك مفتاح شقته للشيخ/إبراهيم لإستضافتنا ، وبعد السلامات والإحترامات والنحنحات والمقدمات .. انتابني شعور غريب ، لم أستطع فهمه !

كانت الإضاءة في الغرفة شبه خافتة .. والرائحة داخلها ثقيلة جداً ، خليط من بقايا أدخنة شيشة ، وأتربة ، ورائحة أخرى عطنة بسبب سوء التهوية ! .. لم تفلح رائحة البخور المشتعل في محوها بل زادتها ثقلاً وكآبة .. جاءت جلستي على كرسي منفرد يقع في ركن الغرفة أسفل الشباك الوحيد بها ، وكان عن يميني كلا من : نبيل والشيخ/إبراهيم الذين جلسا على أريكة قديمة يسار الباب .. كانت الأريكة مكسوة بمفرشِ قديم ، نـُقشت عليه ورود وأزهار كالحة اللون بفعل الزمن وتكرار الغسيل ! .. في البداية .. تهيأ لي أنني سمعت صوتاً صادراً من أسفل الأريكة .. وعندما نظرت إلى المفرش من أسفل ، ووجدته يهتز بالفعل ، فكرت أن ذلك ربما يكون بسبب الهواء الآتي من أسفل باب الغرفة ، وحاولت ألا أستسلم لهواجسي حتى لا يتمكن مني القلق والخوف ! .. لا سيما وأن الأمور حتى الأن تسير على ما يرام .. ثم سمعنا نقرات خفيفة على باب الغرفة ، تبشر بقدوم العروس .. وقام الأب ليفتح الباب .. بعد إذنكوا يا جماعة .. اتفضل يا حاج .. وقام من على الأريكة .. وفجـــــأة !!!!!

تـِعبــــــاااان يا نبيـــل !! إلحـــق التـِعبــان ع الكنبة يااااد !! .. يا لهوووووووي !! .. يا نهااااااار أسود ومنيل كل ده حنش ؟؟ .. لقيت نبيل نط زي البرص اتشعلق فِ رقبة الشيخ/إبراهيم اللي شاله وما بقاش عارف يعمل بيه إيه غير أنه يلف بيه في الأوضة !! .. وأنا وقفت ع الكرسي ، ومش قادر أستوعب الموقف ، ما بين ذعر وخوف وضحك هيستيري !! .. العروسة بره الأوضة عماله تصوّت بصوت مسرسع !! .. والتعبان راح واقف على ديله وأتنفـش !! .. يا نهااااااار أسود !! ده تـِعبـــان كـــوبرا ياااااد / احدفه بالجزمة يا ابني / لاااااء الجزمة لاااااء الجزمة لأ والنبي يا بيه لياكلها / يا ابني انزل حرام عليك مش قادر أشيلك هاتفطسني / ياااااااد ما تتحركش ليرش عليك سم يعميك ، اثبت يا حاج / يا ابني انزل من على كتفي الله يهديك مش شايفه ، عاوز أرفع الجلابية هاتكعبل ، سترك يا رب / مش نازل ، هـِشه يا بيه والنبي (يبكي) والنبي تهـِشه حرام عليك هايموتنا (بكاء) / أتصل بالبوليس يا بابا ؟؟ / يا ماااه إلحقيني يا ماااه (بكاء) / فيه واحد تاني بيلعب ورا الــ ههههههه / ورا إيه ما تنطق !! / ورا الـكو ههههههههههههه / فيـــن يا ابني ؟؟ / بيلعب فيــــن يا بيه ؟؟ حرام عليك بجد !! / ورا الكومودينو هههههههههههه / تـِعبان كوبري برضة ؟؟ / مش عاوز أموت حرام عليكوا ، اضربهم بالجزمة والنبي / كوبري ؟؟ هههههههههه انتوا بتهرجوا هههههههههههه / تهريج إيه وزفت إيه دلوقت ؟؟ / وربنا بتهرجوا هههههههههههه قولوا إن دي هههههههههه الـ كاميرا الخفية هههههههههههه / يا بت اندهي لنا أي حد بسرعة !! / بقوا تلاتة هههههههههههه / تلاااااتة كوبري ؟؟ فين ؟؟ / التااالت فين ؟؟ التااالت فييين ؟؟ / حرام عليك نشفت دمي !! بطل ضحك وقول لنا فين ؟؟ / ورا الكرتونة هههههههههههه / والنبي يا "شبعانه" اندهيلي أمي / سلام قول من رب رحيم ، الكرتونة فين ؟؟ / هههههههههههه التاني بيتمشى وجايلكو هههههههههه / يا نبيل غرقتني ، انزل بقى ربنا ياخدك ! / يا "فجعانة" يا بنت الــ ... افتحي الباب بسرعة ! / أهه أهه !! خارج م الكرتونة أهه / كده كل واحد هههههههههه له تـِعبــان / زمر لهم يا ابني يمكن يبعدوا !! / زمر لهم والنبي يا بيه !! / أزمر لهم بإيه ؟؟ أنفخ لهم في صوابعي ؟؟ دول عاوزين لهم واحد رفاعي !! الشباك ده بيودي على فين ؟؟ / ع البلكونة ، افتحه بسرعة ! / لاااااء والنبي أحسن صحابهم ييجوا من بره !!

