لسان عصفور
- لما بافتكر دلوقت مفاهيمي عن الأكل زمان وأنا صغير باقعد أضحك والله .. معظم المفاهيم دي كانت نتيجة خيالي الطفولي اللي كان بيحاول يلاقي تفسير لأي اسم أو شكل أكل بيسمعه أو بيشوفه قدامه .. لسان العصفور مثلاً ؛ قعدت فترة طويلة جداً ما أكلوش لأني كنت فاكر أنه ألسنة عصافير بجد !! .. وكنت كل ما أشوف عصفورة واقفة قدامي تصعب عليا لأن ما عندهاش لسان ؛ وفسرت سبب طيرانها بعيد عننا لأنها خايفة أحسن ناخد لسانها وناكله !! .. وبقيت باخاف جداً من العصافير أحسن تتلم وتيجي تنتقم مننا !! .. (ولما شفت فيلم الطيور بتاع هيتشكوك بقيت أخاف أكتر) .. وعلشان كده قعدت فترة أسرق لسان العصفور من الكيس وأحطه على سور البلكونة علشان كل عصفورة تاخد لسانها وتشيلني من دماغها !!
- زمان برضه لما كنا بنروح عند جدي الله يرحمه ويقعدني جنبه واحنا بناكل كان بيقول لي شوية حاجات غريبة المفروض أنها علشان تشجعني أكل ، لكن في الحقيقة كانت بتخليني أقلق !! .. يعني مثلاً الفراخ (أو الكوكو زي ما كان بيقول) : كـُل الصدر ده علشان صدرك يكبر / كـُل الورك ده علشان وركك يكبر / مين الشاطر اللي هياكل حتة الزلمـُكة دي ؟؟ .. طبعاً هو ما كانش يعرف أن كل حاجة بيقولها لي كنت باقعد أتخيلها عليا وأترعب !! .. إزاي يعني أبقى طفل وأمشي في الشارع بصدر و ورك وزلمـُكة منفوخين ؟؟ .. وبالذات لما كنت أتخيل أن ممكن زلمكتي تكبر فجأة وأنا ماشي في الشارع والشورت يتقطع عليا كنت أتكسف قوي !! .. فبقيت تقريباً ما باكلش غير العيش الحاف بس !! .. ولما الله يرحمه لاحظ الحكاية دي بعد فترة ؛ ما سابنيش برضه في حالي وبقى يقول لي : العيش الحاف يربي الكتاف !! أ*ـــا يعني يا جدو أصوم طيب ولا إيه مش فاهم ؟؟
في نفس الوقت كانت جدتي الله يرحمها بتشجعني على النضافة بس بالرعب !! .. لو ما غسلتش بقك وسنانك قبل ما تنام هتيجي "الشمامة" بالليل وتعمل لك حاجات وحشة على بقك (غالباً بي بي) !! .. وأقعد أنت بقى طول الليل تخيل في شكل أم "الشمامة" دي !!
بعد فترة اتشغلت بحاجات تانية .. يعني مثلاً كان نفسي أشوف عمال مصنع الموز وهما بيجيبوا قشرة قشرة ويحشوها موز وبعدين يقفلوها من الحتة السودة اللي تحت دي وفي الآخر يرصوا الموز كده جنب بعضه ويربطوه في سباطة واحدة !! .. كان نفسي برضه أشوف شجر المكرونة الإسباجتي علشان أعرف إزاي بيقطفوها من ع الشجر كده من غير ما تتكسر ؟؟ وإزاي بتطلع كلها مفرودة ونفس المقاس بالمللي ؟؟ سبحان الله بجد !! .. وطبعاً كنت عارف أن اللبن بييجي من البقرة اللي هي مرات الجاموسة اللي بتعمل لنا الزبادي (زي ما الخروف جوز المعزة والفار جوز العرسة والقطة لما بتكبر بتبقى نمر والبرص تمساح صغير) .. بس ما كنتش أعرف شكل حيوان القصب اللي بيتغذى على القصب ولما بنحلبه بيطلعه لنا عصير !!
