يا ليلة العيد بالراحة علينا

- ليلة رمضان .. بعد أول سحور .. وقفت أشرب سيجارة في الشباك .. سمعت خناقة كبيرة في شقة الجيران اللي قصادنا .. "هتطلقني يعني هتطلقني يا محمد" .. صوت ضرب بالأقلام وتلطيش وصريخ .. "ما تشتمش أهلي يا ابن الــ" .. "أنا أبقى بنت ستين .... لو قعدت لك في البيت دقيقة واحدة" .. صوت رمي حاجات ودربكة وجري وصريخ طفل صغير .. "افتح الباب باقول لك" .. تلطيش وصريخ .. "هات المفتاح، نزل إيدك من عليا أحسن لك، سيب الإسدال، بتقلعني يا جبان علشان ما أروحش لأهلي؟؟ طب والله العظيم لانزل زي ما أنا كده، هانزل في الشارع ملط وأفضحك يا محمد، ولو راجل انزل ورايا وقول لهم دي مراتي يا ...."

- قبل الوقفة بيومين .. صوت صريخ وتلطيش .. طلعت البلكونة .. عرفت أن فيه شاب في البيت اللي جنبنا بيضرب أخته وبيسب لها الدين وهي بتشتمه وبتقول: "ما تمدش إيدك عليا، أنت مش بتصرف علينا، ما لكش حكم عليا" .. "هتجيبي الفلوس ولا هاطلع ميتــ ....؟؟ هاكسر البيت على دماغك" .. أمه اتدخلت، راح ضاربها .. صوته كان عامل زي التور الهايج .. الستات فضلوا يصوتوا لحد ما الجيران اتلموا .. الشاب ضرب واحد فيهم .. الموضوع اتطور ووصل للشارع .. والخناقة فضلت لحد نص الليل.

- النهاردة .. ليلة وقفة العيد .. قبل الفطار بربع ساعة .. شقة فوقنا .. من الأصوات اللي واصلة لنا، تعرف أن الست بتنضف .. أصوات تنفيض وشيل وحط ورزع وخبط وجر وهبد وتزييق موبيليا ع السيراميك .. إيييء .. شيء مزعج لكنه عادي في يومين زي دول، وبيحصل في كل البيوت .. الزوج راح رازع مراته كلمتين بعصبية: "سنة علشان تنضفي؟؟ هتفضلي طول عمرك خيبة ولخمة كده؟؟ مش هتبطلي بقى اللكاعة اللي أنتي فيها دي؟؟ الناس كلها خلصت وأنتي عندك شلل، مكركبة الدنيا ومش عارفين نمشي" .. الصوت اتقطع للحظات (غالبا لأنها راحت وراه أوضة تانية) وبعدين سمعنا: "يا أخي يحرق ميتـ ...."، "يلعن أبو شكلك يا ابن الــ ....." .. صوت رمي حاجات وتكسير .. "احترمي نفسك يا بنت الــ ... بدل ما أقوم عليكي ما أخليش فيكي حتة سليمة" .. "تقوم على مين؟؟ أنت فاكر نفسك راجل؟؟ طب فكر كده وأنا أخلي أهلي يقطعوك يا ....." .. "يلعن ............." .. العيال خافت وعيطت، قامت زعقتلهم ودخلتهم أوضتهم وقفلت عليهم، والعيال فضلوا يصرخوا من ورا الباب ويخبطوا .. بعد كده سب الدين لرمضان والعيد والجواز والستات، وتقريبا كان بيلبس علشان ينزل .. "مش هتنزل إلا أما تطلقني" .. "سيبيني بدل ما أرتكب جناية، أنا مش شايف قدامي" .. "قلت لك مش هتنزل إلا أما تطلقني" .. العيال محبوسين جوه الأوضة وعمالين يصرخوا ويرزعوا ع الباب .. فتحت الباب نزلت فيهم ضرب وتلطيش وشتيمة وقفلت الباب عليهم تاني .. كان هو خرج من الشقة ورزع الباب وراه .. خرجت وراه عند الأسانسير وفضلت تشتم فيه .. صوت ضرب وتلطيش وصريخ ودربكة ع السلالم .. أصوات أبواب شقق بتفتح (تقريبا الجيران خرجوا) صرخت فيهم: خشوا جوه مش لابسة هدومي .. دخلت شقتها، كلمت أهلها في التليفون: "عاوزاكوا تشرحوه، مش هارتاح غير لما أشوف دمه سايح وتيجيبوا لي جثته، ما حدش يقول لي إهدي" .. ولحد دلوقت بتزعق وبتشتم في جوزها.