- مش عارف إزاي فتحت الشباك ونطيت !! .. ولا عارف إزاي الشيخ/إبراهيم نط وهو شايل نبيل .. ولا فاكر أي حاجة غير كمية الضحك اللي ضحكتها وضحكناها كلنا اليوم ده ! .. كل اللي عرفته بعد كده من نبيل .. أن صاحب الشقة دي طلع كان بيربي تعابين وبيتاجر فيهم وبيبيع السم بتاعهم لشركات الأدوية .. وأن التعابين اللي كانت في الشقة دي ما كانتش سامة لأنها "متترمة" يعني منزوعة الأسنان والسم ! .. عموماً نبيل ربنا رزقه من يومين بمولود من زوجته "شعبانه" وأتصل بيا يسألني : أسميه إيه ؟؟

قلت له : اللي تشوفه حضرتك !

تمــت

تسقط تسقط تسقط

2012-03-15T00:35:00.010+02:00

تقريباً وقتها كان عندي ست أوسبع سنين ! .. مش فاكر بالظبط ! .. بس فاكر حاجات تانية كتير ! .. فاكر لما كنت باقف في البلكونة أم شبابيك خشب خضرا اللي بتطل على الفسحاية الكبيرة وأنده على بتاع التفاح الأخضر : يا عم يا عم يا عم هات بربع جنيه تفاح ونقيه كبير ، وأزعل منه أوي أنه بيعبيه في قرطاس معمول من ورق المجلات مش في كيس الورق البني بتاع الفاكهة ! .. وفاكر كمان بتاع الحرنكش والدوم وحب العزيز وبتاع التين الشوكي وبتاع البطاطا اللي كنت باحب أجيب منه البطاطا البيضا وأقول له هات ببريزه ونقيها معسلة علشان دي لعيل صغير هايتفطم ! .. فاكر كمان بتاع القصب اللي كان جنب بتاع الجاز ! .. وبتاع غزل البنات وبتاع الخرشوف وبتاع حب العزيز والبشملة .. فاكر الست العجوزة بتاعة البخت (أقماع بسكوت من اللي بيتصب فيها الآيس كريم دلوقت ، سداسية الشكل لونها بمبي في قعرها طبقة عسل أسود وقد يضعون فيها عملة فضية : قرش أو شلن) اللي كنت باروح لها مخصوص لحد المترو علشان أشتري منها يمكن أكسب ! .. وأفضل رافع واحدة البخت كده في الشمس علشان أشوف فيها شلن ولا لأ ؟؟ .. فاكر كمان الست بتاعة لقمة القاضي .. اللي كنا بنقعد جنبها في الشتا وهي بتقلي قدام الطاسة علشان نتدفى .. ونبـِل صوابعنا في الخباثة بلساننا ونحطها في طبق السكر البودرة اللي بترشه على لقمة القاضي .. وتلاقي كل واحد فينا بقه متلحوس أبيض وهي تبص لنا وتضحك وتزعق لنا .. واحنا نستغرب أوي إنها إزاي عرفت إننا بنلحس السكر ؟؟ .. فاكر كمان معمل الترمس وبتاع الفيشار وبتاع اللب والسوداني .. فاكر كمان بتاع الخس والملانة اللي كان بييجي يقف في شم النسيم !