ياللا بقى احكوا لنا على ذكرياتكم مع الأكل وأنتوا صغيرين :)
ده اييييييه الخيال ده
ردحذفبس بينى وبينك معاك حق انا لغاية دلوقت بترعب من اغنية نام ننة وادبحلك جوزين حمام دى ليه يدبحوهم انا مش فاهمة
reemaas
ردحذف:))
أه والله يا دكتورة حضرتك معاكي حق !!
مش عارف إزاي الأغنية دي تبقى تهويدة للأطفال قبل ما يناموا !! دي المفروض تغنيها أم النسر للفرخ الصغير
:))
شرفتينا
ماما كانت بتقولنا موضوع الشمامة دا برضة بس كانت بتقول هتاكل بقكوا ف كنت بتخيل انى اقوم الصبح معنديش بق زى ف فيلم ماتريكس كدا و مش عارفة اتكلم
ردحذفمكناش بنحب ناكل بسلة ف كانت بتقنعنا ان كتر اكل البسلة بيخلى العين تخضر ف كنا ناكلها و نجرى عالمراية نشوف عنينا اخضرت ولا لأ
و اكبر اشتغالة كانت عملالى رعب ان لو شربنا مية بعد ما ناكل سمك السمكة اللى اكلناها هتعوم ف بطننا الفكرة كانت بترعبنى لدرجة انى كنت بفضل اليوم كله من غير ما اشرب ولا نقطة مية :D
و كان عندى نفس اعتقاد لسان العصفور و برضة فضلت فترة محتارة المكرونة بتتزرع ولا لأ :D
رائع كالعادة (y)
دي الشمامة طلعت م التراث الشعبي بقي ...اكيد بقي الراجل ابو سيخ اللي بيطلع م الحيطة لو حد خبط عليها ده اختراع ستي او حاجة خاصه بسلو بلدنا هههه...
ردحذفEsmeralda
ردحذف:))
هههههههههههههههههههههههههههه
يبقى على كده بصرة :))
هو بصراحة أنا ماليش تقل ع البسلة بصفة عامة بس باكلها .. أنتي فكرتيني بحاجة مستغربها من فترة طويلة ومش لاقي لها تفسير !! أن معظم البنات بتحب البسلة !! يمكن أنتي أول استثناء أقابله في الموضوع ده !!
بالنسبة لموضوع السمك ففعلاً باسمع جملة "اشرب ميه خللي السمك يعوم" دي كتير !!
وبرضه كنت فاكر المكرونة بتتزرع وكنت باستغرب إزاي بيزرعوا الإسباجتي وبتطلع كلها مفرودة ونفس الطول !!
وكنت فاكر برضه أن معظم الحبوب الصغيرة والبقول والمكسرات والتوابل بتتصنع : اللوبيا واللب والسوداني والشاي والرز والسمسم والحلبة والبندق والقرفة والجنزبيل ... إلخ لأن أولاً مالهاش أوراق خضراء زي الملوخية والسبانخ والبرسيم وثانياً لأن مين هيقعد يلم سمسماية سمسماية ؟؟ ده يكون جاله شلل على ما يلم شوية علشان يعمل سمسمية !!
:))
عندي فولدر كامل فيه اشكال الأشجار والنباتات لكل الحاجات اللي كنت فاكرها بتتصنع زي الخروب والدوم والكركدية والقرفة والفانيليا :))
شرفتينا
Tarkieb
ردحذف:))
هههههههههههههههههههههههههه
لأ تصدق حكاية الراجل أبو سيخ دي جديدة أول مرة أسمعها !!فكرتني بشقتنا القديمة .. كان البيت اللي لازق في بيتنا بيت عيلة واحدة ست وراجل كبير في أول دور وباقي الأدوار كل عيل من عيالة واخد شقة ومتجوز فيها .. فكانت الشقة اللي جنبنا ساكن فيها علاء (أكبرهم) وكان نومه تقيل تقولش ميت يا أخي !! فكانت أمه تنده عليه من شباك أوضتها اللي ع المنور في أول دور كل يوم الصبح وهو في الدور التالت : يا عيييلاااااااااااااء !! اصحى يا عيييلااااااااااااااااء !!
يا مايسة صحي جوزك !!
فطبعاً هي ما كانتش تعرف أنها بتصحي بيتنا والبيت اللي جنب بيتها بصوتها العالي ده !!
