إرادتي العزيزة تحية طيبة وبعد

فينك يا ست الكل؟؟ مختفية فين كل ده؟؟ مش كفاية دلال بقى ونرجع لبعض؟؟ لو أنا زعلتك في حاجة قوليلي!! عاتبيني!! إنما تمشي كده فجأة وتسيبي الباب مفتوح ع البحري وتخلي التفاؤل والأمل والحماس والإتزان وحاجات تانية كتير مش فاكرها يمشوا وراكي؟؟ .. بالمناسبة صحيح،، مين فيكوا اللي ساب الذكريات المعفنة ورا الباب؟؟ هه؟؟ إشمعنى دي يعني اللي ما خدتوهاش في إيديكوا؟؟ والحزن المتلتل ده مين اللي طلعه بره الدواليب؟؟ هه؟؟ ومين السافل اللي لخبط اليأس ع الإحباط؟؟ مش حرام أقعد طول اليوم مكتئب ودمي محروق وأنا باحاول أفرق ما بينهم؟؟ .. يا ستي أنا لا باتهمك ولا بالقح عليكي أنا بس مخنوق من حالي اللي اتشقلب وقلت أفضفض معاكي،، بلاش يعني؟؟

أنا؟؟ .. ولا حاجة!! .. وأنا هاعمل إيه يعني من غيركم .. احــم .. لأ وأنتوا معايا الوضع كان مختلف .. صحيح كنت باتدلع برضه بس كنت معتمد أنكم ملقحين جوايا،، ووقت ما أعوزكم هالاقيكم،، إنما تخونوني كلكوا كده وتسيبوني لوحدي؟؟ .. يوووووه!! جينا بقى للكلام اللي ما يجيبش همه!! لزومه إيه التقطيم ده بس؟؟ .. يييييييه!! .. المهم يعني ناويين ترجعوا ولا لأ؟؟ .. إيه؟؟ أتغير؟؟ إيه اللي جاب سيرة التغيير دلوقت؟؟ وبعدين هو التغيير ده بالساهل كده؟؟ عمرك سمعتي عن حد أتغير في يوم وليلة؟؟ .. مين اللي بيتكلم ده؟؟ التفاؤل؟؟ عاش من شافك يا عم!! صوتك طلع دلوقت يعني؟؟ إشمعنى معايا كنت عامل أخرس؟؟ .. الله .. دي الشلة كلها هنا بقى!! .. الأمل والحماس والصبر والفرح و.. معلش ثانية واحدة بس،، مين الأخت؟؟ .. لأ لأ المهزوزة دي الثقة بالنفس أنا عارفها،، أنا قصدي على التانية الطويلة دي اللي واقفة مكسوفة ورا الشجاعة .. الكرامة؟؟ .. إيه ده؟؟ أنا عندي كرامة؟؟ .. آآ أقصد أني كنت فاكرها لسه جوه .. على كده بقى أنا قاعد ملط ومش حاسس؟؟ .. إيه؟؟ الإحساس كمان معاكوا؟؟

طب اسمع بقى منك ليها: أنا ممكن أعتبركم بتصيفوا يومين وراجعين،، إنما لو فضلتوا سايقين العوج كده وما رجعتوش؟؟ يبقى بصراحة خير ما عملتم .. أروح أعمل أبديت وأنزل سوفت وير جديد للحاجات اللي ماشية في السوق اليومين دول: قلة الذوق – البلادة - النطاعة – السفالة – الوقاحة - الدناءة – النفاق - الغش - الجشع - الاستغلال – الحقارة ... كمان شوية أدخل ع البلطجة والإجرام،، وبعدها أمسك الدركسيون وأقعد الشيطان ورا .. محتاج بس في الأول شوية بجاحة،، ثواني كده أدخل أدور جوه،، أنا فاكر أن كان عندي برطمان كبير زمان .. إيه؟؟ .. أه تهونوا عليا،، أنتوا ناسيين أني ما عنديش إحساس ولا إيه؟؟ .. إيه؟؟ .. الإحساس رجع؟؟ .. طيب .. مش عارف البرطمان ده بقى لسه شغال ولا تاريخ صلاحيته انتهى؟؟ .. إيه؟؟ .. أيوه مش واثق فيكم،، أثق فيكم إزاي وأنا أساسا ما عنديش ثقة في نفسي؟؟ .. إيه؟؟ .. الثقة بالنفس رجعت؟؟ .. طيب .. أنا باقول أجرب معلقة بجاحة صغيرة .. اتاخري شوية كده يا حاجة بعد إذنك،، مين حضرتك؟؟ القناعة؟؟ لا لا لا مش وقتك خالص يا أمي،، خشي نامي،، ويا ريت تدخلي جوه خالص بعد الآخر .. بس بقى يا فرح ما تزغزغنيش،، المعلقة وقعت ع الأرض،، طب وربنا لأشرب من البرطمان .. هع هع هع ضحكت عليكوا وشربت برضه .. مممم .. عادي يعني،، مش حاسس بفرق كبير .. بتضحكوا على إيه؟؟ .. لأ بجد فيه إيه؟؟ .. إيه؟؟ .. القناعة بدلت البرطمانات؟؟ .. شربت إيه؟؟ .. صبر؟؟ .. لأاااااا (بيقلع ملط ويجري وراهم) .. فين برميل السفالة يا ولاد الـ ...