فاكر كمان الوشوش (الأقنعة) الورق اللي كنا بنشتريها ونخوف بيها بعض .. الوشوش اللي كانت بتبقى مربوطة بأستك من الجنبين تلبسه في ودانك ويخلليها مطرطقة وحمرااااا .. فاكر لما كنا بنقعد في حوش البيت نعمل الطيارات الورق من جريد الأقفاص وورق السيلوفان وخيط المنجد وعجينة النشا ونتفنن في الألوان بتاعة الديل اللي كنا بنعملها من الورق الملون اللي بيلفوا فيه الفاكهة .. ولا لما كنا نييجي نجربها وواحد يمسك الطيارة ويفضل يجري يجري يجري وهو باصص وراه ع الطيارة علشان الهوا يلقفها ويطيرها وفي الغالب كان يا إما يتكعبل ويقع ع الأرض يا إما يخبط في أي حد والخيط يتلعبك والطيارة تتقطع ونقعد نتخانق معاه .. ما حدش فينا كان بيبص ع الطريق لأن عينينا وقتها كانت بتبقى ع الطيارة ! .. فاكر كمان زينة رمضان لما كنا بنسهر نعملها في الشارع لحد الفجر ، لما كنا نفرغ الورق الملون بالمقص ونلزقه بالنشا على الخيط ونطلع نخبط ع البيوت علشان نعلق الزينة في البلكونات ، كنا ساعتها بنصوم لحد الضهر بس - أول ما نصحى - وبعد ما نفطر ، نكمل صيام عادي !.. فاكر المراجيح الوزة اللي كنت بالف بيها 360 درجة وأنا مرعوب ومغمض عينيا علشان ما أدوخش ورجليا متسمرة في المرجيحة ! .. ولما كبرت شوية اكتشفت من العيال السفلة متعة تانية للمراجيح وهي أنك تبص تحت فساتين البنات اللي بتطير وهما بيتمرجحوا D: .. أما أول مرجيحة اخترعتها في البيت ، فكانت من حبل غسيل ربطته في المفصلة بتاعة إزاز البلكونة ، وكنت باحط عليه مخدة وأقعد اتمرجح ! .. فاكر كمان الكيس البلاستيك أبو فقاقيع – كنت باسميها فسافيس - اللي كانت بتتلف فيه الأجهزة الكهربائية لما كنت باحب أطرقعه !