* البوست خلص .. آسف أني نكدت عليكم .. بس فيه كلمتين محشورين في زوري: يلعن أبو التنفيض ع التنضيف ع الترويق ع الغسيل على هدوم العيد ع الكحك ع الزيارات ع العيديات ويلعن أبو أي حاجة ممكن تعكنن وتنكد علينا وتخلينا نتخانق، يلعن أبو أي حاجة مهما كانت ممكن تخرب البيوت لا قدر الله .. استهدوا بالله يا جماعة واستعيذوا بالله من الشيطان الريجيم وهاتوا لب وسوداني وشوية فاكهة واقعدوا معززين مكرمين في بيوتكوا إذا كان خروجكوا هيعمل مشكلة .. خشي نامي وارتاحي وروقي دماغك وأعصابك يا ست الكل ويتحرق غسيل السجاد على تنزيل الستاير وتعليقها ع الشقة .. كفاية هم وشقا طول السنة وكتر ألف ألف خيرك أنك أصلا بتقفي في المطبخ في رمضان في الجو ده .. الشقة وسخة؟؟ طظ .. وهي من إمتى الشقق بتبقى نضيفة بالذات للي عندهم عيال؟؟ ده حتى لو نضفت العيال مش هتعرفها ومش هيسيبوها في حالها ساعة زمن .. ما تعمليش حساب للناس اللي هتيجي على حساب نفسك وعيالك وجوزك وبيتك .. وبعدين هو ليه مفهوم العيد مرتبط عندكوا بالشقا وهدة الحيل؟؟ .. خايفة أحسن الناس يقولوا عليكي مش نضيفة؟؟ والله اللي مش عاجبه ييجي يشمر ويورينا همته .. وبعدين هو اللي جي زيارة بييجي علشان الشقة ولا علشانكوا؟؟ .. يا شيخة كبري دماغك بلا كلام فاضي .. وبالنسبة للزوج: اتقي الله في أهل بيتك، وما تخليش الشيطان يشخ لك في ودنك، ويخليك تعكنن على نفسك وعلى أهل بيتك في أيام مفترجة زي دي، استهدى بالله كده وكبر مخك يا معلم، ما تدققش وبلاش تلاكيك على حاجات تافهة ما تخصكش، وعامة علشان نبقى واضحين بس، أي حاجة في البيت ما تخصكش، عندك كلمة حلوة قولها، ما عندكش يبقى الله وكيلك يا شيخ تسكت، قدرت تساعد بحاجة ساعد، مش عيب والله، ما قدرتش وحاسس أنك مش عارف تقعد في دوشة البيت وسط الكركبة، اخلع، روح اقعد ع القهوة، وهي يعني القهاوي اتعملت ليه؟؟ مش علشان تلم الرجالة يوم الوقفة؟؟ زي بالظبط كده ما الكوافيرات بتلم الستات، صدقني والله كلها حاجات تافهة، شوف بس حد نستقضي منه مصلحة ونقعد نلف لنا سيجارتين كده نعدل بيهم الطاسة، أمال هما سموه "الحسيس" ليه؟؟ مش تخليك حسيس كده يا جدع؟؟ وبعدين ما أنت عارف الستات يا عم، هو أنا هاقول لك يعني؟؟ آآآآآآ فاهمني أنت طبعا.

أقول لكم؟؟ .. قبل ما حد يزوركم، فاجئوه واكبسوا عليه .. ولو مش هتقدروا، تخرجوا، عيدوا عليه بالتليفون .. ووالله يا جدعان، وأنتوا عارفين من غير حلفان، أن اليومين دول، اللي عنده حد عزيز عليه وبيحبه قوي قوي ولقاه عاوز يزوره، يقول له: "ما تجيش"، صدقوني هينبسط أكتر ما كان ييجيلكم ويشوفكم وهيدعيلكم أن ربنا يبارك لكم ويسعدكم وكل سنة وأنتوا طيبين جميعا وبألف ألف خير وصحة وسعادة وستر وراحة بال، ربنا يحفظكم جميعا من كل هم وشر وضيق وكرب ودين ووجع وخناق وعجز ومرض اللهم آمين.

تعليقات

  1. * تنويه:
    علشان بس أي حد ناوي يحرجني ويجرحني ويسألني: يعني أنت بتساعد في البيت؟؟
    شوف يا مونبيه،، أنت طبعا عارف أن الراجل مش مطلوب منه في شغل البيت غير حاجة واحدة لعينة بس،، أو حاجتين إن شئت الدقة: تنزيل الستاير وتعليقها .. يعني أنت نزلت الستاير؟؟ .. شوف .. ما تهربش من السؤال وجاوب .. ده أنت رخم بقى!! ينفع يعني أسيب الناس اللي هتيجي تعلق هنا وأروح أعلق الستاير؟؟ .. حوش يا أخويا الناس،، قال يعني أنت كنت نزلتها لما هتعلقها؟؟ .. يا ابني اسكت بقى بدل ما أعلقك هنا،، ده أنا عامل البوست أصلا علشان أهرب من الستاير،، ما سمعتنيش وأنا عمال أشتم وألعن في الستاير وجر الكراسي؟؟ .. لأ .. غريبة!! مع أني اتكيت عليها قوي في البوست علشان المدام تقراها .. ؟؟ .. قصدي ما دام أنت بخير وأنا بخير يبقى هنشغل بالنا ليه بحاجات تافهة زي دي؟؟ وبعدين لو مش عاجبك تعالى أنت نزلها يا أخويا!! ولا تعالي أنتي يا هانم اتشمللي وانشري الغسيل!!
    إيه الناس دي؟؟

    ردحذف