تعليقات

  1. راق لي التجوال ، أعجبني الحرف و الفكر

    تحياتي
    https://sociopoliticarabsite.wordpress.com/

    ردحذف
  2. مسا الفل والياسمين والسعاده
    عارف ان البوست ده ينفع فى التنميه البشريه واعمل منه سلسله بوستات بجد هيفرق جدا جدا
    لما كنت ادرس كورس تدريب مدربين كنا بنتعلم تمرين اسمه تمرين البجاحه متخيل

    كلامك محتاج اتفرج اقراه خمسين مره لأن كل حرف أعمق من اللى قبله

    عاوزة بوستات تانيه على نفس المنهج أو هاشرب كوباية غلاسه على شويه رزالة وارجع اعلق تانى

    ربنا يطمن قلبك الطيب بالخير

    ردحذف
  3. أخيرا وبعد طول انتظار لحقت التعليق قبل قفله
    أخى شريف اتمنى تكون بخير وسعادة
    ويستمر عطاءك التدوينى وابدعاتك دائما
    راق لى قرائاتى فى عالمكم الإفتراضى الجميل

    ردحذف
  4. Mongi Bakir
    :))
    تسلم يا أستاذنا على تشجيعك الراقي .. ربنا يكرم حضرتك ويبارك لك .. إن شاء الله أتشرف بزيارة مدونتك
    :))
    شرفتنا

    ردحذف
  5. زهــــراء
    :))
    يا مساء الورد والفل والياسمين يا أستاذتنا .. ربنا يكرم حضرتك ويبارك لك ويسعدك زي ما بتسعدينا بزيارتك الكريمة :))
    يا فندم احنا عاوزين تنمية مادية :D
    وبعدين احنا اللي بنتعلم من حضرتك والله .. إن شاء الله أواظب على النشر الفترة الجايه،، وتشرفونا دايما بتعليقاتكم الجميلة ونتمنى نقرا حاجة لحضرتك قريب في مدونتك
    :))
    شرفتينا

    ردحذف

  6. Gamal Abu El-ezz
    :))
    يا ألف أهلا وسهلا بيك يا أستاذنا منورني يا معلم والله
    :))
    الحمد لله بخير يا جمال،، يا رب تكون أنت كمان بخير وصحة وسعادة .. معلش الفترة دي سخيفة معايا شوية .. باعتذر لحضراتكم كلكم على التقصير في النشر والمتابعة وتأخير الردود .. ويا ريت ترجعوا تنوروا مدوناتكم تاني ونشجع بعض
    :))
    شرفتنا

    ردحذف
  7. شريف
    واحشني
    وواحشني شقلابظاتك وكلامك مع كل شئ ممكن وغير ممكن
    ولو لقيت برطمان من الحاجات دي ماتنسنيش :)

    ردحذف
  8. محمد سلامة
    :))
    والله العظيم يا عم أنت خلتني عملت أحلى شقلبظات بعد ما فرحتني بالخبر الحلو ده
    :))))
    ألف ألف ألف ألف مليون مبروك يا محمد، ربنا يفرح قلبك ويسعدك ويرزقك ويرضيك بكل الخير
    :))
    ويا باشا البرطمانات والمدونة وصاحب المدونة كلهم تحت أمرك يا عريس
    :))
    شرفتني وفرحتني جدا

    ردحذف