فاكر كمان أول عربية اتعلمت الشعبطة عليها .. كانت العربية الفولكس (الخنفسة) كنت باتسحب اتسحب اتسحب وأنا موطي لحد ما أنط ع الإكصدام الخلفي بتاعها – كنت باسميه الرفرف – وأقعد وأمدد رجلي وأنا ماسك في الأكره الصغننة بتاعة الموتور ! .. وكان لازم أنزل آخر الشارع بتاعنا وهو بيهدي قبل ما يطلع ع الشارع العمومي علشان يلف ، يا إما مش هاعرف أنزل خالص ! .. وكمان لأن أي حد ممكن يفتن عليا ويقول للسواق : فيه عيل متشعبط ورا يا أسطى ! .. وفاكر أول عربية عملتها أنا والمتشردين أصحابي – قبل اختراع الإسكوتر – كانت عبارة عن لوح خشب على أربع عجلات حديد بتوع غسالة إيديال ومربوط بحبل غسيل .. كان حد فينا يقعد والتاني يجره لحد محل الجزمجي ! .. فاكر كمان الطوق (فردة كاوتش قديم بتاع عربية) اللي كنا بنزقه قدامنا ونحدفه لبعض ! .. فاكر كمان العجلة الفراشة الزرقا اللي كانت عندي .. واللي كنت مزوق أسلاك العجلة بتاعتها بورق ملون .. كانت بتنفعني بصراحة لما أكون مزنوق ، لأني كنت بأجرها للعيال في الشارع ! .. العجلة دي لفيت بيها الدنيا كلها .. وكنت باروح أجيب بيها عيش من الفرن في الشنطة البلاستيك الشبك وأعلقها في الجادون .. وكنت شغال ديليفري للجيران .. اللي عاوزة خضار أو لبن أو هاتعمل كفتة رز عند الجزار ، كنت باروح أقضي لهم الطلبات بالعجلة ! وهما وذوقهم بقى ! .. يعني شلن ماشي .. رغيف عيش سخن تحط فوقيه زبدة وشوية سكر شغال .. تشغللي التليفزيون يبقى يعني ظبطتني ع الآخر !

فاكر كمان بتاع الجمبري اللي كان بيبقى عليه بالضرب .. وكنت أفضل أتحشر وأتزرق وأتدفس بين الناس وأعدي من تحت رجليهم علشان أجيب رغيف جمبري بنص جنيه وكنت أرخم عليه وأفضل أزن علشان يديني معاه رغيف فاضي والطرشي كان ببلاش ! .. إنما لو كنت هاتشتري كمية .. بجنيه ونص مثلاً .. كان يديك فوق الجمبري تلات أرغفة وعلبتين طحينة وحزمة جرجير صغيرة وليمونة ! .. المهم إني كنت أصلاً ما باقدرش أكمل رغيف لوحدي وكنت في الغالب باطلع الجمبري من قلب الرغيف وأكله حاف وأرمي العيش الفاضي للقطط أما الرغيف التاني مع الطرشي فكنت بأديه للراجل الغلبان اللي بينام في مدخل الحارة الضلمة واللي كان مصاحب كلاب المنطقة كلها علشان يبقى يعديني منهم وأنا رايح عند خالتي .. أو بمعنى أدق وأنا رايح أصطاد عصافير بالنبلة من فوق شجرة التوت الكبيرة اللي في الطريق لبيت خالتي ! .. م الآخر كنت باصطاد التوت من ع الأرض .. وأعمر النبلة بقشر البرتقان وأضرب الكلاب اللي نايمه تحت العربيات وأجري !

فاكر كمان أبلة وفاء جارتنا اللي كانت في كلية تجارة – كنت باحسب كلية التجارة دي اسم مدرسة ابتدائي تانية غير مدرستي - واللي كانت كل ما تشوفني تديني نعناع (كان مربع الشكل مش فاكر اسمه للأسف !) ولبان .. وكنت كل ما أشوفها بتذاكر أستغرب أوي ! .. كــُـُـُــل دي ولسه بتذاكر ؟؟ .. دي أكبر من أمي ؟؟ .. وبعدين توصلت لنتيجة مهمة أقنعتني .. وهي أن : أبلة وفاء دي بليدة خالص ومش بتذاكر كويس ، علشان كده عماله تسقط تسقط تسقط .. لحد يا عيني ما كبرت وبقت قد الفيل وهي لسه بتسقط تسقط تسقط .. وصحابها اللي كانوا زمان صغننين قدها كبروا وخلصوا المدرسة وهي عماله تسقط تسقط تسقط .. وطبعاً يا عيني المريلة صغرت عليها وما بقاش عندها لبس تروح بيه المدرسة لأنها طبعاً إيه ؟؟ .. عماله تسقط تسقط تسقط .. وكمان الدكك اللي في الفصل صغرت عليها ومش هاتنفع تقعد عليها أحسن تتكسر .. ومش هاتعرف تجري وتلعب زينا في الحوش لأنها كبيرة أوي وعملاقة وممكن تدوسنا وتفعصنا ، زي احنا كده ما بنفعص النمل .. علشان كده باباها ومامتها قعدوها تذاكر في البيت لوحدها .. وأنا بكره إن شاء الله هاذاكر وأنجح وأخلص المدرسة وهي لسه قاعدة تسقط تسقط تسقط .. وهابقى آجي من وقت للتاني أديها نعناع ولبان !