فكان البيت اللي بعد بيت علاء يقعدوا يخبطوا له ع الحيطة من ناحية الشمال وأنا أقعد أخبط له ع الحيطة من ناحية اليمين علشان يصحى بسلامته !! كنا شغالين له منبه سعادة البيه !!
وفييييييييين على ما الست مايسة تصحى وتطلع بقميص النوم من شباك المنور وتقول لها خلاص يا ماما صحي !! وتقفل الشباك وتخش تنام جنبه لحد الضهر وأم علاء بتفضل تنده!!
يقوم علاء بيه بسلامته ع الساعة اتنين الضهر وويروح فاتح الشباك اللي ع المنور باللباس ويفضل يزعق لأمه ويقول لها : يا أمـّا حرام عليكي ما صحيتنيش ليه ؟؟ مش قايل لك تصحيني بدري ؟؟
تقوم هي قايلة له نفس الجملة : هي طول ما هي بسلامتها بتلبس لك الأحمر والعريان هتصحى ؟؟ ده أنا باصحي فيك من الساعة تسعة والجيران كانوا هيهدوا البيت بتخبيطهم وأنت قتيل البعيد !!
إيييييييه !!
الله يسامحك يا علاء أنت وأمك ومايسة !!
:))
نورتني يا كبير
سلام عليكم و رحمة الله
ردحذفازيكم جميعا.. ازيك يا استاذنا الكبير ؟
بالنسبة لموضوع اﻷكل ده انا بصراحة كنت مؤمنة تماما ان المكرونة بتتزرع .. و لما عرفت انها بتتصنع اتصدمت جدا .
وكمان فاكرة اني مكنتش بحب اشرب الحليب ﻷننا أشرار و بناخد أكل البيبي بتاع البقرة و بفضل أتخيله و هو بيعيط و جعان بعد ما سرقنا الحليب من مامته . هههههه فضايح والله
صباحك زي الفل :)
لسان عصفور انت وصفت الموقف بتاعي منه بالظبط، و بعدين بقى لما يعملوا ترس..يا لهوي، طيب خدتوه من آنهي مكنة. و لما يقولك كل قلب الفرخة عشان قلبك يكبر، طيب يكبر يروح فين و لحد ايه! هااااار اسوح
ردحذفو البرتقال ابو دمه ، مصاص دماء؟ دراكولا؟! ليه كدة طيب؟
نهارك فل يا استاذ شريف :)
ايه ده استنى انت صدمتني هو الخروف مش جوز المعزة ؟؟؟ والفار مش جوز العرسة ؟؟
ردحذفيعني في فار وفي فارة ؟؟ وفي خروف وفي خروفة ؟
كل معلوماتي بااااظت خلاص
وبكده في معلومتين اتضربوا خلاص وراحوا بتوع الخروف والفار وياخسارة شقا السنين :)
بالنسبة للاكل بصراحة مش فاكرة غير فعلا لسان العصفور قعدت لفترة متخيلاه لسانه بجد ومش فاهمة ليه ناكل لسان العصفور طيب وان مكانش لسانه ليه سموه كده اساسااااا
وتيتة الله يرحمها كانت تقولي اكل طماطم كتير عشان خدودي تحمر :))
بس اللي فاكراه ان ماما كانت بتقولي مقطعش الورق من الكراسة عشان الورقة بتيجي باليل هي وصحابها الورق اللي قطعته عشان تنتقم مني وتقطعني زي ما قطعتها الموضوع ده كان عامللي رعب فعلا م الورق اللي هيجي يقطعني زي ما قطعته
ضحكتني من قلبي وفكرتني بايام البراءة الهبلة :)))
دمت بخير
جيلان حمزة
ردحذف:))
وعليكم السلام ورحمة الله وبركاته
بخير الحمد لله يا أستاذة ؛ ربنا يكرمك يا رب ويجازيكي كل خير على سؤالك الطيب
:))
ده على كده بقى كلنا واخدين فكرة غلط عن المكرونة :))
تعليقك عن البيبي بتاع البقرة ده موتني من الضحك ؛ ربنا يسعدك يا رب :))
أصل عندنا بنسميه العجل :))
فكرتيني ببوست كنت كاتبه زمان وتقريباً كانت فيه وزة أو بطة مش فاكر بالظبط الحقيقة ؛ وجت زميلة فاضلة وعلقت على الكتكوت الصغير ابن البطة أو الوزة !!