السور الحديد الواطي

2012-02-26T05:01:00.011+02:00

- الله يسامحك يا "عبد الرحمن" ده موقف تحطني فيه ؟ .. كان في طريقه للنادي اللي المفروض هايقابل فيه العروسة اللي جايباها له "أميمة" مرات "عبد الرحمن" ابن عمته .. لكن "عبد الرحمن" اتصل بيه واعتذر ، وقال له أنه مش هايقدر يقابلهم لأن عنده ظروف في الشغل .. ولما طلب منه أنه يتصل بمراته ويأجل الميعاد ، هزأه .. وقال له : يعني هي هاتاكلك ؟؟ / ما تبطل الكسوف اللي أنت فيه ده يا أخي ! / روح النادي شوفها واتعرف عليها / والله لو عجبتك يبقى أهلاً وسهلاً / ما عجبتكش ، يبقى كل شيء نصيب / وما تخافش أنا وصيت "أميمة" تظبطـّك قدامها / على الله بس أنت ترفع راسنا وما تفضحناش .

وصل النادي قبل الميعاد بساعة إلا ربع .. علشان يتعرف على المكان ويشوف قائمة الأسعار واتجاه الشمس زي ما قال له "نبيل" .. اللي نصحه بأنه يقعدها في وش الشمس - ما جاش في باله أنها ممكن تكون لابسه نضارة شمس- علشان يقدر يشوف ملامحها كويس من غير ما تاخد بالها ، لأن الشمس هاتكون ضاربه في عينها ! .. خرج من النادي بعد ما استقر على ترابيزة معينة وحجزها من الجرسون وإداله بقشيش محترم .. قرر يتمشى شوية على الكورنيش .. وبعد ما تعب من تخمين اسمها وشكلها ، قعد يفكر في الكلام اللي هايقولهولها .. ولما انتبه لاحتمالية أنه ممكن أصلاً ما يعجبهاش ، فكر في الكلام اللي المفروض أنه ما يغلطش ويقولهولها .. ولما لقى نفسه اتلخبط بين اللي المفروض يقوله علشان يعجبها واللي المفروض ما يقولوش أحسن ما يعجبهاش ، اتخنق واتضايق أوي من نفسه وكمل مشي !

بعد ما طلع منديل مستعمل من جيبه ، ورفع رجله اليمين على السور الأسمنت بتاع الكورنيش علشان يمسح الجزمة ، شاف اتنين قاعدين بيبوسوا بعض ! .. اتحرج ومشي ! .. قرر يسيبهم في حالهم ، علشان يوم ما ييجي يبوس ما حدش يرخم عليه ! .. طب لو ما جاش اليوم ده ؟؟ .. إيه السؤال الرخم ده ؟؟ .. بيييييب .. ولأن الشمس كانت في وشه وهو بيعدي الشارع ما شافش العربية النقل ! .. لكنه سمع بعد الكالاكس العالي ، السواق وهو بيشتمه بأمه .. ومن غير ما يلف ، رد عليه الشتيمة وهو بيعدي السور الحديد الواطي بتاع الجنينة اللي في نـُص الشارع .. إيييييء .. حـِجر البنطلون القماش اللي أول مرة يلبسه اتقطع ! .. اتنرفز والدم ضرب في نافوخه ! .. بص وراه على العربية النقل لقاها مشيت ! .. بص ع الاتنين اللي قاعدين ع السور لقاهم لسه بيبوسوا بعض !! .. وطى على الأرض نقى طوبة كبيرة ، حدفهم بيها وجري !

إلهي ياكلك قطر يا حزن

2012-02-18T19:14:00.001+02:00

زووءه وسوكا - العيان والدكتور

2012-02-17T03:15:00.005+02:00

ويتكون الجهاز التناسلي للمرأة من .. وش وش وش وش

يا سوكااا .. يا سوكااا .. يا سوووووكااااااا

نعم يا زووءه

إنزلي عشان نلعب سوا

هانلعب إيه ؟

العيان والدكتور

هييييييييييه مااااااثي

هاستناكي ف عشة الفراخ فوق السطوح

أوكش !
(وبعــد ســاعة)

اتأخرتي كده ليه ؟

كنت باقرا حاجة

طيب ! .. مين اللي هايبقى الدكتور الأول ؟

أنا أنا أنا !!

ماشي يا ستي اتفضلي افعصيني

ياللا بقى افتح بقك وريني المثانة

**********

برواز متوسط الحجم

2012-02-12T19:42:00.012+02:00

تصيح الأم من المطبخ :

- ياللا يا بت عشان تستحمي !

- للللللللللللأ !

- يا بت هي النضافة بتقرصك ؟؟

- ما ليش دعوة ، أنا اثتحميت يوم الجمعة ، وانتي ما اثتحمتيش !

بعد أن تفشل في إخفاء ضحكتها ، تخرج الأم من المطبخ بحثاً عن "الصغيرة" وهي تحاول أن ترسم على وجهها علامات الغضب ، تستعين على ذلك بـ كبشة في يدها تلوح بها في تهديد ووعيد .. وقبل أن تصل لمنتصف الصالة تلمح أصابع "الصغيرة" من أسفل مفرش كرسي الأنتريه ، فتبتسم في سرها على شقاوة ابنتها ، وتقرر إنها ما تعكننش عليها في يوم زي ده .. ثم تجلس على ذات الكرسي وكأنها لم تر شيئاً .. ومن فوق منضدة صغيرة بجانبها تلتقط صورة زوجها ذات الشريط الأسود المائل ، الموضوعة داخل برواز متوسط الحجم .. وتتحدث بصوت عالي :

- خلليك شاهد يا "عصام" على بنتك وشقاوتها ! .. مش عاوزه تستحمى وتغير هدومها يوم عيد ميلادك .. بتقول إيه ؟؟ .. ما أجيبهاش معايا ؟؟ .. حاضــر .

تصيح "الصغيرة" من أسفل الكرسي وهي تدافع عن نفسها :

- لأه .. والله يا بابا اثتحميت بالليفة يوم الجمعة ، وماما ما اثتحمتش !

- سامع يا "عصام" طولة اللسان ؟؟ .. يرضيك كده ؟؟ .. خلاص أنا هاجيلك لوحدي !

تنفجر "الصغيرة" في البكاء .. ما ليش دعوة أنا هاجي معاكي ! .. أنا هاجي معاكي !

- يعني هاتستحمي ؟

- أه ، بث من غير ليفة !

..............................................

- انزلي هاتيلي كيس ملح خشـن بسرعة !

- وأجيب شيبثي ؟؟

- الشيبسي هايسد نفسك ومش هاتعرفي تاكلي !

- طب أجيب عثلية !

- العسلية بتسوس السنان ! .. تعالي أقشر لك برتقانة أحسن.

- لللللللللللللأ .. أنا عاوزه عثلية !

- قلت ما فيش زفت !

- تعالى يا "عثام" شوف مراتك ! .. إيه ؟؟ .. بتقول إيه ؟؟ .. أشتري شيبثي وعثلية وشيكولاتة ؟؟ .. حاضــر يا بابا .