ودي كانت أول مرة آخد بالي أن ابن البطة أو الوزة أكيد هيكون كتكوت برضه :))
بس والله كنا أطفال أبرياء وبنصدق اللي بيتقال لنا :)) وإن ما لقناش حد يقول لنا على حاجة كنا بنتكفل بنفسنا بتفسيرها وننقل خبرتنا دي للأصغر مننا على أساس إننا كبار وفاهمين بقى :))
نهارك زي الفل بإذن الرحمن
:))
شرفتينا
Mona el Dawakhly
ردحذف:))
أه والله يا باشمهندسة ولا الترس ده والقواقع !!
المكرونة دي عذبت جيل بحاله :))
لأ أنا البرتقان كان فيه حاجتين بيحيروني فيه .. إزاي بيعرفوا يفرقوا بين البرتقان البلدي والسكري .. وليه سموا البرتقان أبو سرة بالإسم ده ؟؟
فيه حاجة كمان أكيد حضراتكم هتوافقوني عليها :
الفول السوداني .. لما بتجيبي فولاية وتقشريها وتقسميها أو تفتحيها نصين ؛ بيبقى فيه نص فيهم فيه ملك براس بني آدم ولابس طاقية أو طرطور أو زعبوط ولابس نص قميص بكرانيش كده .. كتير قوي كنت باقعد أفكر في الراجل ده اللي هو حارس الفول السوداني أو ملك الفول السوداني وباتخيل أنه ما صدق لقاني أنا علشان أنقذه هو وعشيرته من الأكل وكتير كنت باقعد أتخيل في قصص وإزاي وصل لي واستخبى مخصوص جوه قشرة رفيعة وقشرة تانية تخينة ومستنيني أنا اللي أنقذهم علشن يرجع ملك تاني ويعمل لي حفلة كبيرة في مكان جميل وسط حبات الفول السوداني اللي بتقعد تتنطط حواليا ويلبسوني عقد من اللب الأبيض :))
تقريباً لما كبرت عملت قصة عنه هو والسمسم اللي بيبقى لازق على صباع البقسماط بس مش فاكر فين !!
:))
نهارك زي افل بإذن الله
:))
شرفتينا
افكار مبعثرة
ردحذف:))
إيه ده استني ؟؟ حمداً لله ع السلامة الأول وعوداً حميداً يا أستاذة نورتي البلوجر من تاني :))
لأ هو فيه خروف ونعجة !!
على فكرة اللغة العربية ثرية جداً وكل حيوان ليه أسامي كتير جداً من وهو صغير وأسامي لصفاته والذكر بتاعة والأنثى بتاعته وأولادهم بس للأسف الواحد ما يعرفهاش !!
أه الطماطم تقريباً كنت أسمعهم بيقولوا كده للبنات .. بس أنا كنت باحب أغمسها في السكر وألغمط على نفسي :))
قصة الورق دي جديدة بصراحة ؛؛ أول مرة أسمعها من حضرتك !! هما يظهر أي حاجة كانوا بيخافوا إننا نبوظها او نجيب أجلها كانوا بيخترعوا لنا حاجة تخوفنا منها !! .. ناس زمان دي كان عليهم خيال عجيب والله :))
يعني أنا كنت باستغرب قوي من الدرج اللي تيتة الله يرحمها حطاه في صدرها وبتشيل فيه الفلوس وتطلع منه الفلوس واللبان والنعناع من غير ما تقع !! تقوليش حاطه مطبقية في صدرها !! فكنت باخاف أتشاقي أحسن تيجي في مرة تحطني في صدرها ما أطلعش :))
فكرتيني بموقف حصل من يومين في الحضانة عند ياسين ؛ شاف الدادة بتشيل الفلوس في صدرها فهي اتبرعت وقالت له : علشان البوبي ما يجيش ياخد القرش (الفلوس يعني) فالواد خاف ع الشبشب بتاعه وراح قلعه وحطهولها في قفاها ههههههههههههههههههههههه
نهارك زي الفل بإذن الله
:))
شرفتينا