تنفجر الأم ضاحكة في المطبخ .. وتنادي على "الصغيرة" :

- ماشي يا مقصوفة الرقبة انتي يا أم نص لسان ! .. خدي عشرة جنية من ع التسريحة اشتري كيس ملح خشن وهاتيلك كيس شيبسي ! .. بس على الله ما ترضيش تاكلي ع الغدا ! .. واطلعي بسرعة يا بت !

..............................................

عندما لم تجد "الصغيرة" الملح "الحشن" - كما تنطقه - عند "صلاح البقال" أو "السوبر ماركت" الذي على ناصية الشارع قررت أن تسير قليلاً حتى شارع السوق .. وبعد أن سألت "عنتر" الفرارجي و"صالح" الموان ، دلتها بائعة الجرجير على محل العطار الذي يقع بعد المخبز الأفرنجي مباشرة .. وقبل أن تصل إلى المخبز ، تسمرت قدماها أمام الواجهة الزجاجية لمحل العطور ، الممتلئة بالزجاجات الملونة من مختلف الأحجام .. بعد أن دفعت الباب برفق ، تسللت لأنفها بعض الروائح الذكية فابتسمت في نشوة دون إرادة منها .

- هي الريحة بكام يا عمو ؟؟

- ياللا يا شاطرة من هنا ، الريحة دي للكبار بس !

- ما أنا عارفه يا ناثح ! .. أنا هاجيبها لبابا عشان عيد ميلاده !

- هههههههههههه ماشي يا لمضة ! .. فيه من أول عشرة جنية !

- يعني لو إديتك عشرة جنية تديني إزازة حلوة كبيرة ؟

- هاديكي إزازة حلوة قد دي كده !

تمسك "الصغيرة" بالزجاجة ، وتقلب فيها ، فتكتشف إنها أصغر بكثير مما توقعت !

- إيـــه دي ؟؟ .. أنت بتضحك عليا ؟؟ .. دي إزازة البيبث أكبر منها !

- يا ماما دي مش للشرب ! .. دي ترشي منها شوية صغننة تخللي ريحتك حلوة ! .. ثم يرش على يديها الصغيرة قليلاً من زجاجة كانت في يده .. شمي كده ؟

- اللللللللللله .. دي ريحتها حلوة أوي ! .. حط شوية كمان والنبي !

- حاضر ! .. حلو كده ؟؟ .. ياللا بقى اتفضلي !

- طب خد عشرة جنية وهات إزازة لبابا !

- لأ .. أنا هارشلك شوية على منديل وتروحي تاخدي رأي بابا الأول ، لو عجبته تعالي وأنا أعمل لك إزازة .. اتفقنا ؟؟

- اتفقنا :)

..............................................

في المساء .. تنسل "الصغيرة" في هدوء من تحت الغطاء بعد أن تتأكد من استغراق أمها في النوم .. تتسلل في خفة إلى الصالة .. تخرج المنديل المعطر من جيب بيجامتها وتقربه من البرواز متوسط الحجم .. كل ثنة وأنت طيب يا بابا .. شـِم الريحة دي كده ؟؟ .. حلوة ؟؟ .. خلاث هاشتريلك إزازة بكرة بعشرة جنية ! .. بث خللي ماما تديهوملي عشان أنا مش معايا فلوث ! .. تـُقبل البرواز وتضعه في مكانه .. وقبل أن تستدير عائدة إلى فراشها تستكمل : هو أنا ممكن أبقى أحط شوية من الريحة بتاعتك يا بابا ؟؟ .. شوية ثغيرة والله أنا وماما ! .. لو مش عاوز ماما تحط بلاش ! .. مشكرة أوي يا بابا .. تعود "الصغيرة" إلى فراشها في سعادة .. دون أن تلحظ إتساع الإبتسامة داخل البرواز :)

تيه

2012-02-07T03:38:00.002+02:00

" يضل أحدهم سبيله ، فيهتدي بالصدفة إلى سبيل آخر يصبو إليه "